Vahe 12

Talitekeʻi ʻa e Ngaahi Kongakau Laumālie Anga-Fulikivanú

1. Ko e hā naʻe fai ʻe Sīsū ʻi heʻene fetaulaki mo e kau laumālie anga-fulikivanú?

 ʻI HE hili pē ʻa hono papitaisó, naʻe ʻalu leva ʻa Sīsū Kalaisi ki he toafa ʻi Siuteá ke fai ʻene lotu mo e fakalaulauloto. Naʻe feinga ai ʻa Sētane ko e Tēvoló ke ʻai ʻa Sīsū ke ne maumauʻi ʻa e lao ʻa e ʻOtuá. Kae kehe, naʻe talitekeʻi ʻe Sīsū ʻa e mounu ʻa e Tēvoló pea naʻe ʻikai ke maʻu ia ʻe heʻene tauhelé. Naʻe fehangahangai ʻa Sīsū mo e kau laumālie anga-fulikivanu kehe he lolotonga ʻa ʻene ngāue fakafaifekau ʻi he māmaní. Ka, naʻá ne toutou valokiʻi mo talitekeʻi maʻu pē kinautolu.​—Luke 4:​1-13; 8:​26-34; 9:​37-43.

2. Ko e hā ʻa e ngaahi fehuʻi te tau fakakaukau ki aí?

² Ko hono fakamatalaʻi ʻi he ngaahi fakamatala ʻa e Tohitapú ʻa e ngaahi fakafetaulaki ko iá ʻoku totonu ke ne ʻai kitautolu ke tau tui pau ʻoku ʻi ai ʻa e ngaahi kongakau laumālie anga-fulikivanu. ʻOku nau feinga ke takihalaʻi ʻa e kakaí. Kae kehe, ʻoku malava ke tau talitekeʻi ʻa e kau laumālie kovi ko ʻení. Ka ko e tupu mei fē ʻa e kau laumālie anga-fulikivanú? Ko e hā ʻoku nau feinga ai ke kākaaʻi ʻa e faʻahinga ʻo e tangatá? Pea ko e hā ʻa e ngaahi founga ʻoku nau ngāueʻaki ke lava ai ʻenau ngaahi taumuʻá? Ko hono maʻu ʻa e ngaahi tali ki he ngaahi fehuʻi pehē ʻo hangē ko ʻení ʻe tokoni ia kiate koe ki hono talitekeʻi ʻa e ngaahi kongakau laumālie anga-fulikivanú.

KAU LAUMĀLIE ANGA-FULIKIVANÚ—KO HONAU TUPUʻANGÁ MO ʻENAU TAUMUʻÁ

3. Naʻe anga-fēfē ʻa e hoko mai ʻa Sētane ko e Tēvoló?

³ Naʻe ngaohi ʻe Sihova ko e ʻOtuá ha ngaahi meʻamoʻui laumālie tokolahi ki muʻa fuoloa ia peá ne toki fakatupu ʻa e faʻahinga  ʻo e tangatá. (Siope 38:​4, 7) Hangē ko ia naʻe fakamatalaʻi ʻi he Vahe 6, naʻe fakatupulekina ʻe he taha ʻo e kau ʻāngeló ni ha holi ke lotu ange ʻa e faʻahinga ʻo e tangatá kiate ia kae ʻoua ʻe lotu kia Sihova. ʻI he tulitāupau ki he taumuʻa ko iá, naʻe hanga ʻe he ʻāngelo anga-fulikivanu ko ʻení ʻo talitekeʻi mo lauʻikovi loi ʻa e Tokotaha-Fakatupú, pea aʻu ʻo tala ki he ʻuluaki fefiné ko e ʻOtuá ko ha tokotaha loi. Ko ia, ʻoku feʻungamālie pē ʻa e hoko ʻa e meʻamoʻui laumālie angatuʻú ni ʻo ʻiloa ko Sētane (tokotaha talitekeʻi) ko e Tēvoló (tokotaha lauʻikovi loi).​—Sēnesi 3:​1-5; Siope 1:6.

