Ko e Tohi ʻOkú Ne Fakahaaʻi Mai ʻa e ʻIloʻi ʻo e ʻOtuá
Vahe 2
Ko e Tohi ʻOkú Ne Fakahaaʻi Mai ʻa e ʻIloʻi ʻo e ʻOtuá
1, 2. Ko e hā ʻoku fiemaʻu ai kiate kitautolu ʻa e tataki ʻa hotau Tokotaha-Fakatupú?
ʻOKU tuha pē ke pehē ʻe tokonaki mai ʻe hotau Tokotaha-Fakatupu anga-ʻofá ha tohi ʻo e fakahinohino mo e tataki maʻá e faʻahinga ʻo e tangatá. Pea ʻikai ʻokú ke loto-tatau ki he pehē ʻoku fiemaʻu ki he faʻahinga ʻo e tangatá ha tataki?
2 Lahi hake ʻi he taʻu ʻe 2,500 kuo maliu atú, naʻe tohi ai ʻe ha palōfita pea mo faihisitōlia: “Oku ikai i he tagata oku eveeva ke fakahinohino hono aluaga.” (Selemaia 10:23, PM) ʻI he ʻahó ni, ʻoku toe hā mahino ange ʻa e moʻoni ʻa e lea ko iá ʻo ʻikai hano tatau ki muʻa. Ko ia, ko e fakamatala ʻeni ʻa e faihisitōlia ko William H. McNeill: “Ko e meʻa ʻoku hokosia ʻe he faʻahinga ʻo e tangatá ʻi he funga palanite ko ʻení ko ha meimei hokohoko taʻemotu ʻo e ngaahi faingataʻá mo e māveuveu ʻi he fokotuʻutuʻu maau ʻo e sōsaietí.”
3, 4. (a) ʻOku totonu ke fēfē ʻetau fakakaukau atu ki hano ako ʻo e Tohitapú? (e) ʻE fēfē ʻa ʻetau hokohoko atu ʻi hano vakaiʻi ʻa e Tohitapú?
3 ʻOku fakalato ʻe he Tohitapú ʻa e ngaahi fiemaʻu kotoa kiate kitautolu ʻo kau ki ha fakahinohino fakapotopoto. Ko e moʻoni, ʻoku ongoʻi lōmekina ʻa e tokolahi ʻi heʻenau ʻuluaki vakaiʻi pē ʻa e Tohitapú. Ko ha tohi lahi ia, pea ko hono ngaahi konga ʻe niʻihi ʻoku mahinongataʻa. Ka ʻo kapau naʻe ʻoatu kiate koe ha tohi-fakamoʻoni fakalao ʻo fakamatala atu ai ʻa e meʻa naʻe pau ke ke fai ka ke maʻu ha koloa tukufakaholo mahuʻinga, ʻikai te ke vaheʻi ha taimi ke ako fakalelei ai ia? Kapau naʻe ʻi ai ha ngaahi konga ʻo e tohi ko iá naʻe mahinongataʻa kiate koe, ʻoku ngalingali te ke maʻu ʻa e tokoni ʻa ha taha ʻoku taukei ʻi he ngaahi meʻa peheé. Ko e hā ʻoku ʻikai ke fai ai ha fakakaukau meimei tatau ki he Tohitapú? (Ngāue 17:11) ʻOku māfatukituki ange hono mahuʻingá ʻi ha koloa tukufakaholo fakamatelie. Hangē ko ia naʻa tau ako ki ai ʻi he vahe ki muʻá, ko e ʻiloʻi ʻo e ʻOtuá ʻoku malava ke taki atu ia ki he moʻui taʻengatá.
4 Tau sivisiviʻi ange ʻa e tohi ʻokú ne fakahaaʻi mai ʻa e ʻiloʻi ʻo e ʻOtuá. Te tau tomuʻa fai ha kiʻi vakai fakalūkufua ki he Tohitapú. Hili iá te tau lāulea leva ki he ngaahi ʻuhinga ʻoku tui ai ʻa e kau maʻu fakamatala tokolahi ko e Folofola fakamānavaʻi ia ʻa e ʻOtuá.
KO E MEʻA ʻOKU ʻI HE TOHITAPÚ
5. (a) Ko e hā ʻoku ʻi he Ngaahi Konga Tohitapu Faka-Hepeluú? (e) Ko e hā ʻoku ʻi he Ngaahi Konga Tohitapu Faka-Kalisí?
5 ʻOku ʻi he Tohitapú ʻa e ngaahi tohi ʻe 66 ʻi he konga ʻe ua, ʻoku faʻa ui ko e Fuakava Motuʻa mo e Fuakava Foʻou. Ko e ngaahi tohi ʻe 39 ʻo e Tohitapú naʻe tohi ia tautefito ʻi he lea faka-Hepeluú pea ko e 27 ʻi he lea faka-Kalisí. Ko e Ngaahi Konga Tohitapu Faka-Hepeluú, ʻa ia ʻoku kau ki ai ʻa Sēnesi ʻo aʻu kia Malakai, ʻoku fakamatala ia ki he fakatupú pea pehē ki he ʻuluaki ngaahi taʻu ʻe 3,500 ʻo e hisitōlia ʻo e faʻahinga ʻo e tangatá. ʻI hono vakaiʻi ʻa e konga ko ʻeni ʻo e Tohitapú, ʻoku tau ako ai ʻo fekauʻaki mo e ngaahi feangainga ʻa e ʻOtuá mo e kau ʻIsilelí—mei honau fanauʻi ko ha puleʻangá ʻi he senituli hono 16 K.M. ʻo aʻu mai ki he senituli hono 5 K.M. Ko e Ngaahi Konga Tohitapu Faka-Kalisí, ʻa ia ʻoku ʻi ai ʻa e tohi ʻa Mātiú ʻo aʻu kia Fakahā, ʻoku fakahangataha ia ki he ngaahi akonaki mo e ngaahi ngāue ʻa Sīsū Kalaisi mo ʻene kau ākongá he lolotonga ʻo e ʻuluaki senituli T.S.
