Vahe 16

Founga ʻE Lava ke Ke ʻUnuʻunu Ofi Ai ki he ʻOtuá

1. Ko e hā ʻa e ngaahi faitatau ʻoku hā mahino ʻi he ngaahi founga-lotu lahi?

 NAʻE ʻohovale ha tokotaha folau ʻeveʻeva naʻe ʻaʻahi ki ha fonua ʻi he Hahaké ʻi he ngaahi ouau fakalotu naʻá ne mamata ai ʻi ha temipale ʻo e lotu-Putá. Neongo ko e ngaahi ʻīmisí naʻe ʻikai ʻo Mele pe ko Kalaisi, ko e konga lahi ʻo e ngaahi ouaú naʻe tatau mo ia ʻi he siasi ʻokú ne kau ki ai ʻi hono fonuá. Hangē ko ʻení, naʻá ne fakatokangaʻi ʻa hono ngāueʻaki ʻo e ngaahi losalió pea mo hono hivehivaʻi ʻo e ngaahi lotú. ʻOku ʻi ai ʻa e niʻihi kehe foki kuo nau toe fai ha ngaahi fakafehoanaki pehē. ʻI he Hahaké pe ʻi he Hihifó, ko e ngaahi founga ko ia ʻoku feinga ai ʻa e kau muimui līʻoá ke ʻunuʻunu ke ofi ai ki he ʻOtuá pe ki he ngaahi meʻa ʻoku nau lotu ki aí ʻoku ʻilonga ʻa ʻenau meimei tataú.

2. Kuo anga-fēfē ʻa hono fakamatalaʻi ʻa e lea ʻo lotú, pea ko e hā ʻoku lotu ai ʻa e kakai tokolahi?

² ʻOku tautautefito ʻa e feinga ʻa e tokolahi ke ʻunuʻunu ofi ki he ʻOtuá ʻaki ʻa e lotu kiate ia. Kuo fakamatalaʻi ʻa e lotú ʻo pehē “ko ha tōʻonga ʻo e fetuʻutaki ʻa e tangatá mo e meʻa toputapu pe māʻoniʻoni​—ko e ʻOtua, ko e ngaahi ʻotua, ko e nofoʻanga taukakapa, pe ko e ngaahi mālohi mahulu hake fakaenatula.” (The New Encyclopædia Britannica) Kae kehe, ʻi he taimi ʻoku fakaofiofi ai ki he ʻOtuá ʻi he lotú, ʻoku fakakaukau pē ʻa e niʻihi ia ki ha lelei ʻe lava ke nau maʻu mei ai. Ko e fakatātaá, ʻi he taimi ʻe taha naʻe ʻeke ange ʻe ha tangata ki ha taha ʻo e Kau Fakamoʻoni ʻa Sihová: “Kapau te ke lea ʻo lotu maʻaku, ʻe solova ai ʻa e ngaahi palopalema ʻoku ou maʻu ʻi hoku fāmilí, ʻi he ngāueʻangá, pea ʻi heʻeku moʻuí?” ʻOku hangehangē naʻe fakakaukau pehē ʻa e tangatá, ka ʻoku lotu ʻa e tokolahi pea ʻoku nau ʻilo ʻoku kei hokohoko atu pē ʻa ʻenau ngaahi palopalemá ʻanautolu. Ko ia te tau  ʻeke hifo nai, ‘Ko e hā koā ʻoku totonu ai ke tau ʻunuʻunu ke ofi ki he ʻOtuá?’

