Vahe 10

ʻOku Pule ʻa e Puleʻanga ʻo e ʻOtuá

1, 2. Kuo fakamoʻoniʻi fēfē ʻa e taʻefeʻunga ʻa e ngaahi founga-pule ʻa e tangatá?

 MAHALO pē kuó ke fakatau mai ha meʻangāue, pea ke toki ʻilo hake pē naʻe ʻikai ke ngāue ia. Tau pehē ʻeni naʻá ke kole ha tangata ke haʻu ʻo ngaahi ia. Kae kehe, hili pē ha taimi siʻi mei heʻene ngaahi ʻa e meʻangāué, ne maumau ia. Ko ha loto-mamahi lahi ē!

² ʻOku meimei tatau ia mo e ngaahi founga-pule ʻa e tangatá. Kuo holi maʻu pē ʻa e faʻahinga ʻo e tangatá ki ha founga-pule te ne fakapapauʻi mai ʻa e melinó mo e fiefiá. Kae kehe, kuo ʻikai ke lavameʻa moʻoni ʻa e ngaahi feinga tōtōivi ke fakaleleiʻi ʻa e ngaahi maumau ʻi he sōsaietí. Naʻe fai ʻa e ngaahi talite fakamelino lahi​—pea kuo toe maumauʻi ia. ʻIkai ngata aí, ko e hā ha founga-pule kuó ne malava ʻo taʻaki-fuʻu atu ʻa e masivá, filifilimānakó, faihiá, mahakí, mo e maumauʻi ʻo e ʻātakaí? ʻOku ʻikai ke toe ala fakaleleiʻi ʻa e pule ʻa e tangatá ia. Naʻa mo Tuʻi Solomone poto ʻo ʻIsilelí, naʻá ne ʻeke: “Bea koia, e faa iloʻi fefe e he tagata a hono hala oona?”​—Palōvepi 20:​24, PM.

3. (a) Ko e hā naʻe kaveinga ʻaki ʻa e ngāue fakamalanga ʻa Sīsuú? (e) Ko e hā ʻa e fakamatala ʻa e kakai ʻe niʻihi ʻo kau ki he Puleʻanga ʻo e ʻOtuá?

³ ʻOua ʻe fakatuʻatamaki! Ko ha founga-pule tuʻumaʻu ʻi he māmaní ʻoku ʻikai ko ha misi pē. Ko e kaveinga ia ʻo e ngāue fakamalanga ʻa Sīsuú. Naʻá ne ui ia ko e “Puleʻanga ʻo e ʻOtua,” pea naʻá ne akoʻi ʻa hono kau muimuí ke nau lotu ʻo kole ia. (Luke 11:2; 21:31) Ko e moʻoni, ʻoku faʻa fai ha lave ʻi he taimi ʻe niʻihi ki he Puleʻanga ʻo e ʻOtuá ʻi he ngaahi haʻohaʻonga fakalotú. Ko hono moʻoní, ʻoku lotu ʻo fekauʻaki mo ia ʻa e laui miliona ʻi he ʻaho kotoa pē ʻi heʻenau toutou leaʻaki ʻa e Lotu ʻa e ʻEikí (naʻe toe ui ko ʻEtau Tamai pe sīpinga lotú). Ka ʻoku kehekehe ʻa e tali ʻa e kakaí ʻi hono ʻeke atu, “Ko e hā ʻa e Puleʻanga  ʻo e ʻOtuá?” ʻOku pehē ʻe he niʻihi, “ʻOku ʻi ho lotó ia.” ʻOku ui ʻe he niʻihi ia ko hēvani. ʻOku ʻomai ʻe he Tohitapú ha tali mahino, ʻo hangē ko ia te tau vakai ki aí.

KO HA PULEʻANGA MO HA TAUMUʻA

4, 5. Ko e hā naʻe fili ai ʻe Sihova ke fakahoko mai hano fakahāhā foʻou ʻo hono tuʻunga-haú, pea ko e hā ʻe fakahoko ʻe he meʻa ko iá?