6. Ko e hā ʻoku totonu ai ke tau ako ʻa e Tohitapú fakakātoa?
6 ʻOku taukaveʻi ʻe he niʻihi ʻo pehē ko e “Fuakava Motuʻá” ia maʻá e kau Siú pea ko e “Fuakava Foʻoú” maʻá e kau Kalisitiané. Ka ʻi hono fakatatau ki he 2 Tīmote 3:16, “ko e potu Folofola kotoa pe ne fakamanava mei he ʻOtua, ʻoku ʻaonga.” (Fakaʻītali ʻamautolu.) Ko ia ai, ko hano ako totonu ʻo e ngaahi Konga Tohitapú kuo pau ke kau ki ai ʻa e Tohitapú fakakātoa. Ko hono moʻoní, ko e ongo konga ʻo e Tohitapú ʻokú na fefakakakatoʻaki, ʻo na fefiofi fehoanakimālie ʻo fakatupulekina ai ha kaveinga fakalūkufua.
7. Ko e hā ʻa e kaveinga ʻo e Tohitapú?
7 Mahalo kuó ke maʻu ha ngaahi feinga lotu ʻi ha laui taʻu pea fanongo ai ʻi hono lau leʻo-lahi ha konga ʻe niʻihi ʻo e Tohitapú. Pe kuó ke lau nai ʻe koe tonu ha ngaahi konga mei ai. Naʻá ke ʻilo ai kuo maʻu ʻe he Tohitapú ha foʻi afo meia Sēnesi ʻo aʻu kia Fakahā? ʻIo, ʻoku hūhū ʻi he Tohitapú ha foʻi kaveinga fehoanakimālie. Ko e hā ʻa e kaveinga ko iá? Ko hono fakatonuhiaʻi ʻa e totonu ʻa e ʻOtuá ke pule ki he faʻahinga ʻo e tangatá pea mo hono fakahoko ʻa ʻene taumuʻa anga-ʻofá ʻo fakafou mai ʻi hono Puleʻangá. Te tau toki vakai ki he founga tofu pē ko ia ʻe fakahoko ai ʻe he ʻOtuá ʻa e taumuʻa ko ʻení ʻamui ange.
8. Ko e hā ʻoku fakahaaʻi mai ʻe he Tohitapú ʻo fekauʻaki mo e ʻulungaanga ʻo e ʻOtuá?
8 Tānaki atu ki hono fakamatalaʻi ʻa e taumuʻa ʻa e ʻOtuá, ʻoku fakahā mai ʻe he Tohitapú ʻa hono ʻulungaangá. Ko e fakatātaá, ʻoku tau ako mei he Tohitapú ʻoku ʻi ai ʻa e ngaahi ongoʻi ʻa e ʻOtuá pea ʻoku mahuʻinga kiate ia ʻa e ngaahi fili ʻoku tau faí. (Sāme 78:40, 41; Palōvepi 27:11; ʻIsikeli 33:11) ʻOku pehē ʻe he Sāme 103:8-14, ko e ʻOtuá ʻoku “manavaʻofa mo angalelei . . . tuai ki he houhau, pea mohu ʻaloʻofa.” ʻOkú ne fakafeangai manavaʻofa mai kiate kitautolu, ‘ʻo manatuʻi naʻe ngaohi mei he efu pe kitaua’ pea ʻe toe foki pē ki ai ʻi he maté. (Sēnesi 2:7; 3:19) Ko ha ngaahi ʻulungaanga fakaofo ē ʻokú ne fakahāhaá! ʻIkai ko e faʻahinga ʻOtua ʻeni ʻokú ke loto ke ke lotu ki aí?
9. ʻOku anga-fēfē hono ʻomai ʻe he Tohitapú kiate kitautolu ha vakai māʻalaʻala ki he ngaahi tuʻunga ʻa e ʻOtuá, pea ʻoku malava fēfē ke tau maʻu ha ʻaonga mei he ʻilo peheé?