ʻUHINGA KE TAU ʻUNUʻUNU OFI AI KI HE ʻOTUÁ

3. Ko hai ʻoku totonu ke fakahanga ki ai ʻa ʻetau ngaahi lotú, pea ko e hā hono ʻuhingá?

³ Ko e lotú ʻoku ʻikai ko ha ouau taʻeʻuhinga ia, pea ʻoku ʻikai ko ha founga pē ia ke maʻu ai ha meʻa. Ko ha ʻuhinga lahi ke fakaofiofi ai ki he ʻOtuá ke maʻu ha vahaʻangatae vāofi mo ia. Ko ia ai, ʻoku totonu ke fai fakahangatonu ʻetau ngaahi lotú kia Sihova ko e ʻOtuá. “ʻOku ofi leva ʻa Sihova ki he kakai kotoa ʻoku tautapa kiate ia,” ko e lau ia ʻa e tokotaha-tohi-sāme ko Tēvitá. (Sāme 145:18) ʻOku fakaafeʻi mai kitautolu ʻe Sihova ke tau hoko ʻo maʻu ha vahaʻangatae melino mo ia. (ʻAisea 1:18) Ko e faʻahinga ʻoku nau tali ʻa e fakaafé ni ʻoku nau loto-tatau mo e tokotaha-tohi-sāmé ʻa ia naʻá ne pehē: “ʻOku lelei kiate au eku unuunu ke ofi ki he Otua.” Ko e hā hono ʻuhingá? Koeʻuhi ko e faʻahinga ʻoku ʻunuʻunu ofi kia Sihova ko e ʻOtuá te nau maʻu ʻa e fiefia moʻoní mo e nonga ʻo e fakakaukaú.​—Sāme 73:​28, PM.

4, 5. (a) Ko e hā ʻoku mahuʻinga ai ke lea ʻo lotu ki he ʻOtuá? (e) Ko e hā ʻa e faʻahinga vahaʻangatae mo e ʻOtuá ʻoku lava ke tau fokotuʻu fakafou ʻi he lotú?

⁴ Ko e hā ke lotu ai ki he ʻOtuá ki ha tokoni kapau ‘ʻoku mui ʻetau kole, ka kuo toka meaʻi ʻe ia ʻa e ngāhi meʻa ʻoku tau masiva ai’? (Mātiu 6:8; Sāme 139:4) ʻOku fakahaaʻi ʻe he lea ʻo lotú ʻoku tau tui ki he ʻOtuá mo vakai kiate ia ʻi hono tuʻunga ko e Matavai ia ʻo e “foaki lelei kotoabe moe foaki haohaoa kotoabe.” (Sēmisi 1:​17, PM; Hepelū 11:6) ʻOku hōhōʻia ʻa Sihova ʻi heʻetau ngaahi lotú. (Palōvepi 15:8) ʻOkú ne fiefia ke fanongo mai ki heʻetau ngaahi lea mohu ʻuhinga ʻo e houngaʻiá mo e fakahīkihikiʻí, ʻo hangē pē ko e fiefia ʻa ha tamai ʻi he fanongo ki haʻane kiʻi tama ʻokú ne leaʻaki ange ʻa e ngaahi lea ʻo e fakamālōʻia loto-moʻoni. (Sāme 119:108) ʻI he ʻi ai ha vā lelei ʻa ha tamai mo haʻane tama, ʻoku ʻi ai ʻa e fetuʻutaki māfana. Ko ha kiʻi tama ʻoku ʻofaʻi, ʻokú ne loto ke talanoa ki heʻene tamaí. ʻOku moʻoni tatau pē ʻeni ʻi he fekauʻaki mo hotau vahaʻangatae mo e ʻOtuá. Kapau ʻoku tau houngaʻia moʻoni ʻi he meʻa ʻoku tau ako ʻo fekauʻaki mo Sihová pea mo e ʻofa kuó ne fakahāhaaʻi mai kiate kitautolú, te tau maʻu ha holi mālohi ke fakahaaʻi atu kitautolu kiate ia ʻi he lotu.​—1 Sione 4:​16-18.

 ⁵ ʻI heʻetau fakaofiofi ki he ʻOtua Fungani Māʻolungá, ʻoku totonu ke tau anga-fakaʻapaʻapa, neongo ʻoku ʻikai fiemaʻu ia ke fuʻu hulu ʻetau tokanga ʻo fekauʻaki mo e ngaahi foʻi lea totonu ke tau ngāueʻakí. (Hepelū 4:16) ʻOku tau maʻu maʻu pē ʻa e malava ke fakaofiofi kia Sihova. Pea ko ha monū lahi ē ko ʻetau malava ke ‘lilingi hotau lotó’ ki he ʻOtuá ʻi he lotu! (Sāme 62:8) Ko e houngaʻia ʻia Sihová ʻoku taki atu ia ki ha vahaʻangatae māfana mo ia, ʻo hangē ko ia naʻe maʻu ʻe he tangata anga-tonu ko ʻĒpalahamé ʻi hono tuʻunga ko e kaumeʻa ʻo e ʻOtuá. (Sēmisi 2:23) Ka ʻi he taimi ʻoku fai ai ʻa e lotu ki he ʻEiki Hau ʻo e ʻuniveesí, kuo pau ke tau fai ki heʻene ngaahi fiemaʻu fekauʻaki mo e fakaofiofi kiate iá.

