1-3. Ko e hā kuo tokoni ki he tupu ʻa e tokolahi ʻo e ngaahi fāmili mātuʻa-taʻehoá, pea ʻoku anga-fēfē hono uesia ʻo e faʻahinga ʻoku nau kau ki aí?

 KO E ngaahi fāmili mātuʻa-tahá kuo ui ia ʻi he ʻIunaite Seteté “ko e sīpinga fāmili tupu vave tahá.” ʻOku meimei tatau ʻa e tuʻungá ʻi he ngaahi fonua lahi kehé. Ko ha lēkooti ʻo e tokolahi ʻo e ngaahi vete malí, ngaahi liʻakí, ngaahi māvaé, mo e ngaahi fāʻele tuʻutāmakí kuo ʻi ai hono ngaahi nunuʻa kuo aʻu mamaʻo atu ki he laui miliona ʻo e ngaahi mātuʻá mo e fānaú.

² “Ko ha uitou taʻu 28 au mo ha fānau ʻe toko ua,” ko e tohi ia ʻa ha faʻē taʻehoa ʻe taha. “ʻOku ou mātuʻaki loto-mafasia he ʻoku ʻikai te u loto ke ʻohake ʻeku fānaú taʻeʻiai ha tamai. ʻOku hā ngali ʻoku ʻikai naʻa mo ha taha ia ʻe tokanga mai fekauʻaki mo au. ʻOku sio mai ʻa ʻeku fānaú ki heʻeku faʻa tangí pea ʻoku uesia ai kinautolu.” Tuku kehe ʻa e tau fangatua mo e ngaahi ongoʻi ko ia hangē ko e ʻitá, halaiá, mo e taʻelatá, ko e tokolahi taha ʻo e ngaahi mātuʻa taʻehoá ʻoku nau fehangahangai mo e pole ʻo hono maʻu fakatouʻosi ha ngāue ʻi tuʻa mei he ʻapí pea mo hono fakahoko ʻa e ngaahi fatongia fakaʻapí. Naʻe pehē ʻe ha taha: “Ko e hoko ko ha mātuʻa taʻehoá ʻoku hangē ia ko ha tokotaha pōtoʻi hikó. Hili ʻa e māhina ʻe ono ʻo hono fai iá, kuo iku ai ʻo ke malava ke hiko ʻaki ʻi he taimi pē taha ha foʻi pulu ʻe fā. Ka ʻi he taimi pē ko ia ʻokú ke malava ai ke fai peheé, ʻoku lī atu ʻe ha taha ia ha foʻi pulu foʻou kiate koe!”

³ Ko e fānau iiki ʻi he ngaahi fāmili mātuʻa-taʻehoá ʻoku nau faʻa maʻu ʻa e ngaahi fāinga pē ʻanautolu. ʻE pau nai ke nau fekuki mo e ngaahi ongoʻi lahi ko e tupu mei he mavahe taʻeʻamanekina pe mate ʻa ha mātuʻa. Ki he kau talavou  tokolahi ko e ʻikai ʻi ai ha mātuʻá ʻoku hā ngali ke ne maʻu ha ola taʻepau lahi.

4. ʻOku anga-fēfē ʻetau ʻiloʻi ʻoku tokanga ʻa Sihova fekauʻaki mo e ngaahi fāmili mātuʻa-taʻehoá?

⁴ Naʻe ʻi he taimi ʻo e Tohitapú ʻa e ngaahi fāmili mātuʻa-tahá. ʻOku toutou lave ʻa e ngaahi Konga Tohitapú ki he “tamai mate” pea mo e “uitou.” (Ekisoto 22:22; Teutalonome 24:​19-21; Siope 31:​16-22) Naʻe ʻikai ke taʻetokanga ʻa Sihova ko e ʻOtuá ki heʻenau faingataʻaʻiá. Naʻe ui ʻe he tokotaha-tohi-sāmé ʻa e ʻOtuá “ko e tamai ki he tamai mate, mo e fakamāu ʻoku tokanga ki he fefine uitou.” (Sāme 68:5) Ko e moʻoni, ʻoku maʻu ʻe Sihova ʻa e tokanga tatau ki he ngaahi fāmili mātuʻa-taha he ʻaho ní! Ko e moʻoni, ʻoku ʻomai ʻe heʻene Folofolá ʻa e ngaahi tefitoʻi moʻoni ʻa ia ʻe lava ke ne tokoniʻi kinautolu ke nau lavameʻa.

