Vahe 15

Ko Hono Faʻu ha Fāmili ʻOku Fakalāngilangiʻi Ai ʻa e ʻOtuá

1-3. Ko e hā ʻoku ʻikai malava ai ʻe he niʻihi ke solova ʻa e ngaahi palopalema ʻoku hoko lahi ki he nofo malí mo e tuʻunga ko e mātuʻá, ka ko e hā ʻoku malava ai ke tokoni ʻa e Tohitapú ia?

 PEHĒ pē ʻokú ke palani ke langa hao ʻapi pē ʻoʻou. ʻOkú ke fakatau mai ʻa e konga ʻapí. ʻI he fakatuʻamelie vēkeveke, ʻokú ke sio loto atu ki ho fale foʻoú. Kae fēfē kapau ʻoku ʻikai te ke maʻu ʻe koe ha ngaahi meʻangāue mo ha ngaahi pōtoʻi fakaelanga? Ko ha koto kulanoa ē ka ko hoʻo ngaahi feingá!

² ʻOku lahi ʻa e ngaahi hoa mali ʻoku nau kamata ʻi he nofo malí ʻo sio loto atu ki ha fāmili fiefia, ka ʻoku ʻikai te nau maʻu ʻa e ngaahi meʻangāue mo e ngaahi pōtoʻi ʻoku fiemaʻu ki hono faʻu iá. ʻI he hili pē ha taimi siʻi mei he ʻaho malí, ʻoku tupulaki mai leva ʻa e ngaahi sīpinga ʻoku ʻikai sai. ʻOku hoko leva ʻa e keé mo e feʻiteʻitaní ko ha founga tuʻumaʻu fakaʻaho ia. ʻI he taimi ʻoku fanauʻi mai ai ʻa e fānaú, ʻoku ʻilo leva ʻe he tamai mo e faʻē foʻoú ni ʻoku ʻikai te na pōtoʻi ʻi he tuʻunga ko e mātuʻá ʻo hangē pē ko ia he nofo malí.

³ Kae kehe, ko e meʻa fakafiefiá, ʻoku malava ke tokoni ʻa e Tohitapú. Ko ʻene ngaahi tefitoʻi moʻoní ʻoku hangē ha ngaahi meʻangāue ʻoku nau fakamafeia koe ke ke faʻu ha fāmili fiefia. (Palōvepi 24:3) Tau sio ange pe ʻoku lavaʻi fēfē ia.

NGAAHI MEʻANGĀUE KI HONO FAʻU HA NOFO MALI FIEFIÁ

4. Ko e hā kuo pau ai ke ʻamanekina ha ngaahi palopalema ʻi he nofo malí, pea ko e hā ʻa e ngaahi tuʻunga ʻoku tokonaki mai ʻi he Tohitapú?

⁴ Tatau ai pē ʻa hono lahi ʻo e hā ngali hoamālie ʻa ha ongo meʻa mali, ʻokú na kehekehe ʻi he faʻunga fakaeongó, ngaahi  meʻa naʻe hokosia ʻi he kei siʻí, mo e ʻātakai fakafāmilí. Ko ia ai, ʻoku ʻamanekina ʻe ʻi ai ha ngaahi palopalema ʻi he hili ʻa e malí. ʻE fēfē hono lavaʻi kinautolú? Sai, ʻi hono langa ʻe he kau tufungá ha fale, ʻoku nau vakai ki he ngaahi palaní. Kuo pau ke muimui ki he ngaahi fakahinohino ko iá. ʻOku ʻomai ʻe he Tohitapú ʻa e ngaahi tuʻunga ʻa e ʻOtuá ki hono faʻu ha fāmili fiefiá. Tau vakai ange he taimí ni ki ha niʻihi ʻo e ngaahi meʻá ni.

5. ʻOku anga-fēfē hono fakamamafaʻi ʻe he Tohitapú ʻa e mahuʻinga ʻo e mateakí ʻi he nofo malí?