4. Naʻe anga-fēfē ʻa e hoko ʻa e kau ʻāngelo ʻe niʻihi ʻi he taimi ʻo Noá ʻo angahalá?

⁴ Ki mui mai, naʻe kau ha kau ʻāngelo kehe mo Sētane ko e Tēvoló. ʻI he taimi ʻo e tangata māʻoniʻoni ko Noá, naʻe liʻaki ai ʻe he niʻihi ʻo e faʻahingá ni ʻa ʻenau ngāue ʻi hēvaní pea nau ʻai ʻa e ngaahi sino fakakakano ke fakalato ʻaki ʻenau holi kovi ke fehokotaki fakasino mo e kau fefine ʻi he māmaní. ʻOku ʻikai ha toe veiveiua ko Sētane naʻá ne tākiekina ʻa e kau ʻāngelo ko iá ke nau fou ʻi he ʻalunga talangataʻa ko iá. Naʻe iku ai ʻo nau hoko ko e tamai ʻa e fānau tupuʻanga kehekehe naʻe ui ko e kau Nefilimí, ʻa ia naʻa nau hoko ko e kau houtamaki anga-fakamālohi. ʻI hono ʻomai ʻe Sihova ʻa e fuʻu Lōmakí, naʻe ʻauha ai ʻa e faʻahinga ʻo e tangatá ne fakameleʻí mo e hako taʻefakanatula ko ʻeni ʻo e kau ʻāngelo talangataʻá. Naʻe hao ʻa e kau ʻāngelo angatuʻú mei he fakaʻauhá tupu mei heʻenau tukuange atu honau ngaahi sino fakakakanó pea nau toe foki ki he nofoʻanga laumālié. Ka naʻe taʻofi ʻe he ʻOtuá ʻa e kau tēmeniō ko ʻení ʻaki hono ʻai kinautolu ʻi he tuʻunga ko e kau liʻekina ʻi he fakapoʻuli fakalaumālie. (Sēnesi 6:​1-7, 17; Siutasi 6) Ka neongo ia, ko Sētane, “ko e ʻeiki ʻo e kau tevolo [“tēmeniō,” NW],” mo ʻene kau ʻāngelo anga-fulikivanú kuo nau hokohoko atu ʻi heʻenau angatuʻú. (Luke 11:15) Ko e hā ʻa ʻenau taumuʻá?

5. Ko e hā ʻa e taumuʻa ʻa Sētane mo ʻene kau tēmenioó, pea ko e hā ʻoku nau ngāueʻaki ki hono tauheleʻi ʻa e kakaí?

⁵ Ko e taumuʻa kovi ʻa Sētane mo e kau tēmenioó ko hono fakatafokiʻi ʻa e kakaí meia Sihova ko e ʻOtuá. Ko ia ai, kuo hanga ʻe he kau anga-fulikivanú ni ʻo takihalaʻi, fakailifiaʻi, mo ngaohikoviʻi ʻa e kakaí ʻi he faai mai ʻa e hisitōliá. (Fakahā 12:9) ʻOku fakapapauʻi mai ʻe he ngaahi meʻa ʻi onopooní ʻoku toe fulikivanu ange ʻa e ʻoho ʻa e tēmenioó he taimí ni ʻi ha toe taimi ki muʻa. Ke tauheleʻi ʻa e kakaí, ʻoku faʻa ngāueʻaki ʻe he kau tēmenioó ʻa e fakahaʻele faʻahikehé ʻi hono ngaahi foungá kotoa. ʻOku anga-fēfē  ʻa hono ngāueʻaki ʻe he kau tēmenioó ʻa e mounu ko ʻení, pea ʻe malava fēfē ke ke maluʻi koe?

FOUNGA ʻO E FEINGA ʻA E KAU LAUMĀLIE ANGA-FULIKIVANÚ KE TAKIHALAʻI KOÉ

6. Ko e hā ʻa e fakahaʻele faʻahikehé, pea ko e hā ʻa e niʻihi ʻo e ngaahi founga ʻo iá?

⁶ Ko e hā ʻa e fakahaʻele faʻahikehé? Ko e fetuʻutaki mo e kau tēmenioó, pe kau laumālie anga-fulikivanú, ʻo tatau ai pē pe ʻoku fai fakahangatonu pe fakafou ʻi ha tangata fetuʻutaki. ʻOku ʻaonga ʻa e fakahaʻele faʻahikehé ki he kau tēmenioó ʻo hangē pē ko e ʻaonga ʻa e mounú ki he kau tulimanú: ʻOkú ne tohoaki mai ʻa e faʻahinga ʻoku maʻu aí. Pea hangē tofu pē ko hono ngāueʻaki ʻe ha tokotaha tulimanu ha ngaahi mounu kehekehe ke tauheleʻi mai ʻaki ʻa e fanga manú ki heʻene tauhelé, ʻoku pehē pē ʻa hono fakaʻaiʻai mai ʻe he kau laumālie anga-fulikivanú ʻa e ngaahi founga kehekehe ʻo e fakahaʻele faʻahikehé ke ʻomai ʻaki ʻa e faʻahinga ʻo e tangatá ki he malumalu ʻo ʻenau pulé. (Fakafehoanaki mo Sāme 119:110.) Ko e niʻihi ʻo e ngaahi foungá ni ko e tongafisi, fakalouʻakau, fai ʻa e talotalo kovi, fai ʻa e sausau, fie faimana, talatala ki he kau fetuʻutakí, mo e fetuʻutaki ki he kau maté.