5. Ko e hā ʻa e palopalema kuo pau ke ʻuluaki fehangahangai mo e ngaahi mātuʻa taʻehoá?

⁵ Fakakaukau angé ki he ngāue ʻo hono fakalele ʻo ha ʻapi. “ʻOku ʻi ai ʻa e taimi lahi ʻokú ke fakaʻamu ai naʻe ʻi ai ha tangata ʻi he ʻapí,” ko e fakahaaʻi ia ʻe ha tokotaha naʻe vete, “hangē ko e taimi ko ia ʻoku kamata ke longoaʻa ai ʻa hoʻo kaá pea ʻikai ke ke ʻiloʻi pe ko e tupu mei he hā.” Ko e kau tangata kuo nau vete ki mui ní pe hoko ʻo uitoú te nau puputuʻu tatau nai ʻi he lahi fau ʻo e ngaahi ngāue fakafāmili kuo pau ke nau fai he taimi ko ení. Ki he fānaú, ko e moveuveu ʻi he ʻapí ʻoku tānaki ia ki he ngaahi ongoʻi ʻo e ʻikai ke tuʻumaʻu mo ʻikai ke malu.

6, 7. (a) Ko e hā ʻa e faʻifaʻitakiʻanga lelei naʻe fokotuʻu ʻe he “uaifi lavameʻa” ʻo e Palovepí? (e) ʻOku anga-fēfē ʻa e tokoni ʻa e tōtōivi fekauʻaki mo e ngaahi fatongia fakaʻapí ʻi he ngaahi ʻapi mātuʻa-taʻehoá?

⁶ Ko e hā ʻoku lava ke tokoní? Fakatokangaʻi ʻa e faʻifaʻitakiʻanga ʻoku fokotuʻu ʻe he “uaifi lavameʻá” ʻoku fakamatalaʻi ʻi he Palovepi 31:​10-31 (NW). Ko e lahi ʻo ʻene ngaahi lavameʻá ʻoku ʻiloa ia​—ko e fakatau mai, fakatau atu, tuitui, feimeʻatokoni, fakatau mai ha konga kelekele, ngoue, mo hono fakalele ʻo ha pisinisi. Ko ʻene fakapulipulí? Naʻá ne tōtōivi, ʻi he ngāue ʻo aʻu ki he poʻulí mo e tuʻu hake pongipongia  ke kamata ʻene ngaahi ngāué. Pea naʻá ne fokotuʻutuʻu maau lelei, ʻi hono vahe atu ʻa e niʻihi ʻo e ngaahi ngāué pea ʻi hono ngāueʻaki ʻa hono ongo nimá tonu ke tokangaʻiʻaki ʻa e niʻihi kehé. ʻOku ʻikai ha ofo ʻi heʻene maʻu ʻa e fakamāloó!

⁷ Kapau ko ha mātuʻa taʻehoa koe, tokanga fekauʻaki mo ho ngaahi fatongia fakaeʻapí. Kumi ʻa e fiemālié ʻi he ngāue peheé, he ʻoku fai ʻe he meʻá ni ʻa e meʻa lahi ke tānaki ki he fiefia ʻa hoʻo fānaú. Kae kehe, ʻoku mātuʻaki fiemaʻu ʻa e palani mo e fokotuʻutuʻu lelei. ʻOku pehē ʻe he Tohitapú: “Ko e ngaahi tuʻutuʻuni [“palani,” NW] ʻa e faʻa ngaue ʻoku iku pe ki he maʻu ha meʻa.” (Palovepi 21:5) Naʻe fakahaaʻi ʻe he tamai taʻehoa ʻe taha: “ʻOku ou hehema ke ʻoua ʻe fakakaukau fekauʻaki mo e ngaahi houa kaí kae ʻoua ke u fiekaia.” Ka ko e ngaahi houa kai kuo palaní ʻoku ngalingali ʻe fakatupu moʻuilelei mo fakamānako ange ia ʻi he ngaahi houa kai ʻoku ngaohi fakavavé. Kuo pau ke ke toe ako ki ha ngaahi ngāue fakaeʻapi foʻou. ʻI he kumi faleʻi ki ha ngaahi kaumeʻa potó, ngaahi tohi fakahinohino ngāué, mo e kau palōfesinale fietokoní, kuo malava ai ʻa e ngaahi faʻē taʻehoa ʻe niʻihi ke fai ʻa e vali, ngāue fakapalama, mo e fanga kiʻi ngāue faingofua ʻi hono ngaahi ʻo e meʻalelé.

8. ʻOku lava fēfē ke tokoni ʻa e fānau ʻa e ngaahi mātuʻa taʻehoá ʻi he ʻapí?