⁵ Mateaki. Naʻe pehē ʻe Sīsū: “Ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata.” a (Mātiu 19:6) Naʻe tohi ʻe he ʻaposetolo ko Paulá: “Ke lauʻi lelei ʻa e mali ʻe he kakai kotoa pe; pea ke taʻeʻuliʻi ʻa e mohenga: he ko e kau feʻauaki, mo e tonoʻunoho ʻe fakamāu kinautolu ʻe he ʻOtua.” (Hepelū 13:4) Ko ia ai, ʻoku totonu ki he faʻahinga kuo malí ke nau ongoʻi ko honau moʻua ia kia Sihova ke nofo anga-tonu ki honau hoa malí.​—Sēnesi 39:​7-9.

6. ʻE anga-fēfē ʻa e tokoni ʻa e mateakí ki hono fakatolonga ha nofo mali?

⁶ ʻOku ʻomai ʻe he ʻofa-mateakí ʻa e ngeia mo e maluʻanga ki he nofo malí. ʻOku ʻiloʻi ʻe he ngaahi hoa mali ʻoku mateakí, te nau fepoupouaki, neongo pe ko e hā pē ha meʻa ʻe hoko. (Koheleti 4:​9-12) He kehekehe lahi ē mei he faʻahinga ʻoku nau liʻaki ʻenau nofo malí ʻi he ʻuluaki pā mai pē ʻa e palopalemá! ʻOku vave pē ʻa e faʻahinga peheé ke fakaʻosiʻaki ʻo pehē naʻa nau ‘fili ʻa e tokotaha hala,’ ʻa ia kuo nau hoko ‘ʻo ʻikai ke kei feʻofaʻaki,’ ko e fakaleleiʻangá pē ko ha hoa mali foʻou. Ka ʻoku ʻikai ke ʻoange ʻe he fakamulituku ko ʻení ia ha faingamālie ki he hoa malí ke tupulekina ai. Kae kehe, ʻoku ʻoatu nai ʻe he faʻahinga taʻemateaki pehē ní ʻa e ngaahi palopalema tatau ki he ngaahi hoa mali foʻoú. ʻI hono maʻu ʻe ha taha ha fale lelei peá ne ʻiloʻi ʻoku tutulu ʻa e ʻató ia, ʻoku pau te ne feinga ke fakaleleiʻi ia. ʻOku ʻikai te ne hiki pē ki ha toe fale ʻe taha. ʻI he tuʻunga meimei tatau, ko hono fetongi ʻo ha hoa mali, ʻoku ʻikai ko e founga ia ki hono solova ʻa e ngaahi fakakikihi ʻoku tupu mei ai ʻa e fepaki fakaemalí. ʻI he malanga hake ʻa e ngaahi palopalemá, ʻoua ʻe feinga ke mavahe mei he nofo malí, kae feinga tōtōivi ke fakatolonga  ia. ʻOku vakai ʻa e mateaki peheé ki he nofo malí ko ha meʻa ʻoku taau ke maluʻi, tauhi maʻu, pea koloaʻaki.

7. Ko e hā ʻoku faʻa faingataʻa ai ki he kakai malí ʻa e fetuʻutakí, ka ʻoku anga-fēfē ʻa e tokoni ʻa hono ʻai “ʻa e tangata foʻou”?

⁷ Fetuʻutakí. “ʻOku maumau fakakaukau ʻa e ʻikai fai ha alea,” ko e lau ia ʻa ha palōvepi ʻi he Tohitapú. (Palōvepi 15:22) Ka, ʻoku faingataʻa ki he ngaahi hoa mali ia ʻe niʻihi ʻa e fetuʻutakí. Ko e hā ʻoku pehē aí? Koeʻuhi ʻoku kehekehe ʻa e ngaahi founga fetuʻutaki ʻa e kakaí. Ko e moʻoniʻi meʻa ʻeni ʻoku faʻa iku atu ai ki he taʻefemahinoʻaki lahi mo e ongoʻi feifeitamaki. ʻOku kaunga nai ʻi he meʻá ni ʻa e founga ʻo hono akonakiʻí. Ko e fakatātaá, naʻe tauhi hake nai ha niʻihi ia ʻi ha ʻatimosifia ʻo e kē maʻu pē ʻa e ongo mātuʻá. ʻI he tuʻunga leva ko e kakai lalahi kuo malí, ʻoku ʻikai nai te nau ʻilo ʻa e founga ke lea ai ki honau hoa malí ʻi ha founga anga-ʻofa mo ʻofa. Ka neongo ia, ʻoku ʻikai fiemaʻu homo ʻapí ke fakaʻau ʻo hoko ko ha ‘fale ʻoku fonu ʻi he kē.’ (Palōvepi 17:1) ʻOku fakamamafaʻi mai ʻe he Tohitapú ʻa hono ʻai “ʻa e tangata foʻou,” pea ʻoku ʻikai te ne tali ʻa e ʻita tōlilí, feʻiohoʻakí, mo e lauʻikoví.​—ʻEfesō 4:​22-24, 31.