7. ʻOku fēfē ʻa e mafolalahia ʻa e fakahaʻele faʻahikehé, pea ko e hā ʻoku toe tupu ʻāfaʻafa ai ia ʻi he ngaahi fonua ʻoku lau ʻoku Kalisitiané?

⁷ ʻOku lavameʻa ʻa e mounú, he ʻoku tohoaki ʻe he fakahaʻele faʻahikehé ʻa e kakai ʻi he māmaní takatakai. Ko e faʻahinga ʻoku nofo ʻi he ngaahi kolo ʻutá ʻoku nau ō ki he kau tangata faitoʻó, pea ko e kau ngāue fakaʻōfisi leva ʻi he ngaahi kolo lalahí ʻoku nau talatala kinautolu ki he kau vavalo fakaʻasitalōnomá. Naʻa mo e ngaahi fonua ʻoku lau ʻoku Kalisitiané ʻoku tupu ʻāfaʻafa ai ʻa e fakahaʻele faʻahikehé. ʻOku fakahaaʻi ʻe he fakatotoló ʻo pehē ʻi he ʻIunaite Seteté ʻataʻatā pē, ʻoku meimei ko e ngaahi faʻahinga makasini ʻe 30 ʻa ia ʻi hono fakatahaʻí ʻoku laka hake ʻi he 10,000,000 ʻoku līʻoa pē ki he ngaahi founga kehekehe ʻo e fakahaʻele faʻahikehé. ʻOku fakamoleki ʻe he kau Pelēsilá ʻa e paʻanga ʻe 500 miliona tupu ʻi he ngaahi meʻa ki he fakahaʻele faʻahikehé ʻi he taʻu taki taha. Ka, ko e peseti ʻe 80 ʻo e faʻahinga ʻoku ō ki he ngaahi senitā faiʻangalotu fakaefakahaʻele faʻahikehé ʻi he fonua ko iá ko e kau Katolika ʻosi papitaiso ʻoku nau toe maʻu ʻa e Misá. Koeʻuhi ʻoku fai ʻe he kau faifekau ʻe niʻihi ʻa e fakahaʻele faʻahikehé, ʻoku fakakaukau ai ʻa e kakai lotu tokolahi ʻoku tali pē ʻe he ʻOtuá ia ʻa hono fai ʻa e meʻa ko iá. Ka ʻoku pehē?

 ʻUHINGA ʻOKU FAKAHALAIAʻI AI ʻE HE TOHITAPÚ ʻA HONO FAI ʻO E FAKAHAʻELE FAʻAHIKEHÉ

8. Ko e hā ʻa e vakai Fakatohitapu ki he fakahaʻele faʻahikehé?

⁸ Kapau kuo akoʻi atu kiate koe ko e niʻihi ʻo e ngaahi founga ʻo e fakahaʻele faʻahikehé ko e ngaahi founga ia ke fetuʻutaki ai mo e kau laumālie lelei, mahalo te ke ʻohovale ʻi hono ʻilo ʻa e meʻa ʻoku leaʻaki ʻe he Tohitapú ʻo kau ki he fakahaʻele faʻahikehé. Naʻe fakatokanga ki he kakai ʻa Sihová: “ʻOua te mou afe kiate kinautolu ʻoku fakahaʻele faʻahikehe, pe ki he faʻahinga tuki; ʻoua ʻe kumi kiate kinautolu ke mou ʻuli ai.” (Livitikō 19:31; 20:​6, 27, fakaʻītali ʻamautolu.) ʻOku ʻomai ʻe he tohi ʻa Fakahaá ʻi he Tohitapú ʻa e fakatokanga ko e kau “fai fakalouʻakau” te nau iku atu ki he “ano ʻoku ulo afi mo sulifa; ʻa ia ko e mate ʻangaua [taʻengata].” (Fakahā 21:8; 22:15) Ko e ngaahi founga kotoa ʻo e fakahaʻele faʻahikehé ʻoku ʻikai ke tali ʻe Sihova ko e ʻOtuá. (Teutalōnome 18:​10-12) Ko e hā hono ʻuhinga ʻoku pehē aí?

9. Ko e hā ʻoku malava ai ke tau fakaʻosiʻaki ʻo pehē ko e ngaahi pōpoaki ʻi he ʻahó ni mei he maama laumālié ʻoku ʻikai meia Sihova ia?