⁸ ʻOku lelei ke kole ki he fānaú ke nau tokoni? Naʻe fakaʻuhinga ha faʻē taʻehoa ʻe taha: “ʻOkú ke loto ke huhuʻi ʻa e ʻikai ʻi ai ʻa e mātuʻa ʻe tahá ʻaki hono ʻai ke faingofua ki he fānaú.” ʻE mahinongofua nai ia kae mahalo pē ʻoku ʻikai ke hoko maʻu pē ia ko e tuʻunga lelei taha ki he kiʻi tamá. Ko e kau talavou manavahē-ʻOtua ʻo e taimi ʻo e Tohitapú naʻe vaheʻi kiate kinautolu ʻa e fanga kiʻi ngāue fakaʻapi feʻungamālie. (Senesi 37:2; Hiva o e Hiva 1:6) Ko ia, neongo ʻa e tokanga ke ʻoua ʻe fakamafasiaʻi hoʻo fānaú, ʻe fakapotopoto ke vaheʻi ange kiate kinautolu ʻa e ngaahi ngāue hangē ko hono tokangaʻi ke maʻa ʻa e ʻū ipú pea tauhi ke maʻa honau lokí. Ko e hā ʻoku ʻikai ke fai fakataha ai ʻa e fanga kiʻi ngāue fakaʻapi ʻe niʻihi? ʻE lava ke hoko eni ʻo mātuʻaki fakafiefia.

9. Ko e hā ʻoku faʻa fehangahangai ai ʻa e ngaahi faʻē taʻehoá mo e ngaahi faingataʻa fakaepaʻangá?

⁹ Ko e tokolahi taha ʻo e ngaahi mātuʻa taʻehoá ʻoku nau ʻilo ʻoku faingataʻa ke aʻusia ʻenau ngaahi fiemaʻu fakapaʻangá, pea ko e ngaahi faʻē kei siʻi taʻemalí ʻoku faʻa tautefito ʻenau maʻu ha taimi faingataʻá. a ʻI he ngaahi fonua ʻa ia ʻoku ala maʻu ai ʻa e tokoni fakapuleʻangá, ʻe fakapotopoto nai ke nau kiʻi ngāueʻaki ia, kae ʻoua ke lava ʻo nau maʻu ha ngāue. ʻOku fakaʻatā ʻe he Tohitapú ʻa e kau Kalisitiané ke nau fakaʻaongaʻi ʻa e ngaahi tokonaki peheé ʻi he taimi ʻoku fiemaʻu aí. (Loma 13:​1, 6) Ko e kau uitoú mo e faʻahinga kuo veté ʻoku nau fehangahangai mo e ngaahi pole meimei tatau. Ko e tokolahi, kuo fakamālohiʻi ke nau toe hū ʻo ngāue hili ʻa e ngaahi taʻu ʻo e tauhi ʻapí, ʻoku faʻa lava ke nau maʻu pē ha ngāue totongi māʻulalo. ʻOku lava ʻa e niʻihi ke fakaleleiʻi ʻenau founga moʻuí ʻaki ʻenau hū ki he ngaahi polokalama ako ngāue pe ngaahi koosi fakaako taimi nounou.

10. ʻOku lava fēfē ke fakamatalaʻi ʻe ha faʻē taʻehoa ki heʻene fānaú ʻa e ʻuhinga kuo pau ai ke ne kumi ha ngāue fakamāmaní?

¹⁰ ʻOua ʻe ʻohovale kapau ʻoku ʻikai ke fiefia ʻa hoʻo fānaú ʻi he taimi ʻokú ke kumi ngāue aí, pea ʻoua ʻe ongoʻi halaia. ʻI hono kehé, fakamatalaʻi kiate kinautolu ʻa e ʻuhinga kuo pau ai ke ke ngāué, pea tokoniʻi kinautolu ke nau mahinoʻi ʻoku fiemaʻu koe ʻe Sihova ke ke tokonaki maʻa kinautolu. (1 Timote 5:8) Faai atu pē, ko e tokolahi taha ʻo e fānaú te nau feʻunuʻaki. Kae kehe, feinga ke fakamoleki ʻa e taimi lahi mo kinautolu fakatatau ki hono fakaʻatā koe ki ai ʻe hoʻo taimi-tēpile femoʻuekiná. Ko e tokanga anga-ʻofa peheé ʻe toe lava ke tokoni ia ke fakasiʻisiʻi ʻa e maongo ʻo ha ngaahi fakangatangata fakaepaʻanga pē ʻoku hokosia nai ʻe he fāmilí.​—Palovepi 15:​16, 17.

11, 12. Ko e hā ʻa e ngaahi fakangatangata kuo pau ke tauhi ʻe he ngaahi mātuʻa taʻehoá, pea ʻoku lava fēfē ke nau fai pehē?