9 ʻOku ʻomai ʻe he Tohitapú kiate kitautolu ha vakai māʻalaʻala ki he ngaahi tuʻunga ʻa e ʻOtuá. Ko e ngaahi tuʻunga ko ʻení ʻoku fakamatalaʻi he taimi ʻe niʻihi ko e ngaahi lao. Kae kehe, ʻoku faʻa lahi ange ʻa ʻenau tapua mai ʻi he ngaahi tefitoʻi moʻoni ʻoku akoʻi ʻo fakafou ʻi he ngaahi meʻa ke fakatātāʻakí. Naʻe ʻai ʻe he ʻOtuá ke tohi ʻa e ngaahi meʻa pau naʻe hoko ʻi he hisitōlia ʻo e kau ʻIsileli ʻo e kuonga muʻá ke ʻaonga kiate kitautolu. ʻOku fakahaaʻi ʻe he ngaahi fakamatala totonu ko ʻení ʻa e meʻa ʻoku hoko ʻi he taimi ʻoku ngāue ai ʻa e kakaí ʻo fehoanaki mo e taumuʻa ʻa e ʻOtuá, pea pehē ki he nunuʻa fakamamahi ʻoku hoko ʻi he taimi ʻoku nau fai ai pē ʻenau faʻiteliha ʻanautolú. (1 Tuʻi 5:4; 11:4-6; 2 Kalonikali 15:8-15) ʻI hono lau ʻa e ngaahi meʻa pehē naʻe hoko moʻoni ʻi he moʻuí ʻe ʻikai toe ʻi ai ha veiveiua te ne ueʻi hotau lotó. Kapau ʻoku tau feinga ke sio loto atu ki he ngaahi meʻa naʻe hoko ʻa ia kuo hikí, ʻe lava ke tau fakafelāveʻi kitautolu ki he kakai naʻe kau ki aí. Ko ia, ʻoku malava ai ke tau maʻu ʻa e ʻaonga mei he ngaahi faʻifaʻitakiʻanga leleí pea lava ai ʻo fakaʻehiʻehi mei he ngaahi tōʻonga naʻá ne tauheleʻi ai ʻa e kau faihalá. Kae kehe, ʻoku fiemaʻu ha tali ki he fehuʻi mātuʻaki mahuʻingá ni: ʻOku lava fēfē ke tau ʻilo pau ko e meʻa ʻoku tau lau ʻi he Tohitapú ʻoku moʻoni naʻe fakamānavaʻi ia ʻe he ʻOtuá?
ʻE LAVA KE KE FALALA KI HE TOHITAPÚ?
10. (a) Ko e hā ʻoku fakakaukau ai ʻa e niʻihi kuo ʻosi ʻa e taimi ia ʻo e Tohitapú? (e) Ko e hā ʻoku tala mai ʻe he 2 Tīmote 3:16, 17 ʻo kau ki he Tohitapú?
10 Mahalo kuó ke fakatokangaʻi ko e ngaahi tohi lahi ʻoku ʻomai ai ʻa e faleʻí ʻoku hoko ia ʻo ʻosi hono taimí ʻi ha ngaahi taʻu siʻi pē. Fēfē ʻa e Tohitapú ia? ʻOku fuʻu motuʻa ʻaupito ia, pea ko e meimei taʻu ʻeni ʻe 2,000 kuo maliu atu talu mei hono hiki ʻa hono ngaahi lea fakamuimuí. Ko ia ai, ʻoku fakakaukau ʻa e niʻihi ʻoku ʻikai ʻaonga ia ki hotau kuonga ʻi onopooní. Ka ʻo kapau ko e Tohitapú naʻe fakamānavaʻi ia ʻe he ʻOtuá, ʻoku totonu maʻu pē ke kei feʻunga mo e taimí ʻa ʻene faleʻí neongo ʻa ʻene fuʻu motuʻá. Ko e ngaahi Konga Tohitapú ʻoku totonu ke kei “ʻaonga foki ki he akonaki, ki he fakaʻilo hala, ki he fakatonutonu, ki he ngaohia ke maʻoniʻoni: koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.”—2 Tīmote 3:16, 17.
11-13. Ko e hā ʻoku lava ai ke tau pehē ʻoku mātuʻaki ʻaonga ʻa e Tohitapú ki hotau ʻahó ni?
11 ʻOku fakahaaʻi mei hono sivisiviʻi fakaleleí ʻoku kaungatonu ʻa e ngaahi tefitoʻi moʻoni ʻi he Tohitapú ki he ʻahó ni ʻo tatau tofu pē mo ia naʻa nau ʻi ai ʻi he taimi naʻe fuofua hiki ai kinautolú. Hangē ko ʻení, ʻi he fekauʻaki mo e anga ʻo e faʻahinga ʻo e tangatá, ʻoku tapua mai ʻi he Tohitapú ʻa e mahino lahi ʻoku kaungatonu ia ki he toʻutangata kotoa pē ʻo e faʻahinga ʻo e tangatá. ʻOku malava ngofua ke tau ʻilo ʻa e meʻá ni ʻi he Malanga ʻa Sīsū ʻi he Moʻungá, ʻoku maʻu ʻi he tohi ʻa Mātiú, vahe 5 ki he 7. Naʻe maongo ʻaupito ʻa e malangá ni ki he taki ʻInitia kuo mālōlō ko Mohandas K. Gandhi ʻo ne tala ai ki ha ʻōfisa fakapuleʻanga Pilitānia ʻo pehē: “ʻO ka fakataha ho fonuá mo hoku fonuá ʻi he ngaahi akonaki naʻe tuku mai ʻe Kalaisi ʻi he Malanga ko ʻeni ʻi he Moʻungá, te tau lava ʻo solova ʻa e ngaahi palopalemá ʻo ʻikai ko hota ongo fonuá pē ka ʻe pehē ki māmani kotoa.”
