Ko ha Uaifi ʻOku ʻOfeina Lahi
Vahe 5
Ko ha Uaifi ʻOku ʻOfeina Lahi
1-4. Ko e hā ʻa e lāunga ʻoku fai ʻe he kau fefiné ʻi he taimi ʻe niʻihi ʻo kau ki he fakapapauʻi ange ʻe honau ngaahi husepānití ʻa ʻenau ʻofá?
NAʻE lāunga ha fefine ki ha fefine ʻe taha, ‘ʻOku ou ʻilo ʻoku ʻofa hoku husepānití ʻiate au, ka ʻoku ʻikai te ne teitei leaʻaki. Ko e moʻoni, kapau te u toki feingaʻi pē ke ne leaʻaki ia te ne leaʻaki, ka ʻe toe mohu ʻuhinga lahi ange ʻo kapau te ne leaʻaki ia ʻo ʻikai ko ʻeku langaʻi atu kiate ia.’
2 Naʻe tali atu leva ʻe he fefine ʻe tahá, ‘ʻIo. Ko e anga pē ia ʻo e kau tangatá. ʻI he taimi ʻe taha naʻá ku ʻeke ange ki hoku husepānití pe ʻokú ne ʻofa ʻiate au, peá ne pehē, “Naʻá ku mali mo koe, ʻikai ko ia? ʻOku ou tauhi koe, ʻokú ta nofo fakataha; kapau ʻoku ʻikai te u ʻofa ʻiate koe he ʻikai te u fai pehē.”’
3 Naʻe kiʻi longo taimi siʻi ʻa e fefiné, peá ne hoko atu: ‘Kae kehe, naʻe aʻu ki hoku lotó ha meʻa ʻi he efiafi ʻe tahá. Lolotonga ʻa e ʻahó naʻe fai ai ʻeku fakamaʻa homa lokí, pea naʻá ku maʻu ai ha kiʻi laʻi tā. Ko e kiʻi laʻi tā eni naʻá ku fakahā ange kiate ia mei heʻeku ʻaiʻanga tā ʻo homau fāmilí. Ko e laʻi tā ia ʻoʻoku ʻi he taimi naʻá ku taʻu fitu aí. Naʻá ne toʻo ia mei he ʻaiʻanga taá ʻo ne tauhi ia.’
4 Naʻe malimali ʻa e fefiné ni ʻi heʻene manatuʻi ʻa e meʻá ni, peá ne sio atu leva ki hono kaumeʻá. ‘Naʻá ku fakahā ange ia ki hoku husepānití ʻi he efiafi ko iá ʻi heʻene foki mai mei he ngāué. Pea naʻá ne toʻo ʻa e kiʻi laʻi taá ʻi hono nimá peá ne malimali, ʻo ne pehē, “ʻOku ou ʻofeina ʻa e kiʻi taʻahine ko ení.” Peá ne tuku hifo ʻa e kiʻi laʻi taá peá ne pehē, “ʻOku ou ʻofeina foki ia ʻi he tuʻunga ʻokú ne ʻi ai he taimi ní.” Pea naʻá ne ʻuma mai kiate au. Naʻá ku fakatē-loʻimata.’
5. ʻOku totonu ke fēfē ʻa e angafai ʻa e uaifí kae ʻofeina lahi ia ʻe hono husepānití?
5 Ko ha uaifi ʻokú ne ʻiloʻi ʻoku ʻofaʻi lahi ia ʻe hono husepānití ʻokú ne ongoʻi māfana mo malu ʻi hono lotó. ʻOku akonaki ʻa e Folofola ʻa e ʻOtuá ki he kau tangatá ke nau ʻofa pehē ki honau uaifí. “ʻOku totonu ke pehe foki ʻa e ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu. Ko ia ʻoku ne ʻofa ki hono uaifi ʻoku ne ʻofa kiate ia. Seuke, ʻanefē ia ʻa e fehiʻa ʻa ha taha ki hono kakano oʻona; kaekehe ʻoku ne fafanga mo tauhi ia . . . pea te na hoko ko e kakano pe taha.” (ʻEfesō 5:28, 29, 31) Hangē ko ia kuo tau ʻosi lāulea ki aí, kuo pau ke ʻapasia loloto ʻa e uaifí ki hono husepānití, ka ʻoku totonu ki he husepānití ke ne ʻai hono ʻulungaangá ʻi ha founga ke ne taau ke maʻu ai ʻa e ʻapasia ko iá. Ko e meʻa tatau pē ia ʻi he tuʻunga ko ení ʻa ia ʻoku akonakiʻi ai ho husepānití ke ne ʻofa mo lehilehiʻi koe: Ke ke ʻai hoʻo angafaí ʻi he ngaahi founga ʻa ia ʻe ueʻi ai ho husepānití ke ne fai ʻa e meʻá ni mei hono lotó.
ʻOKÚ KE FAI HA POUPOU?
6, 7. (a) ʻI he tohi Sēnesi 2:18, ko e hā ʻa e ngafa naʻe folofola ʻa Sihova naʻá ne ngaohi ʻa e fefiné ke ne fakahokó? (e) Ko e hā ʻoku fiemaʻu mei he uaifí ka ne hoko ko e tokoni moʻoni ki hono husepānití?
6 Ke hoko ʻo ʻofeina lahi ʻa e uaifí, ʻoku fiemaʻu ha meʻa lahi ange ʻi he anganofo pē ki he tuʻunga ʻulu ʻo hono husepānití. ʻE lava ke maʻu ʻe he husepānití ha hoosi pe ha kulī kuo ʻosi akoʻi lelei pea ʻoku anganofo kiate ia. Naʻe ʻi ai ʻa e fanga manu fakataha mo ʻĀtama ʻi he ngoue ko ʻĪtení pea naʻa nau anganofo kiate ia. Ka naʻe kei tokotaha pē ia ʻi he fekauʻaki mo hono faʻahingá. Naʻe fiemaʻu kiate ia ke ʻi ai ha tokotaha maʻu-ʻatamai ʻi he faʻahinga ʻo e tangatá ke hoko ko ha fakakakato mo ha tokoni ke na ngāue fakataha. Naʻe folofola ʻa Sihova ko e ʻOtuá: “ʻOku ʻikai lelei ki he tangata ke tokotaha; kau ngaohi maʻana ha tokoni ke ʻao mo ia.”—Sēnesi 2:18.