¹¹ ʻOku fakaenatula pē ki he ngaahi mātuʻa taʻehoá ke tautefito ʻenau ofi ki heʻenau fānaú, neongo ia kuo pau ke fai ʻa e tokanga ki he ngaahi fakangatangata kuo vaheʻi ʻe he ʻOtuá ʻi he vahaʻa ʻo e ngaahi mātuʻá mo e fānaú ke ʻoua ʻe taʻelavameʻa. Ko e fakatātaá, ʻoku lava ke malanga hake ha ngaahi faingataʻa mafatukituki kapau ʻoku ʻamanekina ʻe ha faʻē taʻehoa ʻa ʻene tamasiʻí ke ne fua ʻa e ngaahi fatongia ʻo e tangata ʻo e ʻapí pe fai ki heʻene taʻahiné ʻo hangē ko ha taha ke tala ki ai ʻa e ngaahi meʻa fakapulipulí, ʻo fakamafasiaʻi ʻa e taʻahiné ʻaki ʻa e ngaahi palopalema tefitó. Ko e fai peheé ʻoku ʻikai ke feʻungamālie ia, ʻoku fakalotomafasia, pea mahalo ʻoku fakapuputuʻu ia ki ha kiʻi tama.

¹² Fakapapauʻi ki hoʻo fānaú ko koe, ʻi ho tuʻunga ko e mātuʻá, te ke tokangaʻi kinautolu​—ʻo ʻikai ko e tafaʻaki ʻe tahá. (Fakafehoanaki mo 2 Kolinito 12:14.) ʻI he taimi ʻe niʻihi, te ke  fiemaʻu nai ai ha faleʻi pe poupou. Kumi ia mei he kau mātuʻa Kalisitiané pe mahalo mei he kau fefine matuʻotuʻa Kalisitiané, ʻo ʻikai mei hoʻo fānau īkí.​—Taitusi 2:3.

13. Ko e hā ʻa e palopalema fekauʻaki mo e akonakí ʻe fehangahangai nai mo ha faʻē taʻehoa?

¹³ ʻE siʻi nai ʻa e faingataʻa ʻe maʻu ʻe ha tangata ʻi he vakai fakamātoato ki ai ko ha tokotaha fai akonakí, ka ʻe maʻu nai ʻe ha fefine ha ngaahi palopalema ʻi he fekauʻaki mo e meʻá ni. Ko e lau eni ʻa ha faʻē taʻehoa ʻe taha: “Ko ʻeku ongo tamaiki tangatá ʻokú na maʻu ʻa e sino fakaetangata lahi mo e leʻo fakaetangata lahi. ʻI he taimi ʻe niʻihi ʻoku faingataʻa ke ʻikai leʻo veiveiua pe vaivai ʻi he fakahoa atu kiate kinauá.” ʻIkai ko ia pē, ʻokú ke kei mamahi pē nai ʻi he mate ʻa ha hoa ʻofeina, pe mahalo pē ʻokú ke ongoʻi halaia pe ʻita ʻi ha movete ʻa ha nofo mali. Kapau ʻoku ʻi ai ha fevahevaheʻaki ʻi hono tauhi ʻo e fānaú, ʻokú ke manavahē nai ʻi ha saiʻia ange ʻa hoʻo tamá ke nofo mo ho hoa ki muʻá. ʻOku lava ke ʻai ʻe he ngaahi tuʻunga peheé ke faingataʻa ke fakahoko ha akonaki mafamafatatau.

14. ʻOku lava fēfē ke tauhi maʻu ʻe he ngaahi mātuʻa taʻehoá ha vakai mafamafatatau fekauʻaki mo e akonakí?

¹⁴ ʻOku pehē ʻe he Tohitapú ko e “tamasiʻi ʻoku tukuange noa ʻoku ne fakamaaʻi ʻene faʻe.” (Palovepi 29:15) ʻOkú ke maʻu ʻa e poupou ʻa Sihova ko e ʻOtuá ʻi hono fai mo ʻai ke mālohi ʻa e ngaahi tuʻutuʻuni ʻi he fāmilí, ko ia ʻoua ʻe tukulolo ki he halaiá, loto-laveá, pe manavaheé. (Palovepi 1:8) ʻOua ʻaupito ʻe fakangaloku ʻa e ngaahi tefitoʻi moʻoni faka-Tohitapú. (Palovepi 13:24) Feinga ke fakaʻatuʻi, huʻufataha, mo tuʻumaʻu. Faai atu pē, ko e tokolahi taha ʻo e fānaú te nau tali ia. Neongo ia, te ke loto ke fakakaukauʻi ʻa e ngaahi ongoʻi ʻa hoʻo fānaú. Ko e lau eni ʻa ha tamai taʻehoa ʻe taha: “Ko ʻeku akonakí naʻe pau ke fakavaivaiʻi ia ʻaki ʻa e mahinó koeʻuhi ko e fakaʻohovale ʻa e mole ʻenau faʻeé. ʻOku ou talanoa kiate kinautolu ʻi he faingamālie kotoa pē. ʻOku mau maʻu ʻa e ‘ngaahi mōmeniti fekoekoeʻi’ ʻi he taimi ʻoku mau teuteu ai ʻa e kai efiafí. Ko e taimi leva ia ʻoku nau falala moʻoni mai ai kiate aú.”

