Ko Hono Akoʻi ʻa e Fānaú mei he Kei Valevalé
Vahe 9
Ko Hono Akoʻi ʻa e Fānaú mei he Kei Valevalé
1-4. Ko e hā ʻa e fakamoʻoni ki he pehē ʻoku ʻi ha kiʻi tama kei siʻi ʻa e malava kāfakafa ke ako?
KUO fakafehoanaki ʻa e ʻatamai ʻo ha kiʻi pēpē toki fanauʻi ki ha lauʻi peesi kuo teʻeki ai ke hiki ai ha meʻa. Ko hono moʻoní, naʻe lahi ʻa e ngaahi meʻa naʻe aʻu ki he ʻatamai ʻo e kiʻi pēpeé he lolotonga ʻene kei ʻi he manava ʻo ʻene faʻeé. Pea ʻoku ʻi ai ʻa e ngaahi meʻa ʻe niʻihi ʻi heʻene tōʻongá naʻe tohi taʻealatāmateʻi ki hono ʻatamaí ʻo fakafou ʻi he tukufakaholó. Ka ʻoku lahi fau ʻa e malava ia ke ako mei he momeniti hono fāʻeleʻí ʻo faai mai ai. ʻI he ʻikai ko ha peesi pē ʻe taha, ʻoku hangē ia ha laipeli naʻe talitali mai ke maʻu ha ngaahi fakamatala ʻi hono ngaahi peesí.
2 Ko e ʻuto ʻo e kiʻi pēpeé ʻi hono fanauʻi maí ko e vahe fā pē ia ʻe taha ʻo e mamafa ʻi he taimi te ne fuʻu lahi aí. Ka ʻoku fuʻu vave ʻa e tupu ʻa e ʻutó he ʻi he taʻu ʻe ua pē kuó ne aʻu ki he vahe fā ʻe tolu ʻo e mamafa ʻo e ʻuto ʻo e tokotaha lahí! ʻOku laka tatau ʻa e tupu fakaʻatamaí. ʻOku pehē ʻe he kau fekumí ko e malava ʻa e kiʻi tamá ke fakakaukaú ʻoku tupu tatau ia ʻi he lolotonga ʻo e ʻuluaki taʻu ʻe fā ʻo ʻene moʻuí mo ʻene tupu ʻi he taʻu ʻe hongofulu mā tolu ka hoko mai aí. Ko hono moʻoní, ʻoku pehē ʻe he faʻahinga ʻe niʻihi ko e “ngaahi fakakaukau ʻoku ako ʻe he kiʻi tamá ki muʻa ʻi hono taʻu nimá ko e niʻihi ia ʻo e ngaahi fakakaukau faingataʻa lahi taha ʻe fetaulaki mo ia ʻi ha taimi.”
3 Ko e ngaahi fakakaukau tefito ʻo hangē ko e toʻomataʻu mo e toʻohema, ki ʻolunga mo e ki lalo, fonu mo e maha, pea mo hono fakafaikehekeheʻi ʻa e faʻahinga kehekehe ʻo e lahí mo e mamafá, ʻoku hā ko e meʻa fakaenatula pē ia kiate kitautolu. Ka kuo pau ke ako ʻa e kiʻi tamá ki he ngaahi meʻá ni pea mo e ngaahi fakakaukau kehe. Kuo pau pē ke tō mo fokotuʻu ki he ʻatamai ʻo e kiʻi pēpeé ʻa e fakakaukau ki he leá.
4 ʻOku pehē ʻe ha niʻihi ko e leá “ko e malava fakaefakakaukau faingataʻa lahi taha nai ia ke fakahoko ʻe he faʻahinga ʻo e tangatá ʻi ha taimi.” Kapau kuó ke fekuki ke ako ki ha lea foʻou te ke loto-tatau nai ki he meʻá ni. Ka ʻokú ke maʻu pē ʻa e ʻaonga ʻo e ʻilo ki he anga ʻo e ngāue ʻa e leá. ʻOku ʻikai maʻu ia ʻe he pēpeé, ka ko hono ʻatamaí ʻoku malava ke ne makupusi ʻa e fakakaukau ki he leá peá ne ngāueʻaki ia. ʻOku ʻikai ngata pē ai, ka ko e fānau ʻoku kei taʻu īkí ʻoku nau nofo ʻi ha ʻapi pe feituʻu ʻoku leaʻaki ai ha lea fakafonua ʻe ua te nau leaʻaki nai kinaua ʻo fuʻu faingofua—ki muʻa pē ia pea toki kamata ke nau ō ki he akó! Ko ia, ʻoku ʻosi ʻi ai pē ʻa e malava ʻa e fakakaukaú ʻo fakatatali ke tupu.
KO E TAIMI KE KAMATA AI IÁ KO E FAINGAMĀLIE VAVE TAHÁ!
5. Ko e fē ʻa e taimi ʻoku totonu ke kamata ai ʻa hono akoʻi ʻo ha kiʻi tama?
5 ʻI he tohi ʻa e ʻaposetolo ko Paulá ki hono kaungāngāue ko Tīmoté, naʻá ne fakamanatu kiate ia ʻo pehē naʻá ne ʻilo ʻa e ngaahi tohi toputapú ‘talu mei he kei valevale.’ (2 Tīmote 3:15) Ko ha mātuʻa fakapotopoto ʻa ia ʻokú ne ʻiloʻi ʻa e holi fakaenatula ʻa ha kiʻi valevale ke ako. Ko e ngaahi pēpeé ʻoku nau fuʻu fakatokanga meʻa, ʻo sio mo fanongo ki he meʻa kotoa pē. Tatau ai pē pe ʻoku fakatokangaʻi ia ʻe he ngaahi mātuʻá pe ʻikai, ko e kau valevalé ʻoku nau tātānaki ʻa e ngaahi fakamatala, ʻo nau tuku tauhi ia, pea nau toe tānaki fakalahi atu ki ai, pea aʻu ki ha ngaahi fakamulituku. Ko hono moʻoní, kapau he ʻikai ke tokanga ʻa e ngaahi mātuʻá, ʻi ha kiʻi taimi nounou pē kuo ʻiloʻi lelei ʻe he kiʻi valevalé ia ʻa e founga te ne malava ʻo kākaaʻi ai kinaua ʻo fakatatau ki heʻene ngaahi fiemaʻú. Ko ia ai, ʻoku kaunga tonu mei he taimi ʻo e fāʻeleʻí ʻo faai mai ʻa e akonaki ʻoku fakahā mai ʻe he Folofola ʻa e ʻOtuá: “ʻAtu ako ki ha tamasiʻi, ʻo tāu mo hono ʻalunga, talaatu ʻo ka ne ka motuʻa ʻe ʻikai te ne hiki mei ai.” (Palōvepi 22:6) Ko hono moʻoní, ko e ʻuluaki ngaahi meʻa ke ako aí ʻoku kau ki he ʻofá, ʻo fakahā ʻa e tokanga anga-ʻofa lahi. Kae fakataha mo e meʻá ni kuo pau ke ʻi ai ʻa e fakatonutonu ʻoku fiemaʻu ʻo fai ia ʻi he anga-fakaalaala kae tuʻumaʻu.
6. (a) Ko e faʻahinga lea fē ʻoku lelei taha ke leaʻaki ki ha kiʻi tama? (e) Ko e hā ʻa e anga ʻo e fakakaukau ʻoku totonu ke maʻu ʻi he fekauʻaki mo e ngaahi fehuʻi lahi ʻoku ʻeke nai ʻe ha kiʻi tama?