NGAAHI FIEMAʻU ʻO KAU KI HE ʻUNUʻUNU KE OFI KI HE ʻOTUÁ

6, 7. Neongo ʻoku ʻikai fiemaʻu mai ʻe he ʻOtuá ha totongi kae fanongo ki heʻetau ngaahi lotú, ko e hā ʻokú ne fiemaʻu meiate kitautolu ʻi he taimi ʻoku tau lotu aí?

⁶ ʻOku fiemaʻu ha paʻanga kae lava ke fakaofiofi ki he ʻOtuá? ʻOku totongiʻi ʻe he kakai tokolahi ʻa e haʻa faifekaú ke nau lotu maʻanautolu. ʻOku aʻu ʻo tui ʻa e niʻihi ʻe ongoʻi ʻa ʻenau ngaahi lotú ʻo fakatatau ki he lahi ʻo e foaki ʻoku nau faí. Kae kehe, ʻoku ʻikai pehē ʻe he Folofola ʻa e ʻOtuá ia ʻoku fiemaʻu kiate kitautolu ke tau fai ha foaki fakapaʻanga ka tau fakaofiofi ai kia Sihova ʻi he lotú. Ko ʻene ngaahi tokonaki fakalaumālié pea mo e ngaahi tāpuaki ʻo ha maʻu ha vahaʻangatae mo ia ʻi he lotú ʻoku ala maʻu taʻetotongi ia.​—ʻAisea 55:​1, 2.

⁷ Ko ia ai, ko e hā leva ʻoku fiemaʻú? Ko ha loto-totonu ʻa ia ko e taha ia ha fiemaʻu pau. (2 Kalonikali 6:​29, 30; Palōvepi 15:11) Kuo pau ke tau ngāueʻi ʻi hotau lotó ʻa e tui kia Sihova ko e ʻOtuá ʻi hono tuʻunga ko e tokotaha ʻokú ne “ogoʻi ae lotu” pea “oku ne totogi kiate kinautolu oku kumi lahi kiate ia.” (Sāme 65:2, PM; Hepelū 11:6, PM) Kuo pau ke tau toe maʻu ha loto-fakatōkilalo. (2 Tuʻi 22:19; Sāme 51:17) ʻI he taha ʻo ʻene ngaahi fakatātaá, naʻe fakahaaʻi ai ʻe Sīsū Kalaisi ʻo pehē ʻi he fakaofiofi ki he ʻOtuá ha tokotaha tānaki tukuhau fakatōkilalo ʻaki ʻa e fakakaukau ʻi he loto-fakatōkilaló, naʻe fakamoʻoniʻi ai naʻe māʻoniʻoni ange ia ʻi he tokotaha Fālesi fiemāʻolungá. (Luke 18:​10-14) ʻI heʻetau fakaofiofi ki he ʻOtuá ʻi he lotú, ʻai ke tau manatuʻi “oku fakalielia kia Jihova akinautolu kotoabe oku loto fielahi.”​—Palōvepi 16:​5, PM.

8. Kapau ʻoku tau fakaʻamu ke tali mai ʻe he ʻOtuá ʻa ʻetau ngaahi lotú, ko e hā kuo pau ke tau fakamaʻa mei ai kitautolú?

 ⁸ Kapau ʻoku tau loto ke tali ʻe he ʻOtuá ʻa ʻetau ngaahi lotú, kuo pau ke tau fakamaʻa kitautolu mei he ʻulungaanga angahalaʻiá. ʻI hono fakalototoʻaʻi ʻe he ākonga ko Sēmisí ʻa e niʻihi kehé ke nau ʻunuʻunu ke ofi ki he ʻOtuá, naʻá ne tānaki atu: “Fakamaʻa homou nima, ʻa kau angahala; pea fakatapu ʻa homou loto, ʻa kau siosio ua.” (Sēmisi 4:8) Naʻa mo e kau faihalá ʻoku malava ke nau maʻu ha vahaʻangatae melino mo Sihova kapau ʻoku nau fakatomala pea liʻaki ʻenau founga moʻui ki muʻá. (Palōvepi 28:13) Heʻikai malava ke fanongo mai ʻa Sihova kiate kitautolu kapau ʻoku tau fakangalingali pē kuo tau fakamaʻa ʻetau foungá. “Oku i he kakai maonioni ae fofoga oe Eiki, bea oku ogo kiate ia e nau gaahi lotu: ka oku houhau ae fofoga oe Eiki kiate kinautolu oku fai kovi,” ko e lau ia ʻa e Folofola ʻa e ʻOtuá.​—1 Pita 3:12, PM.

