Vahe 1

ʻE Lava ke Ke Maʻu ha Kahaʻu Fiefia!

1, 2. Ko e hā ʻoku finangalo ʻa ho Tokotaha-Fakatupú ke ke maʻú?

 KO HA fāʻofua māfana mei ha taha ʻokú ke ʻofa ai. Ko ha kata loto-māfana he lolotonga ʻo ha taimi kai lelei mo ha ngaahi kaungāmeʻa ʻofeina. Ko e fiefia loto ʻi he mamata ki hoʻo fānaú ʻoku nau fiefia ʻi he vaʻingá. Ko e ngaahi mōmeniti pehē ni ʻi he moʻuí ko e ngaahi tafaʻaki fisifisimuʻa ia. Kae kehe, ki he tokolahi, ʻoku hangē ʻoku fakahoko mai ʻe he moʻuí ia ha palopalema mamafa ʻi he taimi ki he taimi. Kapau ko ia kuó ke hokosiá, loto-toʻa pē.

² Ko e finangalo ia ʻo e ʻOtuá ke ke maʻu ʻa e fiefia tuʻuloa ʻi he ngaahi tuʻunga lelei tahá ʻi he ngaahi ʻātakai fakaofo. ʻOku ʻikai ko ha misi pē ʻeni, he kuo tuku atu ʻe he ʻOtuá kiate koe ʻa e kī ki ha kahaʻu fiefia pehē. Ko e kī ko iá ko e ʻilo.

3. Ko e hā ʻa e ʻilo ko e kī ia ki he fiefiá, pea ko e hā ʻoku tau ʻilo pau ai ʻe lava ke tokonaki mai ʻe he ʻOtuá ʻa e ʻilo ko iá?

³ ʻOku tau talanoa ʻo fekauʻaki mo ha faʻahinga ʻilo makehe ʻoku lahi mamaʻo ange ia ʻi he poto fakaetangatá. ʻA ia ko e “ʻiloʻi ʻo e ʻOtua.” (Palōvepi 2:5) Ki muʻa ʻi he meimei taʻu ʻe 2,000 kuo maliu atú, naʻe pehē ai ʻe ha tokotaha-tohi Tohitapu: “ʻIlonga ha ʻapi, kuo pau naʻe langa ʻe ha taha; pea ko ia naʻa ne langa ʻa e meʻa kotoa pe ko e ʻOtua.” (Hepelū 3:4) Fakakaukau atu ki he ʻilo kuo pau ʻoku maʻu ʻe he Tokotaha-Faʻu ʻo e meʻa kotoa pē! ʻOku pehē ʻe he Tohitapú ʻoku lau mo fakahingoa ʻe he ʻOtuá ʻa e foʻi fetuʻu kotoa pē. Ko ha fakakaukau fakapuputuʻu-loto ē, koeʻuhi ʻoku laui teau piliona ʻa e ngaahi fetuʻu ʻoku ʻi hotau kaniva ʻotautolú pē, pea ʻoku pehē ʻe he kau ʻasitalōnomá ʻoku ʻi ai nai mo e ngaahi kaniva ʻe teau piliona kehe! (Sāme 147:4) ʻOku toe ʻafioʻi ʻe he ʻOtuá ʻa e meʻa kotoa pē ʻoku fekauʻaki mo kitautolú, ko ia ai ko hai ha toe taha ʻe lava  ke ne tokonaki mai ʻa e ngaahi tali lelei ange ki he ngaahi fehuʻi mahuʻinga ʻi he moʻuí?​—Mātiu 10:30.

4. Ko e hā ʻoku totonu ai ke tau ʻamanekina ʻe tokonaki mai ʻe he ʻOtuá ʻa e ngaahi fakahinohino ke tatakiʻaki kitautolú, pea ko e hā ʻa e tohi ʻokú ne fakalato ʻa e fiemaʻú ni?

⁴ Fakaʻuta atu ki ha ongo tangata ʻokú na feinga ke na taki taha ngaahi ʻena meʻalelé. ʻI he ongoʻi feifeitamakí, ʻoku lī ʻe he tangata ia ʻe tahá ʻene meʻangāué. ʻOku fakatonutonu anga-mokomoko ʻe he tangata ia ko ē ʻa e palopalemá, fakamoʻui ʻa e mīsiní, peá ne malimali ʻi he moʻui ʻa e meʻalelé pea lele leleí. ʻE ʻikai ke faingataʻa kiate koe ke ke mateʻi mai pe ko e fē ʻi he ongo tangatá ni naʻá ne maʻu ha tohi fakahinohino mei he tokotaha-faʻú. ʻIkai ʻoku ʻuhinga lelei ʻe tokonaki mai ʻe he ʻOtuá ha ngaahi fakahinohino ke tatakiʻaki kitautolu ʻi he moʻuí? Hangē ko ia ʻokú ke ʻilo nai ki aí, ʻoku taukaveʻi ʻe he Tohitapú ko ia pē​—ko ha tohi ʻo e fakahinohino mo e tataki mei hotau Tokotaha-Fakatupú, kuo faʻufaʻu ke ne taufetuku mai ʻa e ʻiloʻi ʻo e ʻOtuá.​—2 Tīmote 3:16.