12 Tā neʻineʻi maongo ki he kakaí ʻa e ngaahi akonaki ʻa Sīsuú! ʻI he Malanga ʻi he Moʻungá, naʻá ne fakahaaʻi mai ai kiate kitautolu ʻa e hala ki he fiefia moʻoní. Naʻá ne fakamatalaʻi ai ʻa e founga ki hono fakaleleiʻi ʻo e ngaahi fakakikihí. Naʻe ʻomai ʻe Sīsū ʻa e fakahinohino fekauʻaki mo e lea ʻo lotú. Naʻá ne fakahaaʻi mai ai ʻa e fakakaukau fakapotopoto taha ke fai ki he ngaahi fiemaʻu fakamatelié pea ʻomai ʻa e Lao Koula ki he ngaahi vahaʻangatae totonu mo e niʻihi kehé. Naʻe toe kau atu ki he ngaahi poini ʻi he malanga ko ʻení ʻa e founga ke ʻiloʻi ai ʻa e ngaahi kākā fakalotú pea mo e founga ke maʻu ai ha kahaʻu malú.
13 ʻI he Malanga ʻi he Moʻungá pea ʻi he toenga ʻo e ngaahi peesi ʻo e Tohitapú, ʻoku fakahā mahino mai ai ʻa e meʻa ke faí mo e meʻa ke fakaʻehiʻehi mei aí koeʻuhi ke fakaleleiʻi ange ai hotau tuʻungá ʻi he moʻuí. Ko ʻene akonaki mātuʻaki ʻaongá naʻe ueʻi ai ha faiako ke ne pehē: “Neongo ko ha tokotaha faleʻi au ʻi ha ʻapiako māʻolunga pea maʻu mo hoku mataʻitohi B.A. mo e mataʻitohi M.A. pea kuó u lau mo ha ngaahi tohi lahi fekauʻaki mo e moʻui lelei ʻa e ʻatamaí mo e saienisi ʻo e ʻatamaí, naʻá ku ʻiloʻi ko e akonaki ʻa e Tohitapú ʻi he ngaahi meʻa hangē ko hono maʻu ha nofo mali ola leleí, ko hono taʻofi ʻa e faihia ʻa e toʻutupú pea mo e founga ki hono maʻu mo tauhi ha ngaahi kaungāmeʻá ʻoku lelei lahi ange ia ʻi ha meʻa pē naʻá ku lau pe ako ki ai ʻi he kolisí.” Tānaki atu ki heʻene ʻaonga pea feʻunga mo e taimí, ʻoku alafalalaʻanga ʻa e Tohitapú.
TONU MO FALALAʻANGA
14. Ko e hā ʻokú ne fakahaaʻi ʻoku tonu fakasaienisi ʻa e Tohitapú?
14 Neongo ko e Tohitapú ʻoku ʻikai ko ha tohi-ako saienisi, ʻoku tonu fakasaienisi ia. Ko e fakatātaá, ʻi ha taimi naʻe tui ai ʻa e tokolahi taha ʻo e kakaí ko e māmaní naʻe lafalafa, naʻe lave ʻa e palōfita ko ʻAiseá ki ai ʻo pehē ʻoku “takatakai” (faka-Hepelū, chugh, ʻa ia ʻoku maʻu ai ʻa e foʻi fakakaukau ko e “fuopotopoto”). (ʻAisea 40:22, PM) Ko e foʻi fakakaukau ki ha māmani fuopotopotó naʻe ʻikai loko tali lahi ia ʻo aʻu mai ki he hili ʻa e taʻu ʻe laui afe mei he taimi ʻo ʻAiseá. Pehē foki, ko e Siope 26:7 (PM)—naʻe tohi ki muʻa ʻi he taʻu ʻe 3,000 tupu kuo maliu atú—ʻokú ne fakahā ʻoku hanga ʻe he ʻOtuá ʻo “tautau a mamani ki he atā noabe.” ʻOku pehē ʻe ha mataotao ʻe taha he Tohitapú: “Naʻe ʻilo fēfē ʻe Siope ʻa e moʻoní, naʻe fakahaaʻi ʻe he saienisi ʻo e ngaahi fetuʻú, ko e māmaní ʻoku tautau taʻepoupou ʻi he ʻatānoá, ko ha fehuʻi ia naʻe faingataʻa ke solova ʻe he faʻahinga ʻoku nau fakaʻikaiʻi ʻa e fakamānavaʻi ʻo e Tohitapú.”
15. ʻI he founga fē ʻoku ʻai ʻo mālohi ange ai ʻa e falala ki he Tohitapú ʻe he founga ʻo hono hiki fakamatalá?
