Vahe 14

Ko e Mafai ʻo Hai ʻOku Totonu ke Ke Tokaʻí?

1, 2. ʻOku kovi ʻa e ngaahi tuʻunga kotoa pē ʻo e mafaí? Fakamatalaʻi.

 ʻOKU taukovi ki he kakai tokolahi ʻa e foʻi lea ko e “mafai.” ʻOku mahinongofua ʻa e meʻá ni, he ʻoku faʻa ngāuekoviʻaki ʻa e mafaí​—ʻi he ngāueʻangá, ʻi he fāmilí, pea mo e ngaahi founga-pulé. ʻOku moʻoni ai ʻa e lau ʻa e Tohitapú: “ʻI he taimi naʻe pule ai ha tangata ki he kakai ke nau kovi ai.” (Koheleti 8:9) ʻIo, kuo puleʻi ʻe he tokolahi ʻa e niʻihi kehe ʻi ha founga anga-kakaha mo siokita.

² Ka ʻoku ʻikai ke kovi ʻa e mafai kotoa pē. Ko e fakatātaá, ʻoku lava ke pehē ʻoku ʻi ai ʻa e mafai hotau sinó ʻokú ne puleʻiʻaki kitautolu. ʻOkú ne “tuʻutuʻuni” mai kiate kitautolu ke tau mānava, kai, inu, mo mohe. ʻOku fakafeʻātungia ia? ʻIkai. ʻOku hoko ko ha lelei pē kiate kitautolu ʻa hono tali fiemālie ʻa e ngaahi tuʻutuʻuni ko ʻení. Neongo ko e anganofo ki he ngaahi fiemaʻu ʻa hotau sinó ʻe fai nai ha taʻeloto ki ai, ʻoku ʻi ai ʻa e ngaahi tuʻunga kehe ia ʻo e mafaí ʻoku fiemaʻu ia ke tau moʻulaloa loto-lelei ki ai. Fakakaukau ange ki ha ngaahi fakatātā ʻe niʻihi.

KO E MAFAI AONIÚ

3. Ko e hā ʻoku totonu ai ʻa hono ui ʻa Sihova ko e “ʻEiki Hau”?

³ ʻOku laka hake he tuʻo 300 ʻi he Tohitapu ʻa hono ui ai ʻa Sihova ko e “ʻEiki Hau.” (NW) Ko ha tokotaha hau ko ha tokotaha ia ʻokú ne maʻu ʻa e mafai aoniú. Ko e hā ʻa e meʻa ʻokú ne ʻoange kia Sihova ʻa e totonu ki he tuʻunga ko ʻení? ʻOku tali mai ʻe he Fakahā 4:11: “Tāu pē Koe, ʻa e ʻAfiona ko homau ʻOtua, ke lau ki ai ʻa e kololia, mo e fakaʻapaʻapa, mo e mafai: He ko koe ia naʻa ke ngaohi ʻa e meʻa kotoa pē, pea naʻa nau ʻi ai, pea naʻe ngaohi kinautolu, koeʻuhi pē ko ho finangalo ia.”

4. Kuo fili ʻe Sihova ke ngāueʻaki hono mafaí ʻi he founga fē?

⁴ ʻI hono tuʻunga ko hotau Tokotaha-Fakatupú, kuo maʻu ai ʻe Sihova ʻa e totonu ke ne ngāueʻaki ʻa hono mafaí ʻo hangē ko ia ʻokú ne fili ki aí. ʻOku hā ngali fakailifia nai ʻa e meʻá ni, tautefito  ki he taimi ʻoku tau fakakaukau atu ai ko e ʻOtuá ʻoku “lahi hono ngaahi ivi.” ʻOku ui ia ko e “ʻOtua Māfimafi-Aoniu”​—ko ha hingoa ʻi he lea faka-Hepeluú ʻokú ne maʻu ʻa e foʻi fakakaukau ʻo e mālohi ʻoku hulu fau. (ʻAisea 40:26; Sēnesi 17:​1, NW) Ka neongo ia, ʻoku fakahāhā ʻe Sihova ʻa hono mālohí ʻi ha founga anga-ʻofa, he ko hono ʻulungaanga laulōtahá ko e ʻofa.​—1 Sione 4:16.

5. Ko e hā ʻoku ʻikai faingataʻa ai ke anganofo ki he mafai ʻo Sihová?

⁵ Neongo naʻe fakatokanga ʻa Sihova ʻo pehē te ne ʻomai ʻa e tautea ki he kau faihala taʻefakatomalá, naʻe ʻilo ʻe Mōsese ko ia tefito “koe Otua agatonu, aia oku ne tauhi ae fuakava moe aloofa mo kinautolu oku ofa kiate ia, bea fai ki he ene gaahi fekau.” (Teutalōnome 7:9, PM) Fakaʻuta atu ā ki ai! Ko e Mafai Aoniu ʻo e ʻuniveesí ē ʻoku ʻikai te ne fakamālohiʻi kitautolu ke tau tauhi ia. Ka, ʻoku tau fakaofi kiate ia koeʻuhi ko ʻene ʻofá. (Loma 2:4; 5:8) ʻOku toe aʻu ʻo fakafiefia ʻa e anganofo ki he mafai ʻo Sihová, he ʻoku ngāue maʻu pē ʻa ʻene ngaahi laó ki he lelei fakaʻaufuli maʻatautolu.​—Sāme 19:​7, 8.