5. ʻOku mahuʻinga fēfē ʻa e ʻilo ʻoku ʻi he Tohitapú?

⁵ Kapau ʻoku moʻoni ʻa e taukaveʻi ko ia ʻoku fai ʻe he Tohitapú, fakakaukau atu ki he ngaahi koloa ʻo e ʻiló kuo pau ke maʻu ʻi he tohi ko iá! ʻI he Palōvepi 2:​1-5, ʻoku enginaki mai ai kiate kitautolu ke tau kumi ki he potó, ke tau keli ki ai ʻo hangē ko haʻatau fai ki ha koloa fufū​—ʻo ʻikai ʻi he kelekele ko e fakakaukau fakaetangatá, ka ʻi he Folofola ʻa e ʻOtuá tonu. Kapau te tau kumi ʻi ai, te tau “maʻu ʻa e ʻiloʻi ʻo e ʻOtua.” Koeʻuhi ʻoku mahino ki he ʻOtuá ʻa hotau ngaahi ngataʻangá mo ʻetau ngaahi fiemaʻu paú, ʻokú ne foaki mai ʻa e fakahinohino ʻe tokoni kiate kitautolu ke tau aʻu ai ki ha moʻui melino mo fiefia. (Sāme 103:14; ʻAisea 48:17) Tānaki atu ki ai, ʻoku fakahoko mai ʻe he ʻiloʻi ʻo e ʻOtuá ha ongoongo lelei fakalotofiefia kiate kitautolu.

MOʻUI TAʻENGATA!

6. Ko e hā ʻa e fakapapau naʻe fai ʻe Sīsū Kalaisi ʻo fekauʻaki mo e ʻiloʻi ʻo e ʻOtuá?

⁶ Naʻe fakamatalaʻi mahino ʻa e tafaʻaki ko ʻeni ʻo e ʻiloʻi ʻo e ʻOtuá ʻe he tokotaha ʻiloa ʻi he hisitōliá ko Sīsū Kalaisi. Naʻá ne pehē: “Pea ko eni ia ʻa e moʻui taʻengata, ke nau fai ke ʻilo koe ko e Otua moʻonia pe taha, pea mo Sisu ne ke fekau mai  ko e Misaia.” (Sione 17:3, fakaʻītali ʻamautolu.) Fakaʻuta atu​—ko e ʻilo ʻoku taki atu ki he moʻui taʻengatá!

7. Ko e hā ʻa e fakamoʻoni naʻe ʻikai ke taumuʻa ʻa e ʻOtuá ke tau mate?

⁷ ʻOua ʻe fakavave pē ke tukunoaʻi ʻa e moʻui taʻengatá ʻo pehē ko ha misi pē. Ka, ke sio hifo ki he founga naʻe ngaohi ai ʻa e sino ʻo e tangatá. ʻOku fisifisimuʻa hono faʻu ia ke ne maʻu ʻa e ifoʻia, fanongo, nāmuʻi, sio, mo e ongoʻi. ʻOku lahi ʻaupito ʻa e ngaahi meʻa ʻi he māmaní ʻoku nau fakafiefiaʻi ʻa hotau ngaahi ongoʻangá​—meʻakai ifo, hiva mālie ʻa e manupuná, ngaahi matalaʻiʻakau namu-kakala, fōtunga fakaʻofoʻofa ʻa e funga fonuá, takanga fiefia! Pea ko hotau foʻi ʻuto fakaofó ʻoku laka mamaʻo ange ia ʻi ha fuʻu komipiuta kāfakafa, he ʻokú ne fakaivia kitautolu ke tau houngaʻia mo fiefia ʻi he ngaahi meʻa peheé kotoa. ʻOkú ke fakakaukau ʻoku loto ʻa hotau Tokotaha-Fakatupú ke tau mate mo mole ʻa e ngaahi meʻá ni kotoa? ʻIkai ʻe hoko ʻo ʻuhinga lelei ange ke fakaʻosiʻaki ʻo pehē ʻokú ne loto ke tau moʻui fiefia pea ke fiefia ʻi he moʻui ʻo taʻengata? Sai, ʻoku lava ʻo ʻuhinga pehē kiate koe ʻa e ʻiloʻi ʻo e ʻOtuá.