8. Ko e hā ʻe tokoni nai ʻi he taimi ʻokú ke loto-kehekehe ai mo ho hoá?

 ⁸ Ko e hā ʻoku malava ke ke fai ʻi he ʻi ai ha ngaahi loto-kehekehe? Kapau ʻoku kamata ke ʻalu hake ʻa e ongoʻi ʻitá, ʻe lelei nai ke ke muimui ki he faleʻi ʻa e Palōvepi 17:14: “Ke ke ʻatā mai koe ʻi he teʻeki ke aʻu ki he feinaʻaki.” ʻIo, ʻe lava ke ke toloi ʻa e fetalanoaʻakí ki ʻamui ange, ki he taimi te mo fakatou mokomoko hifo aí. (Koheleti 3:​1, 7) Ko e hā pē ha meʻa ʻoku hoko, feinga ke “vave . . . he fanongo, kae fakatotoka ki he lea, pea fakatotoka ki he ʻita.” (Sēmisi 1:19) ʻOku totonu ko hoʻo taumuʻá ia ke fakaleleiʻi ʻa e tuʻunga ʻoku hokó, ʻikai ko hono ikunaʻi ʻa e fakakikihí. (Sēnesi 13:​8, 9) Filifili ha ngaahi lea pea mo ha founga ʻo e leá ʻa ia te ne ʻai koe mo ho hoá ke mo mokomoko hifo. (Palōvepi 12:18; 15:​1, 4; 29:11) Sinoemeʻa, ʻoua ʻe nōfoʻi ʻi ha tuʻunga fakaʻita, kae kumi ki ha tokoni ʻaki ʻa e fetuʻutaki ki he ʻOtuá ʻi he lotu anga-fakatōkilalo fakataha.​—ʻEfesō 4:​26, 27; 6:18.

9. Ko e hā ʻoku lava ai ke pehē ʻoku kamata ʻa e fetuʻutakí ʻi he lotó?

⁹ ʻOku pehē ʻe ha palōvepi ʻi he Tohitapú: “Oku akoʻi e he loto oe boto a hono gutu, bea oku ne fakalahi ae boto ki hono lougutu.” (Palōvepi 16:​23, PM) Ko ia, ko hono moʻoní, ko e kī ki he lavameʻa ʻa e fetuʻutakí ʻoku ʻi he lotó ia, ʻikai ʻi he ngutú. Ko e hā hoʻo fakakaukau atu ki ho hoá? ʻOku fakalototoʻaʻi mai ʻe he Tohitapú ʻa e kau Kalisitiané ke nau fakahāhā ʻa e “tauʻaki kaungāmamahi.” (1 Pita 3:8) ʻE lava ke ke fai ia ʻi he taimi ʻoku hokosia ai ʻe ho hoa malí ha loto-moʻua fakamamahi? Kapau ko ia, ʻe tokoni ia kiate koe ke ke ʻilo ʻa e anga hoʻo tali ʻe faí.​—ʻAisea 50:4.

10, 11. ʻE lava fēfē ke ngāueʻaki ʻe ha husepāniti ʻa e akonaki ʻi he 1 Pita 3:7?