6. Naʻe anga-fēfē ʻa e malanga hake ʻa e fakakikihi ʻo fekauʻaki mo e mafaí ʻi he ngoue ʻo ʻĪtení, pea ko e hā hono olá?

⁶ Naʻe fakataleʻi ʻe heʻetau ʻuluaki ongo mātuʻá ʻa e tuʻunga-hau ʻo e ʻOtuá. Naʻá na loto ke na fili pē maʻanaua ʻa e meʻa naʻe leleí mo e meʻa naʻe koví. (Sēnesi 3:​4-6) Ko hono olá, ne kapusi ai kinaua mei hona ʻapi Palataisí. ʻI he hili iá, naʻe fakaʻatā leva ʻe Sihova ʻa e faʻahinga ʻo e tangatá ke nau fokotuʻu ha ngaahi tuʻunga mafai ʻa ia te nau malava ai ke moʻui ʻi ha sōsaieti maau, neongo ʻa e taʻehaohaoá. Ko e hā ʻa e niʻihi ʻo e ngaahi mafai ko ʻení, pea ko e hā ʻa hono lahi ʻoku ʻamanekina ʻe he ʻOtuá meiate kitautolu ke tau anganofo ai kiate kinautolú?

KO E “NGAAHI MAFAI MĀʻOLUNGA”

7. Ko hai ʻa e “ngaahi mafai māʻolunga,” pea ʻoku anga-fēfē ʻa e felāveʻi ʻa honau tuʻungá mo e mafai ʻo e ʻOtuá?

⁷ Naʻe tohi ʻe he ʻaposetolo ko Paulá: “Ke anganofo ʻa e tangata kotoa pe ki he ngaahi pule ʻoku maʻolunga [“ngaahi mafai māʻolunga,” NW]: he ʻoku ʻikai ha pule, ka ʻoku mei he ʻOtua pe.” Ko hai ʻa e “ngaahi mafai māʻolunga”? ʻOku fakahaaʻi ʻe he ngaahi lea ʻa Paula ʻi he ngaahi veesi hoko haké ko kinautolu ia ʻa e ngaahi mafai fakapuleʻanga fakaetangatá. (Loma 13:1-7; Taitusi 3:1) Naʻe ʻikai ke fakatupu ʻe Sihova ʻa e ngaahi mafai fakapuleʻanga fakaetangatá, ka ʻoku nau ʻi ai ní ko ʻene fakangofuá. Ko ia  naʻe lava ai ʻe Paula ke ne tohi: “Ko e ngaahi pule ʻoku ʻi ai ni ko e fokotuʻu ʻe he ʻOtua.” Ko e hā ʻoku fakahaaʻi ʻe he meʻá ni ʻo fekauʻaki mo e mafai fakaemāmani peheé? ʻOku puleʻia ia, pe ʻoku māʻulalo ange ia ʻi he mafai ʻo e ʻOtuá. (Sione 19:​10, 11) Ko ia ai, ʻi he taimi ʻoku hoko ai ha fepaki ʻi he lao ʻa e tangatá mo e lao ʻa e ʻOtuá, kuo pau ki he kau Kalisitiané ke tataki kinautolu ʻe honau konisēnisi kuo akoʻi mei he Tohitapú. Kuo pau ke nau “fai ki he pule ʻa e ʻOtua ʻi he pule ʻa e tangata.”​—Ngāue 5:29.

8. Ko e hā ʻa e ʻaonga ʻokú ke maʻu mei he ngaahi mafai māʻolungá, pea ʻe malava fēfē ke ke fakahāhā ʻa hoʻo moʻulaloa kiate kinautolú?

⁸ Kae kehe, ʻi he taimi lahi, ʻoku ngāue ai ʻa e ngaahi mafai māʻolunga fakapuleʻangá ‘ko e sevaniti ia ʻa e ʻOtua ki haʻatau lelei.’ (Loma 13:3 [Loma 13:​4, PM]) ʻI he ngaahi founga fē? Sai, fakakaukau atu ki he ngaahi faifatongia lahi ʻoku fakahoko mai ʻe he ngaahi mafai māʻolungá, ʻo hangē ko hono feʻaveʻaki ʻo e meilí, kau polisí mo e tāmate afí, ngāue fakahaisiní, mo e akó. “Ko hono ʻuhinga foki ia ʻoku mou tukuhau ai,” naʻe tohi ʻe Paula, “he ko e kau fai ʻo e ngaue tapu ʻa e ʻOtua ʻa kinautolu, pea ʻoku  nau nofo pe ki he meʻa ko ia.” (Loma 13:6) ʻI he fekauʻaki mo e ngaahi tukuhaú pe ko ha toe ngafa fakalao kehe, ʻoku totonu ke tau “moui agatonu” ai.​—Hepelū 13:18, PM.