MOʻUI ʻI HE PALATAISÍ

8. Ko e hā ʻa e lau ʻa e Tohitapú ʻo fekauʻaki mo e kahaʻu ʻo e faʻahinga ʻo e tangatá?

⁸ Ko e meʻa ʻoku tala mai ʻe he Tohitapú ʻo fekauʻaki mo e kahaʻu ʻo e foʻi māmaní mo e faʻahinga ʻo e tangatá ʻoku kātoi nai ia ʻi he foʻi lea ʻe taha​—Palataisi! Naʻe lea ʻa Sīsū Kalaisi ʻo kau ki ai ʻi heʻene tala ki ha tangata naʻe tuʻunuku ki he maté: “Te ke ʻi Palataisi mo au.” (Luke 23:43) Ko e leaʻaki ko ʻeni ʻo e Palataisí naʻá ne ʻomai nai ki he ʻatamai ʻo e tangata ko iá ʻa e tuʻunga fakafiefia naʻe ʻi ai ʻa ʻetau ʻuluaki ongo mātuʻá, ko ʻĀtama mo ʻIvi. ʻI he taimi naʻe fakatupu ai kinaua ʻe he ʻOtuá, naʻá na haohaoa pea naʻá na nofo ʻi ha paʻake hangē ha ngoué ʻa ia naʻe faʻufaʻu mo tō ia ʻe he Tokotaha-Fakatupú. Naʻe feʻungamālie ʻa hono ui ia ko e ngoue ko ʻĪtení, ʻa ia ko e hingoa ko iá ʻoku ʻuhinga ko e fiemālie.

9. Naʻe fēfē ʻa e moʻui ʻi he muʻaki Palataisí?

⁹ Ko ha ngoue fakatupu-fiefia lahi ē! Ko ha palataisi moʻoni ia. ʻI he lotolotonga ʻo hono ʻuluʻakau fakaʻofoʻofá naʻe ʻi ai mo e ʻuluʻakau fua ifo ʻaupito. ʻI he vakavakai holo ʻa ʻĀtama mo ʻIvi ki hona tofiʻá, ʻo inu mei hono ngaahi vai melié, pea tānaki fuaʻiʻakau mei hono ʻuluʻakaú, naʻe ʻikai ha ʻuhinga ke na loto-moʻua  ai pe manavahē. Naʻa mo e fanga manú naʻe ʻikai ke fakatupu manavahē, he naʻe tuku ʻe he ʻOtuá ʻa e tangatá mo hono uaifí ʻi he tuʻunga-pule anga-ʻofa kiate kinautolu kotoa. Tānaki atu ki ai, naʻe maʻu ʻe he ʻuluaki ongo mātuʻá ʻa e moʻui lelei longomoʻui. Naʻe tatali kiate kinaua ha kahaʻu ʻitāniti mo fiefia kapau naʻá na talangofua ai pē ki he ʻOtuá. Naʻe ʻoange kiate kinaua ʻa e ngāue fakafiemālie ko hono tokangaʻi ʻa hona ʻapi Palataisi fakaofó. Tānaki atu ki ai, naʻe ʻoange kia ʻĀtama mo ʻIvi ʻa e fatongia ko hono “fakakakai a mamani, bea bule ki ai.” Ko kinaua mo ʻena fānaú te nau fakalahi atu ʻa e ngaahi ngatangataʻanga ʻo e Palataisí kaeʻoua kuo hoko ʻa e palanité fakakātoa ko ha feituʻu fakaʻofoʻofa mo fakatupu-fiefia.​—Sēnesi 1:28, PM.

10. ʻI he lea ʻa Sīsū ʻo kau ki he Palataisí, ko e hā naʻe ʻi heʻene fakakaukaú?

¹⁰ Kae kehe, ʻi he taimi naʻe lave ai ʻa Sīsū ki he Palataisí, naʻe ʻikai ko haʻane kole ki he tangata naʻe tuʻunuku ki he maté ke ne fakakaukau ʻo mamaʻo atu ki he kuo hilí. ʻIkai, naʻe lea ʻa Sīsū ia ʻo kau ki he kahaʻú! Naʻá ne ʻilo ʻe hoko ʻa hotau ʻapi fakamāmaní fakakātoa ko ha palataisi. ʻE fakahoko ai ʻe he ʻOtuá ʻa ʻene fuofua taumuʻa ki he faʻahinga ʻo e tangatá pea mo hotau māmaní. (ʻAisea 55:​10, 11) ʻIo, ʻe toe fakafoki mai ʻa e Palataisí! Pea ʻe fēfē ia? Tuku ki he Folofola ʻa e ʻOtuá, ko e Tohitapú, ke ne tali.

