Vahe 9

Ko e Hā ʻOku Hoko ki he Faʻahinga Naʻa Tau ʻOfa Ai Kuo Maté?

1. ʻOku fēfē ʻa e ongoʻi ʻa e kakaí ʻi he mate ha taha naʻa nau ʻofa ai?

 “ʻOKÚ TE mamahi ʻi he mate ha taha naʻá te ʻofa ai koeʻuhi ko e maté ko ha mole atu ia ki he taʻeʻiloá.” Ko e meʻa ia naʻe leaʻaki ʻe ha foha ʻe taha ʻi he mate ʻa ʻene tamaí pea hili pē ha taimi nounou mei ai naʻe mate mo ʻene faʻeé. Naʻe hanga ʻe heʻene mamahí mo ʻene ongoʻi ʻa e mole lahí ni ʻo ʻai ia ke ne ongoʻi ne “lōmekina fakaeongo” ia. Mahalo pē kuó ke tofanga ʻi ha founga meimei tatau. Kuó ke fifili nai pe ʻoku ʻi fē ʻa e faʻahinga naʻá ke ʻofa aí mo pehē pe te ke toe sio nai kiate kinautolu.

2. Ko e hā ʻa e ngaahi fehuʻi fakapuputuʻu ʻoku malanga hake ʻo fekauʻaki mo e maté?

² Kuo tala ki he ngaahi mātuʻa loto-mamahi ʻe niʻihi, “Kuo toʻo atu ʻe he ʻOtuá ʻa e kakai lelei tahá ke nau ʻi hēvani fakataha mo ia.” ʻOku moʻoni ia? Kuo ʻalu ʻa e faʻahinga naʻa tau ʻofa ai kuo maté ki ha nofoʻanga laumālie? Ko e meʻa ia ʻoku ui ʻe he niʻihi ko e Nevaná, ʻo fakamatalaʻi ko ha tuʻunga ia ʻo e fiefia kakato ʻi he hoko ʻo ʻataʻatā mei he mamahi mo e holi kotoa pē? Kuo fou atu ʻa e faʻahinga naʻa tau ʻofa aí ʻi ha matapā ki he moʻui taʻefaʻamate ʻi palataisi? Pe hangē ko ia ʻoku taukaveʻi ʻe he niʻihi, ko e maté ko ha tō atu ia ki hono fakamamahiʻi taʻengata ʻo e faʻahinga kuo nau fakalotomamahiʻi ʻa e ʻOtuá? ʻOku lava ʻe he kau maté ke uesia ʻetau moʻuí? Ke maʻu ʻa e ngaahi tali moʻoni ki he ngaahi fehuʻi peheé, ʻoku fiemaʻu ke tau hanga ki he Folofola ʻa e ʻOtuá, ko e Tohitapú.

KO E HĀ ʻA E “LAUMĀLIE” ʻOKU ʻI HE FAʻAHINGA ʻO E TANGATÁ?

3. Ko e hā ʻa e lau ʻa Sokolatesi mo Palato ʻo fekauʻaki mo e maté, pea ʻoku uesia fēfē ʻe he meʻá ni ʻa e kakai he ʻaho ní?

³ Naʻe tui ʻa e ongo filōsefa Kalisi ʻi he kuonga muʻá ko Sōkolatesi  mo Palato ʻo pehē kuo pau pē ʻoku ʻi ai ha meʻa ʻi loto ʻi he tangatá mo e fefiné ʻoku natula ke taʻefaʻamate​—ko ha soulu ʻoku moʻui atu ia ʻi he maté pea ʻoku ʻikai ʻaupito ke mate ia. ʻOku tui ki he meʻá ni ʻa e laui miliona he ʻahó ni ʻi māmani lahi. ʻOku faʻa fakatupunga ʻe he tui ko ʻení ʻa e manavahē ki he kau maté ʻo lahi tatau pē mo ʻene fakatupunga ʻa e hohaʻa ki ha tuʻunga lelei maʻá e kau maté. ʻOku akoʻi mai ʻe he Tohitapú ia ha meʻa kehe ʻaupito ʻo fekauʻaki mo e kau maté.