9, 10. (a) ʻOku anga-fēfē ʻa e feʻungamālie ʻa e ngaahi mafai māʻolungá mo e tuʻutuʻuni ʻa e ʻOtuá? (e) Ko e hā ʻe hala ai ke fakafepaki ki he ngaahi mafai māʻolungá?

⁹ ʻOku ʻi ai ʻa e ngaahi taimi, ʻoku ngāuekoviʻaki ai ʻe he ngaahi mafai māʻolungá ʻa honau iví. ʻOku fakaʻatā ʻe he meʻá ni kitautolu mei hotau fatongia ke kei moʻulaloa ai pē kiate kinautolú? ʻIkai, ʻoku ʻikai pehē ia. ʻOku ʻafioʻi ʻe Sihova ʻa e ngaahi ngāue kovi ʻa e ngaahi mafaí ni. (Palōvepi 15:3) Ko ʻene kātakiʻi ʻa e pule ʻa e tangatá ʻoku ʻikai ʻuhinga ai ia ʻokú ne tukunoaʻi ʻa ʻene koví; ʻoku ʻikai te ne ʻamanekina mai ke tau fai pehē foki mo kitautolu. Ko e moʻoni, ʻe vavé ni ke hanga ʻe he ʻOtuá ʻo “laiki mo fakaʻauha ʻa e ngaahi puleʻanga ko ia,” pea fetongi kinautolu ʻaki ʻa e pule ʻa hono puleʻanga māʻoniʻoni ʻoʻoná. (Tāniela 2:44) Ka ʻi he teʻeki ai ke hoko ʻa e meʻá ni, ʻoku fakahoko ʻe he ngaahi mafai māʻolungá ha taumuʻa ʻaonga.

¹⁰ Naʻe fakamatalaʻi ʻe Paula: “ʻIlonga ʻa ia ʻoku angatuʻu ki he pule, ko ʻene tuʻu ia ki he tuʻutuʻuni ʻa e ʻOtua.” (Loma 13:2) Ko e ngaahi mafai māʻolungá ko e “tuʻutuʻuni” ia ʻa e ʻOtuá ke nau tauhi maʻu ha tuʻunga ʻo e maau, ʻa ia ʻe ʻikai ke pule ai ʻa e maveuveú mo e maumau-laó. Ko hono fakafepakiʻi kinautolú ko ha meʻa taʻefakatohitapu mo fakavalevale ia. Ke fakatātaaʻi: Fakaʻuta atu ne ke hokosia ha tafa pea tuitui ʻa e mataʻitafá ke malu. Neongo ʻoku foʻou ki he sinó ia ʻa e ngaahi mata-tuituí, ʻoku nau fakahoko ha taumuʻa ʻi ha taimi fakangatangata. Ko hano toʻo kinautolu ʻoku teʻeki taimi ke toʻó ʻoku malava ke hoko ai ha maumau. ʻI he tuʻunga meimei tatau, ko e ngaahi mafai fakapuleʻanga fakaetangatá naʻe ʻikai ko ha konga kinautolu ia ʻo e muʻaki taumuʻa ʻa e ʻOtuá. Kae kehe, ʻoku hanga ʻe he ngaahi puleʻanga fakaetangatá ʻo fakatahatahaʻi ʻa e sōsaietí, ʻo fakahoko ai ha ngāue ʻoku feʻungamālie mo e finangalo ʻo e ʻOtuá ki he taimi lolotonga ní pē, kaeʻoua ke toki pule mai ʻa hono Puleʻangá ki he māmaní kotoa. Ko ia ʻoku totonu ke tau kei moʻulaloa pē ki he ngaahi mafai māʻolungá, lolotonga iá ʻoku tau fakamuʻomuʻa ʻa e lao mo e mafai ʻo e ʻOtuá.

MAFAI ʻI HE FĀMILÍ

11. Te ke fakamatalaʻi fēfē ʻa e tefitoʻi moʻoni fekauʻaki mo e tuʻunga-ʻulú?

¹¹ Ko e fāmilí ko e faʻunga tefito ia ʻo e sōsaieti ʻo e tangatá. ʻI  loto ʻi aí ʻoku maʻu ai ʻe ha husepāniti mo ha uaifi ha takanga lelei, pea ʻoku malava ke maluʻi mo akoʻi ai ʻa e fānaú ki heʻenau tupu hake ʻo lalahí. (Palōvepi 5:​15-21; ʻEfesō 6:​1-4) Ko ha fokotuʻutuʻu fakaʻeiʻeiki pehē ʻoku fiemaʻu ia ke fokotuʻutuʻu maau ʻi ha founga ʻe lava ke nofo melino mo feongoongoi ai ʻa e ngaahi mēmipa ʻo e fāmilí. Ko e founga ʻa Sihova ki hono fakahoko ʻo e meʻá ni ʻoku fakafou mai ia ʻi he tefitoʻi moʻoni fekauʻaki mo e tuʻunga-ʻulú, naʻe fakanounou mai ia ʻi he ngaahi leá ni, ʻa ia ʻoku hā ʻia 1 Kolinitō 11:3: “Ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata; pea ko e ʻulu ʻo Kalaisi ko e ʻOtua.”