¹⁰ Tokaʻi mo Fakaʻapaʻapaʻi. ʻOku tala ki he ngaahi husepāniti Kalisitiané ke nau nofo mo honau ngaahi uaifí “o fakatatau ki he ilo, o fakaabaaba [“tokaʻi,” NW] ki he unoho, o tāu moe ibu vaivai.” (1 Pita 3:7, PM) Ko hono tokaʻi ʻa hoto uaifí ʻoku kau ki ai ʻa hono ʻiloʻi hono mahuʻingá. Ko ha husepāniti ʻoku nofo mo hono uaifí “o fakatatau ki he ilo” ʻokú ne tokanga lahi ki heʻene ngaahi ongoʻí, ngaahi mālohí, ʻatamai potó, mo hono ngeiá. ʻOku toe totonu foki ke ne ako ke ʻilo ki he anga ʻo e vakai ʻa Sihova ki he kakai fefiné pea mo e founga ʻokú ne finangalo ke fai kiate kinautolú.

 ¹¹ ʻI ho falé, tau pehē ʻoku ʻi ai haʻo ʻaiʻanga meʻa ʻoku ʻaonga ʻaupito ʻa ia ʻoku mātuʻaki pelepelengesi. ʻIkai te ke fai ha tokanga lahi ki ai? Sai, naʻe ngāueʻaki ʻe Pita ʻa e kupuʻi lea ko e “ibu vaivai” ʻi ha fakakaukau meimei tatau, pea ʻoku totonu ke ueʻi ʻe he meʻá ni ha husepāniti Kalisitiane ke ne fakahāhā ʻa e tokanga fakaalaala ki hono uaifi ʻofeiná.

12. ʻE anga-fēfē hono fakahāhā ʻe ha uaifi ʻokú ne fakaʻapaʻapa loloto ki hono husepānití?

¹² Ka ko e hā ʻa e akonaki ʻoku fai ʻe he Tohitapú ki ha uaifi? Naʻe tohi ʻe Paula: “Ko e uaifi ke ne fakaʻapaʻapa ki hono husepaniti.” (ʻEfesō 5:33) Hangē pē ko e fiemaʻu ke ongoʻi ʻe ha uaifi ʻoku tokaʻi mo ʻofeina ia ʻe hono hoá, ʻoku fiemaʻu ke ongoʻi ʻe ha husepāniti ʻoku fakaʻapaʻapaʻi ia ʻe hono uaifí. ʻE ʻikai ke fāivale ha uaifi anga-fakaʻapaʻapa ʻo fakamafola holo ʻa e ngaahi fehālaaki ʻa hono husepānití, tatau ai pē pe ko ha tangata Kalisitiane ia pe ʻikai. ʻE ʻikai te ne toʻo meiate ia ʻa hono ngeiá ʻaki hano fakaangaʻi mo paetakuʻi ia ʻo tatau pē pe ʻoku fai ia ʻo fakapulipuli pe fai fakahāhā.​—1 Tīmote 3:11; 5:13.

13. ʻE lava fēfē ke fakahaaʻi ʻa e ngaahi fakakaukaú ʻi ha founga melino?

¹³ ʻOku ʻikai ʻuhinga ʻeni ia heʻikai malava ke fakahā ʻe ha uaifi ʻa ʻene ngaahi fakakaukaú. Kapau ʻoku ʻi ai ha meʻa ʻokú ne fakahohaʻasi ia, ʻoku lava ke ne leaʻaki ia ʻi he anga-fakaʻapaʻapa. (Sēnesi 21:​9-12) Ko hono fakahoko atu ha foʻi fakakaukau ki hono husepānití ʻoku lava ke fakatatau ia ki haʻane lī atu ha foʻi pulu kiate ia. ʻOku lava ke ne lī fakalelei atu ia koeʻuhi kae lava ke ne hapo lelei ia, pe ʻoku lava ke ne tolongi mālohi atu ia ʻo ne lavea ai. He lelei lahi ange ē ʻoku hoko ʻi he taimi ʻoku fakatou fakaʻehiʻehi ai ʻa e ongo meʻa malí mei he haʻaki atu ʻa e tukuakiʻí, kae lea ʻi ha founga anga-ʻofa mo anga-malū!​—Mātiu 7:12; Kolose 4:6; 1 Pita 3:​3, 4.