7 Ko e meʻa ʻoku fiemaʻu ki ha husepāniti ko ha uaifi ʻa ia ʻoku ʻikai ngata pē ʻi heʻene ʻofa mo ʻapasia kiate iá ka ʻokú ne toe hoko ko e tokoni moʻoni, ʻo ne poupouʻi ia ʻi he ngaahi fili ʻokú ne faí. ʻOku ʻikai ko ha meʻa faingataʻa eni ʻo kapau te na felotoi ki he ngaahi filí ʻi he hili ʻa hono fai ha fetalanoaʻaki ki ai. Ka mahalo pē ʻoku ʻikai ke faingofua ʻo kapau naʻe ʻikai ke ʻuluaki alea ki ai mo koe pe ʻoku ʻikai te ke loto-taha mo ia. ʻI ha tuʻunga pehē, te ke lava ʻo poupou mateaki ki ho husepānití—ʻo fai hoʻo lelei tahá ke ʻai ke lavameʻa ʻa ʻene filí, ʻo kapau ko ʻene filí ʻoku ʻikai ko ha ngāue maumau-lao pe fepaki mo e Tohitapú? Pe te ke hehema ke loto-taʻeʻunua ʻo taʻepoupouʻi ia, ʻo fakaʻamu pē ke ʻoua ʻe lavameʻa ʻene fakakaukaú, kae malava ke ke toki pehē atu, ‘Naʻá ku ʻosi tala atu pē’? Kapau te ne vakai mai ʻokú ke ngāue mālohi ke lavameʻa ʻa e ngāué, neongo pē ʻoku ʻi ai haʻo tālaʻa, ʻikai ʻokú ke fakakaukau ʻe ueʻi ʻe hoʻo poupou mateaki peheé ke toe lahi ange ʻene ʻofa ʻiate koé?
8. ʻOku malava fēfē ke fakalototoʻaʻi ʻe ha uaifi ʻa hono husepānití ke ngāuetotonuʻaki hono tuʻunga ʻulú?
8 Sinoemeʻa, ʻoua te ke feinga ke faʻaoa hono tuʻunga ʻulú! Kapau te ke lavameʻa ʻi hoʻo fai peheé, he ʻikai te ke saiʻia ʻiate ia; pea ʻe ʻikai foki te ne saiʻia ʻiate koe pe ʻiate ia tonu. Mahalo pē ʻoku ʻikai te ne takimuʻa ʻo hangē ko ia ʻoku totonu ke ne faí. ʻOku malava ke ke fakalototoʻaʻi ia ke ne fai pehē? ʻOkú ke fakahā ha houngaʻia ʻi ha faʻahinga feinga pē ʻokú ne fai ke takimuʻa? ʻOkú ke ngāue fakataha mo fakalototoʻaʻi ia ʻi he taimi ʻokú ne fakalanga ai ha ngāue ʻiate ia pē, pe ʻokú ke tala ange ki ai ʻokú ne hala pea he ʻikai ke lavameʻa ʻa ʻene palaní? ʻI he taimi ʻe niʻihi ʻoku kau ʻa e uaifí ʻi hono tukuakiʻí ʻo kapau he ʻikai ke takimuʻa ʻa e husepānití. Hangē ko ení, kapau ʻoku manuki ʻa e uaifí ki he ngaahi fakakaukau ʻa e husepānití pe fakafepaki ki heʻene ngaahi feingá pe lea ʻo pehē, ‘Naʻá ku tala atu he ʻikai ke lavameʻa ia,’ ʻi he taimi ʻoku ʻikai ke lava lelei ai ʻa e ngāue ʻoku faí. ʻE faifai atu pē pea ʻe malava ke fakatupu ʻe he meʻá ni ha husepāniti ʻoku veiveiua pea toumoua ke ne fai ʻa e ngaahi filí. ʻI he tafaʻaki ʻe tahá, ko hoʻo mateakí mo poupoú, ko hoʻo falala mo tui pau kiate iá, ʻe hoko ia ke ne maʻu ai ha mālohi pea tokoni ke ne hoko ʻo lavameʻa.
“KO E UAIFI FITA”
9. Ko e hā ʻa e lau ʻi he Palōvepi 31:10 ʻo kau ki ha uaifi fita?
9 Ke hoko ko ha uaifi ʻoku ʻofeina lahi, ʻoku toe fiemaʻu foki ke ke tokanga lelei ki ho ngaahi fatongia ʻi he ʻapí. ʻOku pehē ʻe he Tohitapú ʻo fekauʻaki mo ha fefine pehē: “Ko hono mahuʻinga ʻoku hulu ʻi he makakula koloa.” (Palōvepi 31:10) Ko ha uaifi pehē koe? ʻOkú ke fie hoko ʻo pehē?
10, 11. ʻE fakahāhā fēfē nai ʻe ha uaifi ʻoku feʻungamālie ia mo e fakamatala ʻi he Palōvepi 31:15?
10 ʻI he lāulea ʻo kau ki he ngaahi ngāue ʻa ha “uaifi fita,” ʻoku fakamatala ʻe he tohi Palōvepí: “ʻOku ne tuʻu hake foki kei poʻuli, ʻo tufa meʻakai ki hono famili.” (Palōvepi 31:15) ʻOku tokolahi ʻa e kau finemui ʻoku nau kamata ʻa e nofo malí mo ha faingataʻaʻiaʻanga koeʻuhi he naʻe ʻikai ke akoʻi ʻa kinautolu ʻe heʻenau ngaahi faʻeé ki he founga ʻo e feimeʻakaí; ka ʻe lava ke nau ako. Pea ʻe ako ʻe ha fefine fakapotopoto ke ne fai lelei ia pea hoko ʻo poto ai! ʻI he taimi ʻoku teuteuʻi lelei ai ha meʻatokoni, ʻoku ʻikai ke ngata pē ʻi heʻete fiu aí ka ʻokú ne toe ʻai ke fakahā ʻa e houngaʻia mei he lotó.
11 ʻOku lahi ʻa e ngaahi meʻa ʻe lava ke ako ʻo kau ki hono teuteu ʻa e meʻatokoní. ʻOku ʻaonga ke te hoko ʻo ʻilo ʻo fekauʻaki mo e faʻahinga meʻakai ʻoku fakatupu-moʻuileleí kae lava ke maluʻi ai ʻa e moʻui lelei ʻo ho fāmilí. Ka he ʻikai te ke maʻu ʻa e fakamālō mei ho husepānití koeʻuhi pē ko haʻo ʻomai ʻa e meʻakai fakatupu-moʻuileleí kiate iá. ʻOku fakahā mai kiate kitautolu ʻe he Tohitapú ko e uaifi ʻo ʻAisaké, ko Lepeka, naʻá ne ʻilo ʻa e founga ke teuteu ai ʻa e meʻatokoní ʻi ha founga “ifo,” ʻi he founga ko ia naʻe ifoʻia ai hono husepānití. (Sēnesi 27:14, NW) ʻE tokolahi ʻa e ngaahi uaifi te nau maʻu ha ʻaonga mei heʻene faʻifaʻitakiʻangá.