MOʻUI ʻI HE PALATAISI ʻE FAKAFOKI MAÍ

11. ʻI he Palataisi ʻe toe fakafoki maí, ko e hā ʻe hoko ki he mahakí, taʻumotuʻá, mo e maté?

¹¹ ʻE ʻikai toe ʻi ai ha mahaki, taʻumotuʻa, mo e mate. “ʻE toki fakaava ʻa e mata ʻo e kui, pea toʻo ʻa e telinga ʻo e tuli. Toki hopo ʻa e heke hange ha tia, pea hiki mavava ʻa e ʻelelo ʻo e noa.” (ʻAisea 35:​5, 6) “Ko e ʻOtua ʻoku kau [mo e faʻahinga ʻo e tangatá], ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 21:​3, 4.

12. Ko e hā ʻoku tau ʻilo pau ai ʻe ʻikai ke ʻi ai ha faihia, fakamālohi, mo e faikovi ʻi he Palataisi ʻi he kahaʻú?

¹² ʻE mole atu ʻo taʻengata ʻa e faihiá, fakamālohí, mo e faikoví. “Ko e kau taʻe fai totonu ʻe tuʻusi ia . . . ʻOku toe siʻi pea mole ʻa ia ʻoku fai kovi . . . ʻoku ʻikai [ia]. Ka ʻe maʻu ʻa e fonua  ʻe he faʻa kataki.” (Sāme 37:​9-11) “Ka ko e kakai kovi ʻe tuʻusi mei he fonua, ʻio, ko kinautolu ʻoku fai kākā ʻe taʻaki mei ai.”​—Palōvepi 2:22.

13. ʻE fakahoko fēfē mai ʻe he ʻOtuá ʻa e melinó?

¹³ ʻE hoko ʻa e melinó ʻi māmani lahi. “ʻOku ne [ʻOtua] lolololo ʻa e ngaahi tau ʻo aʻu ki he ngataʻanga ʻo mamani, ʻoku ne fesiʻi kaufana, mo tuʻutuʻu tao.” (Sāme 46:​9) “Ke toʻulu ʻa e maʻoniʻoni ʻi hono kuonga; pea ke leta ʻa e melino, kae ʻoua ke ngata ʻa e mahina.”​—Sāme 72:7.

14, 15. Ko e hā ʻa e lau ʻa e Tohitapú ʻo fekauʻaki mo e nofoʻangá, ngāué, mo e meʻakaí ʻi he Palataisi ʻe toe fakafoki maí?

¹⁴ ʻE malu ʻa e nofoʻangá pea ngāue fiemālie. “Te nau laga ae gaahi fale, bea nofo ai . . . E ikai te nau laga, kae nofo ai ha taha kehe; e ikai te nau to, kae kai e ha taha kehe: he oku hage koe gaahi aho oe akau oku behe ae gaahi aho o hoku kakai, bea e leleiia fuoloa ae kakai kuou fili i he gaue a ho nau nima. E ikai te nau gaue taeaoga, be fanauʻi ki he mamahi.”​—ʻAisea 65:​21-23, PM.

¹⁵ ʻE ala maʻu ʻo lahi fau ʻa e meʻakai fakatupu moʻui leleí. “Bea e i ai ae falukuga oe uite i he fonua i he tumutumu oe gaahi mouga, e gauʻeuʻe.” (Sāme 72:​16, PM) “Bea e toki tuku mai e he fonua hono tubu; bea koe Otua, io, ko ho tau Otua, te ne tabuaki akitautolu.”​—Sāme 67:6, PM.

16. Ko e hā ʻe fakatupu-fiefia ai ʻa e moʻui ʻi he Palataisí?

¹⁶ ʻE fakatupu-fiefia ʻa e moʻui taʻengata ʻi ha māmani palataisi. “E maʻu e he maonioni ae fonua, bea te nau nofo ai o taegata.” (Sāme 37:​29, PM) “E fiefia ae toafa moe botu lala koeuhi ko kinautolu, bea e fiefia ae botu liaki, bea fiji o hage koe lose.”​—ʻAisea 35:1, PM.

