Ko e Ongoongo Lelei ʻOku Nau Fiemaʻu Ke Ke Fanongo ki Aí

ʻI HE taimi naʻe ʻi māmani ai ʻa Sīsuú, naʻe haʻu kiate ia ʻa ʻene kau ākongá ʻo ʻeke: “Ko e hā ʻa e fakaʻilonga ʻo hoʻo ʻi aí mo e fakaʻosiʻosi ʻo e ngaahi meʻa ʻoku tuʻu ní?” Naʻá ne tali ange ʻe ʻi ai ʻa e ngaahi tau ʻe kau ki ai ʻa e ngaahi puleʻanga lahi, ngaahi honge, ngaahi mahaki fakaʻauha, ngaahi mofuike, ko ha tupulaki ʻa e maumau-laó, takihalaʻi ʻe he kau faiako fakalotu loi ʻa e tokolahi, ko ha fehiʻanekinaʻi mo fakatangaʻi ʻa hono kau muimui moʻoní, pea mo ha momoko ʻa e ʻofa ki he māʻoniʻoní ʻi he kakai tokolahi. ʻI he kamata ke hoko ʻa e ngaahi meʻá ni, ʻe fakahaaʻi ai naʻe ʻi ai taʻehāmai ʻa Kalaisi pea ʻoku ofi mai ʻa e Puleʻanga fakahēvaní. ʻE hoko eni ko e ongoongo—ongoongo lelei! Ko ia naʻe tānaki ki ai ʻe Sīsū ʻa e ngaahi leá ni ko ha konga ʻo e fakaʻilongá: “Ko e ongoongo lelei ko eni ʻo e puleʻangá ʻe malangaʻi ia ʻi he kotoa ʻo e māmani ʻoku nofoʻí ko ha fakamoʻoni ki he ngaahi puleʻanga kotoa pē; pea ʻe toki hoko mai leva ʻa e ngataʻangá.”​—Mātiu 24:​3-​14, NW.

ʻIate kinautolu tonu, ko e ngaahi meʻa ʻoku hoko lolotonga ʻi he māmaní ʻoku kovi, ka ko e meʻa ʻoku nau fakaʻilongaʻí ʻoku lelei, ʻa ia ko e ʻi ai ʻa Kalaisí. Ko e ngaahi tuʻunga naʻe lave ki ai ʻi ʻolungá naʻe kamata ke hā mahino ia ʻi he taʻu naʻe talaki lahi ko iá ʻa e taʻu 1914! Naʻe fakaʻilongaʻi ai ʻa e ngataʻanga ʻo e Ngaahi Kuonga ʻo e Senitailé pea mo e kamata ʻo e vahaʻa taimi liliu mei he pule fakaetangatá ki he Pule Taʻu ʻe Taha Afe (Fakamileniume) ʻa Kalaisí.

Ko e pau ko ia ke ʻi ai ha vahaʻa taimi liliú ʻoku fakahaaʻi ia ʻe he Sāme hono vahe 110, veesi 1 mo e 2, pea mo e Fakahā 12:​7-​12. ʻOku fakahaaʻi ai ʻe nofo hifo ʻa Kalaisi ʻi he nima toʻomataʻu ʻo e ʻOtuá ʻi hēvani kae ʻoua ke aʻu ki he taimi ʻo ʻene hoko ko e Tuʻí. ʻE iku leva ʻa e tau ʻi hēvaní ki hono lī hifo ʻo Sētane ki he māmaní, ʻo ʻomai ai ʻa e mamahi ki he māmaní, pea ʻe pule ʻa Kalaisi ʻi he lotolotonga ʻo hono ngaahi filí. ʻE hoko mai leva ʻa e ngataʻanga fakaʻaufuli ʻo e fulikivanú fakafou ʻi ha “mamahi lahi,” ko hono tumutumú ʻe ʻi he tau ʻi Hāmaketoné pea hoko mai ai ʻa e Pule Taʻu ʻe Taha Afe ʻa Kalaisi ʻi he melinó.​—Mātiu 24:​21, 33, 34; Fakahā 16:​14-​16.

“Ka ko eni ʻa e meʻa ke ke sinaki ʻilo ki ai,” ko e lau ia ʻa e Tohitapú, “ka hokosia ʻa e kuonga fakamui, ʻe ai ha ngaahi taimi faingataʻa. He ko hono kakai te nau ʻofa kiate kinautolu pe, te nau ʻofa ki he paʻanga, te nau fielahi, te nau angataʻetokaʻi, te nau lea fieʻotua, te nau talangataʻa ki he matuʻa; ko e kau taʻehounga, ko e  kau angataʻemolumalu, ko e kau taeʻofa-ki-hoʻota, ko e kau taʻe fakamolemole, ko e kau fakakovi, ko e kau taʻefakamaʻumaʻu, ko e kau angafakamanu, ko e kau taeʻofa ki he lelei, ko e kau lavaki, ko e kau ʻohonoa, ko e kau loto ʻaoʻaofia ʻi he ʻafungi, ko e kau ʻofa ki he malie ʻo ʻikai ʻofa ki he ʻOtua, ko e kakai ʻoku maʻu ʻa e ngeʻesi ʻo e lotu, ka kuo nau liʻaki hono kakano: ke ke fulituʻa ki he kakai pehe foki.”​—2 Timote 3:​1-5.