12. Ko e hā ʻa e ngaahi meʻa ʻe kau nai ʻi he ngāue ʻa ha fefine ʻo fakatatau ki he Palōvepi 31:14?
12 ʻI he ngaahi feituʻu ʻe niʻihi ʻi he māmaní ʻoku ʻalu ʻa e kau fefiné ki he māketí ʻi he pongipongi kotoa pē ke ʻomai ʻa e ngaahi meʻa te nau fiemaʻu ki he ʻaho ko iá. ʻI he ngaahi feituʻu kehe, ʻoku nau fai fakatau tuʻo taha nai he uike ʻo tuku leva ʻa e ngaahi meʻakai maumaungofuá ʻi he ʻaisí. Tatau ai pē pe ko e hā ʻa e meʻa ʻoku faí, ʻe houngaʻia ha tangata ʻi ha uaifi ʻokú ne ngāue-fakapotopoto-ʻaki ʻa e paʻanga ʻa e fāmilí, pea ʻokú ne tokanga ki he fakamole ʻa e fāmilí. Kapau te ne hoko ʻo poto ʻi hono fili ʻa e faʻahinga meʻakaí mo e valá ʻa ia ʻoku tolongá, pea ʻokú ne ʻilo honau mahuʻingá, he ʻikai te ne fakatau maʻu pē ʻa e ʻuluaki meʻa ʻokú ne sio ki aí. Ka, ʻo hangē ko ia ʻoku fakahā ʻi he Palōvepi 31:14: “Ko e vakafakatau tofu pe ia ʻene ʻomi ʻene meʻakai mei he mamaʻo.”
13. Fakatatau ki he Palōvepi 31:27, ko e hā ʻoku malava ke ʻamanekina mei ha uaifi fita ʻo fekauʻaki mo ʻene tokangaʻi ʻa e ʻapí?
13 ʻOku toe fiemaʻu foki ke fakahā ʻi he tuʻunga ʻo hono ʻapí ʻa e faʻahinga tokanga fakamātoato pehē ʻo kau ki heʻene ngāué. ʻI he hoko atu ʻa e fakamatalá ʻo kau ki he meʻa ʻoku fakaʻilongaʻi ʻaki ha uaifi ʻoku fitá, ʻoku pehē ʻi he Palōvepi 31:27: “ʻOku ne lama ʻa e ngaahi ʻalunga ʻo hono famili; pea ʻoku ʻikai te ne kai ʻa e meʻakai ʻa e fakapikopiko.” Ko ʻene angaʻaki ʻa e moʻumoheá, ko hono fakamoleki ha taimi lahi ʻaupito ʻi he launoa mo e kaungāʻapí—ʻoku ʻikai ko e meʻa ia ke ne faí. Neongo ko e puké pe ngaahi meʻa taʻeʻamanekiná te nau fakatupunga nai ia ke tōtōmui ʻene ngāue fakaʻapí, ka ʻe maau mo maʻa maʻu ai pē ʻa hono ʻapí. ʻE lava ke falala ʻa hono husepānití ʻo ʻilo kapau ʻe ʻaʻahi ange ʻa e ngaahi kaumeʻá, he ʻikai te ne ongoʻi mā ʻi he fōtunga ʻo hona ʻapí.
14, 15. Ko e hā ʻa e akonaki ʻa e Tohitapú ki he kau fefiné ʻo fekauʻaki mo e ngaahi valá mo e teú?
14 ʻOku ʻikai fiemaʻu ke fakahā ki he tokolahi taha ʻo e kau fefiné ʻoku toe mahuʻinga ke fai ha tokanga ki honau fōtungá, ka ʻoku ʻi ai ʻa e faʻahinga ʻe niʻihi ʻoku fiemaʻu ke fakamanatu ki ai. ʻOku ʻikai ko ha meʻa faingofua ke te ongoʻi ʻofa ki ha taha ʻoku fakahā mai mei hono fōtungá ʻoku ʻikai te ne fuʻu fakakaukau lahi kiate ia tonu. ʻOku fokotuʻu atu ʻe he Tohitapú ki he kau fefiné ke nau “teuʻaki kinautolu ʻa e kofu oku ngali ke ʻai, pea ō mo e angamā mo e angafakamaʻumaʻu.” Ka ʻoku toe akonaki foki ke ʻoua ʻe fakamamafaʻi lahi ʻa hono ʻai ʻa e teuʻi ʻo e ʻulú, ngaahi kahoa, vesa mo e hau pea mo e ngaahi vala totongi mamafa ʻa ia ʻoku nau tohoaki ʻa e tokanga taʻetotonu ki he tokotaha ʻokú ne ʻai iá.—1 Tīmote 2:9.
15 Ko e meʻa ʻoku mahuʻinga lahi ange ia ʻi he faʻahinga vala peheé ko e anga ʻo e tokotaha ko ia ʻokú ne ʻai ʻa e teú. ʻOku fakahā ʻe he ʻaposetolo ko Pitá ki he ngaahi uaifi Kalisitiané ko e “angavaivai mo e angamalū . . . ko e meʻa mahuʻinga ʻaupito ʻi he ʻafio ʻa e ʻOtua.” (1 Pita 3:3, 4) Pea ʻi he fakaikiiki ʻe he Palōvepí ʻa e ngaahi tōʻonga ʻa e uaifi fitá, ʻokú ne tānaki atu ʻo pehē “ko e nima ai pe ko ia ʻoku ne alaʻaki ki he masiva” pea ʻoku “nofo ʻa e lao ʻofa ʻi hono funga ʻelelo.” ʻOku ʻikai ke siokita pe loto-kovi ka ʻokú ne nima-homo mo anga-ʻofa. (Palōvepi 31:20, 26) ʻOku hoko atu ʻa e fakamatalá: “Ko e matamatalelei ko e meʻa ʻe ʻikai ala falala ki ai, pea ko e hoihoifua ko e meʻa hamolofia: ko e fefine ʻoku apasia kia Sihova, ko eni ia ʻe fakamaloʻia.”—Palōvepi 31:30.