15 Ko e founga ʻo e hiki fakamatala ʻoku maʻu ʻi he Tohitapú ʻokú ne toe ʻai ke mālohi ange ai ʻa ʻetau falala ki he tohi motuʻa ʻaupitó ni. ʻI he ʻikai ke hangē ha ngaahi talatupuʻá, ko e ngaahi meʻa naʻe hoko ʻoku hiki ʻi he Tohitapú ʻoku fehokotaki ia mo e kakai moʻoni mo e ngaahi ʻaho pau. (1 Tuʻi 14:25; ʻAisea 36:1; Luke 3:1, 2) Pea neongo naʻe meimei fakalahiʻi maʻu ai pē ʻe he kau faihisitōlia ʻo e kuonga muʻá ʻa e ngaahi ikuna ʻa honau kau pulé pea fūfuuʻi ʻenau ngaahi foʻí mo e ngaahi fehālaakí, naʻe lea hangatonu mo faitotonu ʻa e kau tohi Tohitapú ia—naʻa mo e fekauʻaki mo ʻenau ngaahi angahala mamafa ʻanautolú.—Nōmipa 20:7-13; 2 Sāmiuela 12:7-14; 24:10.
KO HA TOHI ʻO E KIKITE
16. Ko e hā ʻa e fakamoʻoni mālohi taha ko e Tohitapú ko e fakamānavaʻi ia ʻe he ʻOtuá?
16 ʻOku ʻomai ʻe he kikite kuo fakahokó ʻa e fakamoʻoni papau ko e Tohitapú ko e fakamānavaʻi mei he ʻOtuá. ʻOku lahi ʻa e ngaahi kikite ʻi he Tohitapú kuo ʻosi fakahoko fakaikiiki. ʻOku hā mahino, naʻe ʻikai malava ke fai ʻeni ʻe he faʻahinga ʻo e tangatá pē. Ko e hā leva ʻoku ʻi mui ʻi he ngaahi kikité ni? ʻOku pehē ʻe he Tohitapú tonu “kuo teʻeki siʻi ke ʻomeia ha palofisai ʻi he tuʻutuʻuni ʻa e tangata: ka naʻe lea mei he ʻOtua ha kau tangata ʻi he takina kinautolu ʻe he Laumalie Maʻoniʻoni,” pe ivi ngāue ʻo e ʻOtuá. (2 Pita 1:21) Fakakaukau ange ki ha ngaahi fakatātā ʻe niʻihi.
17. Ko e hā ʻa e ongo kikite naʻá na tala ki muʻa ʻa e tō ʻa Pāpiloné, pea naʻe fakahoko fēfē kinaua?
17 Ko e tō ʻa Pāpiloné. Naʻe fakatou tala ki muʻa ʻe ʻAisea mo Selemaia ʻa e tō ʻa Pāpilone ki he kau Mītiá mo e kau Pēsiá. Ko e meʻa ke fakatokangaʻí, ko e kikite ʻa ʻAisea ʻo fekauʻaki mo e meʻa ko ení naʻe hiki ia ʻi he taʻu nai ʻe 200 ki muʻa pea ikunaʻi ʻa Pāpiloné! Ko e ngaahi tafaʻaki leva naʻe hoko atu ki ai ʻa e kikité kuo ʻosi fakamoʻoniʻi fakahisitōlia ia: ko hono fakamātuʻu ʻo e Vaitafe ʻEufaletesí ʻaki hono afeʻi hono ngaahi vaí ki ha anovai naʻe toki faʻu pē (ʻAisea 44:27; Selemaia 50:38); ko ha taʻetokanga ʻo ʻikai ha maluʻanga ʻi he ngaahi matapā ʻo e vaitafe ʻo Pāpiloné (ʻAisea 45:1); pea mo hono ikunaʻi ia ʻe ha pule ko hono hingoá ko Kōlesi.—ʻAisea 44:28.
18. Naʻe anga-fēfē hono fakahoko ʻa e kikite ʻa e Tohitapú ʻi he ʻasi hake mo e tō hifo ʻa e “Tuʻi Kalisi”?
18 Ko e ʻasi hake mo e tō hifo ʻa e “Tuʻi Kalisi.” ʻI ha vīsone, naʻe sio ai ʻa Tāniela ki ha kosi tangata ʻokú ne taaʻi hifo ha sipi tangata, ʻo motuhi hono ongo meʻatuí. Hili iá, naʻe motu ʻa e meʻatui lahi ʻo e kosí, pea naʻe tupu hake ʻi hono tuʻuʻangá ha ngaahi meʻatui ʻe fā. (Tāniela 8:1-8) Naʻe fakamatalaʻi ia kia Tāniela: “Ko e sipi tangata naʻa ke sio ki ai naʻe nifo ua, ko e ngaahi tuʻi ia ʻo Mitia mo Pesia. Pea ko e kosi tangata fulufulua, ko e Tuʻi Kalisi ia; pea ko e fuʻu nifo naʻe tuʻu ʻi he vahaʻa ʻo hono ongo mata ko hono ʻuluaki tuʻi ia. Pea ko e meʻa ki he maumau ʻa é, mo e tupu hake ha fa ke fetongi ia, ʻe tupu hake ha faʻi puleʻanga ʻi he kakai ko ia, kae ʻikai maʻu ʻa e ivi ʻo é.” (Tāniela 8:20-22) ʻI he moʻoni ʻa e kikité ni, ʻi he senituli nai ʻe ua ki mui ai, “ko e Tuʻi Kalisi,” ko ʻAlekisānita ko e Lahí, naʻá ne ikunaʻi ʻa e ongo meʻatuí ko e ʻEmipaea Mītia-Pēsiá. Naʻe mate ʻa ʻAlekisānita ʻi he 323 K.M. pea naʻe faifai mai ʻo fetongi ia ʻe heʻene kau seniale ʻe toko fā. Kae kehe, naʻe ʻikai ha taha ʻo e ngaahi puleʻanga ki mui mai ko iá naʻe tatau hono mālohí mo e ʻemipaea ʻo ʻAlekisānitá.