ʻILÓ PEA MO HO KAHAʻÚ

17. (a) Ko e hā ʻoku totonu ke ke fai kapau ʻoku fakamānako kiate koe ʻa e moʻui ʻi he Palataisí? (e) ʻOku tau ʻilo fēfē ʻe fakahoko mai ʻe he ʻOtuá ʻa e ngaahi liliu lahi ki he māmaní?

¹⁷ Kapau ʻoku fakamānako kiate koe ʻa e moʻui ʻi he Palataisí, ʻai ke ʻoua ʻe toe ʻi ai ha meʻa ke ne taʻofi koe mei hono maʻu ʻa e ʻiloʻi ʻo e ʻOtuá. ʻOkú ne ʻofa ʻi he faʻahinga ʻo e tangatá pea te ne fakahoko mai ʻa e ngaahi liliu ʻoku fiemaʻu ki hono ʻai ʻa e māmaní ko ha palataisí. ʻI he ʻosi angé, kapau naʻá ke maʻu ha ivi  mālohi ke fakangata ʻa e moʻui mamahi mo e fakamaau taʻetotonu ʻoku lahi fau ʻi he māmaní, ʻikai te ke fai pehē? ʻOku tau ʻamanekina ʻe fai ʻe he ʻOtuá ia ha meʻa siʻisiʻi ange? Ko hono moʻoní, ʻoku fakamatala maeʻeeʻa lelei ʻa e Tohitapú ʻo fekauʻaki mo e taimi ʻe toʻo atu ai ʻe he ʻOtuá ʻa e fokotuʻutuʻu fepakipaki ko ʻení pea fetongi ia ʻaki ha pule haohaoa mo māʻoniʻoni. (Tāniela 2:44) Ka ʻoku lahi ange ʻa e meʻa ʻoku ʻi he Tohitapú ia ʻi hono tala mai pē kiate kitautolu ʻo fekauʻaki mo e ngaahi meʻá ni kotoa. ʻOkú ne fakahā mai ʻa e founga ʻe lava ke tau hao atu ai ki he māmani foʻou ʻa e ʻOtuá kuó ne talaʻofa maí.​—2 Pita 3:13; 1 Sione 2:17.

18. Ko e hā ʻoku malava ke fai ʻi he taimí ni maʻau ʻe he ʻiloʻi ʻo e ʻOtuá?

¹⁸ ʻOku toe ʻaonga lahi foki kiate koe he taimí ni ʻa hono ʻiloʻi ʻo e ʻOtuá. Ko e ngaahi fehuʻi loloto taha mo fakatupu hohaʻa lahi taha ʻo e moʻuí ʻoku tali mai ia ʻi he Tohitapú. Ko hono tali ʻa ʻene tatakí ʻe tokoni ia kiate koe ke fakatupu ai ha takanga lelei mo e ʻOtuá. Ko ha monū māʻongoʻonga ē! Pea ʻe fakaivia koe ʻe he meʻá ni ke ke maʻu ʻa e melino ʻa ia ko e ʻOtuá pē ʻokú ne malava ke foaki maí. (Loma 15:​13, 33) ʻI hoʻo kamata ke maʻu ʻa e ʻilo mātuʻaki mahuʻinga ko ʻení, ʻokú ke kamata ai ʻi he feinga mahuʻinga lahi taha mo fakapaleʻi lahi taha ʻo hoʻo moʻuí. ʻE ʻikai ʻaupito ai te ke fakaʻiseʻisa ʻi hono maʻu ʻa e ʻiloʻi ʻo e ʻOtuá ʻa ia ʻoku taki atu ki he moʻui taʻengatá.

19. Ko e hā ʻa e fehuʻi te tau lāulea ki ai ʻi he vahe hono hoko maí?

¹⁹ Kuo tau lave ki he Tohitapú ko e tohi ia ʻoku maʻu ai ʻa e ʻiloʻi ʻo e ʻOtuá. Ka, ʻoku tau ʻilo fēfē ʻoku ʻikai ko ha tohi ia ʻo e poto ʻo e tangatá, ka ko ha meʻa ʻoku lahi ange ʻaupito ai? Te tau lāulea ki he fehuʻí ni ʻi he vahe hono hoko maí.

SIVIʻI HOʻO ʻILÓ

Ko e hā ʻa e ʻuhinga ʻoku malava ai ʻe he ʻiloʻi ʻo e ʻOtuá ʻo taki atu koe ki he fiefia ʻi ʻitānití?

ʻE fēfē ʻa e moʻui ʻi he Palataisi fakamāmani ʻoku tuʻunuku maí?

Ko e hā te ke maʻu ai ha ʻaonga mei hono maʻu ʻa e ʻiloʻi ʻo e ʻOtuá he taimí ni?

[Fehuʻi ki he Ako]