⁴ Kuo hoko maʻu ai pē ʻa Sihova ko e ʻOtuá ko e Tuʻi, pe Hau, ʻo e ʻuniveesí. ʻOku hakeakiʻi ia ki he tuʻunga māʻolunga ko iá ʻe he moʻoniʻi meʻa ko ia naʻá ne fakatupu ʻa e ngaahi meʻa kotoa pē. (1 Kalonikali 29:11; Sāme 103:19; Ngāue 4:24) Ka ko e Puleʻanga naʻe malanga ʻa Sīsū ʻo kau ki aí ʻoku fika ua ia, ki he tuʻunga-hau fakaleveleva ʻo e ʻOtuá. Ko e Puleʻanga faka-Mīsaia ko iá kuo ʻi ai haʻane taumuʻa pau, ka ko e hā ʻa e taumuʻa ko iá?

⁵ Hangē ko ia naʻe fakamatalaʻi ʻi he Vahe 6, naʻe angatuʻu ʻa e ʻuluaki ongo mātuʻá ki he mafai ʻo e ʻOtuá. Koeʻuhi ko e ngaahi fakakikihi naʻe malanga hake aí, naʻe fili leva ʻe Sihova ke fakahoko mai hano fakahāhā foʻou ʻa hono tuʻunga-haú. Naʻe fanongonongo ʻe he ʻOtuá ʻa ʻene taumuʻa ke tokonaki mai ha “hako” ʻa ia te ne laiki ʻa e Ngatá, ʻa Sētane, pea toʻo atu ʻa e ngaahi nunuʻa ʻo e angahala tukufakaholo ʻa e faʻahinga ʻo e tangatá. Ko e “hako” tefitó ko Sīsū Kalaisi, pea ko e “Puleʻanga ʻo e ʻOtua” ko e meʻangāue ia te ne ikunaʻi fakaʻaufuli ʻa Sētané. Fakafou ʻi he Puleʻanga ko ʻení, ʻe toe fakafoki mai ai ʻe Sīsū Kalaisi ʻa e tuʻunga-pule ki he māmaní ʻi he huafa ʻo Sihová pea ʻe fakatonuhiaʻi ai ʻa e tuʻunga-hau totonu ʻo e ʻOtuá ʻi he taimi kotoa pē.​—Sēnesi 3:15; Sāme 2:​2-9.

6, 7. (a) ʻOku ʻi fē ʻa e Puleʻangá, pea ko hai ʻa e Tuʻí pea mo hono kaungā-pulé? (e) Ko hai ʻoku pule hifo ki ai ʻa e Puleʻangá?

⁶ Fakatatau ki he liliu ʻe taha ʻo e ngaahi lea ʻa Sīsū ki he kau Fālesi anga-fulikivanú, naʻá ne pehē: “Oku iate kimoutolu ae buleaga oe Otua.” (Luke 17:​21, PM) Naʻe ʻuhinga ʻa Sīsuú naʻe ʻi he ngaahi loto fulikivanu ʻo e kau tangata kākā ko iá ʻa e Puleʻangá? ʻIkai. Ko ha liliu tonu ange ʻo e tupuʻi lea faka-Kalisí ʻoku pehē: “Ko e Puleʻanga ʻo e ʻOtua ʻoku ʻi homou lotolotonga ni.” (Ko e Tohitapu Katoa [1966], fakaʻītali ʻamautolu.) Ko Sīsū, ʻa ia naʻá ne ʻi honau lotolotongá, naʻá ne lave ai kiate ia tonu ko e Tuʻi ʻi he kahaʻú. ʻI he ʻikai ʻaupito ko ha meʻa ʻoku maʻu ʻe ha taha ʻi hono lotó, ko e Puleʻanga ʻo e ʻOtuá ia ko ha founga-pule moʻoni ʻoku ngāue pea ʻoku ʻi ai hono tokotaha-pule mo e  faʻahinga ʻoku pule ki ai. Ko ha founga-pule fakahēvani ia, he ʻoku fakatou ui ia ko e “Puleʻanga ʻo Hēvani” mo e “Puleʻanga ʻo e ʻOtua.” (Mātiu 13:11; Luke 8:10) ʻI ha vīsone, naʻe mamata ai ʻa e palōfita ko Tānielá ki he Tokotaha-pule ʻi aí ko ha ‘toko taha hage koe foha oe tagata’ naʻe ʻomai ki he ʻao ʻo e ʻOtua Māfimafi-Aoniú pea naʻe ʻoange ki ai ke tuʻuloa “ae bule, moe nāunāu, mo ha buleaga, koeuhi ke tauhi kiate ia ae gaahi kakai kotoabe, moe gaahi buleaga, moe gaahi lea.” (Tāniela 7:​13, 14, PM) Ko hai ʻa e Tuʻi ko ʻení? Sai, ʻoku ui ʻe he Tohitapú ʻa Sīsū Kalaisi ko e “Foha oe tagata.” (Mātiu 12:​40, PM; Luke 17:​26, PM) ʻIo, naʻe fakanofo ʻe Sihova ʻa hono ʻAló, ko Sīsū Kalaisi, ke hoko ko e Tuʻi.

