Ko ʻEmau Fakaafe Atu Kiate Koe

Kuo mau fiefia ʻi he talanoa atu kiate koe fakafou ʻi he ngaahi peesi ʻo e polosiuá ni. ʻOku mau fakatauange kuó ke fiefia ʻi he ʻilo lahi ange ʻo fekauʻaki mo e Kau Fakamoʻoni ʻa Sihová. Kātaki ʻo tali ʻemau fakaafe ke ke ʻaʻahi mai kiate kimautolu ʻi homau Fale Fakatahaʻanga fakalotofonuá. Sio ki he anga ʻo hono fai ʻo ʻemau ngaahi fakatahá. Sio ki he anga ʻo ʻemau feinga ke vahevahe atu ki he niʻihi kehé ʻa e ongoongo lelei fekauʻaki mo ha māmani palataisi ʻi he malumalu ʻo e Puleʻanga ʻo Kalaisí.

Kuo talaʻofa ʻe he ʻOtuá. “ʻI he funga ʻo e talaʻofa ʻa ʻEne ʻAfio ʻoku tau ʻamanaki [“tatali,” NW] ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.” (2 Pita 3:13) Kuo maliu atu ʻa e ngaahi senituli lahi. ʻOku fakaofiofi atu ʻa e vahaʻa taimi tatalí ki hono ngataʻangá. ʻOku fakahaaʻi ʻe he ngaahi tuʻunga ʻo e māmaní ʻa e meʻá ni.

ʻI hoʻo “mou sio ki he fakaofiofi mai ʻa e ʻaho,” ko e lea ia ʻa e ʻapositolo ko Paulá, “ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha.” (Hepelu 10:​24, 25) ʻOku mau fakaafeʻi atu koe ke ke tokanga ki he faleʻi ʻa Paulá ʻaki hoʻo fakatahataha mo kimautolu.