9. ʻOku totonu ke tau fakaofiofi kia Sihova ʻo fakafou ʻia hai, pea ko e hā hono ʻuhingá?

⁹ ʻOku fakahā mai ʻe he Tohitapú: “Ko e meʻa ki he tangata, ʻoku ʻikai ha maʻoniʻoni ʻi mamani, ʻa ia ʻoku ne fai lelei, ʻo ʻikai angahala.” (Koheleti 7:20) Ko ia ai, te ke ʻeke nai: ‘ʻOku malava fēfē leva ke tau fakaofiofi ki he ʻOtuá?’ ʻOku tali mai ʻe he Tohitapú: “Ka kuo fai ha angahala ʻe ha taha, ʻoku tau maʻu ha taukapo ki he Tamai, ko Sīsū Kalaisi ko e faitotonu.” (1 Sione 2:1) Neongo ko e kau angahala kitautolu, ʻoku malava ke tau fakaofiofi ki he ʻOtuá ʻaki ʻa e tauʻatāina ke lea ʻo fakafou ʻia Sīsū Kalaisi, ʻa ia naʻá ne pekia ko ha huhuʻi ʻo kitautolu. (Mātiu 20:28) Ko ia pē ʻe taha ʻa e fetuʻutakiʻanga ʻa ia ʻoku malava ke tau fakaofiofi ai kia Sihova ko e ʻOtuá. (Sione 14:6) Kuo pau ke ʻoua te tau ʻai ʻa e mahuʻinga ʻo e feilaulau huhuʻi ʻa Sīsuú ko e meʻa maʻamaʻa mo tau fai fakakaukauʻi pē ha angahala. (Hepelū 10:26) Kae kehe, kapau ʻoku tau fai hotau lelei tahá ke fakaʻehiʻehi mei he meʻa ʻoku koví pea tau kei faihala ʻi ha ngaahi taimi, ʻoku malava ke tau fakatomala mo kole ki he ʻOtuá ha fakamolemole. ʻI he taimi ʻoku tau fakaofiofi ai kiate ia ʻaki ha loto-fakatōkilaló, te ne fanongo mai kiate kitautolu.​—Luke 11:4.

NGAAHI FAINGAMĀLIE KE TALANOA AI KI HE ʻOTUÁ

10. ʻI he fekauʻaki mo e lotú, ʻe anga-fēfē ʻetau faʻifaʻitaki ai kia Sīsuú, pea ko e hā ha niʻihi ʻo e ngaahi faingamālie ke lotu lilo aí?

¹⁰ Naʻe fakamahuʻingaʻi lahi ʻaupito ʻe Sīsū Kalaisi ʻa hono  vahaʻangatae mo Sihová. Ko ia ai, naʻe vaheʻi ʻe Sīsū ha taimi ke talanoa ai ki he ʻOtuá ʻi he lotu lilo. (Maʻake 1:35; Luke 22:​40-46) ʻOku lelei ke tau faʻifaʻitaki ki he faʻifaʻitakiʻanga ʻa Sīsuú pea lotu maʻu pē ki he ʻOtuá. (Loma 12:12) ʻOku taau ke kamata ʻa e ʻahó ʻaki ʻa e ngaahi lea ʻi he lotu, pea ʻi he ki muʻa ke ʻalu ʻo mohé, ʻoku totonu ke tau fakamālō kia Sihova koeʻuhi ko e ngāue ʻi he ʻaho ko iá. ʻI he lolotonga ʻo e ʻahó, fakapapauʻi ke fakaofiofi ki he ʻOtuá “ʻi he faingamalie kotoa pe.” (ʻEfesō 6:18) ʻOku toe lava ke tau lotu fakalongolongo pē ʻi hotau lotó, ʻi he ʻilo ʻoku lava ke fanongo mai ʻa Sihova kiate kitautolu. Ko e talanoa fakalilolilo ki he ʻOtuá ʻoku tokoni ia ki hono ʻai ke mālohi hotau vahaʻangatae mo iá, pea ko e lotu fakaʻaho kia Sihová ʻoku tokoniʻi ai kitautolu ke tau ʻunuʻunu ke toe ofi ange kiate ia.

11. (a) Ko e hā ʻoku totonu ai ke lotu fakataha ʻa e ngaahi fāmilí? (e) ʻOku ʻuhinga ki he hā ʻa hoʻo lea “ʻEmeni” ʻi he ngataʻanga ʻo ha lotu?