15. Ko e hā ʻoku totonu ke fakaʻehiʻehi mei ai ha mātuʻa kuo vete ʻi he taimi ʻokú ne lea ai fekauʻaki mo e hoa ki muʻá?

 ¹⁵ Kapau kuó ke vete, ʻoku ʻikai ha meʻa lelei ʻoku fakahoko ʻi hono fakavaivaiʻi ʻa e ʻapasia ki ho hoa ki muʻá. Ko e fekeʻikeʻi fakaemātuʻá ʻoku fakamamahi ia ki he fānaú pea ʻe faifai pē ʻo ne fakavaivaiʻi ʻenau ʻapasia kiate kimouá fakatouʻosi. Mei hení, fakaʻehiʻehi mei hono fai ʻa e ngaahi lea fakatupu loto-lavea hangē ko ení: “ʻOkú ke hoko teteʻe pē ki hoʻo tamaí!” Ko e hā pē ha mamahi kuo fakatupunga kiate koe ʻe ho hoa ki muʻá, ko iá ʻoku kei hoko pē ko e mātuʻa ʻa hoʻo tamá, ʻa ia ʻokú ne fiemaʻu ʻa e ʻofa, tokanga, mo e akonaki fakatouʻosi ʻa e ongo mātuʻá. b

16. Ko e hā ʻa e ngaahi fokotuʻutuʻu fakalaumālie ʻoku totonu ke hoko ko ha konga tuʻumaʻu ʻo e akonakí ʻi ha ʻapi mātuʻa-taʻehoa?

¹⁶ Hangē ko ia naʻe lāulea ki ai ʻi he ngaahi vahe ki muʻá, ko e akonakí ʻoku kau ki ai ʻa e akoʻi mo e fakahinohino, ʻo ʻikai ko e tautea pē. ʻOku lava ke kalofi ʻa e ngaahi palopalema lahi ʻaki ha polokalama lelei ʻo e akoʻi fakalaumālie. (Filipai 3:16) Ko hono maʻu maʻu pē ʻa e ngaahi fakataha faka-Kalisitiané ʻoku mātuʻaki fiemaʻu ia. (Hepelu 10:​24, 25)  ʻOku pehē pē mo hono maʻu ha ako Tohitapu fakauike fakafāmilí. Ko e moʻoni, ʻoku ʻikai faingofua ke tauhi ke hokohoko atu ha ako pehē. “Hili ʻa e ngāue ʻo e ʻahó, ʻokú ke fiemaʻu moʻoni ke mālōlō,” ko e lau ia ʻa ha faʻē tokanga ʻe taha. “Ka ʻoku ou teuʻi fakaʻatamai au ke ako mo ʻeku taʻahiné, ʻi he ʻiloʻi ko ha meʻa ia ʻoku fiemaʻu ke fai. ʻOku fiefia moʻoni ia ʻi heʻema ako fakafāmilí!”

17. Ko e hā ʻoku lava ke tau ako mei hono ʻohake lelei ʻo e takanga ʻo Paula ko Tīmoté?

¹⁷ Ko e takanga ʻo e ʻapositolo ko Paulá ko Tīmoté naʻe hā mahino naʻe fai ʻa hono akoʻi ʻi he ngaahi tefitoʻi moʻoni faka-Tohitapú ʻe heʻene faʻeé mo ʻene kui-fefiné​—ka ʻoku hā mahino naʻe ʻikai ko ʻene tamaí. Neongo ia, ko ha Kalisitiane tuʻu-ki-muʻa moʻoni ē naʻe hoko ki ai ʻa Tīmoté! (Ngāue 16:​1, 2; 2 Timote 1:5; 3:​14, 15) ʻOku lava ke ke ʻamanaki tatau ki ha ngaahi ola lelei ʻi hoʻo feinga ke ʻohake hoʻo fānaú “ʻi he akonaki mo e fakatonutonu fakaʻatamai ʻa Sihová.”​—Efeso 6:4, NW.

18, 19. (a) ʻOku lava fēfē ke hā ʻa e taʻelatá tonu ʻi ha mātuʻa taʻehoa? (e) Ko e hā ʻa e faleʻi ʻoku fai ke tokoni ki hono mapuleʻi ʻo e ngaahi holi fakakakanó?

