Tokanga ki he Faleʻí, Tali ʻa e Akonakí
Vahe 16
Tokanga ki he Faleʻí, Tali ʻa e Akonakí
1. (a) ʻOku ʻi ai ha taha ʻo kitautolu ʻoku ʻikai fiemaʻu ki ai ʻa e faleʻí mo e akonakí? (e) Ka ko e hā ʻa e ongo fehuʻi ʻoku lelei ke tau fakakaukau atu ki aí?
KO E tokolahi taha ʻo kitautolu ʻoku loto-tatau ki he konga Tohitapu ʻoku pehē: “ʻOku lahi ʻa e meʻa ʻoku tau humu ai kotoa pe.” (Sēm. 3:2) ʻOku ʻikai faingataʻa ke fakakaukau atu ki he ngaahi tuʻunga ʻa ia kuo ʻikai te tau aʻu ai ʻo hoko ko e faʻahinga tokotaha ʻoku naʻinaʻi mai ʻe he Folofola ʻa e ʻOtuá ke tau hangē ko iá pea mo e faʻahinga tokotaha ʻoku tau saiʻia ke hoko ki aí. Ko ia ʻoku tau lāuʻilo ʻoku moʻoni ʻa e Tohitapú ʻi heʻene tala mai kiate kitautolu: “Tokanga ki ho faleʻi, pea tali akonaki: koeʻuhi ke ke poto ʻi ho ngaahi ʻaho ʻamui.” (Pal. 19:20) ʻOku tau ʻilo ʻoku fiemaʻu kiate kitautolu ʻa e tokoni pehē. ʻOku ʻikai ha toe veiveiua kuo tau fai ha ngaahi liliu ʻi heʻetau moʻuí ke fakahoatatau mo e meʻa ko ia kuo tau ako mei he Tohitapú. Ka ko e hā ʻa e meʻa ʻoku tau faí ʻo kapau ʻoku akonakiʻi kitautolu ʻe ha kaungā-Kalisitiane ʻo kau ki ha meʻa naʻa tau fai taʻefakapotopoto? Pea ʻe fēfē ʻo kapau ʻokú ne ʻomai pē ha fokotuʻu ki ha founga ke tau fakaʻau ʻo lelei ange ai ʻi ha faʻahinga ngāue?
2. (a) Ko e hā ʻoku totonu ai ke tau fakahā ʻa e houngaʻia ki he akonaki ʻoku ʻomai kiate kitá? (e) ʻOku totonu ke ʻoua ʻe fēfē ʻa e anga ʻo ʻetau tali ki aí?
2 Neongo ʻa e tomuʻa ongoʻi ʻi hotau lotó koeʻuhi ko hotau anga-fakaetangata taʻehaohaoá, ʻoku totonu ke tau fakahā loto-moʻoni ʻa e houngaʻia ki he akonakí pea feinga ke ngāueʻaki ia. ʻOku malava ke iku ʻo ʻaonga ʻa ʻetau fai peheé. (Hep. 12:11) Kaekehe, mahalo pē ko e taimi ʻoku fai mai ai ha akonaki, kuo tau feinga ke fakatonuhiaʻi kitautolu, ke fakasiʻisiʻi ʻa e mamafa ʻo e meʻa ʻoku hokó pe ke tukuakiʻi ha tokotaha kehe. Kuó ke fai pehē? ʻI heʻetau manatuʻi ʻa e meʻa naʻe hokó, ʻoku tau ongoʻi fisiʻia ki he tokotaha naʻá ne fai mai ʻa e akonakí? ʻOku tau hehema ke fakatokangaʻi ʻa e ngaahi tō nounou ʻa e tokotaha naʻá ne fai mai ʻa e akonaki kiate kitautolú pe ko e founga naʻá ne fai ai ʻa e akonakí, ʻo hangē ko e meʻa ia ke maʻu ai ha kalofanga ki heʻetau ngaahi vaivai ʻa kitautolú? ʻOku malava ʻe he Tohitapú ke ne tokoniʻi ha taha ke ikuʻi ʻa e ngaahi hehema peheé?