6 Lea ki he kiʻi valevalé, ʻo ʻikai ʻi he “talanoa fakapēpē” ka ʻi he lea faingofua ʻoku ngāueʻaki ʻe he kakai lalahí, ʻa ia ko e meʻa ia ʻokú ke fiemaʻu ke ne akó. ʻI he ako ʻa e kiʻi tama kei siʻí ke talanoá te ne lōmekina ʻaki koe ʻa e ngaahi fehuʻi: ‘Ko e hā ʻoku ʻuha aí? Naʻá ku tupu mei fē? ʻOku ʻi fē ʻa e ngaahi fetuʻú ʻi he taimi ʻahó? Ko e hā hoʻo meʻa ʻoku faí? Ko e hā ʻoku pehē ai ení? Ko e hā ʻoku pehē ai ē?’ ʻOku hokohoko ʻa e ngaahi fehuʻí ʻo ʻikai toe tuku! Fanongo kiate kinautolu, he ko e ngaahi fehuʻí ʻoku kau ia ʻi he ngaahi meʻa lelei taha ʻoku maʻu ʻe he fānaú ki heʻenau akó. Ko hono taʻofi ʻa e ngaahi fehuʻí ʻoku malava ke taʻofi ai ʻa e tupu ʻa e fakakaukaú.
7. Ko e hā ʻa e founga lelei taha nai ke tali ai ʻa e ngaahi fehuʻi ʻa ha kiʻi tama, pea ko e hā hono ʻuhingá?
7 Kae manatuʻi, ʻo hangē ko ia naʻe fai ʻe he ʻaposetoló, “lolotonga naʻa ku tamasiʻi naʻa ku lea fakatamasiʻi, naʻa ku feinga fakatamasiʻi, naʻa ku fakakaukau fakatamasiʻi.” (1 Kolinitō 13:11) Tali ʻa e ngaahi fehuʻí ʻi he lelei taha te ke malavá, kae ʻi ha founga faingofua mo nounou. ʻI he ʻeke ʻe ha kiʻi tama, ‘Ko e hā ʻoku ʻuha aí?’ ʻoku ʻikai ke fiemaʻu ia ke fai ha tali fakaikiiki mo fihi. ʻE fakafiemālie nai ke fai ha tali ʻo hangē ko ení, ‘ʻOku mamafa ʻa e ngaahi konga ʻaó ʻi he vai pea tō hifo leva ʻa e vaí.’ ʻOku taimi nounou ʻa e malava ke tokanga ʻa e kiʻi tamá; ʻoku vave ʻene toe hoko atu ki he ngaahi meʻa kehé. Ko ia, ʻo hangē pē ko hoʻo ʻoange ʻa e huʻakaú ki he kiʻi tamá kae ʻoua kuo fakalakalaka atu ki he ngaahi meʻakai mālohí, fakahā kiate ia ʻa e fakamatala faingofua pē kae ʻoua kuo malava ke mahino kiate ia ʻa e ʻilo ʻoku fakaikiiki angé.—Fakafehoanaki mo Hepelū 5:13, 14.
8, 9. Ko e hā ʻoku malava ke fai ke akoʻi ha kiʻi tama ʻi ha founga fakalakalaka ke lau tohi?
8 ʻOku totonu ke fakalakalaka ʻa e akó. Hangē ko ia naʻe lave ki aí, naʻe maheni ʻa Tīmote mo e Tohitapú talu mei heʻene kei valevalé. ʻOku hā mahino ko e ʻuluaki ngaahi meʻa naʻá ne manatuʻi mei heʻene kei siʻí naʻe kau ai ʻa hono akoʻi mei he Tohitapú. ʻOku pau naʻe fakalakalaka ʻa e meʻá ni, ʻo hangē pē ko e kamata ʻa ha tamai pe ko ha faʻē ʻi he ʻahó ni ke akoʻi ha kiʻi tama ke lau tohi. Lau tohi ki hoʻo kiʻi tamá. ʻI heʻene kei valevalé, huki ia, peá ke puke mai ia peá ke lau tohi ʻi ha leʻo ongo-mālie. Te ne maʻu ai ha ongo māfana ʻo e malu mo e fiefia, pea ʻe hoko ʻa e lau tohí ko e meʻa fakafiefia, neongo ʻoku siʻisiʻi ʻa e meʻa ʻoku mahino kiate iá. Ki mui mai, te ke lava ʻo akoʻi kiate ia ʻa e ngaahi motuʻaleá ʻi he founga nai ʻo hangē ha kiʻi vaʻinga. Pea toki faʻu ha ngaahi foʻi lea, pea faifai atu pē ʻo fokotuʻu ʻa e ngaahi foʻi leá ke hoko ko ha ngaahi sētesi. Pea ʻai ʻa e akó ko ha meʻa fakafiefia ki he lahi taha ʻe malavá.
9 Ko e fakatātaá, naʻe lau tohi leʻo lahi ha ongo mātuʻa ki heʻena kiʻi tama taʻu tolu, pea tuhu ki he foʻi lea taki taha koeʻuhi ke muimui ki ai ʻa e kiʻi tamá ʻi he lau tohí. ʻI he ngaahi foʻi lea ʻe niʻihi naʻá na kiʻi mālōlō ai, pea ʻe puʻaki mai ʻe he kiʻi tamá ʻa e foʻi leá, ʻo hangē ko e “ʻOtua,” “Sīsū,” “tangata,” “fuʻu ʻakau.” Faifai atu pē naʻe tupulaki ʻa e lahi ʻo e ngaahi foʻi lea naʻá ne malava ke laú, pea ʻi heʻene taʻu faá kuó ne lava ʻe ia ʻo lau ʻa e ngaahi foʻi lea lahi taha. ʻOku ʻalu fakataha ʻa e lau tohí mo e tohinima, ʻuluakí ko e ngaahi foʻi mataʻitohi taki taha, pea toki hoko ki he ngaahi foʻi lea kakato. Ko e meʻa fakatupu-fiefia ki he tamá ke ne tohi hono hingoa pē ʻoʻoná!
10. Ko e hā ʻoku fakapotopoto ai ke tokoniʻi ʻa e tama taki taha ke tupulaki ʻa ʻene malava pē ʻaʻaná?
10 ʻOku kehekehe ʻa e tama taki taha, pea ʻokú ne maʻu ha tōʻonga makehe, pea ʻoku totonu ke tokoniʻi ke tupulaki ʻo faitatau mo ʻenau ngaahi malava tāutaha kuo maʻu ʻi he tukufakaholó. Kapau te ke akoʻi ʻa e tama taki taha ke tupulaki ʻa e tafaʻaki ʻokú ne mālohi aí pea mo e ngaahi malava kuó ne maʻu ʻi he tukufakaholó, he ʻikai fiemaʻu ai ke ne ongoʻi meheka ʻi he lavameʻa ʻa e fānau kehé. ʻOku totonu ke ʻofaʻi mo houngaʻia ʻi he tōʻonga ʻa e tama taki taha. ʻI hono tokoniʻi ia ke ne ikuʻi pe mapuleʻi ʻa e ngaahi hehema fehālaakí, ʻoku ʻikai ke totonu ke ke feinga ke fakamālohiʻi ʻa e kiʻi tamá ki ha fōtunga naʻá mo tomuʻa fakakaukauʻi. Ka ke tataki ia ke ngāueʻaki lelei taha ʻa hono ngaahi ʻulungaanga lelei ʻo ʻene tōʻonga ʻaʻaná.