4. (a) Ko e hā ʻoku tala mai ʻe Sēnesi kiate kitautolu ʻo kau ki he soulú? (e) Ko e hā ʻa e meʻa naʻe ʻai ʻe he ʻOtuá kia ʻĀtama ke ʻai ia ke ne moʻuí?

⁴ ʻI he fakakaukau atu ki he tuʻunga ʻoku ʻi ai ʻa e kau maté, kuo pau ke tau manatuʻi ko ʻetau tamai tupuʻangá, ʻa ʻĀtama, naʻe ʻikai te ne maʻu ha soulu. Ko iá ko ha soulu. ʻI ha ngāue fakaofo ʻo e fakatupú, naʻe faʻu ai ʻe he ʻOtuá ʻa e tangatá​—ko e soulu​—mei he ngaahi ʻelemēniti tefito ʻo e māmaní peá ne toki hō kiate ia “ʻa e manava moʻui.” ʻOku tala mai ʻe he Sēnesi 2:7 kiate kitautolu: “Naʻe ngaohi ʻe Sihova Elohimi ʻa e tangata mei he efu ʻo e kelekele, ʻo ne hō ki hono avaʻi ihu ʻa e mānava moʻui; pea naʻe hoko ʻa e tangata ko e kakano [“soulu,” NW] moʻui.” Naʻe fakatolonga mai ʻa e moʻui ʻa ʻĀtamá ʻaki ʻa e mānava. Kae kehe, naʻe ʻikai ngata pē ʻi he puhiʻi ʻo e ʻeá ki he maʻamaʻa ʻo e tangatá ʻi hono ʻai ko ia ʻe he ʻOtuá ʻa e mānava ʻo e moʻuí kia ʻĀtamá. ʻOku lave ʻa e Tohitapú ʻo kau ki he “ivi moʻui” ʻoku ngāue ʻi he ngaahi meʻamoʻui fakatupu ʻi he māmaní.​—Sēnesi 7:​22, NW.

5, 6. (a) Ko e hā ʻa e “ivi moʻui”? (e) Ko e hā ʻoku hoko ʻi he ʻikai ke toe ʻai ʻe he “laumālie” ʻoku lave ki ai ʻi he Koheleti 12:7 ke moʻui ʻa e sinó?

⁵ Ko e hā ʻa e “ivi moʻui”? Ko e kamataʻanga tefito ia ʻo e moʻuí naʻe ʻai ʻe he ʻOtuá ki he sino taʻemoʻui ʻo ʻĀtamá. Naʻe fakatolonga leva ʻa e ivi ko ʻení ʻe he foʻi ngāue ko e mānavá. Ka ko e hā ʻa e “laumālie” naʻe lave ki ai ʻi he Koheleti 12:7? ʻOku pehē ʻe he veesi ko iá ʻo kau ki ha taha ʻoku mate: “Pea foki ʻa e efu ki he kelekele, ʻo hange ko ʻene ʻi ai muʻa; pea foki ʻa e laumālie kia Elohimi ʻa ia naʻa ne tuku mai ia.” ʻI he taimi naʻe ngāueʻaki ai ʻe he kau tohi Tohitapú ʻa e foʻi lea “laumālie” ʻi he founga ko ʻení, naʻe ʻikai ke nau fakakaukau ki ha soulu ʻoku ʻikai hano sino ʻoku hokohoko atu ʻa ʻene moʻuí ʻi he hili ʻa e mate ʻa e sinó.

⁶ Ko e “laumālie” ko ia ʻoku mavahe mei he faʻahinga ʻo e  tangatá ʻi he maté ko e ivi moʻui ia naʻe tupu mei hotau Tokotaha-Fakatupú. (Sāme 36:9; Ngāue 17:28) Ko e ivi moʻui ko ʻení ʻoku ʻikai te ne maʻu ʻe ia ha taha ʻo e ngaahi tōʻonga ʻa e meʻamoʻui fakatupu ko ia ʻokú ne ʻai ke moʻuí, ʻo hangē tofu pē ko e ivi ʻuhilá ʻoku ʻikai te ne maʻu ʻe ia ʻa e ngaahi fōtunga ʻo e nāunau ʻokú ne ʻoange ʻa hono mālohí. ʻI he mate ha taha, ʻoku ngata ai ʻa hono hanga ʻe he laumālié (ivi moʻui) ʻo ʻai ke moʻui ʻa e fanga kiʻi sela ʻo e sinó, ʻo meimei hangē pē ko e mate ʻa e foʻi ʻuhilá ʻi hono tāmateʻi ʻa e ʻuhilá. ʻI he taimi ʻoku tuku ai ʻe he ivi moʻuí ʻa ʻene tokoniʻi mo fakatolonga ʻa e sino ʻo e tangatá, ʻoku mate leva ʻa e tangatá​—ko e soulú.​—Sāme 104:29.