Ngaahi Faʻifaʻitakiʻanga Naʻe Hiki ko Hotau Akonekina
3. (a) Ko e hā ʻoku ʻi he Tohitapú ʻoku malava ke tokoni kiate kitautolu ke tau fakatupu ʻa e vakai totonu atu ki he faleʻí mo e akonakí? (e) Ngāueʻaki ʻa e ngaahi fehuʻi ʻi ʻolungá ke sivisiviʻi ʻa e anga ʻo e tali ʻa Saula mo ʻŪsaia ki he akonakí.
3 ʻI he tānaki atu ki hono tokonaki mai ke hulu ʻa e ngaahi akonaki fakahangatonu ʻo fekauʻaki mo e meʻá ni, ʻoku ʻi he Folofola ʻa e ʻOtuá ʻa e ngaahi meʻa naʻe hokosia tonu ʻi he moʻuí ʻo fekauʻaki mo e faʻahinga naʻe akonakiʻi. Naʻe faʻa toe hoko foki ʻa e faleʻí ko e akonaki, he ko e tokotaha naʻe fai ki ai iá naʻe fiemaʻu ke ne liliu ʻa e anga ʻo ʻene fakakaukaú pe ko hono ʻulungaangá. ʻI hoʻo ngāueʻaki ʻa e ngaahi fehuʻi ʻi laló ke vakaiʻi ʻa e niʻihi ʻo e ngaahi meʻá ni, te ke toki ʻilo ʻoku ʻi ai ʻa e ʻaonga lahi ai kiate kitautolu kotoa:
KO SAULA, FOHA ʻO KISI: Naʻe ʻikai te ne talangofua kakato kia Sihova ʻi heʻene faitau ki ʻAmalekí, he naʻe ʻikai te ne tāmateʻi ʻa e tuʻí pea mo ʻenau fanga manu lelei tahá. (1 Sām. 15:1-11)
ʻI he anga ʻo e tali ʻa Saula ki he akonaki valoki naʻe fai ange ʻe Sāmiuelá, ko e hā ʻokú ne fakahā naʻá ne feinga ke fakasiʻisiʻi ʻa e faihalá? (1 Sām. 15 veesi 20) Ko hai naʻá ne feinga ke tukuakiʻí? (1 Sām. 15 veesi 21) ʻI heʻene toki tala ko e moʻoni kuó ne faihalá, ko e hā ʻa e kalofanga naʻá ne faí? ( 1 Sām. 15 veesi 24) Ko e hā ʻa e meʻa naʻe hā ngalingali naʻá ne tokanga lahi taha ki ai ʻo aʻu mai ki he tuʻunga ko ení? (1 Sām. 15 veesi 25, 30)
KO ʻŪSAIA: Naʻá ne ʻalu ki he temipale ʻo Sihová ke tutu ʻinisēnisi, neongo ko e kau taulaʻeikí pē naʻe fakamafaiʻi ke nau fai iá. (2 Kal. 26:16-20)
ʻI he feinga ʻa e taulaʻeiki lahí ke taʻofi ʻa Tuʻi ʻŪsaiá, ko e hā naʻe ʻita ai ʻa e tuʻí? (Fehoanaki mo e 2Ka 26 veesi 16.) Ko e hā ʻa e meʻa naʻe iku ki aí? (2Ka 26 veesi 19-21)
4. (a) Ko e hā naʻe faingataʻa ai kia Saula mo ʻŪsaia ke na tali ʻa e akonakí? (e) Ko e hā ko ha toe palopalema mafatukituki ai ia he ʻaho ní?