11. Ko e hā ʻoku taʻefakapotopoto ai ke fakahoatāmaki ha kiʻi tama ki ha kiʻi tama ʻe taha?
11 ʻE lava ʻe ha mātuʻa ke ne fakaʻaiʻai ʻa e feʻauʻauhi siokitá ʻaki haʻane ʻai ke maʻu ʻa e fakakaukau ʻoku lelei ange pe ʻikai ke loko lelei ha kiʻi tama ʻi hono fakahoa ia ki ha kiʻi tama ʻe taha. Neongo ʻoku kamata ke ʻasi ʻi he fānau īkí ʻa e siokita naʻe fanauʻi pē mo iá, ka ʻi he kamataʻangá ʻoku nau ʻatā mei he ngaahi fakakaukau ʻo kau ki ha tuʻungá, ko e ongoʻi ʻoku nau lelei angé, mo e ongoʻi ʻo e fie meʻá. Ko hono ʻuhinga ia naʻe malava ai ʻe Sīsū ke ne ngāueʻaki ha kiʻi tama ko ha faʻifaʻitakiʻanga ke ne fakatonutonu ʻaki ʻa e loto fie faai ki ʻolungá mo e tokanga pē ki he mahuʻinga fakafoʻituituí ʻa ia naʻe hā mei heʻene kau ākongá ʻi ha taimi ʻe taha. (Mātiu 18:1-4) Ko ia, fakaʻehiʻehi mei hono fakahoatāmaki ha kiʻi tama ki ha tama ʻe taha. ʻE lava ke ongoʻi ʻe he kiʻi tamá ko hono talitekeʻi ia. Ko e ʻuluaki meʻá te ne ongoʻi loto-mamahi, pea kapau ʻe hokohoko atu ai pē hono fai ki ai ʻa e meʻa ko ʻení, ʻe hoko ai leva ia ʻo fakafili. ʻI he tafaʻaki ʻe tahá, ko e kiʻi tama ko ia ʻoku pehē ʻoku lelei angé ʻe hoko nai ia ʻo loto-mahikihiki pea ʻe fehiʻanekina ai ia ʻe he niʻihi kehé. ʻI ho tuʻunga ko e mātuʻá, ʻoku totonu ke ʻoua naʻa teitei fakatuʻunga hoʻo ʻofá mo hoʻo tali ʻa e tamá ʻi hono fakahoa ia ki ha taha kehe. Ko e meʻa fakafiefia ʻa e faikehekehé. ʻOku ʻi ha tāmeʻalea ʻa e ngaahi faʻahinga meʻalea kehekehe lahi ke ʻai ke kehekehe mo lelei, ka ʻoku nau feongoongoi kotoa. Ko e ngaahi tōʻonga kehekehé ʻoku nau ʻai ke ifo mo fakamānako ʻa e fāmilí, ka ʻe ʻikai ke maumau ʻa e feongoongoí ʻo kapau te nau sīpingaʻaki ʻe kinautolu kotoa ʻa e ngaahi tefitoʻi moʻoni totonu ʻa honau Tokotaha-Fakatupú.
TOKONI KI HOʻO TAMÁ KE TUPU HAKE
12. Ko e hā ʻa e ngaahi moʻoniʻi meʻa ʻo fekauʻaki mo e kakai lalahí ʻoku fakahā ai ʻoku fiemaʻu ki ha kiʻi tama ʻa e tataki totonú?
12 ʻOku pehē ʻe he Folofola ʻa e ʻOtuá: “ʻOku ʻikai ʻi he tangata ʻoku haʻele ke fakaʻuli ʻene ʻalu.” (Selemaia 10:23) ʻOku pehē ʻe he tangatá ia ʻoku malava pē. Ko ia ʻoku ʻikai te nau tali ʻa e tataki mei he ʻOtuá, kae tali ʻa e tataki ʻa e tangatá, ʻo nau fetaulaki mo e ngaahi faingataʻa hokohoko, pea iku ai ʻo fakamoʻoniʻi ʻoku moʻoni ʻa e ʻOtuá. ʻOku folofola mai ʻa Sihova ko e ʻOtuá ʻo pehē ʻoku ʻi ai ha founga ʻoku matamata totonu ki he tangatá ka ko hono ikuʻangá ko e mate. (Palōvepi 14:12) Kuo fuoloa mai ʻa e fou ʻa e kakaí ʻi he hala matamata totonu pē kiate kinautolú, pea kuo iku ai ki he tau, honge, mahamahaki mo e mate. Kapau ʻoku iku ki he maté ʻa e founga ʻoku matamata totonu ki ha tangata taukei mo lahi, pea ʻe malava fēfē ke iku ki ha meʻa kehe ʻa e founga ʻoku matamata totonu ki ha kiʻi tama? Kapau ʻoku ʻikai ke ʻi he tangata ʻoku hāʻelé ke fakaʻuli ʻene ʻalú, pea ʻe malava fēfē ke ʻi he kiʻi tama ʻoku tōtuʻú ke ne tataki hono halá ki he moʻuí? ʻOku tokonaki mai ʻe he Tokotaha-Fakatupú ʻa e tataki ki he mātuʻá mo e kiʻi tamá fakatouʻosi ʻo fakafou mai ʻi Heʻene Folofolá.
13, 14. ʻE fakahinohinoʻi fēfē nai ʻe he ngaahi mātuʻá ʻa e fānaú ʻo fetāiaki mo e akonaki ʻi he Teutalōnome 6:6, 7?
13 ʻOku folofola mai ʻa e ʻOtuá ki he ngaahi mātuʻá: “Pea ko e ngaahi foʻi folofola ko eni ʻoku ou kouna atu he ʻaho ni ʻe fuesia ʻe ho loto: pea te ke uhuʻi ki hoʻo fanau, pea te ke lea ki ai ʻi hoʻo nofo ʻi ho fale, pea ʻi hoʻo ʻalu ʻi he hala, pea ʻi hoʻo tokoto hifo, pea ʻi hoʻo tuʻu hake.” (Teutalōnome 6:6, 7) ʻOku totonu ke fai ʻa e fakahinohinó ʻi ha faʻahinga taimi pē, ʻi he hoko mai ʻa e ngaahi faingamālie feʻungamālié. Kapau ʻoku kai pongipongi fakataha ʻa e fāmilí, neongo ʻoku hoko ʻa e taimi pongipongí ko e taimi fakavave ia ki he tokolahi ke mateuteu ki he ngāué pe ko e akó, ka ko e fakahā ʻo e fakamālō koeʻuhi ko e meʻakaí te ne tataki ʻa e ngaahi fakakaukaú ki he Tokotaha-Fakatupú pea ʻe malava ke fakakau ai ʻa e ngaahi meʻa kehe ʻoku ʻaonga fakalaumālie ki he fāmilí. Mahalo ʻe ʻi ai ha taimi feʻunga ke fai ha fakamatala ʻo kau ki he ngaahi meʻa ʻe fai ʻi he ʻaho ko iá pe fekauʻaki mo e akó pea mo e akonaki lelei ʻi he fekuki mo e ngaahi palopalema ʻe lava ke hokó. Ko e taimi mohé, “ʻi hoʻo tokoto hifo,” ʻe lava ke hoko ko e taimi fiefia ki he fānau īkí ʻo kapau ʻe fai ʻe he ngaahi mātuʻá ha toe tokanga makehe kiate kinautolu. Ko e fanga kiʻi talanoa ʻi he taimi tākoto ke mohé ʻoku mahuʻinga ia ki he fānau īkí pea ʻoku malava ke hoko ia ko ha founga lelei ke fai ai ʻa e akó. ʻOku ʻi he Tohitapú ʻa e fakamatala lahi ʻa ia ʻoku fiemaʻu pē ki ai ʻa e fakakaukau pōtoʻi mo e loto-māfana ʻa e mātuʻá ke ʻai ia ʻo fakafiefia ʻaupito ki he kiʻi tamá. Ko e ngaahi meʻa ʻoku hokosia mei hoʻo moʻui pē ʻaʻaú ʻe maongo makehe ia ki hoʻo fānaú pea ʻoku lava ke hoko ia ko ha founga ke ako ai ha meʻa lelei. Pea neongo ʻe ngalingali nai ko ha meʻa faingataʻa ke maʻu ha ngaahi talanoa foʻou, ka te ke faʻa fakatokangaʻi ʻoku manako ʻa e kiʻi tamá ke toutou fanongo pē ki ha ngaahi talanoa tatau. Te ke ʻilo nai ʻe toe lahi ange ʻa hoʻo fetalanoaʻaki mo hoʻo fānaú ʻi hono vaheʻi ʻa e taimi lahi ange ko ení. Ko hono fai ʻa e lotu fakataha mo e fānaú ka nau toki mohé ʻe toe tokoni ia ke ne fokotuʻu tōmuʻa ʻa e fetuʻutaki mo e Tokotaha ʻoku malava ke ne fai ʻa e meʻa lahi taha ki hono tataki mo maluʻi kinautolú.—ʻEfesō 3:20; Filipai 4:6, 7.