ʻE fakakikihi nai ha niʻihi ko e ngaahi meʻá ni kuo hoko ia ki muʻa ʻi he hisitōlia ʻo e tangatá, ka ko hono moʻoní, kuo ʻikai ʻaupito te nau hoko ʻi he tuʻunga lahi tatau. Hangē ko ia ko e lau ʻa e kau faihisitōliá mo e kau faiongoongó, kuo ʻikai ʻaupito ha taimi ʻi he māmaní ʻe hangē ko e meʻa naʻe hokosia ʻi he 1914 ʻo faai mai ai. (Sio ki he peesi 7.) Ko e ngaahi mamahí kuo lahi mamaʻo ange ia ʻi ha toe taimi ki muʻa. ʻIkai ngata aí, ki he ngaahi tafaʻaki kehe ʻo e fakaʻilonga ʻa Kalaisi fekauʻaki mo e ngaahi ʻaho fakaʻosí, ʻoku totonu ke fai ha lāulea ki he ngaahi moʻoniʻi meʻa ko ení: Ko e fanongonongo ʻi māmani lahi ʻo e ʻi ai ʻa Kalaisí kuo hoko ia ko e meʻa lahi taʻehanotatau ʻi he hisitōliá. Kuo ʻikai ʻaupito hano tatau ʻa e fakatanga kuo fai ki he malanga ʻa e Kau Fakamoʻoni ʻa Sihová. Ko e laui teau lahi ʻo kinautolu naʻe tāmateʻi ʻi he ngaahi kemi fakamamahi ʻa e kau Nasí. Aʻu mai ki he ʻahó ni ko e Kau Fakamoʻoni ʻa Sihová ʻoku nau ʻi he malumalu ʻo e tapui ʻi he ngaahi feituʻu ʻe niʻihi, pea ʻi he ngaahi fonua kehe ʻoku puke, tuku pilīsone, fakamamahiʻi, pea tāmateʻi ai kinautolu. Ko e konga kotoa eni ʻo e fakaʻilonga naʻe ʻomai ʻe Sīsuú.

 Hangē ko ia naʻe tomuʻa tala ʻi he Fakahā 11:​18, ‘naʻe ʻita ʻa e ngaahi puleʻangá’ ki he Kau Fakamoʻoni loto-tōnunga ʻa Sihová, pea ʻoku fakahaaʻi ʻe he meʻá ni ko e “houhau” ʻa Sihová tonu ʻe fakahāhā ia ki he ngaahi puleʻanga ko iá. Ko e konga Tohitapu tatau ko ení ʻoku pehē ai ko e ʻOtuá te ne “fakaʻauha ʻakinautolu ʻoku fakaʻauha ʻa e [foʻi māmaní].” Kuo ʻikai ʻaupito ha taimi ki muʻa ʻi he hisitōlia ʻo e tangatá kuo fakamanaʻi ai ʻa e malava ʻa e foʻi māmaní ke ne fakatolonga ʻa e moʻuí. Kae kehe, ʻoku kehe ia he taimí ni! Kuo fakatokanga ʻa e kau saienisi tokolahi kapau ʻe hokohoko atu ʻe he tangatá hono ʻuliʻi ʻa e foʻi māmaní, ʻe hoko ia ʻo ʻikai toe lava ke nofoʻi. Ka ko Sihova naʻá ne “fakafuofua ia ke nofo ai ae kakai,” pea te ne toʻo ʻa e faʻahinga ʻoku nau ʻuliʻí ki muʻa ke nau fakakakato ʻenau maumauʻi ʻa e foʻi māmaní.—Aisea 45:​18, PM.

NGAAHI TĀPUAKI FAKAEMĀMANI ʻI HE MALUMALU ʻO E PULEʻANGÁ

Ko e fakakaukau fekauʻaki mo e kakai ʻe nofo ʻi he foʻi māmaní ko e faʻahinga ʻe pule mai ki ai ʻa e Puleʻanga ʻo e ʻOtuá ʻe hā ngali kehe ia ki he kau tui Tohitapu tokolahi ʻa ia ʻoku nau fakakaukau ko e faʻahinga kotoa ko ia kuo fakamoʻuí ʻoku nau ʻi hēvani. ʻOku fakahaaʻi ʻe he Tohitapú ko e fika fakangatangata pē ʻoku ō ki hēvaní pea ko e faʻahinga ko ia te nau moʻui taʻengata ʻi he māmaní ko ha fuʻu kakai tokolahi ʻo e fika taʻefakangatangata.  (Sāme 37:​11, 29; Fakahā 7:9; 14:​1-5) Ko e Puleʻanga ʻo e ʻOtuá ʻi he malumalu ʻo Kalaisí te ne fakafonu ʻa e foʻi māmaní pea pule ki ai ʻo hangē ko ia ʻoku fakahaaʻi ʻe ha kikite ʻi he tohi ʻa Taniela ʻi he Tohitapú.