⁹ Naʻe fekau mai ʻe Sihova ha kau laumālie lelei, pe kau ʻāngelo māʻoniʻoni, ke fetuʻutaki mo e niʻihi ʻi he faʻahinga ʻo e tangatá ki muʻa ia pea kakato ʻa e Tohitapú. Talu mei heʻene kakató, kuo tokonaki mai ʻe he Folofola ʻa e ʻOtuá ʻa e tataki ʻoku fiemaʻu ki he faʻahinga ʻo e tangatá ki hono tauhi fakahōifua ʻa Sihová. (2 Tīmote 3:​16, 17; Hepelū 1:​1, 2) ʻOku ʻikai ke ne toe fakafou ʻi ha hala kehe ʻa ʻene Folofola toputapú ʻaki hano ʻoange ki he kau fetuʻutakí ha ngaahi pōpoaki. Ko hono kotoa ʻo e ngaahi pōpoaki pehē ʻi he ʻahó ni mei he maama laumālié ʻoku haʻu ia mei he kau laumālie anga-fulikivanú. Ko hono fai ʻo e fakahaʻele faʻahikehé ʻoku taki atu ia ki he fakahohaʻasi ʻe he tēmenioó pea naʻa mo hono maʻunimā ʻe he kau laumālie anga-fulikivanú. Ko ia ai, ʻoku fakatokanga anga-ʻofa mai ʻa e ʻOtuá kiate kitautolu ke ʻoua te tau kau ʻi ha faʻahinga tōʻonga fakahaʻele faʻahikehe pē. (Teutalōnome 18:14; Kalētia 5:​19-21) Tānaki atu ki ai, kapau ʻoku tau hokohoko atu pē ʻi hono fai ʻa e fakahaʻele faʻahikehé hili ʻa ʻetau ʻilo ki he anga ʻo e vakai ki ai ʻa Sihová, te tau kau ai mo e kau ʻāngelo anga-fulikivanu angatuʻú pea te tau hoko ai ko e ngaahi fili ʻo e ʻOtuá.​—1 Sāmiuela 15:23; 1 Kalonikali 10:​13, 14; Sāme 5:4.

10. Ko e hā ʻa e tongafisí, pea ko e hā ʻoku totonu ai ke tau fakaʻehiʻehi mei aí?

¹⁰ Ko e taha ʻo e founga manakoa ʻo e fakahaʻele faʻahikehé ko e  tongafisí​—ko e feinga ke ʻilo ʻo fekauʻaki mo e kahaʻú pe ko e taʻeʻiloá ʻaki ʻa e tokoni ʻa e kau laumālié. Ko e niʻihi ʻo e ngaahi founga ʻo e tongafisí ko e vavalo fakaʻasitalōnoma, sio fakamamaʻu ki he foʻi pulu kilisitalá, fakaʻuhinga ʻo e ngaahi misí, ko hono lau ʻa e ʻaofinimá, mo e fakahā monū ʻo ngāueʻaki ʻa e pele fakatātaá. ʻOku fakakaukau ʻa e tokolahi ia ki he tongafisí ko ha foʻi vaʻinga pē ʻoku ʻikai hano maumau, ka ʻoku fakahā mai ʻe he Tohitapú ko e kau fakahā monuú ʻoku nau fekauʻaki vāofi ʻaupito mo e kau laumālie anga-fulikivanú. Ko e fakatātaá, ʻoku lave ʻa e Ngāue 16:​16-19 ki ha “faʻahikehe tongafisi” naʻá ne fakaivia ha kiʻi taʻahine ke ne fai ʻa e “kikite.” Kae kehe, ko ʻene malava ke tala ki muʻa ʻa e kahaʻú naʻe mole ia ʻi hono kapusi ʻa e tēmenioó. ʻOku hā mahino, ko e tongafisí ko ha mounu ia ʻoku ngāueʻaki ʻe he kau tēmenioó ke fakataueleʻi ʻaki ʻa e kakaí ki heʻenau tauhelé.

11. ʻOku anga-fēfē ʻa e hoko ʻa e ngaahi feinga ke fetuʻutaki mo e maté ʻo taki atu ki ha tauhele?