“KO E EFU TE KE FOKI KI AI”

7. Ko e hā naʻe pau ke hoko kia ʻĀtama kapau naʻá ne talangataʻa ki he ʻOtuá?

⁷ Naʻe fakamatalaʻi mahino lelei ʻe Sihova ʻa e meʻa ʻe ʻuhinga ki ai ʻa e maté ki he tokotaha angahala ko ʻĀtamá. Naʻe pehē ʻe he ʻOtuá: “Te ke kai hoʻo meʻakai ʻi he kakava ʻo ho mata, kaeʻoua ke ke foki ki he kelekele ʻa ia naʻe toʻo koe mei ai: he ko e efu koe, pea ko e efu te ke foki ki ai.” (Sēnesi 3:19) ʻE foki ʻa ʻĀtama ki fē? Ki he kelekelé, ki he efu ʻa ia naʻe ngaohi ia mei aí. ʻI he maté ko e ngata ia ʻo e ʻi ai ʻa ʻĀtamá!

8. ʻI he tuʻunga ko e ngaahi soulú, ʻoku ʻikai ke māʻolunga hake ʻa e faʻahinga ʻo e tangatá ʻi he fanga manú ʻi he founga fē?

⁸ ʻI he fekauʻaki mo e meʻá ni, ʻoku ʻikai ke kehe ʻa e mate ʻa e faʻahinga ʻo e tangatá mei he mate ʻa e fanga manú. Ko e ngaahi soulu foki mo kinautolu, pea ko e laumālie tatau, pe ivi moʻui, ʻokú ne fakaivimoʻuiʻi kinautolú. (Sēnesi 1:​24) ʻI he Koheleti 3:​19, 20 (fakamatala ʻi lalo), ʻoku tala mai ai kiate kitautolu ʻe he tangata poto ko Solomoné: “Hange ko e mate ʻa é ʻoku pehe ʻa e mate ʻo é; pea ko e laumālie pe taha ʻoku ʻiate kinautolu kotoa; pea ʻoku ʻikai ke amo atu ʻa e tangata ʻi he manu [ʻi he maté] . . . ʻoku mei he efu kotoa pe, pea ʻoku foki kotoa pe ki he efu.” Naʻe māʻolunga ange ʻa e tangatá ʻi he fanga manú koeʻuhi naʻe fakatupu ia ʻi he ʻīmisi ʻo e ʻOtuá, ʻo tapua mai ai ʻa e ngaahi ʻulungaanga ʻo Sihová. (Sēnesi 1:​26, 27) Ka, ʻi he maté ʻoku foki tatau ai pē ʻa e faʻahinga ʻo e tangatá mo e fanga manú ki he efu.

9. Ko e hā ʻa e tuʻunga ʻoku ʻi ai ʻa e kau maté, pea ʻoku nau ʻalu ki fē?

⁹ Naʻe toe fakamatalaʻi ʻe Solomone ʻa e meʻa ʻoku ʻuhinga ki  ai ʻa e maté, ʻo ne pehē: “Ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa.” ʻIo, ʻoku hala ʻataʻatā ke ʻilo ʻe he kau pekiá ha meʻa. ʻI he vakai ki he meʻá ni, naʻe naʻinaʻi mai ʻa Solomone: “Ko ia kotoa ʻoku ʻilo ʻe ho nima te ne mafai, fai ʻaki ho ivi; he ʻoku ʻikai ha ngaue, pe ha fakakaukau, pe ha ʻilo, pe ha poto ʻi Lolofonua, ʻa e feituʻu ʻoku ke fononga ki ai.” (Koheleti 9:​5, 10) ʻOku ʻalu ki fē ʻa e kau maté? Ki Seoli (faka-Hepelū, sheʼohlʹ), ko e faʻitoka angamaheni pē ia ʻo e faʻahinga ʻo e tangatá. ʻOku ʻikai ke ʻilo ha meʻa ʻe he faʻahinga naʻa tau ʻofa ai kuo maté. ʻOku ʻikai te nau faingataʻaʻia, pea ʻoku ʻikai malava ke nau uesia kitautolu ʻi ha faʻahinga founga pē.

