Ko Homo Ngafa ko e Ongo Mātuʻá
Vahe 8
Ko Homo Ngafa ko e Ongo Mātuʻá
1-3. (a) Ko e hā ʻa e liliu ʻe fakahoko nai ki he moʻui ʻa e ongo mātuʻá ʻi he fanauʻi mai ha kiʻi pēpē? (e) Ko e hā ʻoku mahuʻinga ai ki he tamaí mo e faʻeé fakatouʻosi ke mahino kiate kinaua ʻa hona ngaahi ngafa ko e ongo mātuʻá?
ʻI HE moʻuí ʻoku lahi ʻa e ngaahi meʻa ʻoku nau liliu ʻetau moʻuí ʻi ha tuʻunga siʻisiʻi pē. Ko e faʻahinga meʻa ʻe niʻihi ʻoku nau fai ha liliu lahi mo tolonga. ʻOku hā mahino ko e fanauʻi mai ʻo ha kiʻi tama ʻoku hoko ai ha liliu lahi mo tolonga. He ʻi he hili iá ʻe kehe ʻaupito ʻa e anga ʻo e moʻui ʻa e uaifí mo e husepānití. Neongo ʻoku kei siʻisiʻi ʻaupito ʻa e tokotaha foʻou ko ʻeni ʻi he ʻapí, ka te ne fusi ʻa e tokanga ʻa ia ʻoku ʻikai malava ke taʻetokangaʻi.
2 ʻOku totonu ke hoko ʻo toe kakato ange mo fiefia ange ʻa e moʻuí ki he ongo mātuʻá. Ka ʻoku fakahoko mai ai ʻa e pole, pea ke maʻu ʻa e ngaahi ola lelei tahá, ʻoku fiemaʻu ke fekuki ʻa e ongo mātuʻá fakatouʻosi mo e pole ko iá. Naʻe fiemaʻu fakatouʻosi kimoua ki hono fakatupu mai ʻo e kiʻi tamá, pea te mo fakatou fakahoko ha ngafa mātuʻaki mahuʻinga ʻi he tupu hake hoʻomo pēpeé mei hono fāʻeleʻí ʻo faai mai. Kuo teʻeki ai ke ʻi ai ha fiemaʻu ki he ngāue fakataha ʻi he loto-moʻoní, fāʻūtaha mo anga-fakatōkilalo ʻe hangē ko e taimi ko ení.
3 Ko hono maʻu ʻa e mahino ʻo fekauʻaki mo e ngafa taki taha ʻo e ongo mātuʻá pea mo e anga ʻo e malava ke feongoongoi ʻa e ongo ngafá ni ʻe tokoni lahi ia ki hono aʻusia ʻa e ngaahi fiemaʻu ki hoʻomo pēpeé, ʻo fakatupu ai ha ngaahi ola fakafiefia. ʻOku fiemaʻu ʻa e fakakaukau mafamafatataú. Neongo ʻoku feinga ʻa e ʻatamaí ke fakakaukau mafamafatatau, ka ʻoku hanga ʻe he ngaahi ongoʻí ʻo faʻa uesia ʻa hono fai ʻo e meʻá ni. Te tau hehema nai ke hulu atu ʻi hono fai ha meʻa, mei he fuʻu siʻisiʻi ki he fuʻu lahi, pea toe foki hifo ki he fuʻu siʻisiʻi. Ko e meʻa lelei ki he tamaí ke fakahoko ʻa hono tuʻunga ʻulú, ka ʻo kapau te ne fakahoko ia ʻo fuʻu hulu, te ne hoko ai ʻo fakaaoao. ʻOku lelei ki he faʻeé ke ne kau ki hono akoʻi mo hono akonakiʻi ʻa e fānaú, ka ko hano toʻo mai ʻa e ngaahi ngafá ni ʻo taʻekau ai ʻa e tamaí ʻokú ne fakavaivaiʻi ai ʻa e fāmilí. Ko e leleí ʻoku lelei, ka ʻe hoko nai ha meʻa lelei ʻo kovi ʻo kapau ʻe fai ia ʻo fuʻu hulu atu.—Filipai 4:5.
KO E NGAFA MĀTUʻAKI MAHUʻINGA ʻO E FAʻEÉ
4. Ko e hā ha ngaahi meʻa ʻe niʻihi ʻoku fiemaʻu ki ha pēpē mei heʻene faʻeé?
4 ʻOku mātuʻaki fakafalala ʻa e pēpē toki fāʻeleʻí ki heʻene faʻeé ʻi he fekauʻaki mo ʻene ngaahi ʻuluaki fiemaʻú. Kapau ʻe tokonaki anga-ʻofa mai ʻe he faʻeé ʻa e ngaahi fiemaʻú ni ʻe ongoʻi malu leva ʻa e pēpeé. (Sāme 22:9, 10) Kuo pau ke fafangaʻi lelei mo tauhi ke maʻa mo māfana; ka ʻoku ʻikai ke feʻunga pē ʻi hono tokonaki mai ʻa e ngaahi fiemaʻu fakaesinó. ʻOku toe mahuʻinga tatau pē mo e ngaahi fiemaʻu fakaeongó. Kapau ʻe ʻikai ke maʻu ʻe he pēpeé ʻa e ʻofá, te ne ongoʻi taʻemalu leva. ʻOku malava ʻe ha faʻē ke ne ako vave ke ʻilo ʻa hono lahi moʻoni ʻo e fiemaʻú ʻi he taimi ʻoku tangi ai ʻene pēpeé ke tokanga ange kiate iá. Ka ʻo kapau ʻoku ʻikai ke faʻa fai ha tokanga ia ki heʻene tangí ʻe hoko ʻo puke nai ai ia. Kapau ʻoku ʻikai ke fai ha tokanga ki he anga ʻo ʻene ongoʻí ʻi ha vahaʻa taimi lōloa, ʻe lava ke hoko ia ke kihi ai ʻene ongoʻí ʻo aʻu ki he ngataʻanga ʻo ʻene moʻuí.
5-7. Fakatatau ki ha ngaahi fakatotolo ki mui mai, ko e hā ʻa e kaunga ki he pēpeé ʻa e ʻofa mo e tokanga ʻa ʻene faʻeé?
5 ʻOku fakapapauʻi ʻa e meʻá ni ʻe ha ngaahi fakatotolo kuo fai ʻi he ngaahi feituʻu kehekehe lahi: ʻOku hoko ʻa e ngaahi pēpeé ʻo puke pea aʻu ʻo nau mate ʻi he ʻikai ke ʻofaʻí, ʻa ia ʻoku fakahā ʻi he lea mo e ala ki ai, amoamo mo kuku. (Fakafehoanaki mo ʻAisea 66:12; 1 Tesalonaika 2:7.) Neongo ʻoku malava ke fai ʻeni ʻe ha niʻihi kehe, ka ʻoku ʻikai ha toe veiveiua, ko e faʻeé ʻa e tokotaha ʻoku feʻungamālie lahi taha ke ne fai ení, he naʻe kamata ke moʻui ʻa e pēpeé mo tauhi mo fafanga ia ʻi he ngaahi ʻuluaki māhina ʻo ʻene moʻuí ʻi he manava ʻo ʻene faʻeé. ʻOku ʻi ai ʻa e felāveʻi fakaenatula ʻi he vahaʻa ʻo e faʻeé mo e kiʻi tamá. Ko ʻene holi fakaenatula ke fua ke ofi kiate ia ʻa e kiʻi pēpē toki fanauʻí ʻoku fehoanakimālie ia mo e fekumi fakaenatula ʻa e kiʻi pēpeé ki he huhu ʻo e faʻeé.