¹¹ Kapau ʻokú ke mamahi ʻi he mate ʻa ha mēmipa ʻofeina ʻi he fāmilí pe ko ha kaumeʻa ofi, ʻe malava noa pē ke tauheleʻi koe ʻe ha toe mounu ʻe taha. ʻE ʻoatu nai ʻe ha tokotaha fetuʻutaki mo e laumālié ha fakamatala makehe pe te ne lea atu nai ʻi ha leʻo ʻo hā ngali ko e leʻo ia ʻo e tokotaha ʻoku maté. Tokanga! ʻOku taki atu ki ha tauhele ʻa e ngaahi feinga ke fetuʻutaki mo e tokotaha maté. Ko e hā hono ʻuhingá? Koeʻuhi ʻoku ʻikai malava ke lea ʻa e kau maté. Mahalo pē ʻokú ke manatuʻi, ʻoku fakahā māʻalaʻala mai ʻe he Folofola ʻa e ʻOtuá ʻo pehē ʻi he mate ʻa ha taha “ʻoku ne foki ki hono kelekele; ko e ʻaho pe ko ia ko ʻene ngaahi fakakaukau ʻoku mate.” Ko e kau maté “ʻoku ʻikai te nau ʻilo ha momoʻi meʻa.” (Sāme 146:4; Koheleti 9:​5, 10) Tānaki atu ki ai, ko e moʻoni kuo ʻiloa ʻa e kau tēmenioó ʻi hono faʻifaʻitakiʻi ʻa e leʻo ʻo e tokotaha ʻoku maté pea mo hono ʻoange ki ha tokotaha fetuʻutaki mo e laumālié ha fakamatala ʻo fekauʻaki mo e tokotaha ko ia kuo maté. (1 Sāmiuela 28:​3-19) Ko ia ai, “koia oku kumi ki he mate” ʻoku tauheleʻi ia ʻe he kau laumālie anga-fulikivanú pea ʻokú ne fai ʻa e meʻa ʻoku fepaki ʻaupito mo e finangalo ʻo Sihova ko e ʻOtuá.​—Teutalōnome 18:​11, 12, PM; ʻAisea 8:19.

MEI HE TOHOAKI KI HE ʻOHOFI

12, 13. Ko e hā ʻa e fakamoʻoni ʻoku kīvoi ʻa e kau tēmenioó ʻi hono ʻahiʻahiʻi mo fakahohaʻasi ʻa e kakaí?

¹² ʻI hoʻo tali ʻa e akonaki ʻa e Folofola ʻa e ʻOtuá ʻo fekauʻaki  mo e fakahaʻele faʻahikehé, ʻokú ke fakasītuʻaʻi ai ʻa e mounu ʻa e kau tēmenioó. (Fakafehoanaki mo Sāme 141:​9, 10; Loma 12:9.) ʻOku ʻuhinga ʻení ʻe taʻofi ʻe he kau laumālie anga-fulikivanú ʻa ʻenau feinga ke maʻu koé? ʻIkai ʻaupito! ʻI he hili ʻa hono ʻahiʻahiʻi tuʻo tolu ʻe Sētane ʻa Sīsuú, naʻá ne “ʻalu meiate ia ʻo tali faingamālie.” (Luke 4:13) ʻI he tuʻunga meimei tatau, ʻoku ʻikai ngata pē ʻi hono tohoaki ʻe he kau laumālie taʻemangoí ʻa e kakaí ka ʻoku nau toe ʻohofi kinautolu.

¹³ Manatuʻi ʻa ʻetau lave ki muʻa ki hono ʻohofi ʻe Sētane ʻa e sevāniti ʻa e ʻOtuá ko Siopé. Naʻe fakatupunga ʻe he Tēvoló ʻa e mole atu ʻa ʻene fanga manú pea mo e mate ʻa e tokolahi taha ʻo ʻene kau tamaioʻeikí. Naʻe aʻu ʻo tāmateʻi ʻe Sētane ʻa e fānau ʻa Siopé. Ko hono hokó, naʻá ne taaʻi ʻa Siope ʻaki ha mahaki langa lahi. Ka naʻe tauhi pē ʻe Siope ʻa ʻene anga-haohaoa ki he ʻOtuá pea naʻe tāpuakiʻi lahi ai ia. (Siope 1:​7-19; 2:​7, 8; 42:​12) Talu mei ai, kuo ʻai ʻe he kau tēmenioó ha kakai ʻe niʻihi ʻo noa pe kui pea kuo hokohoko atu ʻenau fiefia lahi ʻi he faingataʻaʻia ʻa ha faʻahinga. (Mātiu 9:​32, 33; 12:22; Maʻake 5:​2-5) ʻI he ʻahó ni, ʻoku hā mei he ngaahi fakamatalá ʻoku fakahohaʻasi fakaefehokotaki fakasino ʻe he kau tēmenioó ʻa e kakai ʻe niʻihi pea ʻai ʻa e niʻihi ke hoko ʻo fakasesele. ʻOku toe ʻi ai ʻa e niʻihi kehe ʻoku nau fakalotoʻi ke nau fakapō mo taonakita, ʻa ia ko e angahala ia ki he ʻOtuá. (Teutalōnome 5:17; 1 Sione 3:15) Ka neongo ia, ko e laui afe ʻo e kakai naʻe tauheleʻi ʻi ha taimi ʻe he kau laumālie anga-fulikivanu ko ʻení kuo nau malava ke fakatauʻatāinaʻi kinautolu mei ai. Naʻa nau malava fēfē ke fai ʻa e meʻá ni? Naʻa nau fai pehē ʻaki ʻenau laka ʻi ha ngaahi sitepu mātuʻaki mahuʻinga.