10. Ko e hā ʻoku malava ai ke tau pehē ko e maté ʻoku ʻikai ke pau ko e ngalutukú ia?

¹⁰ Kuo pau kiate kitautolu kotoa mo e faʻahinga ʻoku tau ʻofa aí ke moʻui ʻi ha ngaahi taʻu siʻi pē pea ʻikai leva ke toe ʻi ai ʻo taʻengata? Fakatatau ki he Tohitapú, ʻikai. ʻI he taimi ʻo e angatuʻu ʻa ʻĀtamá, naʻe fokotuʻu leva ʻe Sihova ko e ʻOtuá ha ngaahi fokotuʻutuʻu ke fakafoki ʻaki ʻa e ngaahi nunuʻa ʻo e angahala ʻa e tangatá. Ko e maté naʻe ʻikai ko ha konga ia ʻo e taumuʻa ʻa e ʻOtuá ki he faʻahinga ʻo e tangatá. (ʻIsikeli 33:11; 2 Pita 3:9) Ko ia ai, ko e maté ʻoku ʻikai pau ke hoko ia ko e ngalutuku kiate kitautolu pe ko e faʻahinga ʻoku tau ʻofa aí.

“KUO MOHE”

11. Ko e hā ʻa e fakamatala ʻa Sīsū ki he tuʻunga naʻe ʻi ai ʻa hono kaumeʻa naʻe mate ko Lasalosí?

¹¹ Ko e taumuʻa ia ʻa Sihová ke fakahaofi kitautolu mo e faʻahinga naʻa tau ʻofa ai kuo maté mei he mate ʻia ʻĀtamá. Ko ia ai, ʻoku lave ʻa e Folofola ʻa e ʻOtuá ki he kau maté ʻo pehē ʻoku nau mohe pē. Ko e fakatātaá, ʻi he hoko ʻo ʻilo ʻe Sīsū Kalaisi kuo mate ʻa hono kaumeʻa ko Lasalosí, naʻá ne tala ange ki Heʻene kau ākongá: “Ko siʻota kaumeʻa ko Lasalosi kuo mohe; ka ko ʻeku ʻalu ni ke u fafangu ia.” Koeʻuhi naʻe ʻikai ke makupusi leva ʻe he kau ākongá ʻa e ʻuhinga ʻo e fakamatala ko ʻení, naʻe lea fakapatonu atu ʻa Sīsū: “Kuo pekia ʻa Lasalosi.” (Sione 11:​11, 14) Naʻe ʻalu leva ʻa Sīsū ki he kolo ko Pētaní, ʻa ia naʻe tangi mamahi ai ʻa e ongo tuofefine ʻo Lasalosí ko Māʻata mo Mele ʻi he mate hona tuongaʻané. ʻI he tala ange ʻe Sīsū kia Māʻata, “ʻE toetuʻu ho tuongaʻane,” naʻe fakahaaʻi ʻe Māʻata ʻa ʻene tui ki he  taumuʻa ʻa e ʻOtuá ke fakafoki ʻa e ngaahi nunuʻa ʻo e maté ʻi he fāmili ʻo e tangatá. Naʻá ne pehē: “ʻOku ou ʻilo te ne toetuʻu ʻi he Toetuʻu ʻi he ʻaho fakamui.”​—Sione 11:​23, 24.