19. Ko e hā ʻa e ngaahi kikite naʻe fakahoko ʻia Sīsū Kalaisí?
19 Ko e moʻui ʻa Sīsū Kalaisí. ʻOku lahi ʻa e ngaahi kikite ʻi he Ngaahi Konga Tohitapu Faka-Hepeluú naʻe fakahoko ia ʻi he ʻaloʻi, ngāue fakafaifekau, pekia, pea mo e toetuʻu ʻa Sīsuú. Ko e fakatātaá, lahi hake ʻi he taʻu ʻe 700 ki muʻa, naʻe tala ki muʻa ai ʻe Maika ʻo pehē ko e Mīsaiá, pe Kalaisí, ʻe ʻaloʻi ʻi Pētelihema. (Maika 5:2; Luke 2:4-7) Ko e tokotaha naʻe kuonga taha mo Maiká ko ʻAisea naʻá ne tala ki muʻa ʻe taaʻi mo ʻanuhia ʻa e Mīsaiá. (ʻAisea 50:6; Mātiu 26:67) ʻI ha taʻu ʻe nimangeau ki muʻa, naʻe kikiteʻi ai ʻe Sākalaia ʻe lavakiʻi ʻa e Mīsaiá ki he konga siliva ʻe 30. (Sākalaia 11:12; Mātiu 26:15) Lahi hake he taʻu ʻe taha afe ki muʻa, naʻe tala ki muʻa ai ʻe Tēvita ʻa e ngaahi tuʻunga fekauʻaki mo e pekia ʻa Sīsū ko e Mīsaiá. (Sāme 22:7, 8, 18; Mātiu 27:35, 39-43) Pea ʻi he senituli nai ʻe nima ki muʻa, naʻe fakahaaʻi ai ʻe he kikite ʻa Tānielá ʻa e taimi ʻe ʻasi ai ʻa e Mīsaiá pea pehē ki he lōloa ʻo ʻene ngāue fakafaifekaú pea mo e taimi ʻo ʻene pekiá. (Tāniela 9:24-27) Ko ha ngaahi fakatātā pē ia ʻe niʻihi ʻo e ngaahi kikite naʻe fakahoko ʻia Sīsū Kalaisí. Te ke ʻilo ʻoku mātuʻaki ʻaonga ʻa e lautohi ke lahi ange ʻamui ʻo kau kiate iá.
20. Ko e hā ʻa e loto-maʻu ʻoku totonu ke ʻomai kiate kitautolu ʻe he lēkooti haohaoa ʻo e ngaahi kikite ʻi he Tohitapú kuo fakahokó?
20 ʻOku lahi mo e ngaahi kikite vahaʻa taimi lōloa kehe ʻi he Tohitapú kuo ʻosi fakahoko. ‘Ka,’ te ke ʻeke nai, ‘ko e hā ʻa e kaunga ʻa e meʻá ni ki heʻeku moʻuí?’ Sai, kapau ne tala atu ʻe ha taha ʻa e moʻoní kiate koe ʻi ha ngaahi taʻu lahi, ʻe fakafokifā pē haʻo veiveiua ʻiate ia ʻi haʻane leaʻaki ha meʻa foʻou? ʻIkai! Kuo tala mai ʻe he ʻOtuá ʻa e moʻoní ʻi he Tohitapú kotoa. ʻIkai ʻoku totonu ke langaʻi ʻe he meʻá ni ʻa hoʻo falala ki he meʻa ʻoku talaʻofa mai ʻe he Tohitapú, hangē ko ʻene ngaahi kikite ʻo fekauʻaki mo ha māmani palataisi ʻoku tuʻunuku maí? Ko e moʻoni, ʻoku malava ke tau maʻu ʻa e loto-maʻu tatau naʻe ʻia Paulá, ko e taha ʻo e kau ākonga ʻa Sīsū ʻi he ʻuluaki senitulí, ʻa ia naʻá ne tohi ʻo pehē ko e ʻOtua ‘oku ikai aubito loi.’ (Taitusi 1:2, PM) Pehē foki, ʻi heʻetau lau ʻa e ngaahi Konga Tohitapú pea ngāueʻaki ʻene akonakí, ʻoku tau ngāueʻi ai ʻa e poto ʻoku ʻikai malava ʻe he faʻahinga ʻo e tangatá ke nau lavaʻi ʻiate kinautolu pē, he ko e Tohitapú ko e tohi ia ʻokú ne fakahaaʻi mai ʻa e ʻiloʻi ʻo e ʻOtuá ʻa ia ʻoku taki atu ki he moʻui taʻengatá.