4 ʻI he meʻá ni ʻe ua, ko e hā naʻe faingataʻa fau ai ki he ongo meʻá ni taki taha ke na tali ʻa e fiemaʻu kiate kinaua ʻa e akonakí? Ko e palopalema tefitó ko e loto-mahikihiki, ʻo fakakaukau fuʻu lahi pē kiate kitá. ʻOku tokolahi ʻa e faʻahinga he ʻahó ni ʻoku nau ʻomai ʻa e loto-mamahi lahi kiate kinautolu koeʻuhi ko e ʻulungaanga ko ení. ʻI heʻenau aʻusia ʻa e meʻa ʻoku nau fakakaukau atu ko ha tuʻungá, tatau ai pē pe koeʻuhi nai ko e taʻumotuʻá pe ko e tuʻunga ʻoku nau ʻi aí, ʻoku ʻikai te nau ʻatamai-fiefanongo ki he akonakí. ʻOku nau fakakaukau nai ʻoku hanga ʻe he akonakí ʻo fakahā ha tō nounou ʻiate kinautolu pe fakameleʻi honau ongoongó. Ka ko e meʻa ʻokú ne fakahā moʻoni ʻa e vaivaí ko e loto-mahikihikí. ʻOku ʻikai totonu ke hoko hono failahia ʻo e loto-mahikihikí ke te kumi kalofanga ki ai. Ko e tauhele ia ʻoku ngāueʻaki ʻe Sētane ke ne uesia ʻa e fakakaukau ʻa ha taha ʻo ne talitekeʻi ʻa e tokoni anga-ʻofa ʻoku tokonaki ʻe Sihova ʻo fakafou mai ʻi heʻene Folofolá pea mo ʻene kautaha hā maí. ʻOku fakatokanga mai ʻa Sihova: “Ko e fieʻeiki ko e fakamelomelo ʻo e haveʻi: pea ko e angahiki ko e fakamelomelo ʻo e hinga.”—Pal. 16:18; sio foki kia Loma 12:3; Palōvepi 16:5.
5. Ngāueʻaki ʻa e ngaahi fehuʻi ʻa ia ʻoku fakakau ki he palakalafí ni ke ʻilo ʻa e ngaahi meʻa ʻoku malava ke ako mei he ngaahi fakamatala ʻo kau kia Mōsese mo Tēvitá.
5 ʻI he tafaʻaki ʻe tahá, ʻoku ʻi he Tohitapú ʻa e ngaahi faʻifaʻitakiʻanga lelei ʻo e faʻahinga naʻa nau tali ʻa e akonakí. ʻOku malava ke tau ako foki mei ai ha ngaahi meʻa mātuʻaki mahuʻinga. Fakakaukau ange:
KO MŌSESE: Naʻe ʻoange ʻe heʻene tamai-ʻi-he-fonó kiate ia ha faleʻi fakapotopoto ki he anga hono fai ʻo e ngāue mamafa naʻe ʻiate iá ʻo ʻoua ʻe hoko ai ha maumau ki heʻene moʻui fakasinó. Naʻe fanongo ki ai ʻa Mōsese pea naʻá ne ngāueʻaki leva ia. (ʻEki. 18:13-24)
Neongo naʻe maʻu ʻe Mōsese ha mafai lahi, ko e hā naʻá ne mātuʻaki ʻatamai-fiefanongo ai ki he akonaki leleí? (Fehoanaki mo Nōmipa 12:3.) Ko e hā hono mahuʻinga ʻo e ʻulungaanga ko iá kiate kitautolu? (Sēf. 2:3)
KO TĒVITA: Naʻá ne halaia ʻi heʻene fai ʻa e tono, pea naʻá ne faʻufaʻu leva ke tāmateʻi ʻa e husepāniti ʻo e fefiné koeʻuhi kae malava ke mali ia mo e fefiné pea fūfuuʻi ai ʻa e tonó. Naʻe ʻosi atu ʻa e ngaahi māhina ki muʻa pea fekauʻi ʻe Sihova ʻa Nētane ke ne valokiʻi ʻa Tēvitá. (2 Sām. 11:2–12:12)