ʻOku fakatātaaʻi ai ʻa e Puleʻanga ʻo Kalaisí ko ha maka kuo tongi mei he tuʻunga-hau hangē ha moʻunga ʻo Sihová. ʻOkú ne taaʻi pea fakaʻauha ha ʻīmisi ʻa ia ʻokú ne fakatātaaʻi ʻa e ngaahi puleʻanga mālohi ʻo e māmaní, pea “ko e maka naʻa ne taʻi ʻa e imisi naʻe hoko ko e fuʻu moʻunga, pea naʻe fonu ai ʻa mamani.” ʻOku hoko atu ʻa e kikité: “ʻI he taimi ʻo e ngaahi tuʻi ko ia, ko e ʻOtua ʻo Langi te ne fokotuʻu ha puleʻanga ʻe ʻikai fulihi ʻo taʻengata; pea ko hono pule ʻe ʻikai tuku ki ha kakai kehe: ka te ne laiki mo fakaʻauha ʻa e ngaahi puleʻanga ko ia, kae tuʻu pe ia ʻo taʻengata.”—Taniela 2:​34, 35, 44.

Ko e Puleʻanga ko ení pea mo e ʻamanaki poupouʻi Fakatohitapu ʻo e moʻui taʻengata ʻi ha māmani maʻa mo fakaʻofoʻofá ʻoku fakaʻamu ʻa e Kau Fakamoʻoni ʻa Sihová ke nau talanoa atu ʻo fekauʻaki mo iá. Ko e laui miliona ʻoku moʻui he taimí ni, pea mo e laui miliona lahi, ʻoku nau ʻi honau ngaahi faʻitoká he taimi ní te nau maʻu ʻa e faingamālie ke nofo ʻi ai ʻo taʻengata. Pea ʻi he malumalu ʻo e Pule Taʻu ʻe Taha Afe ʻa Kalaisi Sīsuú, ko e muʻaki taumuʻa ʻa Sihova ki hono ngaohi ʻo e foʻi māmaní pea tuku ki ai ʻa e ʻuluaki ongo meʻa fakaetangatá ʻe fakahoko ia. Ko e Palataisi fakaemāmani ko ení ʻe ʻikai ʻaupito ke hoko ʻo fakapipiko. Hangē tofu pē ko hono vaheʻi kia ʻĀtama ʻa e ngāue ʻi he ngoue ko ʻĪtení, ʻe pehē pē ʻa e maʻu ʻe he faʻahinga ʻo e tangatá ha ngaahi ngāue fakamānako ʻi hono tokangaʻi ʻa e foʻi māmaní pea mo e moʻui ʻa e ʻakau mo e fanga manu ʻi aí. Te nau “fiefia fuoloa ʻi he ngāue ʻa honau nimá.”​—Aisea 65:​22, Revised Standard Version; Senesi 2:⁠15.

ʻE lava ke ʻomai ʻa e ngaahi konga Tohitapu lahi ke fakahaaʻi ʻa e ngaahi tuʻunga ʻa ia ʻe ʻi ai ʻi he taimi ʻe tali ai ʻa e lotu ʻa ia naʻe akoʻi mai ʻe Sīsū kiate kitautolú: “Ke hoko hoʻo Pule, ke fai ho Finangalo, hange ko ia ʻi he langi ke pehe foki ʻi māmani.” (Mātiu 6:10) Kae kehe, tuku ke fakahoko atu he taimí ni ʻa e meʻá ni: “Pea ongo mai ha fuʻu leʻo mei he taloni, ʻoku ne pehē, Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai; pea ʻe nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa. Pea folofola ʻe ia naʻe ʻafio ʻi he taloni, Ko eni ʻoku ou fakafoʻou ʻa e meʻa kotoa pe. Pea ne pehe mai, Tohi, he ko e ngaahi lea ko eni ʻoku ala falala ki ai, pea ko e moʻoni ʻo e moʻoni.”—Fakahā 21:​3-5.

[Fakamatala ʻi he peesi 15]

“ʻI ai ha ngaahi taimi faingataʻa,”

KA “ʻe hoko mai ʻa e ngataʻangá”

[Fakatātā ʻi he peesi 18]

Netaleni

[Fakatātā ʻi he peesi 18]

Naisīlia