ʻAI KE “HOLI LAHI” KI HE ʻILOʻI ʻO E ʻOTUÁ
21. Ko e hā ʻoku totonu ke ke fai kapau ʻoku hā ngali taulōfuʻu kiate koe ha ngaahi meʻa ʻokú ke ako mei he Tohitapú?
21 ʻI hoʻo ako ʻa e Tohitapú, ʻoku ngalingali ʻokú ke ako ai ʻa e ngaahi meʻa ʻoku kehe ia mei he meʻa naʻe akoʻi kiate koe ʻi he kuo hilí. ʻOku aʻu nai ʻo ke ʻilo ko e niʻihi ʻo e ngaahi tōʻonga fakalotu naʻá ke koloaʻakí ʻoku ʻikai ke fakahōifua ia ki he ʻOtuá. Te ke ako ai ʻoku ʻi ai ʻa e ngaahi tuʻunga ʻa e ʻOtuá ki he totonú mo e halá ʻoku māʻolunga ange ia ʻi he ngaahi tuʻunga ʻoku ngāuelahiʻaki ʻi he māmani fakangofua tavale ko ʻení. ʻE ʻuluaki hā ngali taulōfuʻu nai ʻa e meʻá ni. Ka ke anga-mokomoko! Sivisiviʻi fakalelei ʻa e ngaahi Konga Tohitapú ke maʻu ʻa e ʻiloʻi ʻo e ʻOtuá. ʻAi ke loto-lelei ke tali ʻoku malava ʻa e akonaki ʻa e Tohitapú ke fiemaʻu nai ai ke ke fai ha liliu ʻi hoʻo fakakaukaú mo hoʻo ngaahi tōʻongá.
22. Ko e hā ʻokú ke ako ai ʻa e Tohitapú, pea ʻe lava fēfē ke ke tokoniʻi ʻa e niʻihi kehé ke mahino kiate kinautolu ʻa e meʻá ni?
22 ʻE fai loto-maʻa pē nai ʻe he ngaahi kaumeʻá mo e ngaahi kāingá haʻanau fakafepakiʻi ʻa hoʻo ako ʻa e Tohitapú, ka naʻe pehē ʻe Sīsū: “Pea ʻilonga ʻa ia te ne fakahā ʻi he ʻao ʻo e kakai ʻene kau kiate au te u fakahā foki ʻe au ʻeku kau kiate ia ʻi he ʻao o ʻeku Tamai ʻoku ʻi Hevani. Ka ʻilonga ʻa ia te ne fakafisinga au ʻi he ʻao ʻo e kakai, te u fakafisinga foki ʻe au ʻa e tangata ko ia ʻi he ʻao o ʻeku Tamai ʻoku ʻi Hevani.” (Mātiu 10:32, 33) ʻOku manavasiʻi nai ʻa e niʻihi ʻo pehē te ke hoko ʻo kau ʻi ha lotu mavahevahe pe hoko ʻo tōtuʻa ʻa hoʻo loto-māfaná. Kae kehe, ko hono moʻoní, ko hoʻo feinga pē ke ke maʻu ʻa e ʻiloʻi kānokano ʻo e ʻOtuá mo ʻene moʻoní. (1 Tīmote 2:3, 4) Ke tokoniʻi ʻa e niʻihi kehé ke mahino ki ai ʻa e meʻá ni, ke anga-fakaʻatuʻi, ʻikai ke fakakikihi, ʻi he taimi ʻokú ke lea ai kiate kinautolu ʻo kau ki he meʻa ʻokú ke akó. (Filipai 4:5) Manatuʻi ko e tokolahi ʻoku lava ke “maʻu mai . . . kae ʻikai ʻaki ha lea” ʻi heʻenau sio mai ʻo fakamoʻoniʻi ʻa e mātuʻaki ʻaonga ki he kakaí ʻa e ʻilo mei he Tohitapú.—1 Pita 3:1, 2.
23. ʻE lava fēfē ke ke ʻai koe ke “holi lahi” ki he ʻiloʻi ʻo e ʻOtuá?
23 ʻOku enginaki mai ʻa e Tohitapú: “Mou holi lahi, o hage koe fānau toki faeleʻi, ki he hua huhu taekākā oe folofola.” (1 Pita 2:2, PM) ʻOku fakafalala pē ha kiʻi valevale ki he meʻakai mei heʻene fāʻeé pea ʻoku vilitaki ke fakahoko ʻa e fiemaʻu ko iá. ʻI he tuʻunga meimei tatau pē, ʻoku fakafalala pē kitautolu ki he ʻilo mei he ʻOtuá. ʻAi ke “holi lahi” ki heʻene Folofolá ʻaki hono hokohoko atu ʻa hoʻo ako iá. Ko hono moʻoní, ʻai ia ko hoʻo kolo ke lau fakaʻaho ʻa e Tohitapú. (Sāme 1:1-3) ʻE fakahoko mai ʻe he meʻá ni kiate koe ʻa e ngaahi tāpuaki lahi, he ʻoku pehē ʻe he Sāme 19:11 ʻo fekauʻaki mo e ngaahi lao ʻa e ʻOtuá: “ʻI hono tauhi ʻoku iku ai ki ha fuʻu totongi.”
SIVIʻI HOʻO ʻILÓ
ʻI he ngaahi founga fē ʻoku ʻikai tatau ai ʻa e Tohitapú mo ha toe tohi kehe?
Ko e hā ʻoku lava ai ke ke falala ki he Tohitapú?
Ko e hā ʻokú ne fakamoʻoniʻi kiate koe ko e Tohitapú ko e Folofola fakamānavaʻi ia ʻa e ʻOtuá?