12, 13. Ko hai ʻa e ʻulu ʻi he fāmilí, pea ko e hā ʻoku malava ke ako mei he founga ʻo hono ngāueʻaki ʻe Sīsū ʻa e tuʻunga-ʻulú?

¹² Ko e husepānití ko e ʻulu ia ʻo e fāmilí. Kae kehe, ʻoku ʻi ai ha ʻulu ia ʻoku ʻi ʻolunga ʻiate ia​—ko Sīsū Kalaisi. Naʻe tohi ʻe Paula: “ʻA e kau tangata, mou ʻofa ki homou ngaahi uaifi, ʻo hange foki ko Kalaisi ne ne ofaʻi ʻa e Siasi, ʻo ne liʻoa ʻa ʻEne ʻAfio koeʻuhi ko ia.” (ʻEfesō 5:25) ʻOku tapua mai ʻe ha husepāniti ʻa ʻene moʻulaloa kia Kalaisí ʻi heʻene feangainga ki hono uaifí ʻi he founga kuo feangainga maʻu pē ai ʻa Sīsū ki he fakatahaʻangá. (1 Sione 2:6) Kuo foaki kia Sīsū ʻa e mafai lahi, ka ʻokú ne ngāueʻi ia fakataha  mo e lelei taha ʻi he anga-malū, ʻofa, mo e anga-fakaʻatuʻi. (Mātiu 20:​25-28) ʻI heʻene hoko ko ha tangatá, naʻe ʻikai ʻaupito ke ngāuekoviʻaki ʻe Sīsū ʻa hono tuʻunga mafaí. Naʻá ne “agavaivai mo agamalu,” pea naʻá ne ui ʻa hono kau muimuí ko e “ngaahi kaumeʻa” kae ʻikai ko e “kau tamaioʻeiki.” “Teu foaki ae fiemalie kiate kimoutolu,” ko ʻene talaʻofa ange ia kiate kinautolú, pea ko e meʻa ia naʻá ne faí.​—Mātiu 11:​28, 29, PM; Sione 15:15.

¹³ ʻOku hanga ʻe he faʻifaʻitakiʻanga ʻa Sīsuú ʻo akoʻi ki he ngaahi husepānití ko e tuʻunga-ʻulu faka-Kalisitiané ʻoku ʻikai ko ha tuʻunga ia ʻo e pule fefeka. ʻI hono kehé, ko e tuʻunga ia ʻo e tokaʻi mo e ʻofa fakaefeilaulauʻi-kita. ʻE mahino lelei hono taʻofi ʻe he meʻá ni ʻa hono ngaohikoviʻi fakaesino mo fakaelea ha hoa mali. (ʻEfesō 4:​29, 31, 32; 5:​28, 29; Kolose 3:19) Kapau naʻe ngaohikoviʻi pehē ʻe ha tangata Kalisitiane ʻa hono uaifí, ʻe hoko ʻo taʻeʻaonga ʻa ʻene ngaahi ngāue lelei kehé, pea ko ʻene ngaahi lotú ʻe taʻofia.​—1 Kolinitō 13:​1-3; 1 Pita 3:7.

14, 15. ʻOku anga-fēfē ʻa hono tokoniʻi ʻe he ʻiloʻi ʻo e ʻOtuá ha uaifi ke ne anganofo ki hono husepānití?

¹⁴ ʻI he faʻifaʻitaki ʻa ha husepāniti ki he faʻifaʻitakiʻanga ʻa Kalaisí, ʻoku faingofua ange ai ki hono uaifí ke ne tali fiemālie ʻa e ngaahi lea ʻi he ʻEfesō 5:​22, 23: “ʻA e kau fefine, mou anganofo ki siʻomou ngaahi husepaniti, ʻo hange ki he ʻEiki. He ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi.” Hangē pē ko ia ko e pau ke anganofo ha husepāniti kia Kalaisí, kuo pau ke moʻulaloa ha uaifi ki hono husepānití. ʻOku toe fakamahino mai ʻe he Tohitapú ʻoku taau mo e ngaahi uaifi fitá ʻa e fakaʻapaʻapaʻia mo e fakamālōʻia ʻi heʻenau poto fakaʻotuá mo faʻa ngāué.​—Palōvepi 31:​10-31.