16. Ko e hā ʻa e anga ʻo e fakakaukau ʻe maʻu ʻe ha husepāniti ʻoku loto-hounga ʻo kau ki ha uaifi pehē?
16 ʻIo, ʻe ʻofeina lahi ʻa e fefine peheé ʻe ha husepāniti ʻokú ne maʻu ʻa e anga ʻo e fakakaukau tatau mo e Tokotaha-Fakatupú. ʻE ongoʻi ʻe he husepānití ki hono uaifí ʻo hangē ko ia ʻoku fakahā ʻe he tokotaha tohi Palōvepí: “ʻOku tokolahi ʻa e ngaahi ʻofefine kuo fai fita; ka ko koe kuo ke hulu ʻiate kinautolu kotoa.” (Palōvepi 31:28, 29) Pea ʻi he ʻikai ke ʻi ai ha fuʻu fakaʻaiʻai lahi ki he husepānití, ʻe ueʻi ia ke ne ʻai ke ʻiloʻi ʻe hono uaifí ʻokú ne ongoʻi pehē.
ʻOKU MAHUʻINGA ʻA E ANGA ʻO HOʻO VAKAI KI HE FEHOKOTAKI FAKASINÓ
17, 18. ʻI he founga fē ʻe malava ke uesia ai ʻe he anga ʻo e vakai ʻa e uaifí ki he fehokotaki fakasinó ʻa e anga ʻo e ongoʻi ʻa hono husepānití ʻo kau kiate iá?
17 Ko e taʻefakafiemālie ʻi he fehokotaki fakasinó ʻoku hoko ia ko e tupuʻanga ʻo e ngaahi palopalema lahi ʻi he nofo malí. ʻI he ngaahi tuʻunga ʻe niʻihi ʻoku tupu ʻa e meʻá ni ʻi he ʻikai ke fakaʻatuʻi mo mahino ki he husepānití ʻa e ngaahi fiemaʻu fakasino mo e fakaeongo ʻa hono uaifí, pea ʻi he ngaahi tuʻunga ʻe niʻihi ko e meʻa ʻi he ʻikai ke kaungākau fakaesino mo e fakaeongo ʻa e uaifí fakataha mo hono husepānití. ʻOku totonu ke hoko ʻa e fehokotaki fakasino ʻa ia ʻoku kau loto-lelei mo māfana ki ai ʻa e husepānití mo e uaifí fakatouʻosi, ko e fakahāhā fekoekoeʻi ia ʻo ʻena feʻofaʻakí.
18 ʻOku fakatupunga nai ʻa e ʻikai ke saiʻia ʻa e uaifí ke kau ʻi he fehokotaki fakasinó mei he taʻefakaʻatuʻi ʻa hono husepānití, ka ko e ʻikai ke ʻaʻafa ki ai ʻa e uaifí ʻoku fakatupu-lotomamahi ki he husepānití, pea ʻi he fakahā ʻe ha uaifi ʻa e taʻemanako ke kau ki he fehokotaki fakasinó ʻe mate ai ʻa e fie fehokotaki fakasino ʻa e husepānití pea aʻu ʻo ʻai ai ia ke ne manako ki ha tokotaha kehe. Kapau ʻe tukulolo pē ʻa e uaifí ʻo fakahāhā ʻa e ongoʻi taʻetokanga, ʻe hanga nai ʻa e husepānití ʻo sio ki he meʻa ko ení ko e fakahāhā ia ʻoku ʻikai ke kei ʻofa ange ʻa e uaifí kiate ia. ʻOku puleʻi ʻe he ngaahi ongoʻí ʻa e fie kau ʻi he fehokotaki fakasinó, pea kapau ʻoku ʻikai ke loko leleiʻia ʻa e uaifí ki ai ʻoku fiemaʻu nai ke ne toe vakai ki he anga ʻo ʻene fakakaukau ʻaʻana ki he fehokotaki fakasinó.
19. (a) ʻOku fakahaaʻi fēfē ʻe he Tohitapú ʻe hala ke taʻofi ʻa e fehokotaki fakasino ki hoto hoá ʻi ha vahaʻa taimi lōloa? (e) Ko e hā ʻoku ʻikai ke totonu ai ke fiemaʻu ke ʻeke ki ha taha ʻi tuʻa mei he nofo malí ke ne fakapapauʻi ʻa e ngaahi meʻa ʻoku taau ʻi he tōʻonga ʻa e ongo meʻa malí ʻo kau ki he fehokotaki fakasinó?
19 ʻOku akonaki ʻa e Tohitapú ki he husepānití mo e uaifí fakatouʻosi ke ʻoua te na “taʻofi ʻa e fefoakiʻaki ʻi he meʻá ni.” ʻOku ʻikai ke fakangofua ʻe he Folofola ʻa e ʻOtuá ke ngāueʻaki ʻa e fehokotaki fakasinó ko ha meʻa ia ke tautea ai hoto hoá pe ke fakahā ai ha loto-mamahi, ʻa ia ʻe lava ke hoko ʻi he fakafisi ʻa e uaifí ke fai ia mo hono husepānití ʻi ha ngaahi uike pe naʻa mo haʻane aʻu ki ha ngaahi māhina. Hangē pē ko ia ke “fai ange ʻe he husepānití ki hono uaifí ʻa e tōʻonga totonu; pea pehē foki ʻa e uaifí ki hono husepānití.” (1 Kolinitō 7:3-5, NW) ʻOku ʻikai ke ʻuhinga eni ʻe ʻamanekina ke kau ʻa e uaifí ki ha faʻahinga tōʻonga taʻefakanatula ʻa ia ko e meʻa fakalielia kiate ia, pea ʻe ʻikai ke fiemaʻu ʻe ha husepāniti ʻoku ʻofa mo ʻapasia ki hono uaifí ke fai pehē ʻa e uaifí. “Ko ʻOfa . . . ʻoku ʻikai te ne fai taʻetāu.” (1 Kolinitō 13:4, 5) ʻOku ʻikai totonu ke fiemaʻu ke ʻeke ki ha taha ʻi tuʻa mei he nofo malí ke fakapapauʻi ʻa e meʻa ʻoku taaú pe ko ia ʻoku taʻetaau ʻo fekauʻaki mo e tōʻonga ʻa e ongo meʻa malí. ʻOku hā mahino hono fakaikiikí ʻi he Tohitapú ʻi he 1 Kolinitō 6:9-11 ʻa e ngaahi tōʻonga ʻoku tapui kiate kinautolu ʻoku lotu kia Sihova ko e ʻOtuá: ko e feʻauaki, tono, ko e fehokotaki fakasino mo hoto faʻahinga pē. (Fakafehoanaki mo Livitikō 18:1-23.) Ko e kakai anga-tauʻatāina ʻe niʻihi ʻi onopooni ʻa ia ʻoku nau ngāueʻaki ʻa e meʻa ʻoku ui ko e “ʻulungaanga foʻou” ka ko hono moʻoní ko e ʻulungaanga taʻetaau, ʻoku nau fakahā ʻi he leʻo lahi ke tali lelei ʻa e niʻihi ʻo e ngaahi tōʻonga fehokotaki fakasino ʻoku tapuí, pea lolotonga iá ʻoku ʻi ai ʻa e faʻahinga ʻoku nau pipiki ki he anga motuʻá pea ʻoku nau saiʻia ke tānaki atu ʻa e ngaahi meʻa ki he ngaahi tapui ko ení. ʻOku fakahā mai ʻe he Tohitapú ʻa e fakakaukau mafamafatatau. ʻI he taimi lahi, kapau ʻoku lelei ʻa e ngaahi felāveʻi kehe ʻi he nofo malí, kapau ʻoku ʻi ai ʻa e ʻofá, ʻapasiá, fetalanoaʻaki lelei mo femahinoʻaki, pea ʻe toki tātātaha leva ʻa e hoko ʻa e fehokotaki fakasinó ko ha palopalema.
