Ko e hā ʻa e meʻaʻofa lelei taha ʻe lava ke ke foaki maʻa hoʻo fānaú? ʻOku lahi fau ʻa e ngaahi meʻa ʻoku nau fiemaʻú, ʻo kau ai ʻa hoʻo ʻofá, tatakí mo e maluʻí. Ka neongo ia, ko e meʻaʻofa mahuʻinga taha ʻe lava ke ke ʻoange kiate kinautolú ko hono ʻiloʻi ʻa Sihova mo e ngaahi moʻoni ʻoku maʻu ʻi heʻene Folofolá, ko e Tohi Tapú. (Sione 17:3) Ko e ʻilo peheé ʻe lava ke tokoni ia ki hoʻo fānaú ke nau hoko ʻo ʻofa kia Sihova mo tauhi ʻaufuatō kiate ia, naʻa mo ʻenau kei taʻu siʻí.—Mātiu 21:16.

ʻOku lahi ʻa e ngaahi mātuʻa kuo nau ʻiloʻi ko e fānau īkí ʻoku nau saiʻia ange ʻi heʻene nounou ʻa e fanga kiʻi lēsoní mo e ngaahi meʻa ke faí. Ko ia ai, ʻoku mau fiefia ke tokonaki atu ʻa e tohi ko ení, Ko ʻEku Ngaahi Lēsoni Fakatohitapú. ʻOku faʻu ʻa e lēsoni taki taha ke faiakoʻaki ʻi ha founga faingofua. Ko e ngaahi fakatātaá mo e ngaahi fakamatala ʻoku hā fakataha mo iá kuo teuteuʻi ia tautefito ki he fānau taʻu tolú ʻo faai ki lalo. ʻOku fakakau ai ha ngaahi fokotuʻu ki ha ngaahi meʻa ke fai. Ko ʻEku Ngaahi Lēsoni Fakatohitapú ʻoku ʻikai ko ha meʻa vaʻinga ia maʻá e fānaú ke nau vaʻingaʻaki. Ka ʻoku faʻu ia maʻau ke ke lau fakataha mo hoʻo fānaú, ʻo pouaki ai ʻa e fetuʻutakí.

ʻOku mau tui taʻetoeveiveiua ko e tohí ni ʻe hoko ia ʻo tokoni ʻi hoʻo akoʻi hoʻo fānaú “mei he kei valevalé” ki he ngaahi moʻoni Fakatohitapú.—2 Tīmote 3:14, 15.

Mei homou fanga tokoua,

Kulupu Pule ʻo e Kau Fakamoʻoni ʻa Sihová