14 Tatau ai pē pe ko e fē ʻa e feituʻu ʻokú ke ʻi ai, ʻo ‘tangutu hifo ʻi ho ʻapí’ pe ‘fononga ʻi he halá,’ ʻoku ʻi ai ʻa e ngaahi faingamālie kiate koe ke akoʻi hoʻo kiʻi tamá ʻi he ngaahi founga ʻa ia ʻoku fakatupu tokanga mo ola leleí. Ki he fānaú, ʻe lava ke fakahoko eni ʻi ha founga ʻo ha kiʻi vaʻinga. Ko e fakamatala ʻeni ʻa ha ongo meʻa ʻo kau ki he anga ʻo hono fakahoko ʻa e meʻá ni ʻi hono tokoniʻi ʻa e fānaú ke nau manatuʻi ʻa e ngaahi meʻa mei ha fakataha ki hono ako ʻa e Tohitapú:
‘ʻI he efiafi ʻe taha naʻá ma ʻave ha kiʻi tamasiʻi ʻa ia ko hono taʻu ono hono motuʻá pea ʻoku ʻikai te ne faʻa tokanga ʻi he taimi ʻoku fai ai ʻa e fakatahá. Lolotonga ʻemau fononga ki he fale fakatahaʻangá, naʻá ku pehē: “Tau fai ha kiʻi vaʻinga. ʻI heʻetau foki ki ʻapí te tau vakai angé pe ʻe malava ke tau manatuʻi ʻa e ngaahi hiva naʻe hivaʻakí pea mo e niʻihi ʻo e ngaahi meʻa tefito naʻe fakahā ʻi he fakatahá.” ʻI heʻemau foki ki ʻapí naʻa mau ʻohovale. Ko e kiʻi tamasiʻi siʻisiʻi tahá, ʻa ia ʻoku ʻikai faʻa tokangá, naʻá ne maʻu ʻa e ʻuluaki faingamālie ke leá pea naʻá ne manatuʻi ʻa e ngaahi meʻa lahi. Pea toki tānaki atu ʻe heʻema fānaú ʻenau ngaahi fakamatalá pea fakaʻosi ʻe kimaua lalahí. Naʻe hoko ko ha meʻa fakafiefia ia kiate kinautolu kae ʻikai ko ha ngāue.’
15. Ko e hā ʻa e meʻa ʻoku malava ke fai ke fakalototoʻaʻi ha kiʻi tama ke lelei ange ʻa e meʻa ʻokú ne faí?
15 ʻI he tupu hake ʻa ha kiʻi tama ʻo motuʻa angé te ne ako ke fakahā ʻa e ngaahi fakakaukau, tā ha ngaahi fakatātā, fai ha ngāue, tā ha meʻalea. ʻOkú ne maʻu ʻa e ongoʻi ʻo e lavameʻa. Ko ʻene ngāué ʻoku hangē ha konga ʻo ia. ʻOku mātuʻaki kaunga ia kiate ia. Kapau te ke sio ki ai peá ke pehē ‘Tō atu,’ te ne ongoʻi mātuʻaki fiefia ai. Kumi ha meʻa ʻi heʻene ngāué ʻa ia ʻoku malava ke ke vīkivikiʻi moʻoni, pea ʻe fakalototoʻaʻi ai ia. Ko hono fakaangaʻi taʻefakakaukauʻi iá, pea te ne loto-mamafa nai ai pea foʻi. Langaʻi ha fehuʻi ʻo kau ki ha tafaʻaki ʻe taha ʻo e ngāue ko iá kapau ʻoku fiemaʻu ke fai pehē, kae ʻoua ʻe ʻai ia ke hoko ko hano fakafisingaʻi ʻo ʻene ngāué. Ko e fakatātaá, ʻi he lelei ange ke ʻoua ʻe fakaleleiʻi ʻa ʻene tā fakatātā ʻaʻaná, ʻe lava ke ke fakahāhā ʻi ha kiʻi lauʻi pepa ʻe taha ha fakalelei ʻe lava ke ne fai nai. ʻE ʻai ai ʻe he meʻá ni ia ke ne fakatonutonu ʻa ʻene tā fakatātā pē ʻaʻaná ʻo kapau ʻokú ne fie fai pehē. ʻI hono fakalototoʻaʻi ʻa ʻene feingá ʻokú ke fakalototoʻaʻi ai ʻa ʻene tupú; ʻi hano fakaangaʻi fefeka ia, ʻokú ke fakalotosiʻi ai ia pe taʻotaʻofi ʻa ʻene holi ke hanganaki feingá. ʻIo, ʻe malava ke toe kaunga tonu ki he fānaú ʻa e tefitoʻi moʻoni ʻi he Kalētia 6:4: “Ka ke taki taha sivi ʻene ngaue aʻana; pea te ne toki fakafuofuaʻaki ia pe hono polepoleʻanga, ʻo ʻikai ʻaki ha taha kehe.” ʻOku fiemaʻu ʻa e fakalototoʻá ki ha kiʻi tama, ʻo tautautefito ki heʻene ʻuluaki ngaahi feingá. Kapau ʻoku lelei ʻa e ngāué ʻo fakatatau ki hono taʻumotuʻá, fakaongoongoleleiʻi ia! Kapau ʻoku ʻikai, fakaongoongoleleiʻi ʻa e feinga ʻoku faí, pea fakalototoʻaʻi ke toe fai ha feinga ki ai. He, naʻe ʻikai te ne malava pē ʻo ʻalu ʻi heʻene ʻuluaki feingá.
ʻE FĒFĒ HAʻAKU FAKAMATALAʻI ʻA E FEHOKOTAKI FAKASINÓ?
16. Koeʻuhi ko e meʻa ʻoku leaʻaki ʻe he Tohitapú, ko e hā ʻa e faʻahinga tali ʻoku totonu ke fai ki ha ngaahi fehuʻi ʻa ha kiʻi tama ʻo kau ki he fehokotaki fakasinó?
16 ʻOkú ke tali ʻa e ngaahi fehuʻi ʻa hoʻo kiʻi tamá pea fakalototoʻaʻi ia ke fetalanoaʻaki. Ka ʻe fakafokifā kuo fehuʻi atu kiate koe ʻo kau ki he fehokotaki fakasinó. ʻOkú ke tali totonu pe ʻokú ke fai ai ha tali takihalaʻi, hangē ko ha pehē naʻe maʻu ha kiʻi pēpē ko e tokoua pe ko e tuongaʻane pe ko e tuofefine mei fale mahakí? Te ke fai ha fakamatala totonu pe te ke tuku ʻa e fānaú ke nau honge ʻilo, mo maʻu ha ngaahi tali hala ʻi ha ngaahi fakamatala fakalielia mei ha fānau matuʻotuʻa ange? ʻOku maʻu ʻi he Tohitapú ʻa e ngaahi fakamatala hangatonu ʻo kau ki ha ngaahi meʻa felāveʻi mo e fehokotaki fakasinó pe ko e ngaahi ʻōkani ʻo e fakafanaú. (Sēnesi 17:11; 18:11; 30:16, 17; Livitikō 15:2) ʻI hono fakahinohinoʻi ʻe he ʻOtuá ʻa ʻene kakaí ʻo kau ki he ngaahi fakatahatahaʻi ʻo kinautolu ʻa ia ʻe lau atu ai ʻene Folofolá, naʻá ne pehē: “Fakataha ʻa e kakai, ʻa e kau tangata, mo e kau fefine, mo e tamaiki, . . . koeʻuhi ke nau fanongoa, pea koeʻuhi ke nau maʻu akonaki.” (Teutalōnome 31:12) Ko ia naʻe fanongo ʻa e fānau īkí ki he ngaahi fakamatala pehē ní ʻi ha tuʻunga fakamātoato mo fakaʻapaʻapa, ʻo ʻikai ko e faʻahinga lea tavale ʻoku “fai pē ʻi he hala puleʻangá.”
17-19. ʻI he founga fē ʻe malava nai ke fakahā hokohoko ai ʻa e ngaahi fakamatala ʻo fekauʻaki mo e fehokotaki fakasinó?