Naʻe ʻita ʻa Tēvita ʻi hono valokiʻi iá, ʻo fakasiʻisiʻi ʻa e hala naʻe faí pe feinga ke tukuakiʻi ha tokotaha kehe? (2 Sām. 12:13; Sā 51:tohi fakamatala mata iiki ʻi ʻolunga pea mo e Sā 51 veesi 1-3) Naʻe ʻuhinga nai ʻa hono tali ʻe he ʻOtuá ʻa e fakatomala ʻa Tēvitá ke pehē ai naʻe ʻatā ʻa Tēvita pea mo hono falé mei he ngaahi nunuʻa kovi ʻo e faihala naʻá ne faí? (2 Sām. 12:10, 11, 14; ʻEki. 34:6, 7)
6. (a) Ko e hā ʻa e ongoʻi ʻa Tēvita ʻo kau ki he faʻahinga naʻa nau fai ange kiate ia ʻa e akonaki leleí? (e) Ko e hā ʻa e ʻaonga kiate kitautolu ʻo kapau ʻoku tau tali loto-lelei ʻa e akonaki peheé? (f) Ko e hā ʻoku totonu ke ʻoua ʻe ngalo ʻiate kitautolu ʻo kapau ʻoku akonakiʻi fefeka kitautolu?
6 Naʻe ʻilo lelei ʻe Tuʻi Tēvita ʻa e ʻaonga ʻo e tokanga ki he akonaki leleí, pea naʻá ne fakamālō ai ki he ʻOtuá koeʻuhi ko e tokotaha ko ia naʻe fakafou mai ai ʻa e akonakí. (1 Sām. 25:32-35; sio foki kia Palōvepi 9:8.) ʻOku tau pehē? Kapau ʻoku pehē, ʻe maluʻi ai kitautolu mei he leaʻaki pea mo hono fai ʻa e ngaahi meʻa lahi ʻoku malava ke nau fakatupunga ʻa e ongoʻi fakaʻiseʻisá. Ka ʻo kapau te tau aʻu ki ha ngaahi tuʻunga ʻo iku ai ki hano akonakiʻi fefeka kitautolu, ʻo hangē ko ia naʻe hoko kia Tēvita koeʻuhi ko ʻene angahala mo Patisepá, ʻofa pē ke ʻoua ʻe ngalo ʻiate kitautolu ko e akonakí ko ha fakamoʻoni ia ʻo e ʻofa ʻa Sihová, koeʻuhi ko e lelei taʻengata maʻatautolu.—Pal. 3:11, 12; 4:13.
Ngaahi ʻUlungaanga Taʻefakatataua ke Tau Fakatupulekina
7. Ko e hā ʻa e ʻulungaanga naʻe fakahāhā ʻe Sīsū kuo pau ke maʻu ʻe he kakaí kae lava ke nau hū ki he Puleʻangá?
7 ʻOku fiemaʻu kiate kitautolu ke fakatupu ʻa e ngaahi ʻulungaanga fakafoʻituitui pau kae maʻu ha vahaʻangatae lelei mo Sihova pea mo hotau ngaahi tokoua Kalisitiané. Naʻe fakaeʻa ʻe Sīsū ʻa e taha ʻo e ngaahi ʻulungaangá ni ʻi heʻene fokotuʻu hake ha kiʻi tamasiʻi ʻi he lotolotonga ʻo ʻene kau ākongá peá ne pehē: “Kapau ʻe ʻikai te mou liliu, ʻo hoko ʻo hange ko e tamaiki, ʻe ʻikai ʻaupito te mou hu ki he Puleʻanga ʻo Hevani. Ko ia ʻilonga ʻa ia te ne fakavaivaiʻi ia ʻo hange ko e tamasiʻi ko eni, ko ia ia ʻoku lahi ʻi he Puleʻanga ʻo Hevani.” (Mt. 18:3, 4) Naʻe fiemaʻu ki he kau ākonga ko iá ke nau fai ha ngaahi liliu. Naʻe pau ke nau tuku ange ʻa e loto-mahikihikí pea ke nau fakatupulekina ʻa e anga-fakatōkilalo.