12. Ko e hā ʻa e ʻamanaki fekauʻaki mo e maté naʻe maʻu ʻe he tokotaha loto-mamahi ko Māʻatá?

¹² Naʻe ʻikai ke hā meia Māʻata ha fakakaukau ʻo kau ki ha soulu taʻefaʻamate ʻoku moʻui ʻi ha feituʻu kehe ʻi he hili ʻa e maté. Naʻe ʻikai te ne tui kuo ʻalu ʻa Lasalosi ia ki ha nofoʻanga laumālie ke hoko atu ai ʻa ʻene ʻi aí. Naʻe tui ʻa Māʻata ki he ʻamanaki maʻongoʻonga ko ha toetuʻu mei he maté. Naʻe mahino kiate ia, kuo ʻikai ha soulu taʻefaʻamate naʻe mavahe mei he sino ʻo Lasalosí, ka ko hono tuongaʻane kuo maté kuo ʻikai te ne kei ʻi ai. Ko e fakaleleiʻanga pē ki aí ko e toetuʻu mai ʻa hono tuongaʻané.

13. Ko e hā ʻa e mafai mei he ʻOtuá ʻoku maʻu ʻe Sīsū, pea naʻe anga-fēfē ʻa ʻene fakahāhaaʻi ʻa e mafai ko iá?

¹³ Ko Sīsū Kalaisi ʻa e tokotaha naʻe fakaivia ʻe Sihova ko e ʻOtuá ke ne huhuʻi ʻa e faʻahinga ʻo e tangatá. (Hōsea 13:14) Ko ia, ʻi he tali ki he fakamatala ʻa Māʻatá, naʻe pehē ʻe Sīsū: “Ko au pē ko e Toetuʻu, pea mo e Moʻui: ko ia ʻoku tui pikitai kiate au, ne ongo kuo pekia, ka te ne moʻui pē.” (Sione 11:25) Naʻe fakahāhaaʻi ʻe Sīsū ʻa hono mafai mei he ʻOtuá ʻi he meʻá ni ʻi heʻene ʻalu ki he fonualoto ʻo Lasalosí, ʻa ia naʻá ne mate ʻo ʻosi ʻa e ʻaho ʻe fā, ʻo fakafoki mai ia ke ne toe moʻui. (Sione 11:​38-44) Fakakaukauloto atu ki he fiefia-loto ʻa e faʻahinga naʻa nau sio ʻi he toetuʻu ko ʻení pe ko e ngaahi toetuʻu kehe naʻe fakahoko ʻe Sīsū Kalaisí!​—Maʻake 5:​35-42; Luke 7:​12-16.

14. Ko e hā ʻoku ʻikai fehoanaki ai ʻa e toetuʻú mo e foʻi fakakaukau ko ia ʻo kau ki ha soulu taʻefaʻamaté?

¹⁴ Kiʻi tuʻu ange ʻo fakakaukau ki he meʻá ni: ʻOku ʻikai ha taha ʻe toe fiemaʻu ke toetuʻu, pe fakafoki mai ki he moʻuí, kapau naʻe hao mei he maté ha soulu taʻefaʻamate ia. Ko hono moʻoní, ʻe hoko ko ha taʻeʻofa ia ʻa hono fokotuʻu mai ha taha ʻo hangē ko Lasalosí ki he moʻui taʻehaohaoa ʻi he māmaní kapau naʻe ʻosi hoko atu ia ki ha pale maʻongoʻonga fakahēvani. Ko e moʻoni, ʻoku ʻikai ʻaupito ke ngāueʻaki ʻe he Tohitapú ʻa e kupuʻi lea ko e “soulu taʻefaʻamate.” Ka, ʻoku pehē ʻe he ngaahi Konga Tohitapú ko e soulu fakaetangata ʻoku faiangahalá ʻoku mate ia. (ʻIsikeli 18:​4, 20, NW) Ko ia ʻoku tuhu ʻa e Tohitapú ki he tokonaki ʻo e toetuʻú ko e fakaleleiʻanga moʻoni ia ki he maté.

 “KAKAI KOTOA PE ʻOKU ʻI HE NGAAHI FAʻITOKA”

15. (a) ʻOku ʻuhinga ki he hā ʻa e foʻi lea “toetuʻu”? (e) Ko e hā ʻe ʻikai hoko ai ko ha palopalema kia Sihova ko e ʻOtuá ʻa e toetuʻu ʻa e kakaí?