¹¹ ʻOku toe fanongo mai ʻa Sihova ki he ngaahi lotu ʻoku fai maʻá ha falukunga kakai. (1 Tuʻi 8:​22-53) ʻOku lava ke tau ʻunuʻunu ke ofi fakaefāmili ki he ʻOtuá, ʻa ia ko e ʻulu ʻo e ʻapí te ne fai ʻa e takí. ʻE ʻai ʻe he meʻá ni ke mālohi ai ʻa e haʻi ʻo e fāmilí, pea ʻe hoko ai ʻa Sihova ko ha tokotaha moʻoni ki he fānau tupú ʻi heʻenau fanongo ki heʻenau mātuʻá ʻoku nau lotu ʻi he anga-fakatōkilalo ki he ʻOtuá. Fēfē kapau ʻoku fakafofongaʻi ʻe ha taha ha faʻahinga ʻi hono fai ʻa e lotú, mahalo pē ʻi ha fakataha ʻa e Kau Fakamoʻoni ʻa Sihová? Kapau ko e kau fanongo kitautolu, tau fanongo tokanga koeʻuhi ʻi he aʻu ki he ngataʻanga ʻo e lotú, ʻoku lava ke tau lea ʻi he loto-ʻaufuatō ʻo pehē “ʻEmeni,” ʻa ia ʻoku ʻuhingá “Ke hoko pehē ia.”​—1 Kolinitō 14:16.

NGAAHI LOTU ʻOKU FANONGO MAI KI AI ʻA SIHOVÁ

12. (a) Ko e hā ʻoku ʻikai tali mai ai ʻe he ʻOtuá ʻa e ngaahi lotu ʻe niʻihi? (e) Ko e hā ʻoku ʻikai totonu ai ke te tokanga taha pē ki heʻete ngaahi fiemaʻu fakafoʻituituí ʻi heʻete lotú?

¹² ʻOku ongoʻi nai ʻe he niʻihi ʻoku ʻikai ke tali mai ʻe he ʻOtuá ʻa ʻenau ngaahi lotú neongo ʻoku nau lotu kiate ia ʻo fakafou ʻia Kalaisi. Kae kehe, naʻe pehē ʻe he ʻaposetolo ko Sioné: “Ka tau ka kole ha mea o fakatatau ki hono finagalo [ʻo e ʻOtuá], oku ne ogoʻi akitautolu.” (1 Sione 5:​14, PM) Ko ia ai, ʻoku fiemaʻu ke tau kole ʻo fakatatau ki he finangalo ʻo e ʻOtuá. Koeʻuhi ʻokú ne  mahuʻingaʻia ʻi heʻetau moʻui lelei fakalaumālié, ko ha meʻa pē ʻokú ne uesia hotau tuʻunga fakalaumālié ko ha meʻa feʻungamālie ia ke lotu ʻo kau ki ai. Kuo pau ke tau talitekeʻi ʻa e fakatauele ke tokanga taha pē ki he ngaahi fiemaʻu fakaesinó. Hangē ko ʻení, neongo ʻoku totonu ke tau lotu ʻo kole ha fakamaama mo ha fakalotolahi ke fekuki ai mo ha mahaki, ʻoku ʻikai totonu ke hanga ʻe he ngaahi loto-moʻua fekauʻaki mo e moʻui leleí ʻo kāsia ʻa e ngaahi mahuʻingaʻia fakalaumālié. (Sāme 41:​1-3) ʻI he ʻilo ʻe ha fefine Kalisitiane ʻe taha naʻe fuʻu tōtuʻa ʻa ʻene tokanga ʻo fekauʻaki mo haʻane moʻui leleí, naʻá ne kole kia Sihova ha tokoni ke ne maʻu ʻa e vakai totonu ki hono mahakí. Ko hono olá, naʻe hoko ʻo siʻi ange ʻaupito ai ʻa ʻene tokanga ki he ngaahi palopalema fekauʻaki mo ʻene moʻuí, pea naʻá ne ongoʻi naʻe ʻoange kiate ia ʻa e “makehe atu ʻo e mafai.” (2 Kolinitō 4:7) Naʻe mālohi ʻaupito ʻa ʻene holi ke ne hoko ʻo tokoni fakalaumālie ki he niʻihi kehé, pea naʻá ne hoko ai ko ha tokotaha fanongonongo taimi-kakato ʻo e Puleʻangá.