20. Ko e hā ʻa e ikuʻanga ʻo kapau ʻe ngāueʻaki ʻe he uaifí ʻa e fehokotaki fakasinó ke maʻu ha meʻa lelei mei hono husepānití?
20 Ko ha uaifi ʻoku ʻofeina loloto ʻoku ʻikai te ne ngāueʻaki ʻe ia ʻa e fehokotaki fakasinó ke ne maʻu ai ha meʻa. ʻOku moʻoni ʻoku ʻikai ke ngāueʻaki ʻe he ngaahi uaifí kotoa ʻa e fehokotaki fakasinó ke maʻu ai ha meʻa, ka ʻoku fai pehē ʻe he faʻahinga ʻe niʻihi. ʻI he ngaahi founga olopoto ʻoku nau ngāueʻaki ʻa e fehokotaki fakasinó ke maʻu ha ngaahi meʻa lelei mei honau husepānití. Ko e hā hono ikuʻangá? He ʻikai te ke ongoʻi ʻofa uʻuuʻu ki ha tokotaha ʻokú ne fakatau atu kiate koe ha kofu, ʻikai ko ia? Pehē foki, he ʻikai ke ongoʻi ʻe ha husepāniti ʻa e ʻofa uʻuuʻu ki hono uaifi ʻokú ne hanga ʻo fetongi meʻa meiate ia ʻaki ʻa e fehokotaki fakasinó. Ko e fefine ʻokú ne fai peheé ʻe maʻu nai haʻane meʻa fakamatelie, ka ʻe ʻi ai ʻa e mole fakaeongo mo fakalaumālie.
KO E KAU TANGI, KO E KAU HANU
21-23. Hangē ko ia ʻoku fakahā ʻi he meʻa ʻo fekauʻaki mo Samisoní, ʻi he founga fē ʻoku malava ai ke fakaʻauha ʻa e fiefiá ʻe he faʻa tangi mo e hanu ʻa ha fefine?
21 Ko Samisoní ko e tangata mālohi, ka naʻe ʻikai te ne lava ʻo matuʻuaki ʻa e vili ʻa e kau fefine naʻa nau ngāueʻaki ʻa e tangí pe hanú ke lava honau lotó. ʻI he taimi ʻe taha naʻá ne fehangahangai mo e tangi mamahi ʻa e fefine naʻe teu ke hoko ko hono uaifi. Hangē ko ia ʻoku hiki ʻi he Fakamaau 14:16, 17 naʻe “tangi fakafiu ʻa e uaifi ʻo Samisoni kiate ia, ʻo ne pehe, Uī! ʻoku ke fehiʻa kiate au; ʻoku ʻikai te ke ʻofa mai: kuo ke fokotuʻu ha tupuʻa ki he fanau ʻa hoku kakai, pea kuo ʻikai te ke tala kiate au. Pea ne pehe ki he fefine, Vakai, naʻa mo ʻeku tamai mo ʻeku faʻe kuo ʻikai te u tala ki ai, pea te u tala koā kiate koe?” Naʻe ʻikai ke lavameʻa ʻa e feinga ʻa Samisoní ke aʻu ki he fakakaukau lelei ʻa e fefiné. ʻOku tātātaha ke lavameʻa ʻa e meʻá ni ʻi he taimi ʻoku mālohi ai ʻa e ngaahi ongó. “Pea naʻa ne tangi fakafiu kiate ia ʻi he fituʻi ʻaho, ʻa ia naʻe fai ai ʻena katoanga; pea ko ia ʻi he hoko ʻa hono fitu ʻo e ʻaho, naʻa ne tala kiate ia, he naʻa ne fakafiuʻi ia: pea tala ʻe he fefine ʻa e tupuʻa ki he fanau ʻa hono kakai.”
22 ʻOua te ke fakakaukau ʻoku ʻikai ke ʻofa ho husepānití ʻiate koe koeʻuhi ko e ʻikai te ne faʻa fai maʻu pē ʻa e meʻa ʻokú ke saiʻia aí. Ko e fefine naʻe teu ke hoko ko e mali ʻo Samisoní naʻá ne tukuakiʻi ia ʻo pehē ʻoku ʻikai ke ʻofa ʻa Samisoni ʻiate ia, ka ko hono moʻoní ko ia naʻe ʻikai ke ʻofa ʻia Samisoní. Naʻá ne hanga ʻo fakafiuʻi ʻa Samisoni kae ʻoua kuo ʻikai te ne kei lava ʻo matuʻuaki. Pea ʻi he tala ange ʻe Samisoni kiate ia ʻa e tupuʻá, naʻe ʻikai te ne tauhi ʻa e meʻa fakapulipuli naʻe fakahā ʻe Samisoní ka ne lele ke tala ʻa e tupuʻá ki he ngaahi fili ʻo Samisoní. Naʻe faifai atu pē peá ne hoko ko e uaifi ʻo ha toe tangata kehe.