8. (a) ʻOku fiemaʻu ke tau anga-fakatōkilalo kia hai, pea ko e hā hono ʻuhingá? (e) Kapau ʻoku tau pehē, ʻe fēfē ʻa e anga ʻo ʻetau tali ki he akonakí?
8 Naʻe tohi ʻe he ʻapositolo ko Pitá ki mui ki hono kaungā-Kalisitiane: “Ke fefakavaivaiaki akimoutolu kotoabe kiate kimoutolu, bea kofu aki ae agavaivai: he oku tekeʻi e he Otua ae fielahi, ka oku ne foaki ae aloofa ki he agavaivai.” (1 Pita 5:5, PM) ʻOku tau ʻilo ʻoku fiemaʻu kiate kitautolu ke tau anga-fakatōkilalo ʻi he ʻao ʻo e ʻOtuá, ka ʻoku pehē ʻe he konga Tohitapú ni ʻoku toe fiemaʻu foki ke tau anga-fakatōkilalo, pe anga-vaivai ʻi he fakakaukau, ʻi heʻetau feangai mo hotau kaungātuí. Kapau ʻoku tau pehē, ʻe ʻikai te tau vale ʻo ongoʻi fisiʻia ʻi he ngaahi fokotuʻu ʻoku nau fokotuʻu mai naí. Te tau loto-lelei leva ke feakoʻaki. (Pal. 12:15) Pea kapau ʻoku fiemaʻu ki hotau ngaahi tokouá ke nau fai mai ha akonaki fakatonutonu kiate kitautolu, pea ʻi heʻetau ʻiloʻi ʻoku anga-ʻofa ʻa Sihova ʻo ngāueʻaki ʻa e foungá ni ki hono fakafuo ʻo kitautolú, ʻe ʻikai te tau fakataleʻi ia.—Sāme 141:5.
9. (a) Ko e hā ʻa e ʻulungaanga mahuʻinga ʻoku fekauʻaki vāofi mo e anga-fakatōkilaló? (e) Ko e hā ʻoku totonu ai ke tau tokanga ʻo fekauʻaki mo e kaunga ʻo hotau ʻulungaangá ki he niʻihi kehé?
9 Ko e toe ʻulungaanga ʻe taha, ʻa ia ʻoku fekauʻaki vāofi pea mo e anga-fakatōkilaló, ko e tokanga moʻoni ki he lelei ki he niʻihi kehé. ʻOku ʻikai malava ke tau kalofi ʻa e moʻoniʻi meʻa ko ia ko e meʻa ʻoku tau faí ʻoku ʻi ai hono kaunga ki he kakai kehé. Naʻe faleʻi ʻe he ʻapositolo ko Paulá ʻa e muʻaki kau Kalisitiane ʻi Kolinitō mo Lomá ke nau tokanga ʻo fekauʻaki mo e konisēnisi ʻo e niʻihi kehé. Naʻe ʻikai te ne pehē kuo pau ke nau tuku ki he tafaʻakí ʻa e ngaahi manako fakaekita kotoa pē, ka naʻá ne naʻinaʻi kiate kinautolu ke ʻoua te nau fai ha faʻahinga meʻa te ne fakalotolahiʻi nai ha tokotaha kehe ke ne fai ʻa e meʻa naʻe tala ange ʻe hono konisēnisí ʻoku halá, ʻa ia ʻe iku ʻo maumau ai hono tuʻunga fakalaumālié. ʻI hono fakahā mahino ʻa e tefitoʻi moʻoní fakalūkufua, naʻe tohi ʻe Paula: “Ke ʻoua naʻa kumi ʻe ha taha ʻene lelei aʻana, ka ko e lelei ʻa e taha. . . . Ko ia, pe ko hoʻomou kai, pe ko hoʻomou inu, pe ko hoʻomou fai ha meʻa, mou fai kotoa pe ke ongoongolelei ai ʻa e ʻOtua. Ke taʻemelengatāmaki hoʻomou toʻonga ki he Siu mo e Kalisi fakatouʻosi, pea ki he siasi foki ʻa e ʻOtua.”—1 Kol.1Ko 10:24-33; 8:4-13; Loma 14:13-23.