FOUNGA KE TALITEKEʻI AI ʻA E KAU LAUMĀLIE ANGA-FULIKIVANÚ

14. ʻI he fetāiaki mo e faʻifaʻitakiʻanga ʻa e kau Kalisitiane ʻEfesō ʻi he ʻuluaki senitulí, ʻe lava fēfē ke ke talitekeʻi ʻa e kau laumālie anga-fulikivanú?

¹⁴ Ko e hā ʻa e founga ʻe taha ʻe malava ke ke talitekeʻi ai ʻa e kau laumālie anga-fulikivanú pea mo maluʻi ai koe mo ho fāmilí mei heʻenau ngaahi tauhelé? Ko e kau Kalisitiane ko ia ʻi he ʻuluaki senitulí ʻi ʻEfesoó ʻa ia naʻa nau fai ʻa e fakahaʻele faʻahikehé ki muʻa ia pea nau hoko ko e kau tuí naʻa nau laka ʻi ha ngaahi sitepu pau. ʻOku tau lau ko e “niʻihi ʻi he faʻahinga naʻe ngaue fie mana naʻa nau haʻu mo kinautolu ʻenau ngaahi tohi, ʻo tutu ʻi he  ʻao ʻo e kakai.” (Ngāue 19:19) Neongo kapau kuo teʻeki ai ke ke fai ʻe koe ʻa e fakahaʻele faʻahikehé, fakamamaʻo mei ha meʻa pē ʻoku ngāueʻaki ki he fakahaʻele faʻahikehé pe ko ha meʻa ʻoku poupou ki ai. ʻOku kau heni ʻa e ngaahi tohi, ngaahi makasini, ngaahi vitiō, ngaahi fakatātā, ngaahi fasi kuo hiki, mo e ngaahi meʻa naʻe ngāueʻaki ki ha ngaahi taumuʻa fakahaʻele faʻahikehe. ʻOku toe kau ai ʻa e ngaahi tamapua ʻaitoli, ngaahi meʻa ʻomi monū pea mo e ngaahi meʻa kehe ʻoku tui ko hoto maluʻi, mo e ngaahi meʻaʻofa naʻe maʻu mei ha faʻahinga ʻoku nau fai ʻa e fakahaʻele faʻahikehé. (Teutalōnome 7:​25, 26; 1 Kolinitō 10:21) Ke fakatātāʻaki: Ko ha ongo meʻa mali ʻi Taileni naʻe fakahohaʻasi kinaua ʻe he kau tēmenioó ʻo fuoloa. Naʻá na liʻaki atu leva ʻa e ngaahi meʻa naʻe fekauʻaki mo e fakahaʻele faʻahikehé. Ko e hā hono olá? Naʻá na tauʻatāina leva mei he ngaahi ʻohofi fakatēmenioó pea ʻi he hili iá naʻá na fai ha laka ki muʻa fakalaumālie moʻoni.

15. Ko e hā ʻa e toe sitepu ʻe taha ʻoku fiemaʻu ki hono talitekeʻi ʻa e ngaahi kongakau laumālie anga-fulikivanú?

¹⁵ Ke talitekeʻi ʻa e kau laumālie anga-fulikivanú, ko e toe sitepu ʻe taha ʻoku fiemaʻú ko hono ngāueʻaki ʻa e akonaki ʻa e ʻaposetolo ko Paulá ke tui ʻa e teunga tau fakalaumālie kakato kuo foaki mai ʻe he ʻOtuá. (ʻEfesō 6:​11-17) Kuo pau ki he kau Kalisitiané ke nau fakamālohiʻi ʻenau ngaahi maluʻi kinautolu mei he kau laumālie anga-fulikivanú. Ko e hā ʻoku kau ki he sitepu ko ʻení? “Kaeʻumaʻā,” naʻe pehē ʻe Paula, “kuo mou toʻo ʻa e pa ko e tui, ʻa ia te mou lava ʻaki ke tamateʻi ʻa e ngaahi ngahau vela kotoa pe ʻa e Fili.” Ko e moʻoni, ko e mālohi ange ʻa hoʻo tuí, ko e lahi ange ia ʻa hoʻo malava ke talitekeʻi ʻa e ngaahi kongakau laumālie anga-fulikivanú.​—Mātiu 17:​14-20.

