Ko ʻEnau Kautahá mo e Ngāue ʻi Māmani Lahí

ʻOKU ʻi ai ʻa e ngaahi founga lahi ʻoku ngāueʻaki ʻi hono tataki ʻa e ngāue fakamoʻoní ʻi he ngaahi fonua laka hake ʻi he 230 ko ē ʻoku fai aí. Ko e tataki fakalūkufuá ʻoku haʻu ia mei he Kulupu Pulé ʻi he ʻuluʻi ʻapitangá ʻi Brooklyn, Niu ʻIoke. ʻOku fekauʻi atu ʻe he Kulupu Pulé ʻa e kau fakafofonga ʻi he taʻu taki taha ki he ngaahi feituʻu kehekehe ʻi māmani lahi ke alea mo e kau fakafofonga ʻo e vaʻá ʻi he ngaahi feituʻu ko iá. ʻI he ngaahi ʻōfisi vaʻá, ʻoku ʻi ai ʻa e ngaahi Kōmiti Vaʻa ʻo e kau mēmipa ʻe toko tolu ki he toko fitu nai ke nau tokangaʻi ʻa e ngāue ʻi he ngaahi fonua ʻi he malumalu ʻo honau mafaí. Ko e niʻihi ʻo e ngaahi vaʻá ʻoku ʻi ai ʻenau ngaahi fale ki he pulusí, ʻoku fakalele ʻe he niʻihi ʻa e ngaahi mīsini pulusi lōtali vave ʻaupito. Ko e fonua pe ko e ʻēlia ʻoku tokangaʻi ʻe he vaʻa taki taha ʻoku vahevahe ia ki he ngaahi vahe, pea ʻi he tafaʻaki ʻe tahá, ko e ngaahi vahé, ʻoku vahevahe ia ki he ngaahi sēketi. Ko e sēketi taki taha ʻoku ʻi ai ʻa e fakatahaʻanga ʻe 20 nai. ʻOku ʻaʻahi takai ha ʻovasia fakavahe ki he ngaahi sēketi ʻi heʻene vahé. ʻOku fai fakataʻu ʻa e ongo ʻasemipilī ʻe ua maʻá e sēketi taki taha. ʻOku ʻi ai foki ha ʻovasia fakasēketi, pea ʻokú ne ʻaʻahi ki he fakatahaʻanga taki taha ʻi heʻene sēketí ʻo faʻa tuʻo ua ʻi he taʻu, ʻo tokoniʻi ʻa e Kau Fakamoʻoní ʻi hono fokotuʻutuʻu mo hono fai ʻa e ngāue fakamalangá ʻi he feituʻu ngāue kuo vaheʻi ki he fakatahaʻanga ko iá.

Ko e fakatahaʻanga fakalotofonuá mo hono Fale Fakatahaʻangá ʻa e senitā ki hono talaki ʻa e ongoongo leleí ʻi ho feituʻú. Ko e ngaahi ʻēlia ʻi he malumalu ʻo e fakatahaʻanga taki taha ʻoku fokotuʻu ia ʻi ha mape ki ha ngaahi feituʻu ngāue iiki. ʻOku vaheʻi eni ki he Kau Fakamoʻoni tāutaha ʻoku nau feinga ke ʻaʻahi ʻo talanoa mo e kakai ʻi he ʻapi taki taha ʻi aí. Ko e fakatahaʻanga taki taha, ʻoku faʻuʻaki ia ʻa e kiʻi tokosiʻi ʻo aʻu ki he Kau Fakamoʻoni ʻe toko 200 nai, ʻa ia ʻoku vaheʻi ki ai ʻa e kau mātuʻa ke nau tokangaʻi ʻa e ngaahi fatongia kehekehe. Ko e tokotaha fanongonongo tāutaha ʻo e ongoongo leleí ko ha tokotaha longomoʻui ia ʻi he kautaha ʻa e Kau Fakamoʻoni ʻa Sihová. Ko e tokotaha kotoa ʻi he Kau Fakamoʻoní, tatau ai pē pe ʻoku ngāue ʻi he ʻuluʻi ʻapitanga ʻi he māmaní, ʻi he ngaahi vaʻá, pe ʻi he ngaahi fakatahaʻangá, ʻokú ne fai ʻa e ngāue fakamalanga ko eni, ko e talanoa fakafoʻituitui ki he niʻihi kehé ʻo fekauʻaki mo e Puleʻanga ʻo e ʻOtuá.

Ko e ngaahi līpooti ʻi he ngāue ko ení ʻoku aʻu ia ʻi he tuʻunga fakaʻosí ki he ʻuluʻi ʻapitanga ʻi he māmaní, pea ʻoku faʻu mei ai ʻo pulusi ha Yearbook fakataʻu. Pehē foki, ʻoku pulusi ha saati ʻi he taʻu taki taha ʻi he ʻīsiu ʻo e Taua Leʻo ʻo Sanuali 1. Ko e ongo tohi ko eni  ʻe uá ʻoku ʻomai ai ʻa e ngaahi līpooti fakaikiiki ʻo e ngaahi meʻa kuo lavaʻi ʻi he taʻu taki taha ʻi hono fai ʻa e fakamoʻoni kia Sihova pea mo hono Puleʻanga ʻi he malumalu ʻo Kalaisi Sīsuú. ʻI he ngaahi taʻu ki mui ní ko e Kau Fakamoʻoni pea mo e kakai mahuʻingaʻia ʻe toko 14,000,000 nai kuo nau kau ki he Fakamanatu fakataʻu ʻo e pekia ʻa Sīsuú. ʻOku fakamoleki ʻe he Kau Fakamoʻoni ʻa Sihová ʻo laka hake ʻi he houa ʻe 1,000,000,000 ʻi he taʻu ʻi hono fanongonongo ʻa e ongoongo leleí, pea ko e faʻahinga foʻou laka hake ʻi he toko 300,000 ʻoku papitaisó. Ko e fakakātoa ʻo e ngaahi tohi kuo tufakí ʻoku ʻi he ngaahi tatau ʻe laui teau miliona.