14. Ko e hā ʻoku totonu ke ke faí kapau ʻoku ʻikai loko mahuʻingaʻia ho hoá ʻoʻou ʻi hono ngāueʻaki ʻa e ngaahi tefitoʻi moʻoni ʻa e Tohitapú ʻi he nofo malí?

¹⁴ Hangē ko ia kuo tau vakai ki aí, ʻoku malava ke tokoniʻi koe ʻe he ngaahi tefitoʻi moʻoni ʻi he Tohitapú ke faʻu ha nofo mali fiefia. Kae fēfē kapau ʻoku ʻikai loko mahuʻingaʻia ho hoá ʻi he meʻa ʻoku leaʻaki ʻe he Tohitapú? ʻOku kei malava pē ke lavaʻi ʻa e ngaahi meʻa lahi kapau te ke ngāueʻaki ʻa e ʻiloʻi ʻo e  ʻOtuá ʻi ho ngafá. Naʻe tohi ʻe Pita: “ʻA kau fefine, mou anganofo ki homou ngaahi husepaniti; koeʻuhi ka ai ha niʻihi ʻoku talangataʻa ki he folofola, heiʻilo ʻe maʻu mai kinautolu ʻaki ʻa e ngaahi toʻonga ʻa honau ngaahi uaifi, kae ʻikai ʻaki ha lea; heʻenau mamata ki he maʻa ʻo hoʻomou fakafeangai mo taka ʻapasia.” (1 Pita 3:​1, 2) Ko hono moʻoní, ko e meʻa tatau pē ʻe ngāueʻaki ʻe ha husepāniti ʻa ia ko hono uaifí ʻoku ʻikai tokanga ia ki he Tohitapú. Tatau ai pē pe ko e hā ha meʻa ʻoku fili ho hoá ke ne faí, fakaʻatā ʻa e ngaahi tefitoʻi moʻoni ʻi he Tohitapú ke nau ʻai koe ko ha hoa mali lelei ange. ʻOku malava ʻe he ʻiloʻi ʻo e ʻOtuá ke ne toe ʻai koe ko ha mātuʻa lelei ange.

KO HONO TAUHI HAKE ʻO E FĀNAÚ ʻO FAKATATAU KI HE ʻILOʻI ʻO E ʻOTUÁ

15. ʻOku anga-fēfē ʻa e hokohoko atu ʻi he taimi ʻe niʻihi ʻa e ngaahi founga tamele ʻo e tauhi fānau ʻa e mātuʻá, ka ʻe lava fēfē nai ke liliu ʻa e founga ko iá?

¹⁵ ʻOku ʻikai ko ʻete maʻu pē ha kili pe ko ha hāmalá peá te hoko ai kita ko ha tufunga pōtoʻi. Pehē foki, ʻoku ʻikai ke ʻai kita ʻe heʻete maʻu pē ha fānaú ke te hoko ai ko ha mātuʻa pōtoʻi. ʻI he ʻilo ki ai pe taʻeʻilo, ʻoku faʻa tauhi hake pē ʻe he ngaahi mātuʻá ʻa ʻenau fānaú ʻi he founga naʻe tauhi hake ai kinautolú. Ko ia, ko e ngaahi founga tamele ʻo e tauhi fānau ʻa e mātuʻá, ʻoku hokohoko atu ia ʻi he taimi ʻe niʻihi mei he toʻutangata ʻe taha ki he toʻutangata hono hokó. ʻOku pehē ʻe ha palōvepi faka-Hepelū ʻo e kuonga muʻá: “Kuo kai e he gaahi tamai ae kalebi mahi, bea kuo maninia ae nifo oe fānau.” Kae kehe, ʻoku fakahaaʻi mai ʻe he ngaahi Konga Tohitapú ʻoku ʻikai ko ha meʻa ia kuo pau ki ha taha ke ne muimui ʻi he ʻalunga naʻe fokotuʻu ʻe heʻene ongo mātuʻá. ʻOku malava ke ne fili ha hala kehe, ʻa e hala ʻoku tākiekina ʻe he ngaahi tuʻutuʻuni ʻa Sihová.​—ʻIsikeli 18:​2, 14, 17, PM.

