‘I he tu‘unga ko ha tangata haohaoa, na‘e ‘ikai ke hokosia ‘e Sīsū ‘a e ngaahi faingata‘a‘ia mo e hoha‘a lahi na‘e hokosia ‘e he ni‘ihi kehé. Neongo ia na‘á ne fakahāhā ‘a e ongo‘i loloto ki he kakaí. Na‘á ne loto-lelei ke tuku atu ‘a ia tonu ma‘a kinautolu, ke fai ‘a e ngaahi me‘a ‘oku fakalaka atu ia ‘i he me‘a na‘e hā ngali fiema‘ú. ‘Io, na‘e ue‘i ia ‘e he manava‘ofá ke tokoni‘i ‘a e ni‘ihi kehé.

Na‘e ongo‘i ‘e he kakai ta‘umotu‘a kehekehe​—kei si‘i mo ta‘umotu‘a—​‘e lava ke nau fakaofiofi kia Sīsū koe‘uhi na‘e ‘ikai ke ne anga-ta‘efakakaume‘a pe fiemahu‘inga. ‘I hono ‘ilo‘i ‘e he kakaí na‘e mahu‘inga‘ia fakafo‘ituitui ‘a Sīsū ‘iate kinautolú, na‘e ‘ai ai ke nau ongo‘i fiemālie ‘i he‘ene ‘i aí.

Na‘e hanga ma‘u pē ‘a Sīsū ki he‘ene Tamaí ‘i he lotu tōtōivi, ‘i he taimi na‘á ne tokotaha aí pea mo e taimi na‘á ne kau fakataha ai mo e kau lotu mo‘oní. Na‘á ne lotu ‘i he ngaahi taimi lahi, kae ‘ikai ko e taimi kaí pē. Na‘á ne lotu ke fakamālō ki he‘ene Tamaí, ke fakahīkihiki‘i ia, pea ke kumi ki He‘ene tatakí ki mu‘a ke ne fai ha ngaahi fili mafatukituki.

‘I he taimi na‘á ne mei lava ai ‘o ma‘u ha taimi mālōloó, na‘e kei fakamu‘omu‘a pē ‘e Sīsū ‘a e fiema‘u ‘a e ni‘ihi kehé. Na‘e ‘ikai ke ne ma‘u ha fakakaukau siokita. ‘I he me‘á ni, ‘okú ne ‘omai ai ha fa‘ifa‘itaki‘anga ‘e lava ke tau muimui ofi ki ai.

Na‘e fai ‘e Sīsū ‘a e me‘a lahi ange ‘i hono ako‘i pē ‘a e fiema‘u ke fa‘a fakamolemolé​—na‘á ne fakahāhā ‘a e fakamolemolé ‘i he‘ene feangainga mo ‘ene kau ākongá mo e ni‘ihi kehé.

Na‘e tomu‘a tala ko e tokolahi taha ‘o e kau Siú te nau fakafisi ke tali ‘a e Mīsaiá pea ‘e tāmate‘i ia ‘e hono ngaahi filí. Ko ia na‘e mei lava ke fai pē ‘e Sīsū ha me‘a si‘isi‘i pē ma‘á e kakaí. ‘I hono kehé, na‘á ne pouaki faivelenga ‘a e lotu mo‘oní. Na‘á ne fokotu‘u ha fa‘ifa‘itaki‘anga ‘o e faivelengá ki he kotoa hono kau muimui ‘oku nau fehangahangai mo e kakai ta‘emahu‘inga‘iá pe na‘a mo e fakafepakí.

Na‘e mā‘olunga ange ‘a Sīsū ‘i he fa‘ahinga ta‘ehaohaoa ‘o e tangatá ‘i he ngaahi founga ta‘efa‘alaua, hangē ko e ‘iló mo e potó. ‘Oku ‘ikai ha veiveiua ko hono tu‘unga haohaoá na‘á ne ‘oange kiate ia ‘a e ngaahi malava fakaesino mo faka‘atamai na‘e fakalaka atu ia ‘i ha toe taha. Neongo ia na‘á ne fakafeangai anga-fakatōkilalo ki he ni‘ihi kehé.

Na‘e fakahāhā ma‘u pē ‘e Sīsū ‘a e anga-kātakí ki he‘ene kau ‘apositoló mo e ni‘ihi kehé ‘i he taimi na‘e ‘ikai ke nau fa‘ifa‘itaki ai kiate iá pē ngāue‘aki ‘a e me‘a na‘á ne lea‘akí. Na‘á ne toutou fakamatala‘i anga-kātaki ‘a e ngaahi lēsoni na‘a nau fiema‘ú koe‘uhi ke nau lava ‘o ‘unu‘unu ofi ange ai kia Sihova.