1-3. (a) Ko e ngaahi matavai fē ʻoku hoko mai mei ai ʻa e ngaahi tākiekina fakatupu maumau ʻokú ne fakamanamanaʻi ʻa e fāmilí? (e) Ko e hā ʻa e mafamafatatau ʻoku fiemaʻu ʻe he ongo mātuʻá ki hono maluʻi hona fāmilí?

 ʻOKÚ KE teu eni ke fekau ʻa hoʻo kiʻi tamasiʻí ke ʻalu ki he akó, pea ʻoku tō ʻa e ʻuhá. ʻOku anga-fēfē ʻa hoʻo ngāue ki he tuʻunga ko iá? ʻOkú ke tuku atu ia ke ne ʻalu vave ki tuʻa mei he matapaá ʻo ʻikai ha kofu fakaʻuha? Pe ʻokú ke fakatuiʻaki ia ha fuʻu fatunga vala maluʻi lahi ʻo ʻikai lava ke ne meimei ngaue? Ko e moʻoni, ʻe ʻikai te ke fai ha taha ʻo kinaua. ʻOkú ke ʻoange kiate ia ʻa e meʻa tofu pē ko ia ʻoku fiemaʻú ke tauhi ia ke ne mātuʻu.

² ʻI he founga meimei tatau, kuo pau ke kumi ʻe he ongo mātuʻá ha founga mafamafatatau ke maluʻiʻaki ʻa hona fāmilí mei he ngaahi tākiekina fakatupu maumau ʻoku haʻaki mai kiate kinautolu mei he ngaahi matavai lahi​—ko e ngāue ki he fakafiefiá, ko e mītiá, ngaahi toʻumeʻá, pea naʻa mo e ngaahi ʻapiakó ʻi he taimi ʻe niʻihi. ʻOku fai ʻe he ngaahi mātuʻa ʻe niʻihi ʻa e meʻa siʻisiʻi pe halaʻatā ke maluʻiʻaki honau fāmilí. Ko e niʻihi kehe, ʻi heʻenau vakai ki he fakatupu maumau ʻa e meimei tākiekina kotoa ʻi tuʻá, ʻoku nau fuʻu fakataputapui ʻo ongoʻi ai ʻe he fānaú ia ʻo hangē ʻoku siofi pē kinautolú. ʻOku malava ke ʻi ai ha mafamafatatau?

³ ʻIo, ʻoku ʻi ai. Ko e hoko ʻo fuʻu tōtuʻá ʻoku ʻikai ke ola lelei ia pea ʻoku malava ke fakatupu ai ha maumau. (Koheleti 7:​16, 17) Ka ʻoku anga-fēfē ʻa e maʻu ʻe he ngaahi mātuʻa Kalisitiané ʻa e mafamafatatau totonu ki hono maluʻi honau fāmilí? Fakakaukau angé ki he ngaahi tafaʻaki ʻe tolu: ko e akó, kaungāmeʻá, mo e fakafiefiá.

4. ʻOku totonu ke fēfē ʻa e vakai ʻa e ngaahi mātuʻa Kalisitiané ki he akó?

⁴ ʻOku fai ʻe he ngaahi mātuʻa Kalisitiané ha fakamahuʻingaʻi lahi ʻo e akó. ʻOku nau ʻiloʻi ʻoku tokoni ʻa e akó ki he fānaú ke nau lautohi, tohi, mo fetuʻutaki, pea pehē foki ki hono solova ʻa e ngaahi palopalemá. ʻOku totonu foki ke ne toe akoʻi kinautolu ki he founga ke ako aí. Ko e ngaahi pōtoʻi ʻoku maʻu ʻe he fānaú ʻi he ʻapiakó ʻoku lava ke tokoniʻi ai kinautolu ke nau lavameʻa neongo ʻa e ngaahi pole ʻi he māmani ʻo e ʻaho ní. Tānaki atu ki ai, ko ha ako lelei ʻe tokoniʻi nai ai kinautolu ke nau fakahoko ʻa e ngāue lelei ange.​—Palovepi 22:29.

5, 6. ʻOku anga-fēfē nai ʻa e fakaeʻa ʻo e fakamatala mioʻi ʻo fekauʻaki mo e ngaahi meʻa fakaefehokotaki fakasinó ki he fānau ʻi he ʻapiakó?

⁵ Kae kehe, ʻoku toe ʻomai ʻe he ʻapiakó ʻa e fānaú ke nau fakataha mo e fānau kehe​—ko e tokolahi ai ʻoku nau maʻu ʻa e ngaahi fakakaukau mioʻi. Ko e fakatātaá, fakakaukau angé ki heʻenau ngaahi vakai ki he fehokotaki fakasinó mo e ngaahi ʻulungaanga tāú. ʻI ha ʻapiako lotoloto ʻi Naisīlia, naʻe faʻa angaʻaki ai ʻe ha taʻahine fakaʻaluʻalu fakaefehokotaki fakasino ʻa hono fakahinohinoʻi ʻa hono kaungāakó ʻo fekauʻaki mo e fehokotaki fakasinó. Naʻa nau vēkeveke fanongo kiate ia, neongo naʻe fonu ʻa ʻene ngaahi fakakaukaú ʻi he  launoa naʻá ne tānaki mei ha tohi fakatātā fakalielia. Naʻe ʻahiʻahiʻi ʻe he tamaiki fefine ʻe niʻihi ʻa ʻene fakahinohinó. Ko hono nunuʻá, naʻe hoko ʻo feitama taʻemali ai ʻa e taʻahine ʻe taha peá ne mate ʻi ha fakatōtama naʻá ne fai kiate ia tonu.