¹⁵ Ko e foʻi lea naʻe ngāueʻaki ʻe he kau ākonga ʻa Sīsuú ki he “toetuʻu” ʻoku ʻuhinga fakafoʻilea ko e “fokotuʻu hake” pe “tuʻu hake.” Ko hano fokotuʻu hake ʻeni mei he tuʻunga taʻemoʻui ko e maté​—ʻo hangē pē ko ia, ko ha tuʻu hake mei he faʻitoka angamaheni ʻo e faʻahinga ʻo e tangatá. ʻOku malava noa pē ʻe Sihova ko e ʻOtuá ke ne fokotuʻu hake ha taha. Ko e hā hono ʻuhingá? Koeʻuhi ko Sihova ʻa e Tupuʻanga ʻo e moʻuí. ʻI he ʻahó ni, ʻoku malava ʻe he faʻahinga ʻo e tangatá ke nau hiki ha ngaahi leʻo mo e ngaahi ʻata ʻo e kakai tangatá mo e kakai fefiné ʻi ha foʻi tepi-vitiō pea malava ke toe tā mo huluʻi ʻa e ngaahi meʻa naʻe hikí ʻi he hili ʻa e mate ʻa e faʻahingá ni. Ko ia, ʻoku pau, ʻa e malava ʻe hotau Tokotaha-Fakatupu māfimafi-aoniú ʻo hiki  ʻa e ngaahi fakaikiiki ʻo ha taha pē pea fokotuʻu mai ʻa e tokotaha tatau pē, ʻo ʻoange kiate ia ha sino foʻou naʻe toki faʻu.

16. (a) Ko e hā ʻa e talaʻofa naʻe fai ʻe Sīsū ʻo fekauʻaki mo e faʻahinga kotoa ʻoku ʻi he ngaahi faʻitoká? (e) Ko e hā te ne fakapapauʻi pe ʻe iku ki he hā ʻa e toetuʻu ʻa ha taha?

¹⁶ Naʻe pehē ʻe Sīsū Kalaisi: “ʻOku ʻunu mai ha taimi, ʻa ia ʻe fanongo ai ki hono leʻo [ʻo Sīsū] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai; ko kinautolu naʻe ngaue lelei, ki he toetuʻu ke moʻui, ko kinautolu naʻe fai kovi, ki he toetuʻu ke fakamāu.” (Sione 5:​28, 29) Ko e faʻahinga kotoa ʻoku ʻi he manatu ʻa Sihová ʻe fokotuʻu hake pea akoʻi ki heʻene ngaahi foungá. Ki he faʻahinga ʻoku nau ngāue ʻo fetāiaki mo e ʻiloʻi ʻo e ʻOtuá, ʻe hoko ʻeni ko ha toetuʻu ke moʻui. Kae kehe, ʻe hoko ia ko ha toetuʻu ʻo e fakamaau fakahalaia ki he faʻahinga ʻoku nau siʻaki ʻa e ngaahi akonaki mo e tuʻunga-pule ʻo e ʻOtuá.

17. Ko hai ʻe toetuʻú?

¹⁷ Hangē ko hono anga totonú, ko e faʻahinga ko ia kuo nau muia ha ʻalunga māʻoniʻoni ʻi he tuʻunga ko e kau sevāniti ʻa Sihová te nau toetuʻu. Ko hono moʻoní, naʻe hanga ʻe he ʻamanaki ki he toetuʻú ʻo fakaivimālohiʻi ʻa e tokolahi ke fehangahangai mo e maté, naʻa mo e ʻi he ngaahi tuʻunga ʻo e fakatanga mālohí. Naʻa nau ʻilo ʻe malava ʻe he ʻOtuá ke toe fakafoki mai kinautolu ki he moʻuí. (Mātiu 10:28) Ka kuo laui miliona ʻa e kakai kuo nau mate ka naʻe teʻeki ai ke nau fakahāhā pe te nau tali ʻa e ngaahi tuʻunga māʻoniʻoni ʻa e ʻOtuá. ʻE toetuʻu mo kinautolu foki. ʻI he tui pau ki he taumuʻa ʻa Sihova fekauʻaki mo e meʻá ni, naʻe pehē ʻe he ʻaposetolo ko Paulá: “Oku ou maʻu ae amanaki lelei ki he Otua . . . e ai ha toetuu oe bekia, ae agatonu moe taeagatonu.”​—Ngāue 24:​15, PM.