16. Ko e hā ʻoku mahuʻinga ai ke fai ʻa e tokonaki ki ho fāmilí, pea ʻoku kau ki ai ʻa e hā?

¹⁶ ʻOku ʻamanekina ʻe Sihova mei he ngaahi mātuʻa Kalisitiané ke nau ʻoange ki heʻenau fānaú ʻa e tataki mo e tokanga totonú. Naʻe tohi ʻe Paula: “Ka ʻo ka ai ha taha ʻoku ʻikai tokanga ki hono kainga, kaeʻumaʻā hono famili, ʻoku ne fakaʻikaiʻi ʻene lotu, ʻio, ʻoku ne koviange ʻi ha hiteni.” (1 Tīmote 5:8) Ko ha  ngaahi lea mālohi ē! Ko hono fakahoko ho ngafá ʻi he tuʻunga ko ha tokotaha-tokonakí, ʻa ia ʻoku kau ai ʻa hono tokangaʻi ʻa e ngaahi fiemaʻu fakaesino, fakalaumālie, mo e fakaeongo ʻa hoʻo fānaú, ko ha monū mo e fatongia ia ʻo ha tokotaha anga-fakaʻotua. ʻOku ʻomai ʻe he Tohitapú ʻa e ngaahi tefitoʻi moʻoni ʻa ia ʻoku malava ke tokoniʻi ai ʻa e ngaahi mātuʻá ki hono faʻu ha ʻātakai fakafiefia ki heʻenau fānaú. Fakakaukau ange ki he niʻihi ʻo e ngaahi meʻá ni.

17. Ko e hā ʻoku fiemaʻu pau kae hoko ʻo ʻi he loto ʻo hoʻomo fānaú ʻa e lao ʻa e ʻOtuá?

¹⁷ Fokotuʻu ha faʻifaʻitakiʻanga lelei. Naʻe fekau ki he ngaahi mātuʻa ʻIsilelí: “Te ke uhuʻi [ʻa e ngaahi folofola ʻa e ʻOtuá] ki hoʻo fanau, pea te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.” Naʻe fiemaʻu ke akoʻi ʻe he ngaahi mātuʻá ʻa e ngaahi tuʻunga ʻa e ʻOtuá ki heʻenau fānaú. Ka ko e akonaki ko ʻení naʻe hiki ʻi muʻa ai ʻa e leá ni: “Ko e ngaahi foʻi folofola ko eni ʻoku ou kouna atu he ʻaho ni ʻe fuesia ʻe ho loto.” (Teutalōnome 6:​6, 7, fakaʻītali ʻamautolu.) ʻIo, heʻikai malava ke foaki ʻe he ngaahi mātuʻá ha meʻa ʻoku ʻikai te nau maʻu. Kuo pau ke ʻuluaki tohi tongi ʻa e ngaahi lao ia ʻa e ʻOtuá ʻi homou lotó ʻo kapau ʻoku mou fiemaʻu ke tohi ia ʻi he loto ʻo hoʻomou fānaú.​—Palōvepi 20:7; fakafehoanaki mo Luke 6:40.

18. ʻI hono fakahaaʻi ʻa e ʻofá, kuo anga-fēfē hono fokotuʻu ai ʻe Sihova ha faʻifaʻitakiʻanga tuʻu-ki-muʻa maʻá e ngaahi mātuʻá?

¹⁸ Fai ha fakapapauʻi ʻo hoʻo ʻofá. ʻI he papitaiso ʻo Sīsuú, naʻe talaki ai ʻe Sihova: “Ko hoku ʻAlo Pele koe, ko koe kuo u hōifua ai.” (Luke 3:22) Ko ia naʻe fakamoʻoni ʻa Sihova ki hono ʻAló, ʻo fakahā tauʻatāina ʻa e hōifua ʻiate iá pea fakapapauʻi ki ai ʻa ʻEne ʻofá. Ki mui aí naʻe pehē ʻe Sīsū ki heʻene Tamaí: “Naʻa ke ʻofa kiate au ʻi he teʻeki ke tanu pou ʻa māmani.” (Sione 17:24) Ko ia ai, ʻi he tuʻunga ko e ngaahi mātuʻa anga-fakaʻotuá, ʻoatu ʻa hoʻomou ʻofa ki hoʻomou fānaú ʻi he lea pea ʻi he tōʻonga ʻoku fai kiate kinautolú​—pea faʻa fai ia. Manatuʻi maʻu pē ko e “ʻofa ko e meʻa langa hake.”​—1 Kolinitō 8:1.