⁷ ʻOku ʻikai ke pule tokotaha pē ʻa Sīsū. ʻOku kau fakataha mo ia ʻa e toko 144,000 ʻa ia kuo “fakatau mei mamani” ke nau hoko ko hono kaungātuʻi mo kaungātaulaʻeiki. (Fakahā 5:​9, 10; 14:1, 3; Luke 22:​28-30) Ko e faʻahinga ʻoku pule mai ki ai ʻa e Puleʻanga ʻo e ʻOtuá te nau hoko ko ha fāmili ʻo e faʻahinga ʻo e tangatá ʻi he kolopé kātoa ʻa ia ʻoku nau anga-nofo ki he tuʻunga-taki ʻo Kalaisí. (Sāme 72:​7, 8) Ka neongo ia, ʻoku malava fēfē ke tau fakapapauʻi ʻe fakatonuhiaʻi moʻoni ʻe he Puleʻangá ʻa e tuʻunga-hau ʻo e ʻOtuá pea mo toe fakafoki mai ʻa e ngaahi tuʻunga fakapalataisí ki hotau māmaní?

KO E MOʻONI ʻO E PULEʻANGA ʻO E ʻOTUÁ

8, 9. (a) ʻE anga-fēfē nai ke tau fakatātaaʻi ʻa e alafalalaʻanga ʻo e ngaahi talaʻofa ʻa e Puleʻanga ʻo e ʻOtuá? (e) Ko e hā ʻoku tau fakapapauʻi ai ʻa e moʻoni ʻo e Puleʻangá?

⁸ Fakaʻuta atu kuo fakaʻauha ho ʻapí ʻe ha afi. Pea kuo talaʻofa atu ʻeni hao kaumeʻa ʻa ia kuo ʻi ai haʻane ʻū meʻa langa te ne toe langa ho falé mo tokonaki atu ha meʻakai ki ho fāmilí. Kapau kuo tala atu maʻu pē ʻe he kaumeʻa ko iá ʻa e moʻoní kiate koe, ʻe ʻikai te ke tui kiate ia? Pehē pē ne ke foki mai ki ʻapi mei he ngāué ʻi he ʻaho hono hokó ʻo ke ʻilo kuo ʻosi kamata ʻe ha kau ngāue ʻa hono fakamaʻa ʻa e ngaahi toetoenga mei he velá pea kuo ʻosi ʻomai mo e meʻakai ki ho fāmilí. ʻOku ʻikai ha veiveiua te ke falala kakato ʻe faifai atu pē, ʻe ʻikai ngata pē ʻi hono toe fakafoʻou mai ʻa e ngaahi meʻá ka ʻe toe lelei ange ia ʻi he ngaahi meʻa ki muʻá.