16. ʻE lava fēfē ke ke ʻai ke mālohi ʻa hoʻo tuí?

¹⁶ ʻE lava fēfē ke ke ʻai ke mālohi ʻa hoʻo tuí? ʻAki hono hokohoko atu ʻa hono ako ʻa e Tohitapú pea ngāueʻaki ʻa ʻene akonakí ʻi hoʻo moʻuí. ʻOku fakatuʻunga lahi pē ʻa e mālohi ʻa ʻete tuí ʻi he fefeka ʻa hono makatuʻungá​—ko e ʻiloʻi ʻo e ʻOtuá. ʻIkai ʻokú ke loto-tatau ko e ʻilo kānokano kuó ke maʻu mo tali fakamātoato ʻi hoʻo ako ʻa e Tohitapú kuó ne langa hake ʻa hoʻo tuí? (Loma 10:​10, 17) Ko ia ai, ʻoku ʻikai ha toe veiveiua, ʻi hoʻo hokohoko atu ʻa e ako ko ʻení pea ke tōʻongaʻaki ʻa hono maʻu ʻa e ngaahi fakataha ʻa e Kau Fakamoʻoni ʻa Sihová, ʻe toe mālohi ange ai ʻa hoʻo tuí. (Loma 1:​ 11, 12; Kolose 2:​6, 7) ʻE hoko ia ko ha maluʻanga mālohi ʻaupito mei he ngaahi ʻohofi ʻoku fai ʻe he tēmenioó.​—1 Sione 5:5.

17. Ko e hā ʻa e toe ngaahi sitepu ʻoku fiemaʻu nai ki hono talitekeʻi ʻa e ngaahi kongakau laumālie anga-fulikivanú?

¹⁷ Ko e hā ʻa e toe ngaahi sitepu ʻe laka nai ai ha taha ʻokú ne fakapapauʻi ke talitekeʻi ʻa e ngaahi kongakau laumālie anga-fulikivanú? Naʻe fiemaʻu ke maluʻi ʻa e kau Kalisitiane ʻEfesoó koeʻuhi naʻa nau nofo ʻi ha kolo naʻe tēmeniōʻia. Ko ia ai, naʻe tala ʻe Paula kiate kinautolu: “ʻI he faingamalie kotoa pe mou fai hoʻomou lotu ʻi he Laumalie.” (ʻEfesō 6:18) Koeʻuhi ʻoku tau nofo ʻi ha māmani tēmeniōʻia, ko e lotu tōtōivi ʻo kole ʻa e maluʻi ʻa e ʻOtuá ʻoku mātuʻaki fiemaʻu ia ki hono talitekeʻi ʻa e kau laumālie anga-fulikivanú. (Mātiu 6:13) ʻOku ʻaonga lahi ʻi he meʻá ni ʻa e tokoni fakalaumālie mo e ngaahi lotu ʻoku fai ʻe he kau mātuʻa kuo fakanofo ʻi he fakatahaʻanga Kalisitiané.​—Sēmisi 5:​13-15.

HOKOHOKO ATU ʻA HOʻO TAUʻI ʻA E KAU LAUMĀLIE ANGA-FULIKIVANÚ

18, 19. Ko e hā ʻoku malava ke fai kapau ʻoku toe fakahohaʻasi ʻe he kau tēmenioó ha taha?

¹⁸ Kae kehe, naʻa mo e hili ʻa e laka ʻi he ngaahi sitepu tefito ko ʻení, kuo kei fakahohaʻasi pē ʻa e niʻihi ia ʻe he kau laumālie anga-fulikivanú. Hangē ko ʻení, naʻe ako ʻe ha tangata ʻe taha ʻi Kotevuā ʻa e Tohitapú mo e Kau Fakamoʻoni ʻa Sihová peá ne fakaʻauha ʻa e kotoa ʻo ʻene ngaahi meʻa ʻomi monuú. ʻI he hili iá, naʻá ne fai ha laka lelei ki muʻa, ʻo fakatapui ʻa ʻene moʻuí kia Sihova, peá ne papitaiso. Ka ʻi he ʻosi ha uike ʻe taha mei heʻene papitaisó, naʻe kamata ʻa e kau tēmenioó ke toe fakahohaʻasi ia, pea naʻe ongo mai ha ngaahi leʻo ʻo tala kiate ia ke ne liʻaki ʻa e tui foʻou kuó ne maʻú. Kapau naʻe hoko atu ʻa e meʻá ni kiate koe, ʻe ʻuhinga leva ia kuo mole meiate koe ʻa e maluʻi ʻa Sihová? ʻOku ʻikai pau ko ia.