[Fehuʻi ki he Ako]
[Puha ʻi he peesi 14]
HOKO ʻO MAHENI MO HOʻO TOHITAPÚ
ʻOku ʻikai fiemaʻu ke faingataʻa ʻa e hoko ʻo maheni mo e Tohitapú. Ngāueʻaki ʻa hono hokohoko ʻo e ngaahi tohí ke ʻilo ʻa e fakahokohoko mo e tuʻuʻanga ʻo e ngaahi tohi ʻi he Tohitapú.
Ko e ngaahi tohi ʻo e Tohitapú ʻoku ʻi ai hono ngaahi vahe mo e ngaahi veesi ke faingofua ʻa e lave ki aí. Naʻe toki tānaki atu ʻa hono ngaahi vahevahe fakafoʻivahé ʻi he lolotonga ʻo e senituli hono 13, pea ʻoku hā mahino ko ha tokotaha faipaaki Falanisē ʻi he senituli hono 16 naʻá ne vahevahe ʻa e Ngaahi Konga Tohitapu Faka-Kalisí ki hono ngaahi veesi ʻoku ʻi ai he ʻaho ní. Ko e ʻuluaki Tohitapu kakato ke maʻu fakatouʻosi ai ʻa e ngaahi fika ʻo e vahé mo e veesí ko ha tatau faka-Falanisē, naʻe pulusi ʻi he 1553.
ʻI he lave ki he ngaahi konga Tohitapu ʻi he tohí ni, ko e ʻuluaki mataʻifiká ʻokú ne fakahaaʻi ʻe ia ʻa e vahé, pea fakahaaʻi ʻe he mataʻifika hono hokó ʻa e veesí. Ko e fakatātaá, ko e pehē ko ia “Palōvepi 2:5” ʻoku ʻuhinga ia ko e tohi ʻa Palōvepi, vahe 2, veesi 5. ʻI he vakai ki he ngaahi konga Tohitapu naʻe fai ʻa e lave ki aí, ʻe vave hoʻo ongoʻi fiemālie leva ʻi hono kumi ʻa e ngaahi potutohi ʻi he Tohitapú.
Ko e founga lelei taha ke hoko ʻo maheni ai mo e Tohitapú ko hono lau fakaʻaho ia. ʻI he kamatá, ʻoku hā ngali ko ha pole nai ʻa e meʻá ni. Ka ʻo kapau te ke lau ha vahe ʻe tolu ki he nima ʻi ha ʻaho, ʻo fakatuʻunga ʻi honau lōloá, ʻe kakato leva hoʻo lau ʻa e Tohitapú fakakātoa ʻi he taʻu ʻe taha. Fēfē ke kamata he ʻahó ni?
[Puha ʻi he peesi 19]
KO E TOHITAPÚ—KO HA TOHI LAULŌTAHA
• Ko e Tohitapú ko e “fakamanava mei he ʻOtua.” (2 Tīmote 3:16) Neongo naʻe hiki ʻe he kau tangatá ʻa e ngaahi foʻi leá, ko e ʻOtuá naʻá ne tataki ʻenau ngaahi fakakaukaú, ko ia ai ko e Tohitapú ko e moʻoni “ko e folofola ʻa e ʻOtua.”—1 Tesalonaika 2:13.
• Naʻe tohi ʻa e Tohitapú ʻi he vahaʻa taimi ko e senituli ʻe 16, ʻe he kau hiki-tohi ʻe toko 40 nai mei he ngaahi ʻātakai kehekehe. Ka neongo ia, ʻoku fetāiaki ʻa e foʻi ngāué kakato mei he kamataʻangá ki he ngataʻangá.
• Kuo hao mai ʻa e Tohitapú mei hono fakakikihiʻi ia ʻo lahi ange ʻi ha toe tohi kehe pē. ʻI he lolotonga ʻo e Kuonga Lotolotó, naʻe tutu ʻa e kakaí ʻi he pou ʻakau koeʻuhi pē ko ʻenau maʻu ha tatau ʻo e ngaahi Konga Tohitapú.
• Ko e Tohitapú ko e tohi fakataua lahi taha ia ʻi he māmaní. Kuo fai hono liliu lea, fakakātoa pe ko hono konga pē, ki he ngaahi lea ʻe 2,000 tupu. Kuo laui piliona ʻa hono ngaahi tatau kuo paakí, pea ʻoku ʻikai ke meimei hala ha feituʻu ʻi māmani ʻe taʻemaʻu ai hano tatau.
• Ko e konga motuʻa taha ʻo e Tohitapú ʻoku aʻu ki he senituli hono 16 K.M. Naʻe ki muʻa ʻeni ia pea toki ʻasi mai ʻa e Rig-Veda ʻa e lotu-Hinituú (ʻi he 1300 K.M. nai), pe ko e “Ngaahi Tohi Toputapu ʻo e Kato ʻe Tolu” ʻa e lotu-Putá (senituli hono nima K.M.), pe ko e Kōlani ʻa e lotu-ʻIsilamí (senituli hono fitu T.S.), pea pehē ki he Nihongi ʻa e lotu-Sinitō (720 T.S.).
[Fakatātā peesi kakató ʻi he peesi 20]