⁹ ʻI he founga meimei tatau, ʻoku fakapapauʻi mai ʻe Sihova kiate kitautolu ʻa e moʻoni ʻo e Puleʻangá. Hangē ko ia kuo  fakahā ʻi he tohi Hepeluú ʻi he Tohitapú, naʻe tomuʻa fakatātaaʻi mai ʻe he ngaahi tafaʻaki lahi ʻo e Laó ʻa e fokotuʻutuʻu ʻo e Puleʻangá. (Hepelū 10:1) Ko e ngaahi vakai tōmuʻa ʻo fekauʻaki mo e Puleʻanga ʻo e ʻOtuá naʻe toe hā ia ʻi he puleʻanga fakamāmani ʻo ʻIsilelí. Ko e founga-pule ko iá naʻe makehe, he ko hono kau pulé naʻa nau nofo “ʻi he taloni ʻo Sihova.” (1 Kalonikali 29:23) ʻIkai ko ia pē, naʻe ʻosi tala ki muʻa: “Ko e sepita meia Siuta ʻe ʻikai ʻave, mo e tokotoko mei hono vahaʻa vaʻe, kaeʻoua ke haʻu ʻa Sailo, pea ʻe fai kiate ia ʻe he [ngaahi] kakai ʻenau tukulolo.” (Sēnesi 49:10) a ʻIo, ko e laine hohoko ko ʻeni ʻo e ngaahi tuʻi Siutá naʻe pau ke ʻaloʻi mai ai ʻa Sīsū, ko e Tuʻi tuʻumaʻu ʻo e founga-pule ʻa e ʻOtuá.​—Luke 1:​32, 33.

10. (a) Naʻe fakatoka ʻa e makatuʻunga ʻo e Puleʻanga faka-Mīsaia ʻo e ʻOtuá ʻanefē? (e) Ko e hā ʻa e ngāue mahuʻinga ʻe takimuʻa ai ʻi he māmaní ʻa e kau kaungā-pule ʻo Sīsū ʻi he kahaʻú?

¹⁰ Ko e makatuʻunga ʻo e Puleʻanga faka-Mīsaia ʻo e ʻOtuá naʻe fakatoka ia ʻi hono fili ʻo e kau ʻaposetolo ʻa Sīsuú. (ʻEfesō 2:​19, 20; Fakahā 21:14) Ko e faʻahingá ni ko e ʻuluaki kau mēmipa ia ʻo e toko 144,000 te nau pule ʻi hēvani ko e ngaahi kaungātuʻi fakataha mo Sīsū Kalaisí. ʻI he lolotonga ʻo ʻenau ʻi he māmaní, ʻe tataki ʻe he kau kaungāpule ko ʻeni ʻi he kahaʻú ha feingangāue fakaefakamoʻoni, ʻo fehoanaki mo e fekau ʻa Sīsuú: “Mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni.”​—Mātiu 28:19.

11. ʻOku fēfē ʻa e ngāue fakamalanga fekauʻaki mo e Puleʻangá ʻoku fakahoko ʻi he ʻaho ní, pea ko e hā kuó ne lavaʻí?

¹¹ Ko e fekau ke ngaohi ākongá ʻoku lolotonga fai ia ʻi ha tuʻunga taʻefakatataua. ʻOku fanongonongo ʻe he Kau Fakamoʻoni ʻa Sihová ʻa e ongoongo lelei ʻo e Puleʻangá ʻo takatakai ʻi he kolopé kotoa, ʻo fetāiaki mo e ngaahi lea fakaekikite ʻa Sīsuú: “Ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” (Mātiu 24:14) Ko e tafaʻaki ʻe taha ʻo e ngāue fakamalanga ʻo e Puleʻangá, ko ha polokalama  fakaeako lahi ʻoku lolotonga fakahoko. Ko e faʻahinga ʻoku nau anga-nofo ki he ngaahi lao mo e ngaahi tefitoʻi moʻoni ʻa e Puleʻanga ʻo e ʻOtuá kuo nau ʻosi aʻusia ha melino mo e fāʻūtaha ʻa ia ʻoku ʻikai malava ke maʻu ia ʻe he ngaahi founga-pule fakaetangatá. ʻOku ʻomai ʻe he meʻá ni kotoa ha fakamoʻoni māʻalaʻala ko e Puleʻanga ʻo e ʻOtuá ko ha meʻa moʻoni!