6 Kuo hā ʻi he ngaahi fakatotolo kuo faí ʻoku mātuʻaki longomoʻui ʻa e foʻi ʻuto ʻo e kiʻi valevalé pea ʻoku tokoniʻi ʻa e tupulaki fakaefakakaukaú ʻi he taimi ʻoku ueʻi atu ai ʻa ʻene ngaahi ongo ko e ala, fanongo, mamata mo e nāmuʻi. ʻI he taimi ʻoku fakahuhu ai ha kiʻi pēpē, ʻokú ne ʻiloʻi ʻa e māfana mo e nanamu ʻo e kili ʻo ʻene faʻeé. ʻOkú ne meimei sio maʻu pē ki he mata ʻo e faʻeé ʻi he taimi ʻokú ne fafanga ai iá. ʻOku fanongo ʻa e kiʻi pēpeé ʻo ʻikai ngata pē ʻi he leʻo ʻo e faʻeé ʻi heʻene talanoa pe hiva hifo kiate iá ka ʻoku toe pehē foki ki he tā ʻa hono mafú, ko ha meʻa naʻá ne fanongo ki ai ʻi heʻene kei ʻi manavá. ʻI ha tohi naʻe pulusi ʻi Noaue, ʻoku pehē ai ʻe ha tokotaha ako ʻo kau ki he ʻatamai ʻo e fānaú, ko Anne-Marit Duve:
“Koeʻuhi ʻoku fakahā ʻa e ngāue ʻa e ʻutó ʻi he teka ʻa e kanoʻimatá, ʻoku tau maʻu ʻa e ʻuhinga ke tui ko e felāveʻaki lahi ʻa e kilí ʻo hangē ko e felāveʻaki ʻi hono fafangaʻí, ʻoku malava ke ne ueʻi ʻa e ngāue ʻa e ʻatamaí, ʻa ia ʻe lava ke iku ai ki he malava fakaefakakaukau lahi ange ʻi he taimi ʻe fuʻu lahi ai ʻa e tamá.”
7 Ko ia, ʻi he ongoʻi maʻu pē ʻe he pēpeé ʻa e ala ange ʻa e faʻeé, ʻi heʻene fua iá, kuku iá, pe kaukauʻi mo holo iá, ʻoku hoko ʻa e ueʻi ko ia ʻokú ne maʻú ko e meʻa mahuʻinga ia ki heʻene tupu haké pea mo hono ʻulungaangá ʻi heʻene fuʻu lahí. Neongo ʻoku ʻikai ke fakamānako ʻa e faʻa mālanga hake ʻi he poʻulí ʻo fakanaʻanaʻa ʻa e pēpeé ʻi heʻene tangí, ka ko hono ʻiloʻi ʻo e ngaahi ʻaonga ʻe maʻu ʻamui angé ʻoku malava ke ʻoua ʻe toe tokanga ai ki he taimi mohe ko ia kuo molé.
KO E AKO KE ʻOFÁ ʻAKI ʻA HONO ʻOFAʻI KITA
8-10. (a) Ko e hā ʻa e meʻa ʻoku ako ʻe ha pēpē mei he ʻofa ʻa ʻene faʻeé? (e) Ko e hā ʻoku mahuʻinga ai ení?
8 Ko hono ʻofaʻi ʻo e pēpeé ʻoku mātuʻaki mahuʻinga ia ki heʻene tupu fakaeongó. ʻOkú ne ako ke ʻofa ʻi hono ʻofaʻí, ʻaki ʻene sio ki he ngaahi faʻifaʻitakiʻanga ʻo e ʻofá. ʻOku pehē ʻi he 1 Sione 4:19 ʻi he lea ʻo kau ki he ʻofa ki he ʻOtuá: “ʻOku tau ʻofa ʻe kitautolu, koeʻuhi naʻe tomuʻa ʻofa ʻe he ʻEne ʻAfio kiate kitautolu.” ʻOku fakatefito mei he faʻeé ʻa e ʻuluaki ngaahi lesoni ʻo kau ki he ʻofá. ʻOku punou hifo ʻa e faʻeé ki he pēpeé ʻi hono mohengá ʻo ʻai hono nimá ki he fatafata ʻo e pēpeé ʻo ueueʻi ia pea fakaofiofi hifo hono matá ki he kiʻi pēpeé ʻo ne lea hifo, ‘Sio mai!’ ‘Sio mai!’ Ko hono moʻoní, ʻoku ʻikai ke ʻilo ʻe he pēpeé ʻa e ngaahi foʻi leá ni (ʻa ia ʻoku ʻikai loko mohu ʻuhinga). Ka ʻoku futefute mo fiefia ai ia, he ʻokú ne ʻiloʻi ko e nima ʻoku ala angé mo e ongo ʻo e leʻó ʻoku fakahā ai, ‘ʻOku ou ʻofa ʻiate koe! ʻOku ou ʻofa ʻiate koe!’ ʻOkú ne ongoʻi fiemālie mo malu ai.
9 ʻOku fakahoungaʻi ʻa e ʻofá ʻe he ngaahi pēpē mo e fānau iiki ʻa ia ʻoku ʻofaʻí, pea ʻi he faʻifaʻitaki ki he ʻofa ko iá, ʻoku nau fakahāhā ia, ʻo nau ʻai honau kiʻi nimá ki he kia ʻo ʻenau faʻeé pea ʻuma loto-māfana ki ai. ʻOku nau fiefia ʻi he ongoʻi loto-māfana ʻoku nau maʻu mei heʻenau faʻeé ʻa ia ko e ola ʻo ʻenau fai peheé. ʻOku kamata ke nau ako ʻo ʻilo ʻa e meʻa mātuʻaki mahuʻinga ko ia ʻoku ʻi ai ʻa e fiefia ʻi he foaki atu ʻo e ʻofá pea pehē ki hono maʻu maí, pea ʻi hono tūtuuʻi ʻa e ʻofá ʻoku nau toe utu mai ia. (Ngāue 20:35; Luke 6:38) ʻOku fakahā ʻe he ngaahi meʻa kuo hokó, kapau ʻoku ʻikai fai ha tomuʻa fepikitaki mo e faʻeé, ʻe fuʻu faingataʻa nai ʻamui ange ki he kiʻi tamá ke ne fepikitaki mo felāveʻi loloto ki he niʻihi kehé.