23 Ki mui mai, naʻe manako ʻa Samisoni ki ha fefine ʻe taha naʻe fakahingoa ko Tilila. Mahalo pē ko e fefine eni naʻe hoihoifua, ka naʻá ne hoko ko ha fefine ia ʻe lava ke ʻofeina lahi ʻe Samisoni? Naʻe ngāueʻaki ʻe Tilila ʻa e hanú ke maʻu fakaoloolo meia Samisoni ha fakamatala ke ne ngāueʻaki ki heʻene lelei fakaesiokita. ʻOku pehē ʻe he fakamatalá: “Pea ʻi heʻene fakafiu kiate ia, ʻi heʻene lau ʻi he ʻaho kotoa pe, mo fakakina kiate ia, naʻe faifai pea ʻikai te ne meimei kataki ke moʻui.” Ko e ola fakaʻosí naʻe hoko ʻo pango ʻaupito.—Fakamaau 16:16.
24-27. (a) Ko e hā ʻa e lau ʻa e tohi Palōvepí ʻo kau ki he ikuʻanga ʻo e hanu ʻa e uaifí? (e) Ko e hā ʻoku fakahanga ai pē ʻa e akonakí ni ki he kau fefiné? (f) Ko e hā ʻa e meʻa te ne ueʻi nai ʻa e husepānití ke ne saiʻia ke fai ha ngaahi meʻa lelei maʻá e uaifí?
24 ʻOku ʻikai ke fakapotopoto ʻa e tangí mo e hanú. ʻOkú na maumauʻi ʻa e nofo malí. ʻOkú na fakavāmamaʻo ʻa e husepānití. ʻOku fakatokanga mai ʻa e Tohitapú ke ʻoua ʻe ngāueʻaki ʻa e faʻahinga meʻa pehē, ʻo hangē ko ia ʻoku hā ʻi he ngaahi konga Tohitapu hoko mai mei he The New English Bible: “Ko ia ʻokú ne toutou langaʻi ha meʻa ʻokú ne veteki ʻa e kaumeʻa fetohotohoí.” “Ko e uaifi hanú ʻoku tatau ia mo e toʻi taʻetuku ʻa e vaí.” “ʻOku lelei ange ke nofo tokotaha ʻi he toafá ʻi he nofo fakataha mo ha uaifi hanu mo loto-ʻiteʻita.” “Ko e pātatō ʻi ha ʻaho ʻuha—ko e uaifi hanú ʻoku tatau mo e meʻá ni. Ke mapuleʻi ia ʻoku tatau ia mo hono feingaʻi ke mapuleʻi ʻa e matangí! Pea tatau mo e feinga ke puke ʻa e loló ʻaki hoto louhiʻi nimá!”—Palōvepi 17:9; 19:13; 21:19; 27:15, 16.
25 Ko e hā ʻoku fakahanga ai ʻe he Tohitapú ʻa e akonaki ko ení ki he uaifí pē? Mahalo pē koeʻuhi ʻoku faʻa mālohi ange ʻa e ngaahi ongoʻi ʻa e kakai fefiné pea toe lahi ange ʻenau hehema ke fakahaaʻi atu ʻenau ngaahi ongoʻí, tautautefito ʻi he taimi ʻoku nau hohaʻa ai ʻo kau ki ha meʻa. Mahalo ʻoku nau toe ongoʻi ko e meʻatau pē ia ʻoku nau maʻú. Koeʻuhi ko e ʻulu ʻo e ʻapí ʻa e husepānití ʻokú ne faʻa fai pē nai ʻe ia hono loto ʻoʻoná, pea ko ia ʻoku fakakaukau nai ʻa e uaifí kuo pau ke ne ngāueʻaki ʻa e teke fakaeongó. Ko koe, ko e uaifí, ʻoku totonu ke ʻoua te ke ngāueʻaki ʻa e ngaahi founga ko ení, pea ʻoku totonu ke ʻoua ʻe ʻai koe ʻe ho husepānití ke ke ongoʻi kuo pau ke ke fai pehē.
26 Ko e moʻoni, ʻe hoko nai ha taimi he ʻikai te ke ongoʻi sai ai, pea mahalo pē te ke tangi, neongo ʻoku ʻikai te ke saiʻia ke ke tangi. Ka ʻoku fuʻu kehe ʻaupito ia mei haʻo ngāueʻaki ʻe koe ʻa e ngaahi founga hangē ko e tangí ke maʻu ai ʻa e meʻa ʻokú ke fiemaʻú.
27 Kapau ʻoku ʻofa moʻoni ʻa e ngaahi husepānití ʻi honau uaifí, ko e tokolahi taha ʻo kinautolu te nau fai lahi ange ʻa e meʻa ʻoku saiʻia ai honau uaifí ʻi he meʻa ʻoku nau saiʻia aí ʻi he ngaahi tuʻunga ʻoku kau ai ʻa e manako fakafoʻituituí. ʻAi ke fiefia ho husepānití, pea te ne kumi nai ha ngaahi faingamālie ke ʻai ai koe ke ke fiefia.
“AHO KE FAKALOGOLOGO, MOE AHO KE LEA”
28-35. (a) Fakamatalaʻi ʻa e ngaahi tōʻonga fetalanoaʻaki te nau fakafaingataʻaʻiaʻi nai ʻa e husepānití ke fetalanoaʻaki mo hono uaifí. (e) Ko e hā ʻoku malava ke fai ke fakaleleiʻi ʻa e fetalanoaʻaki ʻi he vahaʻa ʻo e husepānití mo e uaifí?
28 ʻOku lāunga ʻa e ngaahi uaifi tokolahi, ‘ʻOku ʻikai ke teitei talanoa mai kiate au ʻa hoku husepānití.’ Mahalo pē ko e tō nounou ʻa e husepānití. Kae kehe, ʻi he taimi lahi ʻe saiʻia ha husepāniti ke ne talanoa ki hono uaifí, ka ʻoku ʻikai ke fakafaingofuaʻi ʻe he uaifí ke ne fai pehē. ʻI he founga fē? ʻOku ʻikai ke tatau ʻa e kakai fefine kotoa pē. Ka ke ʻeke hifo kiate koe pe ʻokú ke feʻungamālie mo ha taha ʻo e ngaahi fakamatala ko ení:
29 Ko e ʻuluakí ko e fefine ʻoku ʻikai ke ʻi ai ha faingataʻa ʻe taha ʻi he talanoa mo e kau fefine kehe ʻoku nofo takatakai atu ki aí. Ka ko e hā ʻene foungá? ʻI he taimi ʻoku kiʻi mālōlō ai ʻa e fefine ʻe tahá ʻo kiʻi mānava ʻi hono fai ha talanoa, ʻoku hū atu leva ia. Te ne ʻeke nai ha ngaahi fehuʻi, pe te ne kamata nai ke talanoa ʻo kau ki ha meʻa mātuʻaki kehe. Taimi siʻi pea toe hū mai ʻa e tokotaha ʻa ia naʻe taʻofi ʻene leá ʻo toe hoko atu ʻa e fetalanoaʻakí ʻi ha taimi siʻi. ʻE ʻikai ke ʻi ai ha taha ʻiate kinaua ʻe taʻefiemālie ʻi he founga fetalanoaʻaki ko ení.