¹⁸ Naʻe māpuhoi ha mātuʻa taʻehoa ʻe taha: “ʻI heʻeku haʻu ki ʻapi ʻo sio ʻoku ou toko tahá, pea tautefito ʻi he hili ʻa e mohe ʻa e fānaú, ʻoku ʻākilotoa moʻoni au ʻe he taʻelatá.” ʻIo,  ko e taʻelatá ʻoku faʻa hoko ko e palopalema lahi taha ia ʻoku fehangahangai mo ha mātuʻa taʻehoa. ʻOku fakaenatula pē ke ʻunaloto ki he feohi mo e ngaahi fekoekoeʻi māfana ʻo e nofo malí. Ka ʻoku totonu nai ke feinga ha tokotaha ke solova ʻa e palopalema ko ení ʻo tatau ai pē pe ko e hā? ʻI he ʻaho ʻo e ʻapositolo ko Paulá, naʻe fakaʻatā ai ʻe he kau uitou kei siʻi ʻe niʻihi “ʻenau ngaahi ongo mālohi fakaefehokotaki fakasinó [ke] hoko mai ia ʻo tuʻu ʻi honau vahaʻa pea mo e Kalaisí.” (1 Timote 5:​11, 12, NW) Ko hono fakaʻatā ʻa e ngaahi holi fakakakanó ke ne ʻufiʻufi ʻa e ngaahi meʻa fakalaumālié ʻe hoko ia ʻo fakatupu maumau.​—1 Timote 5:6.

¹⁹ Naʻe pehē ʻe ha tangata Kalisitiane: “Ko e ngaahi fakaʻaiʻai fakaefehokotaki fakasinó ʻoku mālohi ʻaupito, ka ʻe lava ke ke mapuleʻi kinautolu. ʻI he taimi ʻoku hoko mai ai ha fakakaukau ki ho ʻatamaí, kuo pau ke ʻoua te ke nōfoʻi ai. Kuo pau ke ke toʻo ia. ʻOku toe tokoni ke ke fakakaukau fekauʻaki mo hoʻo tamá.” ʻOku faleʻi mai ʻa e Folofola ʻa e ʻOtuá: ‘ʻAi ke mate ʻa e ngaahi kupu ʻo homou sinó ʻi he fekauʻaki mo e holi ki he fehokotaki fakasinó.’ (Kolose 3:​5, NW) Kapau naʻá ke feinga ke ʻai ke mate hoʻo holi ki he meʻakaí, te ke lau ʻa e ngaahi makasini ʻoku fakaʻaliʻali mai ai ʻa e ngaahi fakatātā ʻo e ngaahi meʻakai ifó, pe te ke feohi mo e kakai ʻoku nau faʻa talanoa fekauʻaki mo e meʻakaí? ʻIkai ʻaupito! Ko e meʻa tatau pē ʻoku hoko moʻoni fekauʻaki mo e ngaahi holi fakakakanó.

20. (a) Ko e hā ʻa e fakatuʻutāmaki ʻoku tatali mai ki he faʻahinga ʻoku nau faisō mo e faʻahinga taʻetuí? (e) Kuo anga-fēfē ʻa e faitau mo e taʻelatá ʻa e kakai taʻehoa fakatouʻosi ʻi he ʻuluaki senitulí pea mo e ʻaho ní?

²⁰ Kuo kau ʻa e kau Kalisitiane ʻe niʻihi ʻi he ngaahi faisō mo e faʻahinga taʻetuí. (1 Kolinito 7:39) Naʻe solova ʻe he meʻa ko iá ʻenau palopalemá? ʻIkai. Naʻe fakatokanga mai ha fefine Kalisitiane naʻe vete: “ʻOku ʻi ai ʻa e meʻa ʻe taha ʻoku kovi lahi ange ia ʻi he hoko ʻo taʻemalí. Ko e hoko ʻo mali mo e tokotaha halá!” Ko e kau uitou Kalisitiane ʻi he ʻuluaki senitulí ʻoku ʻikai ha veiveiua naʻe ʻi ai honau ngaahi taimi taʻelata, ka ko e faʻahinga fakapotopotó naʻa nau hanganaki femoʻuekina ʻi hono ‘fakaafe ha ʻāunofo, fufulu ʻa e vaʻe ʻo e kau lotú, mo tokoniʻi ha kakai kuo moʻua ʻi ha mamahi.’  (1 Timote 5:10) Ko e kau Kalisitiane loto-tōnunga ʻi he ʻaho ní ʻa ia kuo nau tatali ʻi he ngaahi taʻu lahi ke maʻu ha hoa manavahē-ʻOtuá kuo nau hanganaki femoʻuekina meimei tatau. Ko ha uitou Kalisitiane taʻu 68 naʻá ne kamata ʻaʻahi ki he kau uitou kehé ʻi ha taimi pē naʻá ne hoko ai ʻo taʻelatá. Naʻá ne pehē: “Naʻá ku ʻiloʻi ko hono fai ʻa e ngaahi ʻaʻahi ko ení, tauhi ʻeku ngāue fakaeʻapí mo tokangaʻi ʻa hoku tuʻunga fakalaumālié ʻoku ʻikai ai ke u maʻu ha taimi ke taʻelata ai.” Ko hono akoʻi ʻa e niʻihi kehé fekauʻaki mo e Puleʻanga ʻo e ʻOtuá ko ha ngāue ia ʻoku tautefito ʻa ʻene ʻaonga mo leleí.​—Mātiu 28:​19, 20.