12. (a) Ko e hā ʻoku feʻungamālie ai ʻa hono ui ʻa e kau fanongonongo ʻo e Puleʻangá ko e Kau Fakamoʻoni ʻa Sihová? (e) Ko e hā hono kehekehe ʻo e Puleʻanga ʻo e ʻOtuá mei he ngaahi founga-pule ʻa e faʻahinga ʻo e tangatá?

¹² Naʻe tala ʻe Sihova ki he kau ʻIsilelí: “Ko kimoutolu ʻa e kau fakamoʻoni aʻaku . . . mo e sevaniti aʻaku kuo u fili.” (ʻAisea 43:​10-12) Ko Sīsū, “koe Fakamooni Agatonu,” naʻá ne fanongonongo  faivelenga ʻa e ongoongo lelei ʻo e Puleʻangá. (Fakahā 1:​5, PM; Mātiu 4:17) Ko ia ai, ʻoku feʻungamālie ʻa hono uiʻaki ʻa e kau fanongonongo ʻo e Puleʻangá ʻi he ʻaho ní ʻa e hingoa kuo pani fakaʻotua ko e Kau Fakamoʻoni ʻa Sihová. Ka ko e hā ʻoku fakamoleki ai ʻe he Kau Fakamoʻoní ʻa e taimi mo e feinga lahi pehē fau ʻi he talanoa ki he niʻihi kehé ʻo kau ki he Puleʻanga ʻo e ʻOtuá? ʻOku nau fai ʻeni koeʻuhi ko e Puleʻangá ko e ʻamanakiʻanga pē ia ki he faʻahinga ʻo e tangatá. Kuo vavé ni ke ngata atu ʻa e ngaahi founga-pule ʻa e tangatá ia, ka ʻe ʻikai ʻaupito ke pehē ʻa e Puleʻanga ʻo e ʻOtuá ia. ʻOku ui ʻe he ʻAisea 9:​6, 7 ʻa e Pule aí, ʻa Sīsū, ko e “ʻEiki ʻo e Melino” pea toe tānaki atu: “ʻE ʻikai fakangatangata ʻa e tupu o ʻene pule mo e melino.” ʻOku ʻikai ke hangē ʻa e Puleʻanga ʻo e ʻOtuá ko e ngaahi founga-pule ʻa e tangatá​—ke ʻi heni he ʻahó ni pea liua ʻapongipongi. Ko e moʻoni, ʻoku pehē ʻe he Tāniela 2:​44 (PM): “E fokotuu e he Otua oe lagi, ha buleaga, aia e ikai auha o lauikuoga: bea e ikai tuku ae buleaga ki ha kakai kehe, . . . e tuu mau ia o taegata.”

13. (a) Ko e hā ʻa e ngaahi palopalema ʻe niʻihi ʻe ngāue lavameʻa ai ʻa e Puleʻanga ʻo e ʻOtuá? (e) Ko e hā ʻoku malava ai ke tau fakapapauʻi ʻe fakahoko ʻa e ngaahi talaʻofa ʻa e ʻOtuá?

¹³ Ko hai ha tuʻi ʻi he faʻahinga ʻo e tangatá kuó ne malava ke ne toʻo atu ʻa e taú, faihiá, mahamahakí, hōngeá, mo e ʻikai ha nofoʻangá? ʻIkai ngata aí, ko hai ha pule fakaetangata kuó ne malava ke fokotuʻu hake ʻa e faʻahinga kuo maté? ʻE ngāue ʻa e Puleʻanga ʻo e ʻOtuá mo hono Tuʻí ki he ngaahi meʻa ko ʻení. ʻE ʻikai ke hā mai ʻoku mele ʻa e Puleʻangá, ʻo hangē ha nāunau ngāue ʻoku ʻikai ngāue lelei ʻa ia ʻoku toutou fiemaʻu hano fakaleleiʻi. Ka, ʻe lavameʻa ʻa e Puleʻanga ʻo e ʻOtuá, he ʻoku palōmesi mai ʻa Sihova: “Mo ʻeku lea ʻoku ʻalu atu mei hoku ngutu: ʻe ʻikai foki ngeʻesi mai, kaeʻoua ke ne fai ʻa e meʻa ne u loto ki ai, mo fakaaʻu ʻa e meʻa ne u fekau atu ai ia.” (ʻAisea 55:11) ʻE ʻikai ke tōnoa ʻa e taumuʻa ʻa e ʻOtuá, ka ko fē ʻa e taimi ke kamata ai ʻa e pule ʻa e Puleʻangá?