10 Koeʻuhi ʻoku kamata ako pē ʻa e fānaú ʻi he hili ʻa hono fanauʻí, ko e ʻuluaki ngaahi taʻú ʻoku mātuʻaki mahuʻinga lahi tahá. ʻOku mātuʻaki mahuʻinga ʻa e ʻofa ʻa e faʻeé ʻi he lolotonga ʻo e ngaahi taʻu ko iá. Kapau ʻokú ne lavameʻa ʻi hono fakahāhā mo akoʻi ʻa e ʻofá—ʻo ʻikai fakapelepeleʻi—ʻe malava ke ne fai ai ha lelei ʻe tuʻuloa; kapau ʻe ʻikai te ne lavameʻa ke fai pehē ʻe iku ki ha kovi ʻoku tuʻuloa. Ko e hoko ko ha faʻē leleí ko e taha ia ʻo e ngaahi ngāue faingataʻa kae fakafiemālie lahi taha ʻoku malava ke maʻu ʻe ha fefine. Neongo ʻa hono ngaahi mafasiá mo e ngaahi fiemaʻú, ko e hā ha “ngāue tuʻumaʻu” ʻoku fokotuʻu mai ʻe he māmaní ʻe malava ke fakahoa ki he mahuʻinga mo e fiemālie tuʻuloa ʻoku maʻu ʻi hono tauhi hake ha kiʻi tama?
KO E NGAFA MĀTUʻAKI MAHUʻINGA ʻO E TAMAÍ
11. (a) ʻOku malava fēfē ke ʻai ʻe he tamaí ke ʻilo ʻe he pēpeé ʻa e ngafa ʻo e tamaí? (e) Ko e hā ʻoku mātuʻaki mahuʻinga ai ení?
11 ʻOku fakaenatula pē ʻa hono fakahoko ʻe he faʻeé ha ngafa tuʻu-ki-muʻa ange ʻi he moʻui ʻa e tamá ʻi heʻene kei valevalé pē. Ka ʻoku totonu ke toe kau mo e tamaí ki he moʻui ʻa e pēpeé mei hono fanauʻí ʻo faai mai. Naʻa mo e kei valevale ʻa e tamá ʻoku malava mo totonu ke kau ʻa e tamaí ʻi hono tokangaʻi ʻa e kiʻi pēpeé ʻi he taimi ʻe niʻihi, mo vaʻinga mo ia pea fakanaʻanaʻa ia ʻi heʻene tangí. ʻI he founga ko ení ʻe ʻilo ai ʻe he pēpeé ʻa e ngafa ʻo e tamaí. ʻI he faai mai ʻa e taimí ʻoku totonu ke fakaʻau ke tuʻu-ki-muʻa ange hono fakahoko ʻe he tamaí hono ngafá. Kapau ʻe fuʻu fuoloa ʻene tatalí kae toki kamata, ʻe lava ke hoko ko e kamataʻanga ia ʻo ha palopalema ʻe toki eʻa hake tautefito ki he taimi kuo hoko ai ʻa e tamá ko ha talavoú pea ʻe hoko ʻo faingataʻa ange ai ʻa hono akonakiʻí. ʻOku tautautefito nai ʻa e fiemaʻu ʻa e tokoni ʻa e tamaí ki he foha taʻu 13 ki he 19. Ka ʻo kapau naʻe ʻikai ke fokotuʻu ha vā lelei ki muʻa ai, ʻe ʻikai lava ke fakaleleiʻi ʻi ha ngaahi uike siʻi pē ʻa e fuʻu vahaʻa ko ia naʻe fakatupu ʻi he ngaahi taʻu ki muʻá.
12, 13. (a) Ko e hā ʻa e ngafa ʻo e tamaí ʻi he fāmilí? (e) Ko e hā ʻa e kaunga ʻo hono fakahoko ʻe he tamaí ʻa hono ngaahi fatongiá ʻi he founga totonú ki he anga ʻo e fakakaukau ʻa ʻene fānaú ki he mafaí?
12 Tatau ai pē pe ko ha tamasiʻi pe ko ha taʻahine ʻa e tamá, ko e tākiekina ʻa e ngaahi ʻulungaanga fakaetangata ʻo e tamaí ʻe hoko ko ha tokoni mātuʻaki mahuʻinga ia ki he tupu ʻa ha tōʻonga kakato mo mafamafatatau. ʻOku fakahā ʻe he Folofola ʻa e ʻOtuá kuo pau ke hoko ʻa e tamaí ko e ʻulu ʻo e fāmilí. Ko hono fatongiá ke tokonaki ʻa e ngaahi meʻa fakamatelie maʻanautolu. (1 Kolinitō 11:3; 1 Tīmote 5:8) Ka, “ʻoku ʻikai moʻui ʻa e tangata ʻi he ma pe, ka ko e meʻa kehekehe ʻoku hu atu mei he fofonga ʻo Sihova ʻa ia ʻoku moʻui ai ʻa e tangata.” ʻI he fekauʻaki mo ʻene fānaú, ʻoku toe fekauʻi ʻa e tamaí ke ne “akonekina [kinautolu] ʻaki ʻa e tautea mo e valoki ʻa e ʻEiki.” (Teutalōnome 8:3; ʻEfesō 6:4) Neongo ʻoku totonu ke ueʻi ia ʻe he ʻofa fakaenatula ki heʻene fānaú, kae sinoemeʻa, ʻoku totonu ke ueʻi ia ʻe heʻene ʻiloʻi ʻa e fatongia ki hono Tokotaha-Fakatupú ke ne fai ʻa e lelei tahá ke fakahoko ʻa e fekau fakaʻotua ʻoku ʻiate iá.
13 Fakataha mo e loto-māfaná, anga-fakaalaalá mo e manavaʻofa ʻoku fakahā ʻe he faʻeé, ʻoku malava ke tokonaki mai ʻe he tamaí ha tākiekina tuʻumaʻu, ha tākiekina mālohi mo e tataki fakapotopoto. Ko e founga ʻo ʻene fakahoko ʻa e ngāue kuo vaheʻi mai ʻe he ʻOtuá kiate iá ʻoku malava ke lahi hono kaunga ki he anga ʻo e fakakaukau ʻamui ange ʻa ʻene fānaú ʻo kau ki he mafai fakaetangatá mo e fakaʻotuá fakatouʻosi, pe te nau ʻapasia ki ai pea ʻe lelei fēfē haʻanau ngāue ʻi he tataki ʻa ha taha kehe ʻo ʻikai ke ʻi ai ha ʻiteʻita pe angatuʻu.
14. Ko e hā ʻa e tākiekina ʻa e faʻifaʻitakiʻanga lelei ʻa e tamaí ki hono fohá pe ko hono ʻofefiné?
14 Kapau kuo maʻu ʻe he tamaí ha foha, ko ʻene faʻifaʻitakiʻangá pea mo e anga ʻo ʻene tokangaʻi ha ngaahi meʻa, ʻe tokoni lahi ia ke fakapapauʻi pe ʻe tupu hake ʻa e tamasiʻí ʻo hoko ko ha tokotaha hangē ha limu tuʻu ʻi ʻaú, mo lotolotoua, pe ko ha tokotaha anga-fakatangata, loto-maʻu pea fakahā ʻa e tui pau mo loto-lelei ke fua ʻa e ngaahi fatongiá. ʻOku toe kaunga ia ki hono fakapapauʻi pe ʻe fēfē ʻa e kiʻi fohá ʻi heʻene hoko ko ha husepāniti pe tamai—ʻe hoko ko ha taha taʻeʻunua, taʻefaituʻunga, mo anga-fefeka pe ko ha taha fakakaukau mafamafatatau, loto-ʻiloʻilo mo anga-ʻofa. Kapau ʻoku ʻi ai ha ʻofefine ʻi he fāmilí, ʻe lava ke kaunga ʻa e tākiekina mo e vā mo e tamaí ki he anga ʻo ʻene fakakaukau ʻo fekauʻaki mo e kau tangatá pea ʻe tokoni pe fakafaingataʻaʻiaʻi ai ia mei haʻane lavameʻa ʻi he kahaʻú ʻi haʻane nofo mali. ʻOku kamata pē mei he kei valevalé ʻa e tākiekina fakaetamai ko ení.