18. (a) Ko e hā ʻa e vīsone naʻe maʻu ʻe he ʻaposetolo ko Sioné ʻo fekauʻaki mo e toetuʻú? (e) Ko e hā ʻe fakaʻauha ʻi he “Anoafi,” pea ko e hā ʻoku fakaʻilongaʻi ʻe he “Anoafi” ko ʻení?

¹⁸ Naʻe maʻu ʻe he ʻaposetolo ko Sioné ha vīsone fakatupu-fiefia fekauʻaki mo e kau toetuʻú ʻoku nau tuʻu ʻi he ʻao ʻo e taloni ʻo e ʻOtuá. Naʻe tohi leva ʻe Sione: “Naʻe tukuange ʻe he tahi ʻa e pekia naʻe ʻi ai; pea mo Mate foki mo e Hetesi naʻa na tukuange ʻa e pekia naʻe ʻiate kinaua: pea naʻe fakamāu kinautolu taki taha, ʻo fakatatau ki heʻenau ngāue. Pea naʻe li ʻa Mate mo Hetesi ki he Anoafi. Ko eni ia ʻa e Mate ʻAngaua, ko e Anoafi.”  (Fakahā 20:​12-14) Fakakaukau atu ā ki ai! Ko e kau mate kotoa pē ʻoku ʻi he manatu ʻa e ʻOtuá ʻoku nau maʻu ʻa e ʻamanaki ko hono tukuange mai mei Hētesi (faka-Kalisi, haiʹdes), pe Seoli, ko e faʻitoka angamaheni ʻo e faʻahinga ʻo e tangatá. (Sāme 16:10; Ngāue 2:31) Te nau maʻu ha faingamālie ke fakahāhā ʻaki ʻenau ngaahi ngāué pe te nau tauhi ʻa e ʻOtuá. ʻE toki lī leva ʻa “Mate mo Hetesi” ki he meʻa ko ia ʻoku ui “ko e Anoafi,” ʻokú ne fakaʻilongaʻi ʻa e ʻauha fakaʻaufuli, ʻo tatau mo e foʻi lea “Kihena.” (Mātiu 23:33) Ko e faʻitoka angamaheni ʻo e faʻahinga ʻo e tangatá ʻe fakamaha mai ia pea ʻe ʻikai ke toe ʻi ai ia ʻi he taimi ʻe ʻosi ai ʻa e toetuʻú. Ko ha meʻa fakafiemālie lahi ē ko hono ʻilo mei he Tohitapú ʻoku ʻikai ke fakamamahiʻi ʻe he ʻOtuá ia ha taha!​—Selemaia 7:​30, 31.

TOETUʻU KI FĒ?

19. Ko e hā ʻe toetuʻu ai ha niʻihi ʻi he faʻahinga ʻo e tangatá ki hēvaní, pea ko e hā ʻa e faʻahinga sino ʻe ʻoange ʻe he ʻOtuá kiate kinautolú?

¹⁹ Ko ha tokolahi fakangatangata pē ʻo e kau tangata mo e kau fefine te nau toetuʻu ke moʻui ʻi hēvaní. ʻI he tuʻunga ko e ngaahi tuʻi mo e kau taulaʻeiki fakataha mo Sīsuú, te nau kau ʻi hono fakatalatala atu ʻa e ngaahi nunuʻa kotoa ʻo e mate ko ia naʻe maʻu tukufakaholo ʻe he faʻahinga ʻo e tangatá mei he ʻuluaki tangatá, ko ʻĀtama. (Loma 5:12; Fakahā 5:​9, 10) Ko e toko fiha ʻe ʻave ʻe he ʻOtuá ki hēvani ke nau pule fakataha mai mo Kalaisí? Fakatatau ki he Tohitapú, ko e toko 144,000 pē. (Fakahā 7:4; 14:1) ʻE ʻoange ʻe Sihova ki he tokotaha taki taha ʻo e kau toetuʻú ni ha sino laumālie koeʻuhi ke malava ke nau moʻui ʻi hēvani.​—1 Kolinitō 15:​35, 38, 42-45; 1 Pita 3:18.