10. Ko e hā te ne fakahaaʻi nai pe ʻoku tau angaʻaki ʻa e fai ki he akonaki faka-Tohitapu ko ení?
10 Ko ha tokotaha koe ʻokú ke angaʻaki ke fakamuʻomuʻa ʻa e lelei ki he kakai kehé ʻi he manako fakaekitá? ʻOku lahi ʻa e ngaahi founga ʻoku malava ke fai ai ení, kae fakakaukau ange ki ha fakatātā: ʻI he taimi lahi, ko e valá mo e teuteú ko e ngaahi meʻa pē ʻoku fekauʻaki mo ʻete saiʻia fakaekitá, kehe pē ke fakanānā mo maau mo maʻa hono ʻaí. Ka te ke fai ha ngaahi liliu ʻo kapau te ke ʻilo, koeʻuhi ko e ʻātakai ʻo e kakai ʻi he feituʻu ʻokú ke nofo aí, ʻoku taʻofi ʻe he anga ʻo ho valá pe ko hoʻo teuteú ʻa e niʻihi kehé mei heʻenau fanongo ki he pōpoaki ʻo e Puleʻangá? ʻOku mahuʻinga ange kiate koe ʻa e moʻui ʻa e tokotaha kehé ʻi he fakafiemālieʻi pē kita?
11. Ko e hā ʻokú ne fakahaaʻi ʻoku mahuʻinga ke tau fakatupu ʻa e ngaahi ʻulungaangá ni ʻo kapau ʻoku tau fie hoko moʻoni ko e kau Kalisitiane?
11 ʻI he hoko ʻa e ngaahi ʻulungaanga ʻoku lave ki ai ʻi ʻolungá ko ha konga ʻo hotau angaʻitangatá, ʻoku fakamoʻoniʻi ai ʻoku kamata ke tau maʻu ʻa e anga ʻo e fakakaukau tatau mo Kalaisi. Naʻe fokotuʻu ʻe Sīsū ʻa e faʻifaʻitakiʻanga haohaoa ʻi he anga-fakatōkilaló. (Sione 13:12-15; Fili. 2:5-8) Naʻá ne fokotuʻu ʻa e sīpinga kiate kitautolu ke tau muimui ki ai ʻi hono fakahāhā ʻa e tokanga ʻo fekauʻaki mo e niʻihi kehé, kae ʻikai ʻi hono fakafiemālieʻi ʻe ia ia pē.—Loma 15:2, 3.
ʻOua ʻe Talitekeʻi ʻa e Akonaki ʻa Sihová
12. (a) Ko e hā ʻa e ngaahi liliu ʻoku pau kiate kitautolu kotoa ke tau fai kae lava ke tau maʻu ʻa e angaʻitangata ko ia ʻoku fakahōifua ki he ʻOtuá? (e) Ko e hā te ne tokoniʻi kitautolú?
12 Koeʻuhi ko kitautolu kotoa pē ko e kau angahala, ʻoku fiemaʻu ʻa e ngaahi liliu ʻi heʻetau fakakaukaú, ʻi heʻetau leá pea mo hotau ʻulungaangá koeʻuhi ka tau fakahā atu ʻa e ʻulungaanga ʻo hotau ʻOtuá. ʻOku pau ke tau ʻai ʻa e “tangata foʻou.” (Kol. 3:5-14; Tai. 2:11-14) ʻOku tokoniʻi kitautolu ʻe he faleʻí mo e akonakí ke tau ʻiloʻi fakapapau ʻa e ngaahi tafaʻaki ʻoku fiemaʻu ki ai ha ngaahi liliú pea ke tau ʻilo ʻa e founga ʻo hono fai iá.