15, 16. (a) Ko e hā ʻa e fatongia ʻo fekauʻaki mo e faiakó ʻoku fakahā mai ʻe he Tohitapú ʻoku ʻi he tamaí? (e) ʻE malava fēfē ke fakahoko ia?
15 Ko hono lahi ʻo e fatongia ʻo e tamaí ke faiakó ʻoku fakahā ia ʻi he ngaahi fakahinohino ʻa e ʻOtuá ki heʻene kakaí ʻi he Teutalōnome 6:6, 7: “Pea ko e ngaahi foʻi folofola ko eni ʻoku ou kouna atu he ʻaho ni ʻe fuesia ʻe ho loto: pea te ke uhuʻi ki hoʻo fanau, pea te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.”
16 ʻOku ʻikai totonu ke ngata pē ʻi hono fakamamafaʻi fakaʻaho ki he ʻatamai ʻo e tamá ʻa e ngaahi lea pē ʻoku ʻasi ʻi he Folofola ʻa e ʻOtuá, ka ʻoku toe pehē foki ki he fakakaukau ʻoku fakahoko mai ʻe he ngaahi lea ko iá. ʻOku ʻi ai maʻu pē ʻa e ngaahi faingamālie ke fai pehē ai. Ko e matalaʻi ʻakau ʻi he ngoué, fanga ʻinisēkite ʻoku puná, fanga manupuna ʻi he ʻulu ʻakaú, ngaahi ngeʻesi fingota ʻi he matātahí, ko e ngaahi fetuʻu ʻi he langí he poʻulí—ko e ngaahi meʻa fakaofo kotoa ko ení ʻoku nau lea ʻo kau ki he Tokotaha-Fakatupú, pea ʻoku totonu ke ke fakamahinoʻi ki hoʻo fānaú ʻa e ʻuhinga ʻo ʻenau ngaahi leá. ʻOku pehē ʻe he tangata tohi sāmé: “Ko e ngaahi langi ʻoku nau tala ʻa e nāunauʻia ʻo e ʻOtua; pea ʻoku fakaha ʻe he ʻatā ʻa e ngaue ʻa hono nima. Ko e ʻaho ko é ʻoku ne puʻaki talanoa ki he ʻaho ko é: pea ko e po ko é ʻoku ne fanafana meʻa ki he po ko é.” (Sāme 19:1, 2) ʻI he tokanga ke ngāueʻaki ʻa e ngaahi meʻa ko ʻení, kae tautautefito ke ngāueʻaki ʻa e ngaahi meʻa ʻi he moʻui fakaʻahó ke fakatātaaʻi mo fakamamafaʻi ʻa e ngaahi tefitoʻi moʻoni totonú pea mo hono fakahāhā ʻa e poto mo e ʻaonga ʻo e akonaki ʻa e ʻOtuá, ʻe malava ai ʻe he tamaí ke langaʻi ʻi he ʻatamai mo e loto ʻo ʻene tamá ʻa e makatuʻunga mahuʻinga taha ki he kahaʻú: ko e tui pau ʻo ʻikai ki he ʻi ai pē ʻa e ʻOtuá, ka ʻokú ne ‘fakapaleʻi ʻa kinautolu ʻoku kumi tōtōivi kiate iá.’—Hepelū 11:6.
17, 18. (a) ʻOku totonu ke fēfē ʻa hono akonakiʻi ʻe ha tamai ʻa ʻene fānaú? (e) Ko e hā ʻa e meʻa ʻoku ola lelei ange ia ʻi hono fokotuʻu ha ngaahi tuʻutuʻuni lahi?
17 Ko hono fai ʻa e akonakiʻí ko e toe konga ia ʻo e ngafa ʻo e tamaí. Ko e fehuʻi ʻoku ʻekeʻi ʻi he Hepelū 12:7: “He ko e fēʻia ha foha ʻa ia ʻoku ʻikai ke kinisi ʻe heʻene tamai?” Ka ko hono fatongiá ke fai ia ʻi ha founga ʻe ʻikai fuʻu hulu, ʻo fuʻu fakatonutonu ʻo aʻu ki ha tuʻunga ʻo e fakaʻitaʻi pe fakafiu. ʻOku pehē ʻe he Folofola ʻa e ʻOtuá ki he ngaahi tamaí: “ʻOua te mou fakahohaʻasi hoʻomou fanau, naʻa faifai pea nau loto kina.” (Kolose 3:21) ʻOku fiemaʻu ʻa e ngaahi fakataputapuí, ka ʻi he taimi ʻe niʻihi ʻoku malava ke tau ʻai ke lahi mo fakalahi ʻa e ngaahi tuʻutuʻuní kae ʻoua kuo aʻu ki he fakamafasiá mo fakatupu fakalotosiʻi.
18 Ko e kau Fālesi ʻo e kuonga muʻá ko e faʻahinga naʻe manako ki he ngaahi tuʻutuʻuní; naʻa nau tānaki ke lahi ʻa e ngaahi tuʻutuʻuní pea nau fakatupu ai ʻa e kau mālualoi tokolahi. Ko e tō nounou fakaetangata ia ke fakakaukau ʻe lava ke fakaleleiʻi ʻa e ngaahi palopalemá ʻi hano toe tānaki atu pē ha ngaahi tuʻutuʻuni; ka ʻoku fakaeʻa ʻe he ngaahi meʻa kuo hokosia ʻi he moʻuí ko e aʻu ki he lotó ko e meʻa tefito moʻoní ia. Ko ia fakatuhotuha hono ngāueʻaki ʻo e ngaahi tuʻutuʻuní; kae feinga ke tō ai ʻa e ngaahi tefitoʻi moʻoní, ʻo fakataumuʻa ki he feituʻu tatau mo ia ʻoku fakataumuʻa ki ai ʻe he ʻOtuá: “Te u ʻai ʻeku ngaahi lao ki honau ʻatamai, pea te u tohi tongi ia ki honau loto.”—Hepelū 8:10.