19, 20. Ko e hā ʻoku fakakau ʻi hono akonakiʻi totonu ʻo e fānaú, pea ʻoku lava fēfē ke maʻu ʻe he ngaahi mātuʻá ha ʻaonga mei he faʻifaʻitakiʻanga ʻa Sihová?

¹⁹ Akonaki. ʻOku fakamamafaʻi ʻe he Tohitapú ʻa e mahuʻinga  ʻo e akonaki anga-ʻofá. (Palōvepi 1:8) Ko e ngaahi mātuʻa ʻoku nau kalo mei honau fatongia ko hono tataki ʻenau fānaú he ʻaho ní, te nau fehangahangai ʻapongipongi mo e ngaahi nunuʻa fakatupu loto-lavea. Kae kehe, ʻoku toe fakatokanga ki he ngaahi mātuʻá ʻo fekauʻaki mo hono fai ia ʻo fuʻu tō ki he tafaʻaki ʻe tahá. “ʻA e ngaahi tamai,” naʻe tohi ʻe Paula, “ʻoua te mou fakahohaʻasi hoʻomou fanau, naʻa faifai pea nau loto kina.” (Kolose 3:21) Kuo pau ke fakaʻehiʻehi ʻa e ngaahi mātuʻá mei hono fakatonutonu ʻo fuʻu hulu ʻenau fānaú pe faʻa lea maʻu pē ʻo kau ki heʻenau ngaahi tōnounoú mo fakaangaʻi ʻenau ngaahi feingá.

²⁰ ʻOku fokotuʻu mai ʻe Sihova ko e ʻOtuá, ko ʻetau Tamai fakahēvaní, ʻa e faʻifaʻitakiʻanga ʻi hono fai ʻa e akonakí. ʻOku ʻikai ʻaupito ke tōtuʻa ʻa ʻene fakatonutonú. “Te u tautea koe ke feʻunga,” ko e folofola ia ʻa e ʻOtuá ki hono kakaí. (Selemaia 46:28) ʻOku totonu ke faʻifaʻitaki ʻa e ngaahi mātuʻá kia Sihova ʻi he meʻá ni. Ko e akonaki ko ia ʻoku hulu atu mei he ngaahi ngataʻanga totonú pe ʻokú ne lakasi ʻe ia ʻa e taumuʻa naʻe fakahangahanga ki ai ʻa e fakatonutonú mo e akonekiná ko e moʻoni ʻoku fakahohaʻasi ai ia.

21. ʻOku malava fēfē ke fakapapauʻi ʻe he ngaahi mātuʻá pe ʻoku ola lelei ʻa ʻenau akonakí?

²¹ ʻOku malava fēfē ke fakapapauʻi ʻe he ngaahi mātuʻá pe ʻoku ola lelei ʻa ʻenau akonakí? ʻOku lava ke nau ʻeke hifo kiate kinautolu, ‘Ko e hā ʻoku lavaʻi ʻe heʻeku akonakí?’ ʻOku totonu ke ne fai ʻa e akonekina. ʻOku totonu ke mahino ki hoʻo tamá ʻa e ʻuhinga ʻoku fai ai ʻa e akonakí. ʻOku toe totonu ke tokanga ʻa e ngaahi mātuʻá ʻo fekauʻaki mo e ola ʻe hoko ʻi he hili ʻenau akonakí. Moʻoni, ʻoku meimei ko e fānau kotoa pē te nau ʻuluaki loto-ʻiteʻita ʻi he akonakí. (Hepelū 12:11) Ka ʻoku ʻikai ʻaupito totonu ke hanga ʻe he akonakí ʻo ʻai ha kiʻi tama ke ne ongoʻi ilifia pe liʻekina pe te ne ongoʻi ai ʻokú ne mātuʻaki fulikivanu. Ki muʻa ke ne fakatonutonu hono kakaí, naʻe folofola ʻe Sihova: “ʻOua foki te ke manavahe, . . . he ʻoku ou ʻiate koe.” (Selemaia 46:28) ʻIo, ʻoku totonu ke fai ʻa e fakatonutonú ʻi ha founga ʻe ongoʻi ai ʻe hoʻomo tamá ʻokú mo ʻiate ia ʻi he tuʻunga ko e ongo mātuʻa ʻofa mo fiepoupou.