13. (a) Ko e hā ʻa e founga kuo tokonaki mai ai ʻe Sihova ʻa e faleʻí mo e akonakí kiate kitautolu kotoa pē? (e) Ko e hā ʻoku totonu ke tau fai ʻaki iá?
13 Ko e maʻuʻanga tefito ʻo e fakahinohino ko iá ko e Tohitapú tonu. (2 Tīm. 3:16, 17) Pea ʻi hono fakafou mai ʻi he ngaahi tohi faka-Tohitapú pea mo e ngaahi fakataha ʻoku tokonaki mai ʻe he kautaha hā mai ʻa Sihová ʻokú ne tokoniʻi ai kitautolu ke tau ʻilo ki he founga ʻo hono fai iá. Te tau anga-fakatōkilalo ʻo tali ʻa hono fiemaʻu fakafoʻituitui kiate kitautolu ʻa e fakahinohino ko iá—neongo kuo tau ʻosi fanongo ki ai ki muʻa—pea feinga maʻu pē ke fai ha fakaleleiʻi?
14. Ko e hā ʻa e toe tokoni ʻoku tokonaki mai ʻe Sihova maʻatautolu taautaha?
14 ʻOku ʻikai ke tuku mai ʻe Sihova ke tau fāinga toko taha pē mo e ngaahi meʻa ʻoku hoko ko ha palopalema makehe nai kiate kitautolu. ʻI heʻene tokanga anga-ʻofá, ʻokú ne tokonaki mai ha tokoni kiate kita. Kuo maʻu ʻe he laui miliona ʻa e ʻaonga mei he tokoni pehē ʻo fakafou mai ʻi he ngaahi ako Tohitapu ʻi ʻapi. ʻOku maʻu ʻe he ngaahi mātuʻá ha fatongia makehe ke akonakiʻi ʻenau fānaú koeʻuhi ke maluʻi kinautolu mei he ʻulungaanga ʻoku malava ke ne fakatupunga ha loto-mamahi lahi ʻamui ʻi he moʻuí. (Pal. 6:20-35; 15:5) ʻI loto foki ʻi he fakatahaʻangá, kuo fakafatongiaʻaki ʻa e faʻahinga ko ia kuo nau maʻu ʻa e tuʻunga poto taau fakalaumālié ke ngāueʻaki ʻa e Tohitapú ke toe fakatonutonu ʻa e niʻihi kehé ʻi he taimi ʻoku nau ʻilo ʻoku fiemaʻu ke fai ai iá, ka ke fai ia ʻi he anga-malū. (Kal. 6:1, 2) ʻI he ngaahi foungá ni ʻoku faleʻi mo akonakiʻi ai kitautolu ʻe Sihova koeʻuhi ke tau lotu ange kiate ia ʻi he tuʻunga ko ha kakai fāʻūtaha.
Fetalanoaʻaki ʻo Fakamanatu
● ʻI he founga fē ʻoku tokoni anga-ʻofa mai ai ʻa Sihova ke tau ʻilo ʻa e tafaʻaki ʻoku fiemaʻu kiate kitautolu ke fai ha ngaahi liliu?
● Ko e hā ʻoku faingataʻa ai ki he tokolahi ke nau tali ʻa e akonakí? ʻOku mafatukituki fēfē eni?
● Ko e hā ʻa e ngaahi ʻulungaanga taʻefakatataua ʻe tokoni kiate kitautolu ke tau ʻatamai-fiefanongo ai ki he akonakí? ʻI he founga fē naʻe fokotuʻu ai ʻe Sīsū ʻa e faʻifaʻitakiʻanga ʻi he ngaahi meʻá ni?
[Fehuʻi ki he Ako]