ʻOKU NGĀUE FAKATAHA ʻA E TAMAÍ MO E FAʻEÉ
19. Ko e hā ʻa e meʻa ʻoku malava ke fai ke fakapapauʻi ʻoku lelei ʻa e fetalanoaʻaki ʻi he ʻapí?
19 ʻOku faʻa ngāue paʻanga ʻa e tamaí, pea ʻokú ne helaʻia nai ʻi heʻene foki mai mei he ngāué ki ʻapí, pea ʻoku kei ʻi ai nai ha ngaahi fatongia kehe ke ne fakahoko. Ka ʻoku totonu ke ne vaheʻi ha taimi maʻa hono uaifí mo ʻene fānaú. Kuo pau ke ne fetalanoaʻaki mo hono fāmilí, ʻo vaheʻi ha taimi ki ha ngaahi fetalanoaʻaki mo ha ngaahi ngāue fakafāmili, pea pehē ki he fakafiefia pe ko e ʻeveʻeva fakafāmili. ʻI he founga ko ení ʻoku langaʻi ai ʻa e fāʻūtaha mo e uouangataha ʻa e fāmilí. Mahalo ʻi he ki muʻa ke ʻi ai ha fānaú, ko ia mo hono uaifí naʻá na faʻa fakamoleki ʻa e taimi lahi ʻi ha feituʻu kehe mei ʻapi. Ka he ʻikai ke fakahoko ʻa e fatongia ko e ongo mātuʻá ʻo kapau te na kei hoko atu ʻi he founga ko iá, ʻo ʻalu ki hē pe ko ē pea faʻa toki foki kuo tuʻuapō nai. ʻE hoko ia ko e taʻeʻofa ʻaupito ki heʻena fānaú. ʻE faifai atu pē pea ʻe fuesia ʻe he ongo mātuʻá ʻa e nunuʻa ʻo e ʻikai te na fai tuʻumaʻu ʻa e ngaahi meʻa mo ʻikai ke fai lelei hona fatongiá. Hangē ko e kakai lalahí, ʻoku lelei ange ki he fānaú ʻo kapau ʻoku nau ʻi ha founga moʻui ʻoku tuʻumaʻu mo ʻikai faʻa liliu; ʻoku tokoni ia ki he moʻui lelei fakaʻatamaí, fakasinó, mo e fakaeongó. ʻI he founga tuʻumaʻu fakaʻaho ʻo e moʻui fakafāmilí ʻe ʻi ai ʻa e ngaahi meʻa lelei mo kovi foki ʻe hoko pea ʻe ʻikai totonu ke toe tānaki ʻe he ongo mātuʻá ha meʻa ʻoku ʻikai fiemaʻu ki ai.—Fakafehoanaki mo Mātiu 6:34; Kolose 4:5.
20. ʻI hono fai ʻa e akonakiʻí pe tautea ʻo e fānaú, ko e hā ʻoku malava ke fai ʻe he ongo mātuʻá ka na kei fāʻūtaha pē ʻi heʻena ngaahi feingá?
20 ʻOku totonu ke ngāue fakataha ʻa e tamaí mo e faʻeé ʻi he feangai mo e fānaú, ʻo akoʻi kinautolu, fokotuʻu ʻa e ngaahi fakangatangata, akonakiʻi pe tautea kinautolu, mo ʻofaʻi kinautolu. “Pea ka ko ha ʻapi, kapau ʻe mavahevahe mo fetuʻusi, ʻe ʻikai lava ʻe he ʻapi ko ia ke tuʻu.” (Maʻake 3:25) ʻOku lelei ki he ongo mātuʻá ke na fetalanoaʻaki ʻo kau ki he akonakiʻi te na faí; pea te na malava ai ke ʻoua ʻe ʻai ke sio ʻa e fānaú ʻokú na taʻefelotoi ʻi he fekauʻaki mo e akonakiʻi pe tautea ʻoku faí. Kapau he ʻikai te na fai eni ʻe malava ke feinga ai ʻa e fānaú ke nau ‘fakamavahevahe mo ikuna.’ ʻOku moʻoni, ʻe malava ke hoko ʻi ha taimi ʻe niʻihi ʻe fakavave ai ha taha ʻo e ongo mātuʻá ke fai ha meʻa pe ko haʻane ʻita, peá ne fai ha akonakiʻi pe tautea ʻo fuʻu hulu, pe, ʻi he fai ha vakai ki he ngaahi moʻoniʻi meʻa kotoa, mahalo naʻe ʻikai ke fiemaʻu ke fai ʻa e meʻá ni. ʻE malava nai ke pō talanoa ʻa e ongo mātuʻá fakaekinaua ʻo kau ki ai pea ʻe toki fili nai ʻe he mātuʻa ko ia naʻe ngāue taʻefakapotopotó ke ne fakatonutonu ʻa e ngaahi meʻa ko iá mo e kiʻi tamá. Pe, ka ʻo ka ʻikai malava ke fai ʻa e pō talanoa fakaekinaua ko ʻení, ko e mātuʻa ko ia ʻokú ne fakakaukau ʻoku taʻefaitotonu ke poupouʻi hono hoá te ne pehē nai, ‘ʻOku mahino kiate au ʻa e ʻuhinga naʻá ke ʻita aí, pea te u ongoʻi pehē pē. Ka ʻoku ʻi ai nai ha meʻa naʻe ʻikai te ke ʻilo, pea ko eni ia . . . ’ pea hili iá ʻe fai ha fakamatala ʻo kau ki he meʻa ko ia naʻe ʻikai ke fakatokangaʻí. ʻE hoko nai ia ko e meʻa ke fakatupu fakanonga ʻo ʻikai ke ʻi ai ha fakahāhā ʻo e mavahevahe pe taʻefelotoi ʻi he mamata ki ai ʻa e kiʻi tama naʻe akonakiʻí. Hangē ko ia ʻoku pehē ʻi he palōvepi fakamānavaʻí: “Ko e fielahi ko hono fua ko e kē pe: ka ko e fua ʻoku maʻu ʻe he kau tali faleʻi ko e poto.”—Palōvepi 13:10; toe vakai ki he Koheleti 7:8.
21. ʻOku totonu ke tuku ʻa e akonakiʻí pe tauteá ke fai ʻe ha tokotaha pē ʻi he ongo mātuʻá? Ko e hā ʻa e ʻuhingá pe ko e hā ʻoku ʻikai aí?
21 ʻOku fakahā ʻe he Konga Tohitapu faka-Hepeluú ko e akonakiʻí ko e ngafa ʻoku fai ʻe he toko ua: “Tama, fanongo ki he akonaki ʻa hoʻo tamai, pea ʻouae hiki mei he ngaahi tala ʻa hoʻo faʻe.” ʻOku toe fai pehē mo e Konga Tohitapu faka-Kalisi Kalisitiané: “ʻA e fanau, mou talangofua ʻi he ʻEiki ki hoʻomou matuʻa: he ko hono totonu ia.” (Fakaʻītali ʻamautolu.) ʻI he taimi ʻe niʻihi ʻoku fakakaukau ʻa e tamaí ko e akonakiʻi pe tautea ʻo e fānaú ko e meʻa ia ke fai ʻe hono uaifí. Pe ʻoku fakakaukau nai ʻa e uaifí ʻo mātuʻaki fehangahangai mo eni pea ʻikai te ne toe fai ha meʻa ka ko hono fakamanaʻi pē ʻa e kiʻi tama pauʻú ʻaki ʻene pehē ‘Tali hena, he ʻe haʻu hoʻo tamaí!’ Ka ke ʻi ai ʻa e fiefia fakafāmilí, pea ke taki taha maʻu ʻe he ongo mātuʻá ʻa e ʻofa mo e fakaʻapaʻapa ʻa e fānaú, ʻoku fiemaʻu ke na vahevahe ʻa e fatongia ko ení.—Palōvepi 1:8; ʻEfesō 6:1.
