Ko Fē ʻOku Huʻu ki Ai ʻa e Māmani ko Ení?

Kuo hoko ʻa e ngaahi palopalema mafatukitukí mo e ngaahi meʻa fakamanavahē ʻoku hokó ko e ongoongo fakaʻaho takatakai ia ʻi he māmaní! ʻOku ʻuhinga iá ki he hā?

MALUʻANGA FAKAFOʻITUITUI: ʻOku fakapaaki ʻa e ngaahi pomu ʻi he ngaahi feituʻu faiʻanga fakataú. Fanaʻi ʻa e kau faiako mo e fānau ako ʻi he akoʻangá. Puke fakamālohi ʻa e fānau valevalé ʻi he hanga kehe ʻa e ngaahi mātuʻá. Kaihaʻasia ʻa e kakai fefine mo e kakai tangata taʻumotuʻá ʻi he taimi ʻahó.

KO E TUʻUNGA FAKALOTÚ: ʻOku poupouʻi ʻe he ngaahi lotú ʻa e ngaahi fakafaʻafaʻahi ʻi he taú. Tukuakiʻi ʻa e haʻa faifekaú ki he fakaʻauha fakafaʻahingá. Ngāueʻaki fakaefehokotaki fakasino ʻe he kau pātelé ʻa e toʻutupú; fūfuuʻi ia ʻe he siasí. Hōloa ʻa e maʻu lotú; tuʻuaki fakatau atu ʻa e ngaahi fale lotú.

KO E ʻĀTAKAÍ: ʻOku fakaʻataʻatā ʻa e ngaahi vaotaá ki he ngaahi pisinisi fakakomēsialé. Tā e ʻuluʻakaú ʻe he masivá ʻi he kumi fefié. ʻUliʻi ʻa e vaitupú, ʻo ʻikai lelei ke inu. Maumauʻi ʻa e toutaí ʻe he ʻuli mei he ngaahi fale ngāué mo e ngaahi founga fakaeonopooni ʻe niʻihi. Fakatupunga mānava tamaki ʻa hono ʻuliʻi lahi ʻo e ʻeá.

 MEʻA ʻOKU MAʻU KI HE NOFÓ: Ko e paʻanga hū mai ki he toko tahá ʻi he fakatonga ʻo e Sahala ʻi ʻAfiliká ʻoku līpooti ʻo fakafuofua ki he $480 (U.S.) ki he taʻu. Ko e mānumanu ʻa e kau pule ʻo e ngaahi kautahá ʻoku iku ia ki he movete ʻa e pisinisí, ʻo taʻemaʻungāue ai ʻa e laui afe. Fakatupunga ʻe he kākaá ke mole ai ʻa e paʻanga kotoa ʻa e kau fakahū paʻangá.

NGAAHI NOUNOU FAKAMEʻATOKONÍ: ʻOku fakafuofua ko e kakai ʻe toko 800,000,000 ʻi māmani lahi ʻoku nau mohe fiekaia maʻu pē.

TAÚ: Laka hake he kakai ʻe toko 100,000,000 kuo mole ʻenau moʻuí tupu mei he tau ʻi he senituli hono 20. Maʻu ʻa e ngaahi meʻatau fakaniukilia feʻunga ke fakaʻauha tā tuʻo lahi ʻaki ʻa e faʻahinga kotoa ʻo e tangatá. Ngaahi tau fakalotofonua. Fakalalahi atu ʻa e tautoitoí ke ne uesia ʻa e foʻi kolopé kotoa.

MAHAKI FAKAʻAUHÁ MO E MAHAKI KEHE: Kamata ʻi he 1918, naʻe tāmateʻi ai ʻe he fulū faka-Sipeiní ʻa e kakai ʻe toko 21,000,000. Kuo hoko ʻa e ʻeitisí he taimí ni “ko e mahaki fakaʻauha mafolalahia taha ia ʻi he hisitōlia ʻo e tangatá.” ʻOku ʻomai ʻe he kanisaá mo e mahaki mafú ʻa e mamahi ki māmani lahi.

Sio fakalaka atu ʻi he ngaahi ongoongo tāutahá. Ko e ngaahi meʻa māvahevahe kinautolu? Pe ko e konga kinautolu ʻo ha sīpinga fakaemāmani lahi ʻa ia ʻoku ʻi ai hono ʻuhinga moʻoni?

 [Puha/Fakatātā ʻi he peesi 5]

ʻOku Tokanga Moʻoni Mai ʻa e ʻOtuá?

Ko e faingataʻaʻia ʻi he ngaahi meʻa fakamanavahē ʻoku hokó pe ʻi he mole fakamamahi ʻa ha tahá, ʻoku fifili ai ʻa e kakai tokolahi pe ko e hā ʻoku ʻikai ke kau mai ai ʻa e ʻOtuá ke taʻofi ʻa e ngaahi meʻa peheé.

ʻOku tokanga mai ʻa e ʻOtuá. ʻOkú ne tokonaki mai ʻa e tataki lelei mo e fakafiemālie moʻoni he taimí ni. (Mātiu 11:28-​30; 2 Timote 3:16, 17) Kuó ne fakatoka ʻa e makatuʻunga ki hono fakangata ʻosi ʻa e fakamālohí, puké pea mo e maté. Ko ʻene ngaahi tokonakí ʻoku fakahaaʻi ai ʻokú ne tokanga mai, ʻo ʻikai ki ha kakai ʻo e puleʻanga pē taha ka ki he kakai ʻo e ngaahi puleʻanga, matakali mo e lea kotoa pē.​—Ngāue 10:34, 35.

Ko e hā e lahi ʻo ʻetau tokangá? ʻOkú ke ʻiloʻi ʻa e Tokotaha-Fakatupu ʻo hēvani mo māmaní? Ko hai hono huafá? Ko e hā ʻene taumuʻá? ʻOkú ne tali mai ʻa e ngaahi fehuʻi ko ení ʻi he Tohi Tapú. ʻOkú ne tala mai ai kia kitautolu ʻa e ngaahi sitepu ʻokú ne fou ai ke fakangata ʻa e fakamālohí pea pehē foki ki he puké pea mo e maté. Ke tau maʻu ʻaonga, ko e hā ʻoku fiemaʻu mei heʻetau tafaʻakí? ʻOku fiemaʻu ke tau ako fekauʻaki mo ia pea mo ʻene taumuʻá. ʻE lava fēfē ke tau ʻamanekina ke maʻu ʻaonga mei heʻene ngaahi tokonakí kae ʻikai ke tau fakahāhā ʻa e tui kiate iá? (Sione 3:16; Hepelu 11:6) ʻOku toe fiemaʻu ke talangofua ki heʻene ngaahi fiemaʻú. (1 Sione 5:3) ʻOkú ke tokanga feʻunga ke fai ia?

Ke mahinoʻi ʻa e ʻuhinga ʻoku fakaʻatā ai ʻe he ʻOtuá ʻa e ngaahi tuʻunga lolotongá, kuo pau ke tau mahinoʻi ha ʻīsiu mātuʻaki mahuʻinga. ʻOku fakamatalaʻi ia ʻe he Tohi Tapú. ʻI he peesi 15 ʻo e tohí ni, ʻoku fakahaaʻi ai ʻa e ʻīsiu ko ení.