¹⁹ Neongo naʻe maʻu ʻe he tangata haohaoa ko Sīsū Kalaisí ʻa e maluʻi fakaeʻotuá, naʻá ne fanongo ki he leʻo ʻo e meʻamoʻui laumālie anga-fulikivanu ko Sētane ko e Tēvoló. Naʻe fakahāhaaʻi ʻe Sīsū ʻa e meʻa ke faí ʻi ha meʻa pehē. Naʻá ne tala ki he Tēvoló: “Setane, fei mo ʻalu!” (Mātiu 4:​3-10) ʻI he founga meimei tatau, ʻoku totonu ke ke fakafisi mei he fanongo ki he ngaahi leʻo mei he maama laumālié. Talitekeʻi ʻa e kau laumālie anga-fulikivanú ʻaki hoʻo ui kia Sihova ki ha tokoni. ʻIo, lotu leʻo-lahi ʻo ngāueʻaki ʻa e huafa ʻo e ʻOtuá. ʻOku pehē ʻi he Palōvepi 18:10: “Ko e huafa ʻo  Sihova ko e taua malohi: ʻoku lele ki ai ʻa e faitotonu ʻo ne malu ai.” Naʻe fai ʻeni ʻe he tangata Kalisitiane ʻi Kotevuā, pea naʻe taʻofi leva ʻe he kau laumālie anga-fulikivanú ʻa hono fakahohaʻasi iá.​—Sāme 124:8; 145:18.

20. ʻI hono fakanounoú, ko e hā ʻoku malava ke ke faí ke talitekeʻi ʻa e kau laumālie anga-fulikivanú?

²⁰ Kuo fakaʻatā ʻe Sihova ʻa e kau laumālie anga-fulikivanú ke nau kei ʻi aí ni, ka ʻokú ne fakahāhā ʻa hono mālohí, tautautefito maʻa hono kakaí, pea ko hono huafá ʻoku lolotonga fanongonongo ʻi he kotoa ʻo e māmaní. (ʻEkisoto 9:16) Kapau te ke ofi maʻu pē ki he ʻOtuá, ʻe ʻikai fiemaʻu ke ke ilifia ki he kau laumālie anga-fulikivanú. (Nōmipa 23:​21, 23; Sēmisi 4:​7, 8; 2 Pita 2:9) ʻOku fakangatangata pē honau mālohí. Naʻe tauteaʻi kinautolu ʻi he taimi ʻo Noá, naʻe lī ki tuʻa mei hēvani ʻi he ngaahi taimi ki muí ni mai, pea ʻoku nau lolotonga fakatatali ki he fakamaau fakaʻosí. (Siutasi 6; Fakahā 12:9; 20:​1-3, 7-10, 14) Ko hono moʻoní, ʻoku nau fakatuʻatamaki atu ki honau fakaʻauha ʻoku tuʻunuku maí. (Sēmisi 2:19) Ko ia, tatau ai pē pe ʻoku feinga ʻa e kau laumālie anga-fulikivanú ke tohoaki koe ʻaki ha faʻahinga mounu pe ko hono ʻohofi koe ʻi ha faʻahinga founga, ʻoku malava pē ke ke talitekeʻi kinautolu. (2 Kolinitō 2:11) Fakamamaʻo mei he founga kotoa pē ʻo e fakahaʻele faʻahikehé, ngāueʻaki ʻa e akonaki ʻa e Folofola ʻa e ʻOtuá, pea kumi ki he hōifua ʻa Sihová. Fai ʻeni ʻo ʻoua ʻe toe toloi, he ko hoʻo moʻuí ʻoku fakatuʻunga ʻi hoʻo talitekeʻi ʻa e ngaahi kongakau laumālie anga-fulikivanú!

SIVIʻI HOʻO ʻILÓ

ʻOku anga-fēfē ʻa e feinga ʻa e kau laumālie anga-fulikivanú ke takihalaʻi ʻa e kakaí?

Ko e hā ʻoku fakahalaiaʻi ai ʻe he Tohitapú ʻa e fakahaʻele faʻahikehé?

ʻE lava fēfē ʻe ha taha ke ne ʻataʻatā mei he ngaahi kongakau laumālie anga-fulikivanú?

Ko e hā ʻoku totonu ai ke ke hanganaki talitekeʻi ʻa e kau laumālie anga-fulikivanú?

[Fehuʻi ki he Ako]

 [Fakatātā ʻi he peesi 110]

ʻOku fēfē ʻa hoʻo vakai ki he fakahaʻele faʻahikehé ʻi hono ngaahi founga lahi?