22. Ko e hā ʻoku totonu ke fakaʻehiʻehi mei ai ʻi he taimi ʻoku kole ai ha kiʻi tama ha meʻa, pea ko e hā hono ʻuhingá?
22 ʻOku fiemaʻu ki he fānaú ke nau sio ʻoku ngāue fāʻūtaha ʻa ʻenau mātuʻá ʻi he meʻá ni pea mo e loto-lelei ʻa kinaua taki taha ke fua hona fatongiá. Kapau ʻoku fanongo maʻu pē ʻa e kiʻi tama faʻa kolé ʻoku pehē ʻe heʻene tamaí, ‘ʻAlu ʻo kole ki hoʻo faʻeé,’ pe ko e faʻeé ʻokú ne faʻa fakafoki ʻa e filí ke fai ʻe he tamaí, ʻe toki ʻilo leva ʻe he mātuʻa ʻa ia kuo pau ke ne tali “ʻIkai” ki he kolé, ʻokú ne ʻi ha tuʻunga ʻo hangē ko ha tokotaha anga-kovi ia. Ko e moʻoni, ʻe ʻi ai nai ʻa e ngaahi tuʻunga ʻa ia ʻe pehē ai ʻe he tamaí, ‘ʻIo, te ke lava ʻo ʻalu ʻo vaʻinga ʻi ha kiʻi taimi siʻi—kae tomuʻa vakai ki hoʻo faʻeé pe ʻe maau fakakū ʻa e meʻakaí.’ Pe, ʻi he taimi ʻe niʻihi, ʻe fakakaukau nai ʻe he faʻeé neongo ʻoku ʻikai ngali taukovi kiate ia ha kole, ka ʻoku totonu ke fai ha lau ʻa hono husepānití ʻo kau ki he meʻa ko iá. Ka ʻe tokanga ʻa kinaua fakatouʻosi ke fakapapauʻi ʻoku ʻikai te na poupouʻi pe fakaʻatā ʻa e kiʻi tamá ke ne ʻai ʻo fefakavahaʻaʻaki kinaua ke maʻu ʻa e meʻa ʻokú ne fiemaʻú. ʻE toe tokanga ʻa e uaifi fakapotopotó ke ʻoua te ne ngāueʻaki ʻa hono mafaí ʻi ha founga fakafeʻauhi, ʻo ne feinga ʻaki ʻa e fakapelepelé ke ne maʻu ʻa e ʻofa lahi ange ʻa e kiʻi tamá kae mōlia ai ʻa e ʻofa ʻa e kiʻi tamá ki he husepānití.
23. ʻI he fāmilí, ʻoku fakangatangata pē ki he tamaí ʻa hono fai ʻo e ngaahi filí?
23 Ko hono moʻoní, ʻi hono fai ʻa e ngaahi fili ʻo kau ki he fāmilí, ʻoku ʻi ai nai ʻa e ngaahi tafaʻaki ʻoku taau ai ke fai ha tokanga makehe ki he ngaahi fili ʻa e mēmipa taki taha. ʻOku ʻi he tamaí ʻa e fatongia ke fai ha fili ʻo fekauʻaki mo e ngaahi meʻa ʻoku kau ki he lelei fakalūkufua ʻa e fāmilí, ʻo ne faʻa fai eni ʻi he hili ha fetalanoaʻaki mo e niʻihi kehe ʻo e fāmilí pea fai ha tokanga ki heʻenau ngaahi fakaʻamú mo ʻenau manakó. ʻE fai nai ʻe he faʻeé ʻa e ngaahi fili ʻo kau ki he peitó mo e ngaahi meʻa kehe ʻo kau ki he falé. (Palōvepi 31:11, 27) ʻI he tupu hake ʻa e fānaú, ʻe ʻatā nai ke nau fai ha ngaahi fili ʻe niʻihi ʻo fekauʻaki mo e ngaahi feituʻu te nau vaʻinga aí, ko e ngaahi fili ʻe niʻihi ʻo fekauʻaki mo e valá, pe ko ha ngaahi meʻa kehe fakafoʻituitui. Ka ʻoku totonu ke ʻi ai ha angi feʻunga mei he ongo mātuʻá ke fakapapauʻi ʻoku nau muimui ki he ngaahi tefitoʻi moʻoni leleí, ʻoku ʻikai ke hoko ki ha tuʻunga fakatuʻutāmaki ʻa e fānaú, pea ʻikai ke uesia ʻa e ngaahi totonu ʻa e niʻihi kehé. ʻOku malava ʻi he meʻá ni ke maʻu ai ʻe he fānaú ha kamata māmālie ki hano fai ha ngaahi fili.
ʻOKU FAINGOFUA KE FAKAʻAPAʻAPA KIATE KIMOUA KO E ONGO MĀTUʻÁ?
24. Ko e moʻoniʻi meʻa ko ia ke fakaʻapaʻapa ʻa e fānaú ki heʻenau tamaí mo ʻenau faʻeé, ʻokú ne tuku ai ʻa e fatongia fē ki he ongo mātuʻá?
24 ʻOku tala ki he fānaú, “Fakaʻapaʻapa ki hoʻo tamai mo hoʻo faʻe.” (ʻEfesō 6:2; ʻEkisoto 20:12) ʻOku nau toe fakaʻapaʻapa ki he fekau ʻa e ʻOtuá ʻi heʻenau fai ení. ʻOkú ke ʻai ke faingofua ia kiate kinautolu? Ko koe, ko e uaifí, ʻoku tala kiate koe ke ke fakaʻapaʻapa mo ʻapasia ki ho husepānití. ʻIkai ʻoku faingataʻa ʻaupito kiate koe ke fai pehē ʻo kapau ʻoku siʻisiʻi pe hala ʻatā ke ne feinga ke muimui ki he ngaahi meʻa ʻoku fiemaʻu meiate ia ʻe he Folofola ʻa e ʻOtuá? Ko koe, ko e husepānití, kuo pau ke ke lehilehiʻi mo fakaʻapaʻapa ki ho uaifí ko ho hoa ʻofeina. ʻIkai ʻoku faingataʻa eni ʻo kapau ʻoku ʻikai te ne faʻa tokoni atu? Ko ia, ʻai ia ke faingofua ki hoʻo fānaú ke nau talangofua ki he fekau ʻa e ʻOtuá ke nau fakaʻapaʻapa kiate kimoua, ko ʻenau ongo mātuʻá. Maʻu ʻenau fakaʻapaʻapá ʻaki hano tokonaki ha ʻapi melino, ha ngaahi tuʻunga lelei ʻo kau ki he ʻulungaangá, ha ngaahi faʻifaʻitakiʻanga lelei ʻi homo ʻulungaanga ʻo kimouá, ha akonaki mo ha akoʻi lelei, mo e akonakiʻi pe tautea anga-ʻofa ʻi he taimi ʻoku fiemaʻu aí.