PULE ʻA E PULEʻANGÁ—FAKAKŪ?

14. Ko e hā ʻa e taʻefemahinoʻaki naʻe maʻu ʻe he kau ākonga ʻa Sīsuú ʻo fekauʻaki mo e Puleʻangá, ka ko e hā naʻe ʻilo ʻe Sīsū ʻo kau ki hono tuʻunga-pulé?

¹⁴ “ʻEiki, ko hoʻo toe fakaato ʻi he taimi ni ʻa e puleʻanga maʻa Isileli?” Ko e fehuʻi ko ʻeni naʻe ʻeke ʻe he kau ākonga ʻa Sīsuú naʻe hā mei ai naʻe teʻeki ai ke nau ʻilo ʻa e taumuʻa ʻo e  Puleʻanga ʻo e ʻOtuá pea mo e taimi kuo kotofa ke kamata ai ʻa ʻene pulé. ʻI he fakatokanga kiate kinautolu ke ʻoua te nau fifili ki he meʻa ko iá, naʻe pehē ʻe Sīsū: “ʻOku ʻikai ʻamoutolu ke ʻilo ʻa e ngaahi taimi mo e ngaahi kuonga, ʻa ia kuo taʻofi ʻe he Tamai ki heʻene faʻiteliha aʻana.” Naʻe ʻilo ʻe Sīsū ko ʻene pule mai ki he māmaní naʻe tuku tauhi ia ki he kahaʻú, ʻi ha hili ha taimi fuoloa mei heʻene toetuʻu pea hāʻele hake ki hēvaní. (Ngāue 1:​6-11; Luke 19:​11, 12, 15) Naʻe ʻosi tala ki muʻa ʻe he ngaahi Konga Tohitapú ʻa e meʻá ni. ʻO anga-fēfē?

15. Ko e hā ʻa e fakamaama ʻoku ʻomai ʻe he Sāme 110:1 ʻo fekauʻaki mo e taimi ʻo e tuʻunga-pule ʻo Sīsuú?

¹⁵ ʻI he lave fakaekikite kia Sīsū ko e “ʻEiki,” naʻe pehē ʻe Tēvita: “Folofola ʻa Sihova ki hoku ʻEiki, ‘Nofo koe ʻi hoku toʻomataʻu ni, kaeʻoua ke u ʻai ho fili fuape ke hoko ko ho tuʻungavaʻe.’” (Sāme 110:1; fakafehoanaki mo Ngāue 2:​34-36.) ʻOku fakahaaʻi ʻe he kikité ni heʻikai ke kamata ʻa e tuʻunga-pule ʻo Sīsuú ʻi he hili pē ʻa ʻene hāʻele hake ki hēvaní. Ka, te ne talitali ʻi he toʻomataʻu ʻo e ʻOtuá. (Hepelū 10:​12, 13) Ko e hā hono fuoloa ʻo e talitali ko ʻení? ʻE kamata fakakū ʻa ʻene pulé? ʻOku tokoniʻi kitautolu ʻe he Tohitapú ke tau maʻu ʻa e ongo talí.