17 Ko hono moʻoní, ko e fakamatala ʻo kau ki he fehokotaki fakasinó ʻoku ʻikai fiemaʻu ke faingataʻa ʻo hangē ko ia ʻoku fakakaukau ki ai ʻa e ngaahi mātuʻa tokolahi. ʻOku vave ʻaupito ʻa e hoko ʻa e fānaú ʻo fakatokangaʻi honau sinó, ʻo ʻiloʻi ʻa e ngaahi kupu kehekehe. Te ke tala ia ki he kiʻi tamá: ongo nima, ongo vaʻe, ihu, kete, tuʻungaiku, fakatangata, fakafefine. ʻOku ʻikai ke mā ʻa e kiʻi tama kei siʻí, tuku kehe pē ka ke ka liliu fakafokifā ʻo hoko ʻo “fakapulipuli” ʻo kau ki he ngaahi konga fakafanaú. Ko e meʻa ʻoku manavahē ki ai ʻa e ngaahi mātuʻá ko ʻenau fakakaukau ʻo pehē kuo pau ke nau fakamatalaʻi ʻa e meʻa kotoa pē, ʻi he kamata pē ko ia ke ʻeke ʻa e ngaahi fehuʻí. Ko hono moʻoní, ʻoku haʻu fakakongokonga ʻa e ngaahi fehuʻí, ʻi hono aʻusia ʻe he kiʻi tamá ʻa e ngaahi tuʻunga kehekehe ʻo ʻene tupú. ʻI hono aʻusia ʻa e ngaahi tuʻunga kehekehé ni, ʻoku fiemaʻu ke ke fakahā pē ʻa e ngaahi foʻi lea totonu pea mo e ngaahi fakamatala mātuʻaki faingofua mo fakalūkufuá.
18 Ko e fakatātaá, ʻe ʻeke atu kiate koe ʻi ha ʻaho, ‘ʻOku maʻu mei fē ʻa e ngaahi pēpeé?’ ʻE malava ke ke tali faingofua pē ʻaki haʻo lea ʻo hangē ko ení: ‘ʻOku nau tupu ʻi loto ʻi heʻenau faʻeé.’ ʻOku faʻa feʻunga pē ia ʻi he taimi ko ení. ʻAmui angé ʻe ʻeke nai ʻe hoʻo kiʻi tamá, ‘ʻOku anga-fēfē ʻa e haʻu ki tuʻa ʻa e kiʻi pēpeé?’ ‘ʻOku ʻi ai pē ʻa hono hūʻanga makehe.’ Pea ʻoku faʻa feʻunga pē ʻa e tali ko iá ʻi he taimi ko ení.
19 ʻI ha taimi ʻamui ange ʻe ʻeke nai ʻa e fehuʻi, ‘Naʻe anga-fēfē ʻa e kamata ke ʻi ai ʻa e kiʻi pēpeé?’ Ko hoʻo talí ʻe pehē ni nai: ‘Ko e tamaí mo e faʻeé ʻokú na fiemaʻu ke ʻi ai ha pēpē. Ko ha tenga mei he tamaí ʻoku fetaulaki ia mo ha foʻi fua ʻi he faʻeé pea kamata ke tupu ai ʻa e kiʻi pēpē, ʻo hangē ko e tupu ʻa ha foʻi tengaʻi ʻakau ʻi he kelekelé ʻo hoko ko ha matalaʻiʻakau pe ko ha fuʻu ʻakau.’ Ko ia, ko ha foʻi talanoa hokohoko, ko hono kupu taki taha ʻoku feʻunga pē ke fakafiemālieʻi ʻa e kiʻi tamá ʻi he taimi pē ko iá. ʻE ʻeke nai ʻe he kiʻi tamá ʻamui ange, ‘ʻOku founga fēfē ʻa e hū ʻa e tenga mei he tamaí ki he faʻeé?’ Te ke pehē pē nai: ‘ʻOkú ke ʻilo ʻa e faʻunga ʻo ha kiʻi tamasiʻi. ʻOku ʻi ai hono fakatangata. ʻOku ʻi ai ʻa e ava ʻi he sino ʻo ha taʻahine ʻoku feʻungamālie ki ai. ʻOku tō leva ʻa e tengá ki ai. ʻOku ngaohi pehē ʻa e kakaí koeʻuhi ke malava ke kamata ai ʻa e kiʻi pēpeé mo tupu ʻi he faʻeé, pea faifai atu pē ʻo hoko mai leva ki tuʻa ko ha kiʻi pēpē.’
20. Ko e hā ʻoku lelei ai ko e ngaahi mātuʻá ʻa e faʻahinga ʻoku nau fai ki heʻenau fānaú ʻa e ngaahi fakamatala ʻo fekauʻaki mo e fehokotaki fakasinó?
20 Ko e fakamatala totonu peheé ʻoku pau ʻoku lelei ange ia ʻi he ngaahi talanoa loi pe ko ha tali “fakapulipuli” ʻa ia ʻokú ne ʻai ʻa e meʻa ʻoku fai ha lave ki ai ke hā ngali ko ha meʻa ʻoku ʻikai ke sai ke talanoa ʻo kau ki ai. (Fakafehoanaki mo Taitusi 1:15.) ʻOku toe lelei ange foki ki he kiʻi tamá ke ne fanongoa ʻa e ngaahi moʻoniʻi meʻa peheé mei heʻene ongo mātuʻá, ʻa ia ʻokú na malava ke fakakau ki heʻena ngaahi fakamatalá ʻa e ngaahi ʻuhinga ki he totonu ke hoko mai pē ʻa e ngaahi pēpeé mei he ongo meʻa mali ʻokú na feʻofaʻaki pea kuó na tali ʻa e fatongia ke ʻofaʻi mo tokangaʻi ʻa e kiʻi pēpeé. ʻOku ʻai ʻe he meʻá ni ʻa e meʻa ʻoku lave ki aí ki ha tuʻunga maʻa mo fakalaumālie, kae ʻikai ke ako ki ai ʻi ha founga ʻokú ne ʻai ia ke hā ngali taʻemaʻa.
KO HONO FAKAHOKO ATU ʻA E NGAAHI MEʻA MAHUʻINGA TAHA ʻI HE MOʻUÍ KE AKO AI
21. Koeʻuhi ko e hehema fē ʻi he fānaú ʻoku mātuʻaki mahuʻinga ai ki he ngaahi mātuʻá ke nau fokotuʻu ha faʻifaʻitakiʻanga lelei ki heʻenau fānaú?
21 Naʻe fakatatauʻi ʻe Sīsū ʻa e kakai ʻi hono taimí ki he “tamaiki oku nofo i he botu fakatau, oku nau ui ki ho nau niihi, ʻo behe, Naa mau ifi fagufagu kiate kimoutolu, bea ikai te mou mee; naa mau hiva fakatagi kiate kimoutolu, kae ikai te mou tagi.” (Mātiu 11:16, 17, PM) Ko e ngaahi vaʻinga ʻa e fānaú ko ʻenau faʻifaʻitaki ki he kakai lalahí mo ʻenau ngaahi kātoangá pea mo ʻenau fai putú. Koeʻuhi ko e hehema fakaenatula ʻa e kiʻi tamá ke faʻifaʻitaki ki ha meʻa, ʻoku mātuʻaki mahuʻinga ʻa e faʻifaʻitakiʻanga ʻa e ongo mātuʻá ki hano akoʻi ha kiʻi tama.
22. Ko e hā ʻa e ola ʻe malava ke fakahoko ʻe he ʻulungaanga ʻo e ongo mātuʻá ki heʻena fānaú?
22 Kamata mei hono fāʻeleʻí, ʻoku ako ʻa hoʻo pēpeé meiate koe—ʻo ʻikai ʻi he meʻa pē ʻokú ke leaʻakí ka ko e founga hoʻo leaʻaki iá, ʻaki ʻa e tō ʻo e leʻo ʻokú ke ngāueʻaki ʻi hoʻo talanoá: ki he kiʻi pēpeé tonu, ki ho hoá pea ki ha toe faʻahinga kehe. ʻOkú ne fakatokangaʻi ʻa e feangai ʻa e ongo mātuʻá, pea mo ʻenau feangai mo e kau mēmipa kehe ʻo e fāmilí pea pehē ki he kau ʻaʻahí. Ko hoʻo faʻifaʻitakiʻanga ʻi he ngaahi meʻá ni ʻe malava ke ne akoʻi ʻa e ngaahi meʻa ʻoku mātuʻaki mahuʻinga mamaʻo ange ia ʻi he ako ʻa hoʻo kiʻi tamá ke luelue pe lau fika pe lau ʻa e A, E, F. ʻOku malava ke fakatoka ai ha makatuʻunga ki he ʻilo mo e mahino ʻa ia ʻe tataki atu ki he fiefia moʻoni ʻi he anga ʻo e nofó. Ko e faʻifaʻitakiʻanga ko iá ʻoku malava ke ne ʻai ʻa e kiʻi tamá ke ne tali lelei ʻa hono fakahā ʻa e ngaahi tuʻunga anga-tonú ʻi he taimi ʻoku motuʻa feʻunga ai ke akoʻi ia ʻaki ʻa e leá pea mo e lau tohí.