25. Ko e hā ʻa e ngaahi palopalema ʻoku malava ke mālanga hake ʻi he ʻikai ke fāʻūtaha ʻa e ongo mātuʻá ʻo kau ki he founga ʻoku totonu ke akoʻi ai ʻa e fānaú?
25 Naʻe pehē ʻe he Tuʻi ko Solomoné: “ʻOku ngutuhuaange ke toko ua ʻi heʻete tokotaha; he ʻoku ʻi heʻena ngaue ha totongi lelei.” (Koheleti 4:9) ʻI he fononga fakataha ʻa ha toko ua pea tō ha tokotaha, ʻoku ʻi ai ʻa e tokotaha ke tokoniʻi hake ia. ʻOku toe pehē pē ʻi he fāmilí, ko e husepānití mo e uaifí ʻoku malava ke na fepoupouaki mo fefakalototoʻaʻaki ʻi hona ngaahi ngafa taki taha. ʻI he ngaahi tafaʻaki lahi ʻaupito ʻe tatau ai ʻa e ngafa ʻo e ongo mātuʻá, pea ko e meʻa lelei ia ki he fāʻūtaha ʻa e fāmilí. ʻOku totonu ke hoko ʻa e fānaú ko e meʻa ke toe vāofi ange ai ʻa e ongo mātuʻá, ʻo fakafāʻūtahaʻi kinaua ʻi ha ngāue akonekina. Ka ʻi he taimi ʻe niʻihi ʻe mālanga hake nai ʻa e ngaahi fehuʻi fakatupu fakamavahevahe ʻo fekauʻaki mo e founga ʻo hono akoʻi mo akonakiʻi pe tautea ʻa e kiʻi tamá. ʻI he taimi ʻe niʻihi ʻe fuʻu tāfataha pē ʻa e tokanga ʻa e uaifí ia ki he kiʻi tamá pea ongoʻi ai ʻe he husepānití ʻoku taʻetokangaʻi ia, pea aʻu ʻo loto-fisiʻia ai. ʻE malava ke uesia ʻe he meʻá ni ʻa e anga ʻo e fakakaukau ʻa e husepānití ki he kiʻi tamá. Te ne loto-momoko nai ki ai, pe ʻe fuʻu tāfataha nai ki ai ʻene ʻofá kae fakasiʻisiʻi ʻene tokanga ki hono uaifí. ʻE hoko ha maumau lahi ʻaupito ʻi he taʻemafamafatatau ʻa e fakakaukau ʻa e uaifí pe ko e husepānití.
26. Ko e hā ʻa e meʻa ʻe fai nai ke ʻai ʻa e kiʻi tama lahi angé ke ʻoua te ne ongoʻi meheka ʻi he pau ke fakamoleki ʻe he faʻeé ha taimi lahi ki ha pēpē foʻou?
26 ʻE toe hoko nai mo ha palopalema ʻe taha ʻi he fanauʻi mai ha toe pēpē pea kuo ʻosi ʻi ai ha kiʻi tama ʻe taha. Kuo pau ke fakamoleki ʻe he faʻeé ha taimi lahi ʻaupito mo e pēpē foʻoú. ʻE fai nai ʻe he tamaí ha toe tokanga lahi ki he kiʻi tama lahi angé koeʻuhi ke ʻoua te ne ongoʻi liʻekina mo meheka.
27. ʻOku malava fēfē ke tokoniʻi fakalaumālie ʻa e fānaú ʻo kapau ko e taha ʻi he hoa malí ʻoku ʻikai ko ha tokotaha tui?
27 Ko hono moʻoní ʻoku sai ange ʻa e toko uá ʻi he tokotahá, ka ʻoku sai ange ʻa e tokotahá ʻi he halá. Mahalo koeʻuhi ko e ngaahi meʻa kuo hoko ki he faʻeé, kuo pau ke ne tauhi hake ʻa e fānaú ʻo ʻikai ke ʻi ai ha tokoni ʻa ha tamai. Pe, ʻoku fehangahangai nai ʻa e tamaí mo e faingataʻaʻia tatau. ʻI he taimi lahi ʻoku mavahevahe ʻa e ngaahi ʻapí ʻi he fekauʻaki mo e lotu ʻoku nau kau ki aí, he ʻoku ʻi ai ha taha ia ʻi he ongo mātuʻá ko ha sevāniti ʻa Sihova ko e ʻOtuá pea ʻokú ne tui kakato ki he akonaki ʻa e Tohitapú, ka ʻoku ʻikai pehē ʻa e tokotaha ia ko ē. Kapau ko e husepānití ko e Kalisitiane fakatapuí ia, ʻoku lahi ange hono mafai ʻi hono tuʻunga ko e ʻulu ʻo e fāmilí ki he founga ke faiʻaki hono akoʻi mo akonakiʻi pe tautea ʻa e fānaú. Ka neongo ia, ʻoku fiemaʻu nai ke ne fakahāhā ʻa e faʻa kātaki lahi, mapuleʻi kita mo e kātekina lahi; ʻoku totonu ke ne tuʻumaʻu ʻi he fekauʻaki mo ha meʻa mafatukituki, kae kei anga-fakaʻatuʻi mo anga-ʻofa neongo hano fakaʻitaʻi, pea ke ne ngaofengofua ʻi he ngaahi tuʻunga pē ʻoku totonu ke fai pehē aí. Kapau ko e tokotaha tuí ko e uaifí, pea ko ia ai te ne anganofo ki he husepānití, ʻe fakatuʻunga lahi ʻa e meʻa te ne faí ʻi he anga ʻo e fakakaukau ʻa e husepānití. ʻOku ʻikai ke mahuʻingaʻia ʻa e husepānití ia ʻi he Tohitapú pē, pe ʻokú ne fakafepaki ki hono ngāueʻi ʻe he uaifí ʻa ʻene tuí mo e ngaahi feinga ʻa e uaifí ke akoʻi ʻa e ngaahi tui ko iá ki he fānaú? Kapau ʻoku fakafepakiʻi ia ʻe he husepānití, kuo pau ke ne muimui ʻi he ʻalunga naʻe fakahā ʻe he ʻaposetoló: ʻI he tokanga alafaʻifaʻitakiʻanga ʻa e uaifí ki hono ngaahi fatongiá pea mo ʻene fakaʻapaʻapá, mahalo ko hono husepānití “ʻe maʻu mai . . . kae ʻikai ʻaki ha lea.” Te ne toe ngāueʻaki foki ʻa e ngaahi faingamālie ʻokú ne maʻú ke akoʻi ai ʻene fānaú ʻo kau ki he ngaahi tefitoʻi moʻoni mei he Tohitapú.—1 Pita 3:1-4.
KO E ʻĀTAKAI ʻO E ʻAPÍ
28, 29. Ko e faʻahinga ʻātakai fēfē ʻoku fiemaʻu ki he ʻapí, pea ko e hā hono ʻuhingá?