¹⁵ ʻOku fakangatangata ʻa e moʻulaloa ʻa ha uaifi Kalisitiane ki hono husepānití. ʻOku ʻuhinga ʻení kuo pau ke talangofua ki he ʻOtuá kae ʻikai ko e tangatá ʻo kapau ʻe iku ʻi ha faʻahinga meʻa ʻa e anganofó ʻo maumauʻi ai ʻa e lao fakaʻotuá. Naʻa mo e aʻu ki he taimi ko iá, ko e tuʻumaʻu ʻa ha uaifi ʻoku totonu ke ʻai ke mafamafatatau ia mo e “angavaivai mo e angamalū.” ʻOku totonu ke hā mahino kuo ʻai ia ʻe he ʻiloʻi ʻo e ʻOtuá ʻo ne hoko ko ha uaifi lelei ange. (1 Pita 3:​1-4) ʻOku toe kaungatonu pē ʻeni ki ha tangata Kalisitiane ʻa ia ko hono uaifí ʻoku ʻikai ko ha tokotaha ʻoku tui. Ko ʻene tali fiemālie ʻa e ngaahi tefitoʻi moʻoni ʻi he Tohitapú ʻoku totonu ke ne hoko ai ko ha husepāniti lelei ange.

16. ʻOku malava fēfē ke faʻifaʻitaki ʻa e fānaú ki he faʻifaʻitakiʻanga naʻe fokotuʻu ʻe Sīsū ʻi heʻene kei talavoú?

 ¹⁶ ʻOku fakaeʻa mai ʻi he ʻEfesō 6:1 ʻa e ngafa ʻo e fānaú, ʻo pehē: “Mou talangofua ʻi he ʻEiki ki hoʻomou matuʻa: he ko hono totonu ia.” ʻOku totonu ke muimui ʻa e fānau Kalisitiané ki he faʻifaʻitakiʻanga ʻa Sīsuú, ʻa ia naʻá ne moʻulaloa ai pē ki heʻene ongo mātuʻá ʻi heʻene tupu haké. ʻI hono tuʻunga ko ha tamasiʻi talangofuá, “naʻe lalaka atu ʻa Sīsū ʻi he poto, mo e lahi ʻo hono sino, pea mo hono ʻofeina ʻe he ʻOtua mo e tangata.”​—Luke 2:​51, 52.

17. Ko e hā nai ʻa e ola ʻe ʻi he fānaú ko e tupu ia mei he founga ʻo hono ngāueʻaki ʻa e mafaí ʻe he ngaahi mātuʻá?

¹⁷ Ko e founga ʻo hono fakahoko ʻe he ngaahi mātuʻá ʻa honau ngaahi fatongiá ʻoku lava ke ʻi ai ʻa ʻene tākiekina pe ʻe tokaʻi ʻe he fānaú ʻa e tuʻunga mafaí pe te nau angatuʻu ki ai. (Palōvepi 22:6) Ko ia ʻoku totonu ke ʻeke hifo pē ʻe he ngaahi mātuʻá kiate kinautolu, ‘ʻOku ou ngāueʻaki ʻa hoku mafaí ʻi he anga-ʻofa pe ko e anga-fefeka? ʻOku ou fakangofua tavale pē?’ ʻOku ʻamanekina mei ha mātuʻa anga-fakaʻotua ʻa e anga-ʻofá mo e fakaʻatuʻí, ka ʻe tuʻumaʻu ʻi he pipiki ki he ngaahi tefitoʻi moʻoni fakaʻotuá. ʻOku feʻungamālié, he naʻe tohi ʻe Paula: “Ngaahi tamai, ʻoua te mou fakaʻitaʻi hoʻomou fānaú [ʻuhinga fakafoʻileá, ‘ko hono fakalanga ke nau ʻita’], kae hanganaki tauhi hake kinautolu ʻi he akonaki mo e fakatonutonu fakaʻatamai ʻa Sihová.”​—ʻEfesō 6:​4, NW; Kolose 3:21.

18. ʻOku totonu ke fēfē ʻa hono fakahoko ʻo e akonaki fakaemātuʻá?

¹⁸ ʻOku totonu ke sivisiviʻi lelei ʻe he ngaahi mātuʻá ʻa ʻenau ngaahi founga akoʻí, tautefito kapau ʻoku nau loto ke talangofua ʻa ʻenau fānaú pea ko ia ʻe ʻomai ai kiate kinautolu ʻa e loto-fiefia. (Palōvepi 23:​24, 25) ʻI he Tohitapú, ko e ʻuhinga tefito ʻo e akonakí ko ha tuʻunga ʻo e fakahinohino. (Palōvepi 4:1; 8:33) ʻOku fehokotaki ia mo e ʻofa pea mo e anga-malū, ʻo ʻikai ko e ʻita mo e anga-fakamanu. Ko ia ai, ʻoku fiemaʻu ki he ngaahi mātuʻa Kalisitiané ke nau ngāueʻaki ʻa e potó pea nau anga-fakamaʻumaʻu ʻi he taimi ʻoku nau akonakiʻi ai ʻa ʻenau fānaú.​—Palōvepi 1:7.