21. Ko e hā ʻa e founga ʻoku lava ke tokoni ai ʻa e lotú mo e feohi leleí ki hono ikuʻi ʻo e taʻelatá?

 ²¹ Ko hono moʻoní, ʻoku ʻikai ha faitoʻo fakaemana ki he taʻelatá. Ka ʻe lava ke kātekina ia ʻaki ʻa e mālohi meia Sihová. ʻOku hoko mai ʻa e mālohi peheé ʻi he taimi ʻoku hoko ai ha Kalisitiane ʻo “kīvoi ʻi he ngaahi hū mo e ngaahi lotu ʻi he poó mo e ʻahó.” (1 Timote 5:​5, NW) Ko e ngaahi huú ko e ngaahi kole fakamātoato ia, ʻio, ko ha kōlenga ki ha tokoni, mahalo ʻaki ʻa e ngaahi kalanga mālohi mo e ngaahi loʻimata. (Fakafehoanaki mo Hepelu 5:7.) Ko hono lilingi ho lotó kia Sihova ʻi he “poó mo e ʻahó” ʻe lava ke tokoni moʻoni ia. ʻIkai ngata aí, ko e feohi leleí ʻoku lava ke ne fai ʻa e meʻa lahi ke fakafonu ʻa e tuʻunga taʻeʻaonga ʻo e taʻelatá. Fakafou ʻi he feohi leleí, ʻoku lava ai ha taha ke ne maʻu ʻa e “lea lelei” ʻo e fakalototoʻa naʻe fakamatalaʻi ʻi he Palovepi 12:25.

22. Ko e hā ʻa e ngaahi meʻa ke fakakaukau ki ai ʻe tokoni ia ʻi he taimi ʻoku malanga hake ai ʻi he taimi ki he taimi ʻa e taʻelatá?

²² Kapau ʻe malanga hake ʻa e ngaahi ongoʻi taʻelatá ʻi he taimi ki he taimi​—hangē ko ia ʻe ngalingali hokó​—manatuʻi ʻoku ʻikai ha taha ʻe moʻui haohaoa. Ko e moʻoni, “ko e feohiʻanga kotoa ʻo homou fanga tokouá” ʻoku nau faingataʻaʻia ʻi ha tuʻunga. (1 Pita 5:9, NW) Fakaʻehiʻehi mei he nōfoʻi ʻi he kuohilí. (Koheleti 7:10) Fakamanatu ʻa e ngaahi meʻa ʻaonga ʻokú ke fiefia aí. Hiliō he meʻa kotoa, fakapapauʻi ke tauhi ʻa hoʻo anga-tonú pea ke ʻai ʻa e loto ʻo Sihová ke fiefia.​—Palovepi 27:11.

23. Ko e hā ʻa e fatongia ʻoku maʻu ʻe he kaungā Kalisitiané ki he ngaahi mātuʻa taʻehoa ʻi he fakatahaʻangá?

²³ Ko e poupou mo e tokoni ʻa e kaungā Kalisitiané ʻoku mahuʻinga taʻehanotatau. ʻOku pehē ʻi he Semisi 1:27: “Ko eni ia ʻa e toʻonga lotu ʻoku maʻa mo taʻe hano ʻuli ʻi he ʻafio ʻa e ʻOtua ko ʻetau Tamai, ʻa ʻete aʻahi ki he faʻahinga matuʻamate mo e kau uitou ʻi heʻenau mamahi.” ʻIo, ʻoku fakafatongiaʻaki ʻa e kau Kalisitiané ke nau tokoniʻi ʻa e ngaahi fāmili mātuʻa-taʻehoá. Ko e hā ʻa e ngaahi founga ʻaonga ʻe niʻihi ʻe lava ke fai nai ai ʻa e meʻá ni?

24. ʻI he ngaahi founga fē ʻe lava ke tokoniʻi ai ʻa e ngaahi fāmili mātuʻa-taʻehoa masivá?

²⁴ ʻOku lava ke fai ha tokoni fakamatelie. ʻOku pehē ʻe he  Tohitapú: “ʻIlonga ʻa ia ʻoku ne maʻu ʻa e meʻa ʻo mamani, mo ne sio ki hono tokoua ʻoku ne masiva, ka ne taʻofi hono fatu meiate ia, pea ʻoku nofo fēfē ʻi he toko taha ko ia ʻa e ʻofa ki he ʻOtua?” (1 Sione 3:17) Ko e muʻaki foʻi lea faka-Kalisi ki he “sio” ʻoku ʻuhingá, ʻoku ʻikai ko ha kiʻi hila fāinoa pē, ka ko ha sio fakamamaʻu tuʻumaʻu. ʻOku fakahaaʻi ʻi he meʻá ni ʻe hoko nai ha Kalisitiane anga-ʻofa ʻo ʻuluaki maheni mo e ngaahi tuʻunga pea mo e ngaahi fiemaʻu ʻa ha fāmili. Mahalo pē ʻoku nau fiemaʻu ha paʻanga. ʻE fiemaʻu nai ʻe he niʻihi ʻa e tokoni ʻi he ngaahi monomono ʻo e ʻapí. Pe te nau houngaʻia pē nai ʻi hano fakaafeʻi ki ha houa kai pe ki ha fakatahataha fakasōsiale.