28 Ko e ngafa ʻo e ongo mātuʻá fakatouʻosi ke na tokonaki mai ki he ʻapí ʻa e ʻātakai ko e ʻofa. Kapau ʻe ongoʻi ia ʻe he fānaú, he ʻikai ke fokotuʻuna ʻi loto ʻiate kinautolu ʻa ʻenau ngaahi ongoʻi veiveiuá pe ngaahi fehālaakí koeʻuhi ko ʻenau ilifia ke tala ia ki heʻenau mātuʻá. ʻOku nau ʻilo ʻoku malava ke nau talanoa ʻo kau ki ai pea maʻu ʻa e femahinoʻaki, pea ʻe fai ha ngāue ki he ngaahi meʻá ni ʻi he tokanga anga-ʻofa. (Fakafehoanaki mo 1 Sione 4:17-19; Hepelū 4:15, 16.) ʻE ʻikai ngata pē ʻa e ʻapí ʻi heʻene hoko ko e maluʻangá ka ko e lataʻanga foki. Ko e ʻofa ʻa e ongo mātuʻá te ne ʻai ʻa e ngaahi ongoʻi ʻa e fānaú ke tupu mo maʻuiʻui.
29 He ʻikai te ke lava ke ʻai ha meʻa holo viku ki he viniká pea ʻamanekina ʻe fonu vai. Te ne mimisi pē ʻa e meʻa ʻokú ne ʻi aí. ʻE mimisi ʻe he meʻa holo vikú ʻa e vaí ʻo kapau ʻoku unu ia ki ai. ʻOku mimisi foki ʻe he fānaú ʻa e meʻa ʻoku takatakai ʻiate kinautolú. ʻOku nau ongoʻi ʻa e ngaahi anga ʻo e fakakaukaú pea mo fakatokangaʻi ʻa e ngaahi meʻa ʻoku fai takatakai ʻiate kinautolú, pea ʻoku nau mimisi ʻa e ngaahi meʻá ni ʻo hangē pē ko ia ʻoku fai ʻe he meʻa holo vikú. ʻOku ongoʻi ʻe he fānaú ʻa hoʻo ngaahi ongoʻí, tatau ai pē pe ko e mafasia ʻa e fakakaukaú pe ko e nonga. Naʻa mo e ngaahi pēpeé ʻoku nau mimisi ʻa e ngaahi meʻa ʻoku hoko ʻi he ʻātakai ʻo e ʻapí, ko ia ai, ʻoku mahuʻinga taʻefakatataua ʻa e ʻātakai ko e tui, ʻofa, tuʻunga fakalaumālie mo e falala kia Sihova ko e ʻOtuá.
30. Ko e hā ʻa e ngaahi fehuʻi ʻoku malava ke ʻeke hifo ʻe he ngaahi mātuʻá kiate kinautolu ke fakapapauʻi pe ʻoku nau tokonaki ha tataki lelei ki heʻenau fānaú?
30 ʻEke hifo kiate koe: Ko e hā ʻa e ngaahi tuʻunga ʻokú ke ʻamanekina ke aʻusia ʻe hoʻomo tamá? ʻOku aʻu ʻa kimoua fakatouʻosi ko e ongo mātuʻá ki he ngaahi tuʻunga ko iá? Ko e hā ʻa e ngaahi meʻa ʻoku fakamahuʻingaʻi ʻe homo fāmilí? Ko e hā ʻa e faʻifaʻitakiʻanga ʻokú mo fokotuʻu ke muimui ki ai hoʻomo tamá? ʻOkú ke lāunga, lau mele, fakaangaʻi ʻa e niʻihi kehé, mo fakakaukau maʻu pē ki he ngaahi meʻa taʻepaú? Ko e faʻahinga fānau ia ʻokú mo fiemaʻú? Pe, ʻoku ʻi ai ha ngaahi tuʻunga māʻolunga fekauʻaki mo e ʻulungaangá ʻi homo fāmilí, ʻo moʻuiʻaki ia, mo ʻamanekina ke fai pehē mo e fānaú? ʻOku mahino kiate kinautolu ʻoku ʻi ai ʻa e ngaahi fiemaʻu pau ke nau aʻusia, ʻoku ʻi ai ha ngaahi ʻulungaanga ʻoku ala tali, pea ʻoku ʻi ai mo e ngaahi ngāue mo e anga ʻoku ʻikai ala tali kapau te nau loto ke kau ki homo fāmilí? ʻOku fiemaʻu ʻe he fānaú ke nau ongoʻi ʻa e malu ʻo ʻenau kau ki ha taha, ko ia ʻai ke nau ongoʻi ʻa hoʻo leleiʻia mo hoʻo tali lelei kinautolu ʻi heʻenau aʻusia ʻa e ngaahi tuʻunga ko ia ʻa e fāmilí. Ko e angafai ʻa e kakaí ke nau fai ha meʻa ʻo fakatatau ki he meʻa ʻoku ʻamanekina meiate kinautolú. Kapau te ke tala maʻu pē ki hoʻo tamá ʻokú ne kovi ʻe hoko nai ia ʻo pehē. Ka ʻo kapau te ke ʻamanekina maʻu pē ha lelei meiate ia, te ke fakalototoʻaʻi ia ke ne fai pehē.
31. Ko e hā ʻa e meʻa ʻoku totonu ke ne poupouʻi maʻu pē ʻa e tataki ʻa e ongo mātuʻá?
31 ʻOku fakamāuʻi ʻa e kakaí ʻo lahi ange ʻi heʻenau ngāué kae ʻikai ʻi heʻenau ngaahi leá. ʻOku pehē pē mo e fānaú, ʻoku lahi ange nai ʻenau tokanga ki he meʻa ʻoku faí ʻi he ngaahi leá, pea ʻoku nau faʻa fakatokangaʻi vave ha tōʻonga mālualoi. ʻOku fakapuputuʻuʻi nai ʻa e fānaú ʻi he hulu fau ʻa e ngaahi leá. Fakapapauʻi ʻoku poupouʻi ʻa hoʻo ngaahi leá ʻaki hoʻo fai ki ai.—1 Sione 3:18.
32. Ko e akonaki ʻa hai ʻoku totonu ke muimui maʻu pē ki aí?
32 Tatau ai pē pe ko e tamai koe pe ko e faʻē, ko ho ngafá ko ha ngafa faingataʻa. Ka ʻoku malava ke lavaʻi ia ʻo maʻu ha ngaahi ola fakafiefia ʻaki ʻa e muimui ki he akonaki ʻa e Tokotaha kuó ne foaki mai ʻa e moʻuí. Fakahoko loto-tōnunga ho ngafa kuo vaheʻi maí, ʻo hangē ʻokú ke fai ia kiate Iá. (Kolose 3:17) Fakaʻehiʻehi mei hono fai ha meʻa ʻo fuʻu tōtuʻá, tauhi maʻu hoʻo fakakaukau mafamafatataú pea “tuku ke ilo e he kakai kotoabe hoo mou ulugaaga lelei [“anga-fakaʻatuʻi,” NW],” ʻo kau ai ʻa hoʻomo fānaú.—Filipai 4:5, PM.
[Fehuʻi ki Ako]
[Fakatātā ʻi he peesi 100]
Ko e sio mo e ala mo e tō ʻo e leʻo ʻo e faʻeé ʻoku nau tala ki heʻene pēpeé, “ʻOku ou ʻofa ʻiate koe”
[Fakatātā ʻi he peesi 104]
ʻOkú ke palani ke fai ha ngaahi meʻa fakataha mo hoʻo fānaú?