30 ʻOku haʻu leva ʻa hono husepānití ki ʻapi, pea ʻoku ʻi ai ʻene ongoongo ke tala. ʻI heʻene hū atu ʻi he matapaá, ʻokú ne pehē, ‘Mateʻi mai ʻa e meʻa naʻe hoko he ngāué . . . ’ ʻOku ʻikai ke lava ke ne toe hoko atu ʻene leá. ʻOku taʻofi ʻe he uaifí ʻa ʻene leá ʻaki ʻene pehē, ‘Naʻe anga-fēfē ʻa e tau ʻa e ʻuli ko ʻena ʻi ho soté? ʻAi ho vaʻé ke maʻa. Ko e toki ʻosi eni ʻeku olo ʻa e falikí.’ ʻE toumoua nai ʻa e husepānití ke toe hoko atu ʻa ʻene talanoá.
31 Pe, ʻokú na talanoa nai mo ha ngaahi kaumeʻa pea ʻoku fakahā ʻe he husepānití ha meʻa naʻe hokosia, ka ʻoku ʻikai te ne tala kotoa ʻe ia pe ʻoku ʻikai ke tonu matematē ʻa e ngaahi fakaikiikí. ʻOku hū atu leva ʻa hono uaifí, ʻuluakí ke fakatonutonu ʻa e meʻa naʻe fehālaaki ʻi hono talá, pea ke toe tānaki atu ʻa hono fakaikiiki ʻo e foʻi talanoá. ʻIkai ke fuʻu fuoloa kuo māpuhoi ʻa e husepānití ʻo ne pehē, ‘Hoko atu ā ʻe koe.’
32 Ko e toe fefine ʻe taha ʻokú ne fakalototoʻaʻi ʻa hono husepānití ke talanoa. ʻOkú ne mātuʻaki fie ʻilo ka ʻokú ne feinga nai ke hā ʻoku ʻikai ke pehē, ʻo ne ʻeke: ‘Naʻá ke ʻi fē?’ ‘Ko hai naʻe ʻi aí?’ ‘Ko e hā ʻa e meʻa naʻe hokó?’ Ko e ngaahi meʻa ʻokú ne fie ʻilo ki aí ko e ngaahi meʻa ko ia ʻoku hā ngali fakapulipulí, ka ʻoku ʻikai ko e ngaahi meʻa ʻoku hoko fakaʻaho ʻi he moʻuí. ʻOku hanga ʻe he uaifí ʻo fakafehokotaki ʻa e ngaahi fakamatala ʻoku lava ke ne maʻú pea ʻokú ne fakakakato ia ʻaki ha fakamahalo. Mahalo ko e ngaahi fakamatala ʻe niʻihi naʻe ʻikai totonu ke fakahā ʻe hono husepānití. Mahalo ko e ngaahi meʻa kehe naʻe feʻunga nai ke ne talanoa ia ki hono uaifí, ka ke ngata pē ʻiate kinaua. Ka ʻo kapau ʻoku talanoa ʻa e uaifí ki ha niʻihi kehe ʻo fekauʻaki mo e meʻá ni, kuo maumau leva ʻa e tala fufū ko iá. ʻOku fai fakatokanga mai ʻi he Palōvepi 25:9: “Kae ʻoua ʻe fakaha ai ʻa e meʻa ne tala fufu ʻe ha taha kehe.” Ka ʻo kapau naʻe tala ia ʻe he uaifí, ʻoku hoko nai ai ha ngaahi palopalema. ʻE toe ongoʻi tauʻatāina ʻa e husepānití ke talanoa kiate ia?
33 ʻOku ʻikai ke faʻa lea ʻa e fefine hono tolú. ʻOkú ne ʻilo ʻa e founga ki hono fai ʻene ngāue ʻi ʻapí, ka ʻoku tātātaha pē haʻane faʻa lea ia ʻaʻana. Ko ha taha pē ʻokú ne feinga ke pō talanoa mo ia kuo pau ke ne fai ʻe ia ʻa e talanoá. Mahalo pē ʻoku anga-manavasiʻi ia, pe naʻe ʻikai ke ʻi ai ha faingamālie lahi nai ke ako ʻi heʻene kei siʻí. Tatau ai pē pe ko e hā ʻa e tupuʻanga ʻo e meʻa ko iá, he ʻikai ke lavameʻa ʻa e ngaahi feinga ke fai ha pō talanoá.
34 Ka ʻoku malava ke fai ha ngaahi liliu. ʻOku malava ke ako ke pōtoʻi ʻi he fetalanoaʻakí. Kapau ʻe ʻikai ngata pē ʻa hono fai ʻe ha fefine ʻa e ngāue fakaʻapí, ka ne toe fai ha lau tohi ʻoku ʻaonga mo ha ngaahi ngāue anga-ʻofa maʻá e kakai kehé, ʻe ʻi ai ʻa e ngaahi meʻa fakatupu langa hake ke ne fetalanoaʻaki ai pea mo hono hoá. Pea ke lavameʻa ʻa e fetalanoaʻakí ʻoku fiemaʻu ke na fakatou ʻinasi ai. ʻOku toe fiemaʻu foki ke ʻi ai ʻa e tokaʻi—ha tokaʻi feʻunga ke fakaʻatā ʻa e husepānití ke fakaʻosi ʻene leá, ke fakaʻatā ia ke ne leaʻaki ia ʻi heʻene founga pē ʻaʻaná, pea ke ʻilo ʻa e taimi ke ʻoua ʻe fakahā ai ʻa e talanoa fufuú. Hangē ko ia ʻoku pehē ʻi he Koheleti 3:7 (PM), ʻoku ʻi ai ʻa e “aho ke fakalogologo, moe aho ke lea.”