25. ʻE anga-fēfē hono fakahāhā ʻe he kaungā Kalisitiané ʻa e manavaʻofa ki he ngaahi mātuʻa taʻehoá?

²⁵ Tānaki atu ki ai, ʻoku pehē ʻi he 1 Pita 3:8: “Ke mou uouangataha, ke mou tauʻaki kaungāmamahi, ke mou feʻofaʻaki [fakatokoua], ke mou manavaʻofa.” Naʻe pehē ʻe ha mātuʻa taʻehoa ʻe taha ʻoku ʻi ai ʻene fānau ʻe toko ono: “ʻOku faingataʻa pea ʻi he taimi ʻe niʻihi ʻoku ou ongoʻi lōmekina. Kae kehe, ʻi he taimi ki he taimi ʻoku pehē mai ai ʻe ha taha ʻo e fanga tuongaʻané pe fanga tokouá kiate au: ‘Joan, ko e ngāue lelei ʻokú ke faí. ʻOku tuha ia mo ha ola lelei.’ ʻI hono ʻiloʻi pē ʻoku fakakaukau mai kiate koe ʻa e niʻihi kehé pea ʻoku nau tokanga maí ʻoku tokoni lahi ia.” ʻE tautefito nai ki he kau fefine Kalisitiane taʻumotuʻa angé ʻenau ola lelei ʻi hono tokoniʻi a e kau finemui ʻa ia ko e ngaahi mātuʻa taʻehoa kinautolú, ʻi he fanongo kiate kinautolu ʻi he taimi ʻoku nau maʻu ai ʻa e ngaahi palopalema ʻa ia ʻoku faingataʻa nai kiate kinautolu ke talanoa ki ai mo ha tangatá.

26. ʻOku lava fēfē ke tokoniʻi ʻe he kau tangata Kalisitiane matuʻotuʻá ʻa e fānau tamai maté?

²⁶ ʻOku lava ke tokoni ʻa e kau tangata Kalisitiané ʻi he ngaahi founga kehe. Naʻe pehē ʻe he tangata māʻoniʻoni ko Siopé: “Naaku fakahaofia . . . ae tamai mate, mo ia nae ikai hano tokoni.” (Siope 29:​12, PM) ʻOku mahuʻingaʻia lelei tatau ʻa e kau tangata Kalisitiane ʻe niʻihi ʻi he ʻahó ni ʻi he fānau tamai maté pea fakahaaʻi moʻoni ʻa e “ʻofa tuʻu ʻi he loto maʻa,” ʻo ʻikai maʻu ha ngaahi taumuʻa fufū. (1 Timote 1:5) ʻI he ʻikai liʻaki honau ngaahi fāmilí tonu, ʻoku nau fokotuʻutuʻu nai ʻi he taimi ki he taimi ke ngāue mo e faʻahinga kei  siʻi peheé ʻi he ngāue fakafaifekau faka-Kalisitiané pea toe fakaafeʻi nai kinautolu ke kau ʻi he ako pe ʻi he fakafiefia fakafāmilí. Ko e anga-ʻofa peheé ʻe lava lelei ʻaupito ke ne fakahaofi ha kiʻi tama tamai mate mei ha ʻalunga talangataʻa.

27. Ko e hā ʻa e poupou ʻe lava ke fakapapauʻi ʻe he ngaahi mātuʻa taʻehoá?

²⁷ Ko e moʻoni, ko hono fakaʻosí, ko e ngaahi mātuʻa taʻehoá kuo pau ke nau ‘taki taha fua ʻenau kavenga’ ʻo e fatongiá. (Kaletia 6:5) Ka neongo ia, ʻoku lava ke nau maʻu ʻa e ʻofa ʻa e fanga tokoua mo e fanga tuofāfine Kalisitiané pea mo Sihova ko e ʻOtuá tonu. ʻOku pehē ʻe he Tohitapú fekauʻaki mo ia: “Oku ne fakafiemalieʻi ae tamai mate moe fefine kuo mate hono unoho.” (Sāme 146:​9, PM) ʻI Heʻene poupou anga-ʻofá, ʻoku lava ke lavameʻa ai ʻa e ngaahi fāmili mātuʻa-taʻehoá!