16. Ko e hā naʻe hoko ʻi he 607 K.M., pea ko e hā ʻa e fekauʻaki ʻa e meʻá ni mo e Puleʻanga ʻo e ʻOtuá?

¹⁶ Ko e kolo pē taha ʻi he māmaní kotoa naʻe ʻai ki ai ʻe Sihova ʻa hono huafá ko Selusalema. (1 Tuʻi 11:36) Ko e toe kolomuʻa foki ia ʻo ha puleʻanga fakamāmani naʻe tali ʻe he ʻOtuá ke hoko ko e taipe ʻo e Puleʻanga fakahēvani ʻo e ʻOtuá. Ko ia ai, naʻe mohu ʻuhinga ʻaupito ʻa hono fakaʻauha ʻo Selusalema ʻe he kau Pāpiloné ʻi he 607 K.M. Naʻe fakaʻilongaʻi ʻe he meʻa ko ʻeni naʻe hokó ʻa e kamataʻanga ʻo hano fakaleluʻi ʻi ha vahaʻa taimi lōloa ʻaupito ʻa e pule fakahangatonu mai ʻa e ʻOtuá ki heʻene kakai ʻi he māmaní. ʻI he senituli ʻe ono nai mei ai, naʻe fakahaaʻi ʻe Sīsū naʻe kei hoko atu pē ʻa e vahaʻa taimi ʻo hono fakaleluʻi ʻo e tuʻunga-pulé, he naʻá ne pehē: “ʻE malaki ʻa Selusalema ʻe he Senitaile, kaeʻoua ke kakato ʻa e ngaahi kuonga ʻo e Senitaile.”​—Luke 21:24.

17. (a) Ko e hā “ʻa e ngaahi kuonga ʻo e Senitaile,” pea ko e hā hono fuoloá? (e) Naʻe kamata pea ngata ʻanefē “ʻa e ngaahi kuonga ʻo e Senitaile”?

¹⁷ ʻI he lolotonga “ʻa e ngaahi kuonga ʻo e Senitaile,” ʻe fakaʻatā ai ʻa e ngaahi founga-pule fakamāmaní ke nau fakaleluʻi ʻa e tuʻunga-pule naʻe tali ʻe he ʻOtuá. Naʻe kamata ʻa e vahaʻa taimi  ko iá ʻi hono fakaʻauha ʻo Selusalema ʻi he 607 K.M., pea naʻe fakahaaʻi ʻe Tāniela ʻe hokohoko atu ia ʻi he “fituʻi kuonga.” (Tāniela 4:​23-25) Ko e hā hono fuoloa ʻo iá? ʻOku fakahaaʻi ʻe he Tohitapú ko e “kuonga” ʻe tolu mo e kongá ʻoku tatau ia mo e ʻaho ʻe 1,260. (Fakahā 12:​6, 14) ʻI hono liunga ua ʻa e vahaʻa taimi ko iá, ʻe feʻunga ia mo e ʻaho ʻe 2,520, pe kuonga ʻe fitu. Ka naʻe ʻikai ke hoko ha meʻa fakatupu tokanga ia ʻi he ngataʻanga ʻo e vahaʻa taimi nounou ko iá. Kae kehe, ʻi hono ngāueʻaki ki he kikite ʻa Tānielá “ʻa e ʻaho taki taha ko e taʻu” pea lau ʻa e taʻu ʻe 2,520 mei he 607 K.M., ʻoku tau aʻu mai ai ki he taʻu 1914 T.S.​—Nōmipa 14:34; ʻIsikeli 4:6.

18. Ko e hā naʻe fai ʻe Sīsū ʻi he hili pē ʻa ʻene maʻu ʻa e mafai ki he Puleʻangá, pea naʻe uesia fēfē ʻe he meʻá ni ʻa e māmaní?

¹⁸ Naʻe kamata ʻa Sīsū ke pule fakatuʻi ʻi hēvani ʻi he taimi ko iá? Ko e ngaahi ʻuhinga Fakatohitapu ki he pehē naʻá ne hoko ʻo peheé ʻe fakamatala ki ai ʻi he vahe hono hokó. Ko hono moʻoní, ko e kamataʻanga ʻo e pule ʻa Sīsuú ʻe ʻikai ke fakaʻilongaʻi ia ʻaki ha melino leva ʻi he māmaní. ʻOku fakahaaʻi ʻe he Fakahā 12:​7-12 ʻo pehē ʻi he hili pē ʻa hono maʻu ʻa e Puleʻangá, ʻe tuli hifo leva ʻe Sīsū ʻa Sētane mo e kau ʻāngelo tēmenioó mei hēvani. ʻE hoko heni ʻa e faingataʻa ki he māmaní, ka ʻoku fakalotofiefia ʻi hono lau hifo ko e Tēvoló “ʻoku toesiʻi pe hono taimi” ʻoku toé. ʻOku vavé ni, ke tau malava ke fiefia ʻo ʻikai koeʻuhi pē ʻoku pule ʻa e Puleʻanga ʻo e ʻOtuá ka koeʻuhi foki te ne ʻomai ʻa e ngaahi tāpuaki ki he māmaní mo e faʻahinga talangofua ʻo e tangatá. (Sāme 72:​7, 8) ʻOku tau ʻilo fēfē ʻoku vavé ni ke hoko ʻa e meʻá ni?