13. Hangē ko ia ʻoku hā ʻia Mātiu 6:​9-13, ko e hā ʻa e niʻihi ʻo e ngaahi meʻa feʻungamālie ʻe lava ke tau fakakau ʻi heʻetau ngaahi lotú?

¹³ Ko e hā nai te tau fakakau ʻi heʻetau ngaahi lotú koeʻuhi kae hōifua ʻa Sihova ke fanongo mai ki ai? Naʻe akoʻi ʻe Sīsū Kalaisi ki heʻene kau ākongá ʻa e founga ke lotu aí. ʻI he sīpinga lotu naʻe hiki ʻi he Mātiu 6:​9-13, naʻá ne fokotuʻu ai ha sīpinga ʻo e ngaahi meʻa ʻoku totonu nai ke tau lotu ʻo kau ki aí. Ko e hā ʻoku totonu ke tau tokanga tefito ki ai ʻi heʻetau ngaahi lotú? Kuo pau ke muʻomuʻa taha ʻa e huafa ʻo Sihova ko e ʻOtuá mo hono Puleʻangá. ʻOku feʻunga ke kole ʻo fekauʻaki mo e ngaahi fiemaʻu fakamatelie kiate kitautolú. ʻOku toe mahuʻinga foki ke kole ke fakamolemoleʻi ʻetau ngaahi angahalá pea fakahaofi kitautolu mei he ngaahi ʻahiʻahí mo e tokotaha anga-fulikivanu, ko Sētane ko e Tēvoló. Naʻe ʻikai fiemaʻu ʻe Sīsū ke tau hivehivaʻi ʻa e lotú ni pe toutou leaʻaki pē ia, ʻo lau pē ia kae ʻikai ke fakakaukau fekauʻaki mo hono ʻuhingá. (Mātiu 6:7) Ko ha faʻahinga vahaʻangatae fēfē ia naʻe mei hoko ki ai kapau naʻe ngāueʻaki pē ʻe ha kiʻi tama ia ʻa e ngaahi foʻi lea tatau ʻi he taimi kotoa pē naʻá ne lea ai ki heʻene tamaí?

14. Tukukehe ʻa e ngaahi kolé, ko e hā ʻa e ngaahi lotu ʻoku totonu ke tau faí?

¹⁴ Tukukehe ʻa e ngaahi kole mo e ngaahi hū loto-moʻoní, ʻoku  totonu ke tau fai ʻa e ngaahi lotu ʻo e fakahīkihiki mo e fakamālō. (Sāme 34:1; 92:1; 1 Tesalonaika 5:18) ʻOku lava foki ke tau lotu maʻá ha niʻihi kehe. Ko e ngaahi lotu ʻo fekauʻaki mo hotau ngaahi tokoua mo e ngaahi tuofāfine fakalaumālie ʻoku nau faingataʻaʻia pe fakatangaʻí ʻoku fakahaaʻi ai ʻa ʻetau mahuʻingaʻia ʻiate kinautolú, pea ʻoku hōifua ʻa Sihova ke ne fanongo mai kiate kitautolu ʻoku tau fakahaaʻi ha tokanga pehē. (Luke 22:32; Sione 17:20; 1 Tesalonaika 5:25) Ko hono moʻoní, naʻe tohi ʻe he ʻaposetolo ko Paulá: “Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.”​—Filipai 4:​6, 7.

KĪTAKI ʻI HE LOTU

15. Ko e hā ʻoku totonu ke tau manatuʻí kapau ʻoku hā ngali ʻoku ʻikai ke tali mai ʻa ʻetau ngaahi lotú?

¹⁵ Neongo ʻokú ke maʻu ʻa e ʻilo fekauʻaki mo e ʻOtuá, ʻokú ke ongoʻi nai ʻi he taimi ʻe niʻihi ʻoku ʻikai tali mai hoʻo ngaahi lotú. ʻOku lava ke hoko ʻeni koeʻuhi ʻoku ʻikai nai ko e taimi ia ʻa e ʻOtuá ke ne tali ai ha lotu pau. (Koheleti 3:​1-9) ʻOku fakaʻatā nai ʻe Sihova ha faʻahinga tuʻunga ke hokohoko atu ʻi ha kiʻi taimi siʻi, ka ʻokú ne tali ʻa e ngaahi lotú pea ʻokú ne ʻafioʻi ʻa e taimi lelei taha ke fai pehē aí.​—2 Kolinitō 12:​7-9.