MAFAI ʻI HE FAKATAHAʻANGÁ

19. Kuo anga-fēfē ʻa hono tokonaki mai ʻe he ʻOtuá ha fokotuʻutuʻu maau ʻi he fakatahaʻanga Kalisitiané?

¹⁹ Koeʻuhi ko Sihová ko ha ʻOtua maau, ʻoku ʻuhinga lelei ai ke  pehē te ne tokonaki mai ʻa e tuʻunga-taki maʻu mafai mo fokotuʻutuʻu maau maʻa hono kakaí. Ko ia ai, kuó ne fakanofo ʻa Sīsū ke hoko ko e ʻUlu ʻo e fakatahaʻanga Kalisitiané. (1 Kolinitō 14:​33, 40; ʻEfesō 1:​20-23) ʻI he malumalu ʻo e tuʻunga-taki taʻehāmai ʻa Kalaisí, kuo fakamafaiʻi ai ʻe he ʻOtuá ha fokotuʻutuʻu ʻa ia ʻoku fai ai ʻe he kau mātuʻa kuo fakanofo ʻi he fakatahaʻanga taki taha ʻa hono tauhi ʻo e tākangá ʻi he loto-vēkeveke, loto-lelei, mo e anga-ʻofa. (1 Pita 5:​2, 3) ʻOku tokoni ʻa e kau sevāniti fakafaifekaú kiate kinautolu ʻi he ngaahi founga kehekehe mo fakahoko ʻa e ngāue mahuʻinga ʻi he loto fakatahaʻangá.​—Filipai 1:1.

20. Ko e hā ʻoku totonu ai ke tau anganofo ki he kau mātuʻa Kalisitiane kuo fakanofó, pea ko e hā ʻoku ʻaonga ai ʻení?

²⁰ ʻI he fekauʻaki mo e kau mātuʻa Kalisitiané, naʻe tohi ʻe Paula: “Mou tuitala ki he kau tuʻukimuʻa ʻomoutolu, pea fakavaivai kiate kinautolu; he ko kinautolu ia ʻoku nau ʻā ke leʻohi homou laumalie, he ko kinautolu te nau fakamatala kimoutolu ʻamui; koeʻuhiā ke nau fai fiefia ʻenau ngaue ko ia, ʻo ʻikai fai mo e toʻe: he ʻe taeʻaonga ia kiate kimoutolu.” (Hepelū 13:17) Ko e meʻa fakapotopotó, kuo tuku ʻe he ʻOtuá ki he kau ʻovasia Kalisitiané ʻa e fatongia ko hono tokangaʻi ʻa e ngaahi fiemaʻu fakalaumālie ʻa e faʻahinga ʻi he fakatahaʻangá. ʻOku ʻikai ke fokotuʻu ʻa e kau mātuʻá ni ko ha kalasi haʻa faifekau. Ko e kau sevāniti mo e kau tamaioʻeiki kinautolu ʻa e ʻOtuá, ʻoku nau tokangaʻi ʻa e ngaahi fiemaʻu ʻa honau kaungā lotú, ʻo hangē ko ia naʻe fai ʻe hotau Pulé, ko Sīsū Kalaisi. (Sione 10:​14, 15) ʻI he ʻilo ʻoku mahuʻingaʻia ʻa e kau tangata taau Fakatohitapu ko iá ʻi heʻetau laka ki muʻa mo tupu fakalaumālié, ʻoku fakalototoʻaʻi ai kitautolu ke tau ngāue fakataha mo anganofo.​—1 Kolinitō 16:16.

21. ʻOku anga-fēfē ʻa e feinga ʻa e kau mātuʻa kuo fakanofó ke tokoniʻi fakalaumālie honau kaungā Kalisitiané?

²¹ ʻI he taimi ʻe niʻihi, ʻoku hē nai ai ʻa e fanga sipí pea aʻu ki ha tuʻunga fakatuʻutāmaki ko e tupu mei ha ngaahi meʻa fakamāmani ʻoku fakatupu maumau. ʻI he malumalu ʻo e tuʻunga-taki ʻa e Tauhi-Sipi Lahí, ʻoku mata-tokanga ai ʻa e kau mātuʻá ʻi honau tuʻunga ko e kau tauhi-sipi tokoní ki he ngaahi fiemaʻu ʻa e faʻahinga ʻoku nau tokangaʻí, pea fai tōtōivi ha tokanga fakafoʻituitui kiate kinautolu. (1 Pita 5:4) ʻOku nau ʻaʻahi ki he ngaahi mēmipa ʻo e fakatahaʻangá ʻo fai ha ngaahi lea fakalototoʻa kiate kinautolu. ʻI hono ʻiloʻi ʻoku feinga ʻa e Tēvoló ke maumauʻi ʻa e  melino ʻa e kakai ʻa e ʻOtuá, ʻoku ngāueʻaki ai ʻe he kau mātuʻá ʻa e poto ʻoku mei ʻolungá ʻi he feangai mo ha faʻahinga palopalema pē. (Sēmisi 3:​17, 18) ʻOku nau ngāue mālohi ke tauhi maʻu ʻa e fāʻūtaha mo e taha ʻa e tuí, ʻa e meʻa ko ia naʻe lotu ʻa Sīsū tonu ʻo kolé.​—Sione 17:​20-22; 1 Kolinitō 1:10.