[Fakamatala ʻi lalo]

SIVIʻI HOʻO ʻILÓ

Ko e hā ʻa e Puleʻanga ʻo e ʻOtuá, pea ʻoku pule ia mei fē?

Ko hai ʻoku pule ʻi he Puleʻangá, pea ko hai ʻoku pule ki aí?

Kuo anga-fēfē ʻa hono fakapapauʻi mai ʻe Sihova kiate kitautolu ko hono Puleʻangá ko ha meʻa moʻoni?

Naʻe kamata pea ngata ʻanefē “ʻa e ngaahi kuonga ʻo e Senitaile”?

[Fehuʻi ki he Ako]

[Puha ʻi he peesi 94]

NIʻIHI ʻO E NGAAHI MEʻA MAHUʻINGA FELĀVEʻI MO E PULEʻANGA ʻO E ʻOTUÁ

• Fanongonongo ʻe Sihova ʻa ʻene taumuʻa ke fakatupu ha “hako” te ne laiki ʻa e ʻulu ʻo e Ngatá, ko Sētane ko e Tēvoló.​—Sēnesi 3:15.

• ʻI he 1943 K.M., fakahā ai ʻe Sihova ko e “hako” ko ʻení ʻe hoko ko ha hako fakaetangata ia ʻo ʻĒpalahame.​—Sēnesi 12:​1-3, 7; 22:18.

• Ko e Lao fuakava naʻe ʻoange ki ʻIsileli ʻi he 1513 K.M. tokonaki mai “ʻa e ʻata pe ʻo e ngaahi lelei ka hoko.”​—ʻEkisoto 24:​6-8; Hepelū 10:1.

• Kamata ʻa e puleʻanga fakamāmani ʻo ʻIsilelí ʻi he 1117 K.M., pea hokohoko mai ai ki mui ʻi he laine ʻo Tēvitá.​—1 Sāmiuela 11:15; 2 Sāmiuela 7:​8, 16.

• Fakaʻauha ʻo Selusalema ʻi he 607 K.M., pea kamata ai “ʻa e ngaahi kuonga ʻo e Senitaile.”​—2 Tuʻi 25:​8-10, 25, 26; Luke 21:24.

• ʻI he 29 T.S., pani ai ʻa Sīsū ko e Tuʻi-Fakanofo pea kamata ʻene ngāue fakafaifekau ʻi he māmaní.​—Mātiu 3:​16, 17; 4:17; 21:​9-11.

• ʻI he 33 T.S., hāʻele hake ai ʻa Sīsū ki hēvani, ʻo talitali ai ʻi he toʻomataʻu ʻo e ʻOtuá kaeʻoua ke kamata ʻa ʻene pulé.​—Ngāue 5:​30, 31; Hepelū 10:​12, 13.

• Fakanofo-tuʻi ʻo Sīsū ʻi he Puleʻanga fakahēvaní ʻi he 1914 T.S. ʻi he ngata “ʻa e ngaahi kuonga ʻo e Senitaile.”​—Fakahā 11:15.

• Lī hifo ʻa Sētane mo ʻene kau tēmenioó ki he feituʻu ʻo e māmaní pea hoko ai ʻa e tupulekina ʻa e faingataʻá ki he faʻahinga ʻo e tangatá.​—Fakahā 12:​9-12.

• Tokangaʻi ʻe Sīsū ʻa e ngāue fakamalanga ʻo e ongoongo lelei ʻo e Puleʻanga ʻo e ʻOtuá ʻi māmani lahi.​—Mātiu 24:14; 28:​19, 20.