16. Ko e hā ʻoku totonu ai ke tau kīvoi ʻi he lotú, pea ko e hā hono kaunga ki hotau vahaʻangatae mo e ʻOtuá ʻa hono fai ʻo e meʻá ni?

¹⁶ Ko ʻetau kīvoi ʻi he lotú ʻoku hā ai ʻa ʻetau mahuʻingaʻia loto-moʻoni ʻi he meʻa ʻoku tau leaʻaki ki he ʻOtuá. (Luke 18:​1-8) Ko e fakatātaá, ʻoku tau kole nai kia Sihova ke tokoniʻi kitautolu ke tau ikuʻi ha vaivaiʻanga. ʻI he kītaki ʻi he lotú pea ngāue ʻo fehoanaki mo ʻetau ngaahi kolé, ʻoku tau fakahāhā ai ʻa hotau loto-totonú. ʻOku totonu ke tau loto-pau mo faitotonu ʻi heʻetau ngaahi kolé. ʻOku mātuʻaki mahuʻinga ke tau lotu lahi ʻaupito ʻi he taimi ʻoku tau hokosia ai ha ʻahiʻahi. (Mātiu 6:13) ʻI heʻetau hokohoko atu ʻetau lotú lolotonga ia ʻetau feinga ke mapuleʻi ʻetau ngaahi holi angahalaʻiá, te tau sio ai ki he founga ʻo hono tokoniʻi kitautolu ʻe Sihová. ʻE langa hake ʻe he meʻá ni ʻa ʻetau tuí mo ʻai ke mālohi hotau vahaʻangatae mo iá.​—1 Kolinitō 10:13; Filipai 4:13.

17. Ko e hā ʻa e ʻaonga te tau maʻu mei ha fakakaukau faʻa lotu ʻi he tauhi ki he ʻOtuá?

 ¹⁷ ʻI hono fakatupu ha fakakaukau faʻa lotu ʻi hono fai ʻa e ngāue toputapu kia Sihova ko e ʻOtuá, te tau toki fakatokangaʻi ai ʻoku ʻikai te tau tauhi kiate ia ʻi hotau mālohi pē ʻo kitautolú. Ko Sihova ia ʻokú ne ʻai ke malava ʻo fai ʻa e ngaahi meʻá. (1 Kolinitō 4:7) ʻE tokoniʻi kitautolu ʻe he lāuʻilo ki he meʻá ni ke tau hoko ai ʻo anga-fakatōkilalo pea ʻe lelei ange ai hotau vahaʻangatae mo iá. (1 Pita 5:​5, 6) ʻIo, ʻoku tau maʻu ʻa e ngaahi ʻuhinga mālohi ke kītaki ʻi he lotu. Ko ʻetau ngaahi lotu tōtōiví mo e ʻilo maʻongoʻonga ki he founga ke ʻunuʻunu ofi ai ki heʻetau Tamai fakahēvani anga-ʻofá te na ʻai ʻetau moʻuí ke fiefia moʻoni.

FETUʻUTAKI MO SIHOVÁ ʻOKU ʻIKAI FAKAFAʻAHITAHA

18. ʻOku malava fēfē ke tau fanongo ki he ʻOtuá?

¹⁸ Kapau ʻoku tau loto ke fanongo mai ʻa e ʻOtuá ki heʻetau ngaahi lotú, kuo pau ke tau fakafanongo ki he meʻa ʻokú ne folofolaʻakí. (Sākalaia 7:13) ʻOku ʻikai te ne kei ʻomai ʻa ʻene ngaahi pōpoakí ʻo fakafou mai ʻi ha kau palōfita fakamānavaʻi fakaʻotua pea ko hono moʻoní ʻoku ʻikai te ne ngāueʻaki ha ngaahi founga fakafaʻahikehe. (Teutalōnome 18:​10-12) Ka ʻoku malava ke tau fanongo ki he ʻOtuá ʻaki hono ako ʻa ʻene Folofolá, ko e Tohitapú. (Loma 15:4; 2 Tīmote 3:​16, 17) Hangē pē ko e fiemaʻu nai ke tau fakatupu ha ifoʻia ki ha meʻakai fakamatelie ʻoku fakatupu moʻui lelei kiate kitautolú, ʻoku pehē ʻa e naʻinaʻi mai kiate kitautolu ke tau “holi lahi, . . . ki he hua huhu taekākā oe folofola.” Fakatupu leva ha ifoʻia ki he meʻakai fakalaumālié ʻaki hono lau fakaʻaho ʻa e Folofola ʻa e ʻOtuá.​—1 Pita 2:​2, 3, PM; Ngāue 17:11.