 KO HONO MAʻU ʻA E “TATAKI LELEI”

22, 23. ʻE malava fēfē ke ke maʻu ʻa e tataki ʻoku fiemaʻu ki hono faʻu ha fāmili fiefiá?

²² ʻOku malava ke tau loto-houngaʻia he kuo tokonaki mai ʻe Sihova ʻa e ngaahi meʻangāue ʻoku fiemaʻu ki heʻetau faʻu ha fāmili fiefiá. Ka ʻoku ʻikai feʻunga pē ʻa hono maʻu ʻa e ngaahi meʻangāué. Kuo pau ke tau toutou ngāuetotonuʻaki kinautolu. Ko e fakatātaá, ʻe kamata ke angaʻaki nai ʻe ha tokotaha tufunga ʻa hono ngāue-fakatamulu-ʻaki ʻa ʻene ngaahi meʻangāué. Te ne ngāuehalaʻaki nai ha niʻihi ʻo kinautolu. ʻI he ngaahi tuʻunga ko ʻení, ʻe meimei ko ha fua ʻikai loko lelei pē ʻe maʻu mei heʻene ngaahi foungá. ʻI he founga meimei tatau, ʻokú ke fakatokangaʻi nai he taimí ni ha ngaahi tōʻonga ʻoku ʻikai lelei kuo hūhū atu ki ho fāmilí. Kuo tuʻumaʻu mālohi nai ha niʻihi pea faingataʻa ke liliu. Kae kehe, muimui ki he faleʻi ʻa e Tohitapú: “E fie fanogo e he tagata boto, bea e tubulekina ai a ene boto; bea e maʻu ai e he tagata faa ilo ae gaahi fakakaukau [“tataki,” NW] lelei.”​—Palōvepi 1:5, PM.

²³ ʻE malava ke ke maʻu ʻa e tataki leleí ʻi he hokohoko atu hono maʻu ʻa e ʻiloʻi ʻo e ʻOtuá. Fakaongo ki he ngaahi tefitoʻi moʻoni ʻi he Tohitapú ʻa ē ʻoku kaunga ki he moʻui fakafāmilí, pea fai ʻa e ngaahi fakatonutonu ʻoku fiemaʻú. Sio ki he kau Kalisitiane matuʻotuʻa ʻoku nau fokotuʻu ha faʻifaʻitakiʻanga lelei ʻi he tuʻunga ko e ngaahi hoa malí pea mo e ngaahi mātuʻá. Talanoa kiate kinautolu. Sinoemeʻa, ʻoatu hoʻo ngaahi loto-moʻuá kia Sihova ʻi he lotu. (Sāme 55:22; Filipai 4:​6, 7) ʻOku lava ke ne tokoniʻi koe ke ke maʻu ha fāmili moʻui fiefia ʻoku fakalāngilangiʻi ai iá.

[Fakamatala ʻi lalo]

SIVIʻI HOʻO ʻILÓ

ʻOku anga-fēfē ʻa e tokoni ʻa e mateakí, fetuʻutakí, tokaʻí, mo e fakaʻapaʻapaʻí ki hono maʻu ha nofo mali fiefiá?

ʻI he ngaahi founga fē ʻe lava ke fakapapauʻi ai ʻe he ngaahi mātuʻá ki heʻenau fānaú ʻa ʻenau ʻofá?

Ko e hā ʻa e ngaahi meʻa ʻoku kau ʻi he akonaki totonú?

[Fehuʻi ki he Ako]

 [Fakatātā peesi kakató ʻi he peesi 147]