23, 24. Kapau ʻoku loto ʻa e ngaahi mātuʻá ke aʻusia ʻe heʻenau fānaú ha ngaahi tuʻunga pau, ko e hā ʻa e meʻa kuo pau ke nau loto ke faí?
23 “Mou hoko muʻa ko e kau faʻifaʻitaki ki he ʻOtua, ʻo tāu mo e fanau kuo ʻofeina: pea fou ʻi he ʻofa,” ko e enginaki ia ʻa e ʻaposetoló ki he kau Kalisitiané. Ki muʻa ke ne leaʻaki ení, naʻá ne fakahā ʻa e meʻa ʻoku fiemaʻu ki he faʻifaʻitaki ki he ʻOtuá, ʻo ne pehē: “Ko e fakamahū kotoa pe mo e lili mo e ʻita mo e feʻiohoʻaki mo e lauʻikovi, tuku ke hiki ia meiate kimoutolu, ʻio mo e lotokovi kotoa. Ka mou angaʻofa muʻa ʻi hoʻomou feangai, mo manavaʻofa, pea mou fefakamolemoleʻaki, ʻo hange foki ko e ʻOtua ne ne fakamolemole kimoutolu ʻia Kalaisi. Ko ia, mou hoko muʻa ko e kau faʻifaʻitaki ki he ʻOtua, ʻo tāu mo e fanau kuo ʻofeina . . . ” (ʻEfesō 4:31-33 [ʻEfesō 4:31, 32; 5:1, 2, PM]) Kapau ko e ngaahi leʻo ʻoku fanongo ki ai ʻa e kiʻi tamá, pe ko e meʻa ʻokú ne sio ki ai ʻoku faí, ʻoku fakahā mai ai ʻa e ngaahi meʻa ke ne ako ki ai ʻi he fekauʻaki mo e ʻiteʻitá, ʻo hangē ko e talanoa leʻo lahi mo e leʻo kikī, ko e lāunga, ko e loto-mahikihiki pe ʻita ʻoku fakapā atu, ko ha uesia ia kuo fai pea ʻoku faingataʻa ke tāmateʻi. Kapau ʻokú ke anga-ʻofa mo fakaʻatuʻi ki he kakai kotoa pē, kapau ʻoku māʻolunga ʻa ho ngaahi tuʻunga ʻo kau ki he ʻulungaangá pea lelei mo e ngaahi tefitoʻi moʻoni ʻokú ke muimui ki aí, ʻe hehema leva ʻa hoʻo kiʻi tamá ke faʻifaʻitaki kiate koe ʻi he meʻá ni. ʻAi hoʻo angafaí ke tatau mo e angafai ʻokú ke loto ke fakahāhā ʻe hoʻo fānaú.
24 ʻOku ʻikai ke totonu ke maʻu ʻe he ngaahi mātuʻá ha tuʻunga ʻe ua ʻo kau ki he meʻa ʻoku totonú mo ia ʻoku halá, ko e taha ke leaʻaki pea taha ke ngāueʻaki, ko e taha ki heʻena fānaú pea ko e taha maʻanaua. Ko e hā hano ʻaonga ke mo tala ki hoʻomo fānaú ke ʻoua te nau loi, kapau ʻokú mo loi kimoua? Kapau ʻoku ʻikai te mo fakahoko hoʻomo ngaahi talaʻofa kiate kinautolú, te ke lava ʻo ʻamanekina te nau fakahoko ʻenau ngaahi talaʻofa kiate kimouá? Kapau ʻoku ʻikai ke feʻaʻapaʻaki ʻa e ongo mātuʻá, ʻe malava fēfē ke na ʻamanekina ʻe ako ʻena kiʻi tamá ke ʻapasia? Kapau ʻoku ʻikai teitei fanongo ʻa e kiʻi tamá ki heʻene tamaí pe ko ʻene faʻeé ʻokú na fakahā ʻa e anga-fakatōkilaló, ʻe malava fēfē ke hoko ʻa e anga-fakatōkilaló ko hano tuʻunga ia? ʻOku fakatuʻutāmaki lahi ʻa hono fakahoko ʻe ha mātuʻa ʻa e fakakaukau ʻokú ne tonu maʻu pē he ʻe fakakaukau leva ʻa e kiʻi tamá ʻoku totonu ʻa e meʻa kotoa pē ʻoku fai ʻe heʻene mātuʻá—naʻa mo e taimi ʻoku fai ai ʻe he mātuʻá ʻa e ngaahi meʻa ʻoku hā ai ʻa e anga taʻehaohaoá mo e angahalaʻiá, pea ʻoku hala foki. Ko hono leaʻaki ha meʻa kae ʻikai ke fai ki aí ʻoku hangē ia ko e kau Fālesi mālualoí, pea naʻe pehē ʻe Sīsū ʻo fekauʻaki mo kinautolu: “Ko ia ʻilonga ha meʻa ʻoku nau fekau kiate kimoutolu, mou fai ki ai mo tauhia; kae ʻoua naʻa mou faʻifaʻitaki ki heʻenau ngaue: he ʻoku nau lea kae ʻikai fai ki ai.” Ko ia, ngaahi mātuʻa, kapau ʻoku ʻikai te mou fiemaʻu ha kau Fālesi iiki ʻi homou fāmilí, pea ʻoua te mou hoko ko e kau Fālesi lalahi!—Mātiu 23:3.
25. ʻOku totonu ke akoʻi fēfē ʻa e fānaú ʻo kau ki he ʻofá?
25 ʻOku fuofua ako ʻa e fānaú ʻo kau ki he ʻofá ʻi heʻenau sio ki hono fai iá pea ʻoku nau ako ke ʻofa ʻi hono ʻofaʻi kinautolú. ʻOku ʻikai malava ke fakatau mai ʻa e ʻofá. ʻOku malava nai ʻe he ngaahi mātuʻá ke foaki ha ngaahi meʻaʻofa lahi ki heʻenau fānaú. Ka ko e ʻofá ia ʻoku tefito lahi taha ia ko e meʻa fakalaumālie, mei he lotó kae ʻikai mei he kato paʻanga, pea ʻoku ʻikai malava ʻe he ngaahi meʻaʻofá pē ke fetongi ʻaki ʻa e ʻofa moʻoní. Ko e feinga ke fakatau mai ʻa e ʻofá ʻokú ne fakamaʻamaʻa ai ia. Foaki atu koe, ho taimí, ho iví, hoʻo ʻofá, ʻo mahulu hake ʻi hono foaki ʻa e ngaahi meʻaʻofa fakamatelié. Te ke toe maʻu mai ia ʻi he fua tatau. (Luke 6:38) Hangē ko ia ʻoku pehē ʻi he 1 Sione 4:19 (PM) ʻo kau ki heʻetau ʻofa ki he ʻOtuá: “Oku tau ofa kiate ia, koeuhi ko ene tomua ofa mai kiate kitautolu.”
26, 27. ʻOku malava fēfē ke akoʻi ki he fānaú ʻa e fiefia ʻoku maʻu ʻi he foaki atú?