35 Ko ia ai, ʻi he lelei ange ke ʻoua ʻe lāunga ʻo pehē ʻoku tātātaha ke talanoa ʻa ho husepānití kiate koé, fēfē ke ke feinga ke ʻai ko e meʻa fakafiefia ki he husepānití ke talanoa atu kiate koe? ʻAi ke ke mahuʻingaʻia ʻi he ngaahi meʻa ʻokú ne faí. Fanongo tokanga kiate ia ʻi he taimi ʻokú ne lea aí. ʻAi ke fakahā ʻe hoʻo talí ʻa hoʻo ʻofa māfana mo ʻapasia loloto kiate iá. Fakapapauʻi ko e ngaahi meʻa ʻokú ke talanoa lahi taha ʻo kau ki aí ko e ngaahi meʻa ʻoku pau mo fakatupu langa hake. He ʻikai ke fuʻu fuoloa pea te ke ʻilo nai ko ha meʻa fakafiefia ʻa e fetalanoaʻakí kiate kimoua fakatouʻosi.
“MAʻU MAI . . . KAE ʻIKAI ʻAKI HA LEA”
36-38. Ko e hā ʻa e ngaahi founga ʻe niʻihi ke aʻu ai ki he loto ʻo ha hoa mali ʻoku ʻikai ko ha kaungātui?
36 ʻI he taimi lahi, ʻoku maongo lahi ange ʻa e ngāué ʻi he leá, kae tautefito ki he ngaahi husepāniti ʻoku ʻikai ko e kaungātui ki he Folofola ʻa e ʻOtuá. Naʻe pehē ʻe he ʻaposetolo ko Pitá ʻo fekauʻaki mo kinautolu: “ʻE maʻu mai kinautolu ʻaki ʻa e ngaahi toʻonga ʻa honau ngaahi uaifi, kae ʻikai ʻaki ha lea; heʻenau mamata ki he maʻa ʻo hoʻomou fakafeangai mo taka ʻapasia.” (1 Pita 3:1, 2) ʻOku tokolahi ʻa e ngaahi husepāniti taʻetui ʻoku nau faʻa lāunga ʻo pehē ʻoku “malanga” maʻu pē ʻa hono uaifí kiate ia, pea ʻoku ʻikai te ne saiʻia ai. Ko hono faikehekehé, kuo hoko ʻa e niʻihi kehe ko e kau tui ʻaki ʻenau sio ki he liliu kuo fakahoko ʻe he moʻoni ʻo e Folofola ʻa e ʻOtuá ki honau uaifí. ʻOku faʻa maongo ange ki he kakaí ʻenau sio ki ha ngāue ʻi heʻenau fanongo ki ha malanga.
37 ʻI hoʻo lea ki ho hoa taʻetuí, ʻai “ke lelei mau ai be hoo mou lea, o fakalelei aki ae masima,” ʻo hangē ko ia ʻoku fakahā ʻe he konga Tohitapú. ʻOku ʻi ai ha taimi ke lea. ʻOku pehē ʻe he Tohitapú: “Koni apele koula ʻi he ainga siliva, ko e lea ia ʻoku tautaungamalie hono leaʻaki.” ʻOku ongoʻi loto-siʻi ʻa e husepānití ʻo fekauʻaki mo ha meʻa? Mahalo pē naʻe ʻi ai ha kiʻi palopalema ʻi he ngāueʻangá. Ko ha ngaahi kiʻi lea fakaʻatuʻi ʻe hoko nai ʻo mahuʻinga ki he husepānití ʻi he taimi ko iá. “Ko e ngaahi lea ʻofa . . . ʻoku melie ki he loto, pea ko e faitoʻo ki hoto ngaahi hui.” (Kolose 4:6, PM; Palōvepi 25:11; 16:24) Pe, fakatuʻunga ʻi he meʻa ʻoku hokó, kapau te ke puke ʻa e nima ʻo ho husepānití ʻe hangē pē ʻokú ke pehē atu: ʻOku mahino kiate au, pea ʻoku ou kau mo koe. Te u tokoni atu ʻo kapau te u malava.
38 Neongo ʻa e ʻikai ke taha ho husepānití mo koe ʻi he tuí, ʻoku fakahā ʻe he Folofola ʻa e ʻOtuá kuo pau ke ke kei anganofo kiate ia. ʻE faifai atu pē nai pea te ke ikuna ia ʻaki hoʻo ʻulungaanga leleí, ʻo ne tui ki he meʻa tatau mo koe. Ko ha toki ʻaho fakafiefia ia ʻe hoko! Pea ka hoko ʻa e taimi ko iá, te ne toki ʻilo ʻoku lahi ange ʻa e ngaahi ʻuhinga ke ne ʻofa ai kiate koé. Koeʻuhi ko hoʻo mateakí fakataha mo hoʻo tuʻumaʻu ki he meʻa ʻokú ke ʻilo ʻoku totonú, ʻe tokoni ia kiate ia ke ne “puke ki he moʻui moʻoni.”—1 Kolinitō 7:13-16; 1 Tīmote 6:19.
39, 40. Ko e hā ʻa e ngaahi ʻulungaanga ʻoku hā ʻi he Taitusi 2:4, 5, ʻoku nau ʻai ʻa e uaifí ke mātuʻaki mahuʻinga ʻo ʻikai ki hono husepānití pē, kae toe pehē foki kia Sihova?
39 Tatau ai pē pe ko e kau tui pe taʻetui ʻa e ngaahi husepāniti ʻo e ngaahi uaifi Kalisitiané, ʻoku fakalototoʻaʻi mai ʻe he Tohitapú ʻa e ngaahi uaifí “ke nau ʻofa ki honau ngaahi husepaniti, pea ʻofa ki heʻenau fānau, ke nau angafakapotopoto, ke nau angamaʻa, ke nau ngāue ʻi ʻapi, ke nau angalelei, ke nau anganofo ki honau ngaahi husepaniti naʻa lauʻikovi ʻa e folofola ʻa e ʻOtua.”—Taitusi 2:4, 5.
40 Kapau ko koe, ko e uaifi, te ke fai ʻeni ki he lelei taha ʻo hoʻo malavá, ʻe toki ʻofeina loloto koe, ʻo ʻikai ʻe ho husepānití pē, ka ʻe toe pehē foki mo Sihova ko e ʻOtuá.
[Fehuʻi ki he Ako]
[Fakatātā ʻi he peesi 57]
“Ko e uaifi fita . . . ko hono mahuʻinga ʻoku hulu ʻi he makakula koloa.”—Palōvepi 31:10.
[Fakatātā ʻi he peesi 64]
Ko e ongo fefine ʻi he moʻui ʻa Samisoní