22. Ko e hā ʻa e tokoni ʻoku tokonaki mai ʻe he kau mātuʻá ʻi he ngaahi tuʻunga ʻo e faihalá?

²² Fēfē kapau ʻoku faingataʻaʻia ha taha Kalisitiane ʻi ha kovi ʻoku hoko, pe ʻoku hoko ʻo loto-siʻi koeʻuhi ko ʻene fai ha angahala? Ko ha akonaki fakanonga mei he Tohitapú mo e lotu tupu mei he lotó ʻa e kau mātuʻá maʻana, ʻoku malava ke tokoni ia ki hono toe fakafoki mai ia ke moʻui lelei fakalaumālié. (Sēmisi 5:​13-15) Ko e kau tangatá ni, naʻe fakanofo ʻe he laumālie māʻoniʻoní, ʻoku nau toe maʻu ʻa e mafai ke fai ʻa e akonaki mo e valoki ki ha taha pē ʻokú ne muia ha ʻalunga ʻo e faihalá, pe ʻokú ne ʻai ha tuʻunga fakatuʻutāmaki ki he tuʻunga maʻa fakalaumālie mo fakaeʻulungaanga ʻo e fakatahaʻangá. (Ngāue 20:28; Taitusi 1:9; 2:15) Ke kei tauhi ai pē ʻa e maʻa ʻa e fakatahaʻangá, ʻoku fiemaʻu nai ki he tokotaha tāutaha ke ne līpooti ʻa e faihala mamafá. (Livitikō 5:1) Kapau ʻoku tali ʻe ha taha Kalisitiane kuó ne fai ha angahala mamafa ʻa e akonaki mo e valoki Fakatohitapú pea fakahāhā ʻa e fakamoʻoni ʻo e fakatomala moʻoní, ʻe tokoniʻi ia. Ko hono moʻoní, ʻoku tuʻusi ʻa e faʻahinga ʻoku nau tuʻukāivi mo taʻefakatomala ʻi hono maumauʻi ʻo e lao ʻa e ʻOtuá.​—1 Kolinitō 5:​9-13.

23. Ko e hā ʻoku tokonaki mai ʻe he kau ʻovasia Kalisitiané ko ha lelei ia maʻá e fakatahaʻangá?

²³ Naʻe tala ki muʻa ʻi he Tohitapú ʻo pehē ʻi he malumalu ʻo Sīsū Kalaisi ʻi hono tuʻunga ko e Tuʻí, ʻe fakanofo ai ha kau tangata matuʻotuʻa fakalaumālie ke nau ʻomai ʻa e fakafiemālie, maluʻi, mo e fakaivi foʻou maʻá e kakai ʻa e ʻOtuá. (ʻAisea 32:​1, 2) Te nau takimuʻa ʻi he tuʻunga ko e kau ʻevangeliō, kau tauhi-sipi, mo e kau faiako koeʻuhi ke pouaki ʻa e tupu fakalaumālié. (ʻEfesō 4:​11, 12, 16) Neongo ʻe ʻi ai ʻa e taimi ʻe niʻihi ʻe valokiʻi, leaʻi mo enginakiʻi ai ʻe he kau ʻovasia Kalisitiané ʻa e kaungā tuí, ko hono ngāueʻaki ʻa e akonaki lelei ʻa e kau mātuʻá naʻe makatuʻunga ʻi he Folofola ʻa e ʻOtuá, ʻoku tokoni ia ki he tokotaha kotoa ke nau kei tauhi maʻu ai pē ʻi he hala ki he moʻuí.​—Palōvepi 3:​11, 12; 6:23; Taitusi 2:1.

 TALI ʻA E ANGA ʻO E VAKAI ʻA SIHOVA KI HE MAFAÍ

24. Ko e hā ʻa e fakakikihi ʻoku ʻahiʻahiʻi fakaʻaho ai kitautolú?

²⁴ Naʻe ʻahiʻahiʻi ʻa e ʻuluaki tangatá mo e fefiné ʻi he fekauʻaki mo e fakakikihiʻi ʻo e moʻulaloa ki he mafaí. ʻOku ʻikai ha ofo, ʻoku tau fehangahangai fakaʻaho mo ha ʻahiʻahi meimei tatau. Kuo langaʻi ʻe Sētane ko e Tēvoló ha laumālie ʻo e angatuʻu ʻi he lotolotonga ʻo e faʻahinga ʻo e tangatá. (ʻEfesō 2:2) Ko e ʻalunga ʻo e faʻifaʻitelihá ʻoku ʻai ia ke hā fakatauele ʻo māʻolunga ange ia ʻi he ʻalunga ko ia ʻo e moʻulaloá.