26 ʻOku malava ke ako ʻa e fānaú ʻo kau ki he foaki atú ʻi heʻenau maʻu ʻa e foaki maí. ʻOku malava ke tokoniʻi kinautolu ke ako ki he fiefia ʻo e foaki atú, ʻo e fai tauhí, mo e vahevahe atú. Tokoniʻi kinautolu ke nau ʻilo ʻoku ʻi ai ʻa e fiefia ʻi he foaki atú—kiate koe, ki he fānau kehé, ki he kakai lalahí. ʻOku ʻikai faʻa saiʻia ʻa e kakai lalahí ke tali ʻa e ngaahi meʻaʻofa mei he fānaú, ʻo nau fakakaukau hala ai ko e fakahā ʻo e ʻofá ke tuku ʻa e fānaú ke nau tauhi pē ʻe kinautolu ʻa e ngaahi meʻaʻofa ʻoku nau fie foaki atú. Naʻe pehē ʻe ha tangata ʻe taha:
“Naʻe ʻikai te u faʻa tali ha foaki mai ʻe ha kiʻi tama kiate au ha foʻi lole. Naʻá ku fakakaukau ʻoku ou anga-ʻofa, ʻi he ʻikai te u tali ʻa e meʻa naʻá ku ʻilo ʻokú ne saiʻia lahi aí. Ka ʻi he ʻikai te u tali ia pea tuku ke ne tauhi pē ʻe ia maʻaná, naʻe ʻikai te u sio ki he fiefia naʻá ku fakakaukau ʻe hā mai mei he kiʻi tamá. Pea u toki ʻiloʻi ʻoku ou fakataleʻi ʻene loto-fiefoakí, ʻo fakataleʻi ʻa ʻene ngaahi meʻaʻofá, pea fakataleʻi mo ia. Talu mei ai, kuó u tali maʻu pē ʻa e ngaahi meʻaʻofa peheé, ke ʻai ia ke ne ʻilo ʻa e fiefia ʻo e foaki atú.”
27 Ko e ongo mātuʻa ʻi he fāmili ʻe taha naʻá na fie tokoni ki hona foha siʻisiʻí ke hoko ʻo hangē ko kinautolu ko ia ʻoku fakamatalaʻi ʻi he Tohitapú ʻi he 1 Tīmote 6:18, ʻo pehē ʻoku nau “nimahomo ʻo angafietokoni.” Ko ia, ʻi heʻenau ō ki ha feituʻu ke ako ai ʻa e Tohitapú naʻá na ʻave ʻa e paʻanga ʻa ia te na foakí ʻo ʻoange ia ki hona kiʻi fohá, ʻo tuku kiate ia ke ne lī ki he puha tokoní. Naʻe tokoni ʻeni ke fakamamafaʻi kiate ia ʻa e mahuʻinga ʻo hono foaki ha tokoni ki he ngaahi meʻa fakalaumālié pea mo tokoni ke tokonaki mai ʻa e faʻahinga fiemaʻu fakamatelie ʻe fakakau nai aí.
28, 29. ʻOku malava fēfē nai ke akoʻi ki he fānaú ʻa e mahuʻinga ʻo e kole fakamolemolé koeʻuhi ko ha faihala?
28 Hangē pē ko e malava ke ako ʻa e fānaú ke ʻofa pea nau loto-fiefoaki ʻo kapau ʻoku fakahoko ki ai ʻa e fakahinohino totonú fakataha mo e faʻifaʻitakiʻanga leleí, ko ia ʻoku toe malava foki ke nau ako ke kole fakamolemole ʻi he taimi ʻoku fiemaʻu ai ke fai peheé. Naʻe pehē ʻe ha mātuʻa ʻe taha: “ʻI he taimi ʻoku ou fai hala ai ki heʻeku fānaú, ʻoku ou fakahā ia kiate kinautolu. ʻOku ou fai ha fakamatala nounou kiate kinautolu ʻo fakahā ʻa e ʻuhinga naʻá ku faihala aí pea ko ia naʻe hala ʻa e meʻa naʻá ku faí. ʻOku hanga ʻe he meʻá ni ʻo ʻai ke faingofua ange ai kiate kinautolu ke nau fakahā mai kiate au ʻenau ngaahi faihalá, ʻo nau ʻilo ʻoku ʻikai te u haohaoa pea te u fakaʻatuʻi.” ʻI hono fakahāhā ʻa e anga ʻo e fakakaukau ko ʻení, naʻe ʻi ai ha taimi naʻe ʻaʻahi atu ai ha tokotaha foʻou ki ha fāmili pea naʻe fakafeʻiloaki ʻe he tamaí ʻa e kau mēmipa ʻo e fāmilí kiate ia. Naʻe pehē ʻe he tokotaha ʻaʻahí:
“Naʻe fakafeʻiloaki ʻa kinautolu kotoa naʻe ʻi aí, pea toki ʻasi mai ki he lokí ha kiʻi tamasiʻi fofonga malimali. Naʻe pehē ʻe he tamaí, ‘Pea ko ʻema tamasiʻi siʻisiʻí ʻeni, ʻa ʻeni ʻoku tau ʻa e siamu ʻi hono soté.’ Naʻe mole atu ʻa e fofonga malimali ʻa e kiʻi tamasiʻí kae hā mai mei hono fofongá ʻa e loto-mamahi. ʻI he vakai atu ʻa e tamaí ki he mei tangi ʻa e kiʻi tamasiʻí koeʻuhi ko ʻene ongoʻi maá, naʻe fakavave leva ʻene puke mai ʻa e kiʻi tamá ʻo ne pehē, ‘Naʻe ʻikai totonu ke u lea pehē; ʻoku ou kole fakamolemole atu.’ Naʻe halotu ʻa e kiʻi tamá ʻi ha kiʻi momeniti siʻi, peá ne mavahe atu mei he lokí, kae ʻikai ke fuoloa kuó ne toe foki mai mo ha fofonga malimali lahi ange—pea kuó ne ʻosi tui ʻa e foʻi sote maʻa.”
29 ʻOku pau ʻe ʻai ʻe he anga-fakatōkilalo peheé ke mālohi ange ʻa e ngaahi haʻi ʻo e ʻofá. Ko hono moʻoní, ʻe malava ʻe ha mātuʻa ke ne fakamatalaʻi ʻamui ange ki ha kiʻi tama ʻa e anga ʻo hono maʻu ha fakakaukau mafamafatatau ki he ngaahi palopalema lahi mo siʻisiʻi ʻi he moʻuí. Te ne lava ʻo tokoni ki heʻene fānaú ke nau ako ke ʻoua te nau sio ki ha ngaahi meʻa iiki ʻo fuʻu fakamātoato, ka nau malava ke kataʻi pē kinautolu pea ʻoua ʻaupito ʻe ʻamanekina ʻa e haohaoá mei ha niʻihi kehe ʻo hangē pē ko e ʻikai te nau fiemaʻu ke ʻamanekina meiate kinautolu ʻa e haohaoá.
FAKAHĀ ʻA E NGAAHI MEʻA ʻOKU MAHUʻINGA MOʻONÍ
30-32. Ko e hā ʻoku mātuʻaki mahuʻinga ai ki he ngaahi mātuʻá ke kamata tōmuʻa ʻaupito ʻa hono tokoniʻi ʻenau fānaú ke nau ʻiloʻi ʻa e ngaahi meʻa ʻoku mahuʻinga moʻoni ʻi he moʻuí?
30 ʻI he ʻahó ni ʻoku lahi ʻa e ngaahi mātuʻa ʻoku nau puputuʻu pe ko e hā koā ʻa e ngaahi meʻa ʻoku mahuʻinga moʻoni ʻi he moʻuí. Ko hono olá, ʻoku ʻikai ke teitei fakahā ki he fānau tokolahi ʻa e ngaahi meʻa ʻoku mahuʻinga moʻoní. ʻOku aʻu ʻo veiveiua ʻa e ngaahi mātuʻa ʻe niʻihi ki heʻenau totonu ki hono fakafōtunga ʻa e anga ʻo e fakakaukau ʻo ʻenau fānaú. Kapau ʻoku ʻikai ke fai ia ʻe he ngaahi mātuʻá, ʻe fai ia ʻe he ngaahi fānau kehé, ngaahi kaungāʻapí, ngaahi heleʻuhilá mo e televīsoné. Ko e vā lau taʻumotuʻá, angatuʻu ʻa e kau talavoú, faitoʻo kona tapú, ko e ngaahi ʻulungaanga foʻou ʻo e nofó mo e liliu lahi ʻi he vakai ʻo kau ki he fehokotaki fakasinó—ko e ngaahi meʻá ni kotoa pē ʻoku ilifia ki ai ʻa e ngaahi mātuʻá. Ka ko hono moʻoní, kuo ʻosi tupu ʻa e tōʻonga ia ʻa e kiʻi tamá ki muʻa ia pea toki ʻasi hake ʻa e ngaahi meʻá ni ʻi heʻene moʻuí.