20. Ko e hā ʻe maʻu ʻe he faʻahinga talangofua ʻo e tangatá, ʻo kau ai mo e kau toetuʻú?

²⁰ Ko e fuʻu tokolahi kehe leva ʻo e faʻahinga kuo maté te nau toetuʻu mai ki ha māmani palataisi. (Sāme 37:​11, 29; Mātiu 6:10) Ko e konga ʻo e ʻuhinga ʻoku toetuʻu ai ʻa e niʻihi ki hēvaní ko hono fakakakato ʻa e taumuʻa ʻa e ʻOtuá ki he māmaní. Ko Sīsū Kalaisi mo e toko 144,000 ʻi hēvaní ʻe faai atu pē ʻo nau fakafoki ʻa e faʻahinga talangofua ʻo e tangatá ki he haohaoa ko ia naʻe fakapuna mamaʻo ʻe heʻetau ongo mātuʻa tupuʻangá. ʻE fakakau ki ai ʻa e faʻahinga ʻe toetuʻú, ʻo hangē ko ia naʻe fakahā ʻe Sīsū ʻi heʻene tala ki he tangata naʻe tuʻunuku ki he maté ʻa ia  naʻe tutuki ʻi hono tafaʻakí: “Te ke ʻi Palataisi mo au.”​—Luke 23:​42, 43.

21. Fakatatau ki he palōfita ko ʻAiseá mo e ʻaposetolo ko Sioné, ko e hā ʻe hoko ki he maté?

²¹ ʻI he māmani Palataisí, ko e maté, ʻa ia ʻokú ne ʻomai ʻi he ʻahó ni ʻa e ongoʻi pehē ʻo e laufānoó, ʻe toʻo atu ia. (Loma 8:​19-21) Naʻe fanongonongo ʻe he palōfita ko ʻAiseá ʻo pehē ko Sihova ko e ʻOtuá “te ne folofua ʻa mate ʻo taʻengata.” (ʻAisea 25:8) Naʻe ʻoange ki he ʻaposetolo ko Sioné ha vīsone ʻo kau ki he taimi ʻe tauʻatāina ai ʻa e faʻahinga ʻo e tangatá mei he mamahí mo e maté. Ko ia, “ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”​—Fakahā 21:​1-4.

22. Ko e hā ʻokú ke aʻusia tupu mei he ʻilo ki he toetuʻú?

²² ʻOku toʻo atu ʻe he ngaahi akonaki mahino ʻa e Tohitapú ʻa e puputuʻu ʻo fekauʻaki mo e meʻa ʻoku hoko ki he kau maté. ʻOku fakahā mahino mai ʻe he ngaahi Konga Tohitapú ko e maté ko e “fili fakamui” ia ʻe fakaʻauha atú. (1 Kolinitō 15:26) Ko ha mālohi mo e fiemālie lahi ē ʻoku malava ke tau maʻu mei he ʻilo ki he ʻamanaki ʻo e toetuʻú! Pea ko ha fiefia lahi ē ka ko kitautolu koeʻuhi ko e faʻahinga naʻa tau ʻofa ai kuo nau maté ʻa ia ʻoku nau ʻi he manatu ʻa e ʻOtuá ʻe fafangu hake mei he mohe ʻa ia ko e maté ke nau fiefia ʻi he ngaahi meʻa lelei kotoa kuó ne tauhi maʻá e faʻahinga ʻoku nau ʻofa kiate iá! (Sāme 145:16) ʻE fakahoko ʻa e ngaahi tāpuaki peheé ʻo fakafou mai ʻi he Puleʻanga ʻo e ʻOtuá. Ka ko fē ʻa e taimi naʻe kamata ai ʻa ʻene pulé? Tau vakai ki ai.

SIVIʻI HOʻO ʻILÓ

Ko e hā ʻa e laumālie ʻoku ʻi he faʻahinga ʻo e tangatá?

ʻE anga-fēfē hoʻo fakamatalaʻi ʻa e tuʻunga ʻo e kau maté?

Ko hai ʻe toetuʻú?

[Fehuʻi ki he Ako]

[Fakatātā ʻi he peesi 85]

Hangē pē ko hono ui ʻe Sīsū ʻa Lasalosi mei he fonualotó, ʻe pehē pē ʻa e toetuʻu mai ʻa e laui miliona

 [Fakatātā ʻi he peesi 86]

ʻE ikuna ʻa e loto-fiefiá ʻi hono ‘folofua ʻe he ʻOtuá ʻa mate ʻo taʻengata’