25. Ko e hā ʻa e ngaahi ʻaonga ʻo hono talitekeʻi ʻa e laumālie angatuʻu ʻo e māmaní, pea mo e hoko ʻo anganofo ki he mafai ʻoku ngāueʻaki pe fakangofua ʻe he ʻOtuá?

²⁵ Kae kehe, kuo pau ke tau talitekeʻi ʻa e laumālie angatuʻu ʻo e māmaní. ʻI heʻetau fai peheé, te tau ʻilo ai ʻoku ʻomai ʻe he moʻulaloa fakaʻotuá ʻa e ngaahi pale mahuʻinga ʻaupito. Hangē ko ʻení, te tau fakaʻehiʻehi ai mei he ngaahi loto-moʻua mo e ngaahi ongoʻi feifeitamaki ʻoku hoko lahi ki he faʻahinga ko ia ʻoku nau fakatupunga ha faingataʻa ke hoko mai mei he kau maʻu mafai fakaemāmaní. Te tau fakasiʻisiʻi ai ʻa e fepaki ʻoku lahi ʻene hoko ʻi he ngaahi fāmili lahi. Pea te tau fiefia ʻi he ngaahi ʻaonga ʻo e feohi māfana mo anga-ʻofa mo hotau kaungā tui Kalisitiané. Ka ko e mahulu tahá, ʻe iku atu ʻa ʻetau moʻulaloa fakaʻotuá ki ha vahaʻangatae lelei mo Sihova, ko e Mafai Aoniú.

SIVIʻI HOʻO ʻILÓ

ʻOku anga-fēfē ʻa hono ngāueʻaki ʻe Sihova ʻa hono mafaí?

Ko hai ʻa e “ngaahi mafai māʻolunga,” pea ʻe anga-fēfē ʻa ʻetau kei moʻulaloa kiate kinautolú?

Ko e hā ʻa e fatongia ʻoku fokotuʻu ʻe he tefitoʻi moʻoni ʻo e tuʻunga-ʻulú ki he mēmipa taki taha ʻo e fāmilí?

ʻE fēfē ʻetau fakahāhā ʻa e anganofó ʻi he fakatahaʻanga Kalisitiané?

[Fehuʻi ki he Ako]

[Puha ʻi he peesi 134]

ANGANOFO, ʻIKAI KO E FAKATUPU-MAVEUVEU

Fakafou ʻi heʻenau ngāue fakamalanga ki he kakaí, ʻoku tuhu ʻa e Kau Fakamoʻoni ʻa Sihová ki he Puleʻanga ʻo e ʻOtuá ko e ʻamanakiʻanga pē ia ʻe taha ʻa e faʻahinga ʻo e tangatá ki he melino mo e maluʻanga moʻoní. Ka ko e kau fanongonongo faivelenga ko ʻeni ʻo e Puleʻanga ʻo e ʻOtuá ʻoku ʻikai ʻaupito te nau fakatupu-maveuveu ki he ngaahi puleʻanga ko ia ʻoku nau nofo ai ʻi honau malumalú. Ko hono kehe ʻaupitó, ko e Kau Fakamoʻoní ʻoku nau kau ʻi he lotolotonga ʻo e tangataʻifonua anga-fakaʻapaʻapa mo tauhi-lao lahi tahá. “Kapau naʻe hangē ʻa e ngaahi lotu kotoa pē ko e kau fakamoʻoni ʻa Sihová,” ko e lau ia ʻa ha tokotaha ʻōfisa ʻi ha fonua ʻe taha ʻi ʻAfilika, “ʻe ʻikai te tau maʻu ha kau fakapō, kau hae fale, kau maumau-lao, kau pōpula mo ha ngaahi pomu ʻātomi. ʻE ʻikai ke lokolokaʻi ʻa e ngaahi matapaá ʻi he ʻaho mo e pō.”

ʻI hono fakatokangaʻi ʻa e meʻá ni, kuo fakaʻatā ai ʻe he kau ʻōfisa ʻi he ngaahi fonua lahi ʻa e ngāue fakamalanga ʻa e Kau Fakamoʻoní ke hoko atu ʻo ʻikai ke toe taʻofi. ʻI he ngaahi fonua kehe, kuo toʻo atu ai ʻa e ngaahi tapuí mo e ngaahi fakangatangatá ʻi hono ʻilo ʻe he kau maʻu mafaí ko e Kau Fakamoʻoni ʻa Sihová ko ha tākiekina kinautolu ki he leleí. ʻOku hangē pē ko ia naʻe tohi ʻe he ʻaposetolo ko Paulá ʻo fekauʻaki mo e talangofua ki he ngaahi mafai māʻolungá: “Peʻi fai lelei, pea te ke toki maʻu ha fakamalo mei ai.”​—Loma 13:​1, 3.