31 Ko e ngaahi fekumi naʻe fakamatalaʻi ʻi ha tohi fakasaienisi ʻe taha ʻoku nau pehē “ko e konga lahi taha ʻo e tōʻonga ʻa ha taha kuo ʻosi fokotuʻu ia ki muʻa ʻi he kamata ke ne ʻalu ki he akó. Ko e moʻoni ko e meʻa ʻoku ʻilo fakalūkufuá, ʻoku mātuʻaki maongongofua mo oʻingofua ʻa e fānau teʻeki akó. . . . Kae kehe, kuo mau ʻiloʻi ko e faʻahinga meʻa kuo nau fetaulaki mo ia ʻi heʻenau kei īkí ʻi he fekauʻaki mo e anga ʻo e fakakaukaú pea mo e ngaahi meʻa kuo hokosiá ʻoku nau faʻa fokotuʻu ʻa e ngaahi sīpinga angafai ʻoku tuʻuloa mo ʻikai ala liliu ʻi he taimi ʻe niʻihi.”
32 ʻOku malava ke liliu ʻa e ngaahi sīpinga ʻoku halá, ka ʻoku fakamatalaʻi ʻe ha tokotaha fekumi ʻe taha ʻo kau ki he meʻa ʻoku hoko ʻo kapau ʻe tuku ke fakalaka atu ʻa e ngaahi taʻu mahuʻingá: “ʻOku oʻingofua pē ʻa e kiʻi tamá ʻi hono ʻuluaki taʻu ʻe fitú, ka ko e fuoloa ange ʻa hoʻo tatalí, ko e toe mālohi ange ia ʻa e fiemaʻu kiate koe ke liliu hono ʻātakaí—pea ko e malava ko ia ke hoko ha liliú ʻe fakaʻau ke siʻi ange ʻi he faai atu ʻa e taʻú.”
33. Ko e hā ʻa e ngaahi fakakaukau mahuʻinga lahi taha ʻoku totonu ke akoʻi ki he fānaú?
33 Kuo pau ke ako ʻe he fānau īkí ʻa e ngaahi tefitoʻi fakakaukau lahi, ka ko e mahuʻinga lahi tahá ko e ngaahi fakakaukau ki he meʻa ʻoku moʻoní mo e meʻa ʻoku loí, ko e meʻa ʻoku totonú pea mo e meʻa ʻoku halá. ʻI he tohi ʻa e ʻaposetolo ko Paulá ki he kau Kalisitiane ʻi ʻEfesoó, naʻá ne naʻinaʻi kiate kinautolu ke nau maʻu ʻa e ʻilo kānokanó, ʻo ne pehē, “Koeʻuhi ke ʻoua naʻa tau kei tamaiki, ʻo felīlīʻaki mo feʻaveaki fano ʻe he matangi fakaakonaki kotoa pe ʻoku tupu ʻi he fiemuʻa ʻa e kakai, ʻi he kākā ʻoku ngaue ke māu ʻa e meʻa fakahē: ka tau fai ʻaki ʻa e totonu ʻi he ʻofa, ʻo tau tupu hake ʻi heʻetau meʻa kotoa pe ke hokosi ʻa e tokotaha ko ia, ʻa ia ko e ʻUlu, ʻa Kalaisi.” (ʻEfesō 4:13-15) Kapau ʻoku fai tuai ʻa e ngaahi mātuʻá ke tokoniʻi ʻa e fānau īkí ke tupu ʻa e ʻofa ki he moʻoní mo e faitotonú, ʻa e ʻofa ki he meʻa ʻoku totonu mo leleí, ʻe tuku taʻemaluʻi ai ʻa e fānaú mei he meʻa ʻoku halá. ʻOku fakalaka vave atu ʻa e ngaahi taʻu ia ki muʻa he akó ʻo teʻeki ai ke fakatokangaʻi ia ʻe he ngaahi mātuʻá. ʻOua ʻe tuku ke fakalaka atu ia; ngāueʻaki ʻa e ngaahi ʻuluaki taʻu mātuʻaki mahuʻinga ʻa ia ʻoku nau fakafōtunga ʻa e fānaú ke fakahā ai kiate kinautolu ʻa e ngaahi meʻa ʻoku mahuʻinga moʻoní. Te ke hao nai ai mei he loto-mamahi ʻi he ngaahi taʻu ʻamui angé.—Palōvepi 29:15, 17.
34. Ko e hā ʻoku mahuʻinga ai ʻa e ngaahi tuʻunga tuʻumaʻu ʻo kau ki he ʻulungaangá, pea ko e hā ʻa e matavai lelei taha ʻo e ngaahi tuʻunga peheé?
34 “Kuo kamata liliu ʻa e anga ʻo e maama ko eni,” ko e tohi ia ʻa e ʻaposetolo fakamānavaʻí, pea ʻoku moʻoni eni ʻi he fekauʻaki mo e ngaahi tuʻunga fakamatelie, fakaeongo pea ʻi he fekauʻaki mo e ʻulungaanga ʻo e māmaní. (1 Kolinitō 7:31) ʻOku siʻisiʻi ke ʻi ai ha tuʻunga tuʻumaʻu ʻi he māmaní. Kuo pau ke fakatokangaʻi ʻe he ngaahi mātuʻá, ʻi heʻenau hoko ko e faʻahinga ʻo e tangatá, ʻe malava pē ke nau toe tō foki ʻi he meʻá ni. Kapau ʻoku tokanga ʻa e ngaahi mātuʻá ki he lelei taha maʻa ʻenau fānaú pea tokanga moʻoni ki hanau kahaʻu fiefia, te nau fakahanga leva ʻenau fānaú ki ha ngaahi tuʻunga ʻo kau ki he ʻulungaangá ʻa ia ʻoku moʻoni ʻenau tuʻumaʻú. ʻOku malava ke nau fai ʻeni ʻaki ʻenau fakamamafaʻi ki heʻenau fānaú mei he kei valevalé ʻo faai mai, tatau ai pē pe ko e hā pē ha fehuʻi ʻe mālanga hake, pe ko e hā pē ha palopalema ʻe fiemaʻu ke fakaleleiʻi, ko e Folofola ʻa e ʻOtuá, ko e Tohitapú, ko e feituʻu ia ke hanga ki ai ke maʻu ʻa e ngaahi tali fakapapau mo ʻaonga lahi tahá. Neongo pe ko e hā hono lahi ʻo e hā ngali puputuʻu mo faingataʻa ʻa e moʻuí ʻi he taimi ʻe niʻihi, ʻe kei hoko pē ʻa e Folofola ko iá ko e ‘tūhulu ki honau vaʻé, mo e maama ki honau halá.’—Sāme 119:105.
35. Ko e hā hono lahi ʻo e mahuʻinga ʻo hono akoʻi ʻete fānaú?
35 ʻIo, ko e vahaʻa taimi eni ʻo e faingamālie lelei ʻaupito ke kamata ke tō ki loto ʻi hoʻo fānaú ha tuʻunga ʻo e ngaahi meʻa ʻoku mahuʻinga ʻi he moʻuí ʻa ia ʻoku malava ke ne tauhi kinautolu lolotonga ʻenau moʻuí kotoa. ʻOku ʻikai ke toe ʻi ai ha ngāue tuʻumaʻu ʻe lelei ange, ʻoku ʻikai ha ngāue ʻe mahuʻinga ange, ka ko hono akoʻi hoʻo fānaú. Ko e taimi ke kamata aí ko e hili pē ʻa hono fāʻeleʻí, ʻi heʻenau kei valevalé!
[Fehuʻi ki he Ako]
[Fakatātā ʻi he peesi 117]
ʻAi ʻa e akó ko e meʻa fakafiefia