19. Ko e hā ʻa e ʻaonga ʻo e fakalaulauloto ki he meʻa ʻokú ke lau ʻi he Tohitapú?

¹⁹ Fakalaulauloto ki he meʻa ʻokú ke lau ʻi he Tohitapú. (Sāme 1:​1-3; 77:​11, 12) ʻOku ʻuhinga iá ke ke fakakaukau ki he fakamatalá. ʻE lava ke ke fakatatau ʻa e meʻá ni ki hono fakamolū ʻo e meʻakaí. ʻOku lava ke ke fakamolū ʻa e meʻakai fakalaumālié ʻaki hono fakafekauʻaki ʻa e meʻa ʻokú ke laú ki he ngaahi meʻa kuó ke ʻosi ʻiló. Fakakaukau atu ki he anga ʻo e kaunga ʻa e fakamatalá ki hoʻo moʻuí, pe sio loto atu pe ko e hā ʻokú ne fakahaaʻi mai ʻo fekauʻaki mo e ngaahi ʻulungaanga mo e ngaahi feangainga ʻa Sihová. Ko ia, fakafou ʻi he ako fakafoʻituituí, ʻe lava ke  ke maʻu ai ʻa e meʻakai fakalaumālie ʻa ia ʻoku tokonaki mai ʻe Sihová. ʻE tohoaki koe ʻe he meʻá ni ke ke ʻunuʻunu ofi ange ai ki he ʻOtuá pea ʻe tokoniʻi ai koe ke ke fekuki mo e ngaahi palopalema fakaʻahó.

20. ʻOku fēfē hono tokoniʻi kitautolu ʻe he maʻu ʻo e ngaahi fakataha faka-Kalisitiané ke tau ʻunuʻunu ʻo ofi ai ki he ʻOtuá?

²⁰ ʻOku lava ke ke toe ʻunuʻunu ke ofi ki he ʻOtuá ʻaki hoʻo fanongo ki hono fakamatalaʻi ʻo ʻene Folofolá ʻi he ngaahi fakataha faka-Kalisitiané, ʻo hangē pē ko e fanongo tokanga ʻa e kau ʻIsilelí ʻi he taimi naʻa nau fakatahataha ai ke fanongo ki hono lau mai ki he kakaí ʻa e Lao ʻa e ʻOtuá. Ko e kau faiako ʻo e taimi ko iá naʻa nau ʻai ke ʻuhinga ʻa ʻenau lau ʻa e Laó, ʻo tokoni ia ke mahino ki heʻenau kau fanongó pea ueʻi ai kinautolu ke ngāueʻaki ʻa e meʻa naʻa nau fanongo ki aí. Naʻe iku ʻeni ki he loto-fiefia lahi. (Nehemaia 8:​8, 12) Ko ia, ʻai ke ke tōʻongaʻaki ʻa hono maʻu ʻa e ngaahi fakataha ʻa e Kau Fakamoʻoni ʻa Sihová. (Hepelū 10:​24, 25) ʻE tokoni ʻeni kiate koe ke mahino pea mo ngāueʻaki ʻa e ʻiloʻi ʻo e ʻOtuá ʻi hoʻo moʻuí pea te ke maʻu ai ʻa e fiefia. ʻE tokoniʻi koe ʻi he hoko ko ha konga ʻo e fetokouaʻaki faka-Kalisitiane ʻi māmani lahí ke ke nofo ofi ai kia Sihova. Pea hangē ko ia te tau toki sio ki aí, te ke lava ai ke maʻu ʻa e maluʻanga moʻoni ʻi he lotolotonga ʻo e kakai ʻa e ʻOtuá.

SIVIʻI HOʻO ʻILÓ

Ko e hā ʻoku totonu ai ke ke ʻunuʻunu ke ofi kia Sihová?

Ko e hā ʻa e ngaahi fiemaʻu ʻe niʻihi ki he ʻunuʻunu ke ofi ki he ʻOtuá?

Ko e hā ʻe lava ke ke fakakau ʻi hoʻo ngaahi lotú?

Ko e hā ʻoku totonu ai ke ke kītaki ʻi he lotú?

ʻE lava fēfē ke ke fanongo kia Sihova he ʻahó ni?

[Fehuʻi ki he Ako]

 [Fakatātā peesi kakató ʻi he peesi 157]