⁶ ʻOku fakamamahi ke leaʻaki, ko e niʻihi ʻo e fakamatala hala fakaefehokotaki fakasino ʻi he ʻapiakó, ʻoku haʻu ia, ʻo ʻikai mei he fānaú, kae haʻu mei he kau faiakó. ʻOku loto-siʻi ʻa e ngaahi mātuʻa lahi ʻi hono akoʻi ʻi he ngaahi ʻapiakó ʻenau fānaú ʻo fekauʻaki mo e fehokotaki fakasinó ʻo ʻikai fakahoko ai ha fakamatala ki he ngaahi tuʻunga mo e fatongia fakaeʻulungaanga tāú. Naʻe pehē ʻe ha faʻē ʻa ha taʻahine taʻu 12: “ʻOku mau nofo ʻi ha feituʻu lotu, mo talatukufakaholo, pea neongo ia ʻi he ʻapiako māʻolunga ʻo e feituʻú tonu, ʻoku nau ʻoatu ai ʻa e ngaahi konitomú ki he kau leká!” Ko ia mo hono husepānití naʻá na hoko ʻo hohaʻa ʻi heʻena ʻilo ko hona ʻofefiné naʻe fai ha ngaahi kole fakaefehokotaki fakasino kiate ia mei he tamaiki tangata ʻi hono toʻú. ʻE lava fēfē ke maluʻi ʻe he ongo mātuʻá hona fāmilí mei he ngaahi tākiekina fehālaaki peheé?

7. ʻE anga-fēfē nai hano fakafepakiʻi ʻi he founga lelei tahá ʻa e fakamatala hala ki he fehokotaki fakasinó?

⁷ ʻOku lelei tahá ke maluʻi ʻa e fānaú mei ha lave pē ʻo fekauʻaki mo e ngaahi meʻa fakaefehokotaki fakasinó? ʻIkai. ʻOku lelei ange ke akoʻi ʻa hoʻo fānaú ʻo fekauʻaki mo e fehokotaki fakasinó ʻe koe tonu. (Palovepi 5:1) Ko e moʻoni, ʻi he ngaahi konga ʻo ʻIulope mo ʻAmelika Tokelau, ʻoku fakaʻehiʻehi ai ʻa e ngaahi mātuʻa tokolahi mei he kaveinga ko ení. ʻI he tuʻunga meimei tatau, ʻi he ngaahi fonua ʻAfilika ʻe niʻihi, ʻoku tātātaha ai ʻa e fetalanoaʻaki ʻa e ngaahi mātuʻá ki he fehokotaki fakasinó mo ʻenau fānaú. “ʻOku ʻikai ko ha konga ia ʻo e tōʻonga fakafonua faka-ʻAfiliká ke fai pehē,” ko e lau ia ʻa ha tamai ʻi Siela Leone. ʻOku ongoʻi ʻe he ngaahi mātuʻa ʻe niʻihi ko hono akoʻi ʻa e fānaú ʻo fekauʻaki mo e fehokotaki fakasinó ko hono ʻoange ia kiate kinautolu ʻa e ngaahi fakakaukau ʻa ia ʻe taki atu ai kinautolu ke nau fai ʻa e ʻulungaanga taʻetāú! Ka ko e hā ʻa e vakai ki ai ʻa e ʻOtuá?

8, 9. Ko e hā ʻa e fakamatala lelei ki he ngaahi meʻa fakaefehokotaki fakasinó ʻoku maʻu ʻi he Tohitapú?

⁸ ʻOku ʻai ʻe he Tohitapú ke mahino ʻoku ʻikai ha meʻa ʻe  fakamā ʻo fekauʻaki mo e lāulea ki he fehokotaki fakasinó ʻi ha tuʻunga totonu. ʻI ʻIsileli, naʻe tala ai ki he kakai ʻa e ʻOtuá ke nau fakatahataha fakataha, ʻo kau ai ʻenau “tamaiki,” ke fanongo ki hono lau leʻo-lahi ʻo e Lao ʻa Mōsesé. (Teutalonome 31:​10-12; Siosiua 8:35) ʻOku lave hangatonu ʻa e Laó ki ha ngaahi meʻa fakaefehokotaki fakasino lahi, ʻo kau ai ʻa e puke fakamāhiná, ngaahi mahua ʻo e huhuʻa fakafanaú, feʻauakí, tonó, fakasōtomá, hia fakamalaʻiá, mo e mohe mo e manú. (Livitiko 15:​16, 19; 18:​6, 22, 23; Teutalonome 22:22) Hili e ngaahi lau ko iá ʻoku ʻikai ha veiveiua naʻe lahi ʻa e meʻa ke fakamatalaʻi ʻe he ngaahi mātuʻá ki heʻenau fānau fieʻiló.

⁹ ʻOku ʻi ai ʻa e ngaahi kupu ʻi he vahe hono nima, ono, mo e fitu ʻo e ngaahi Palovēpí ʻoku fakahaaʻi mai ai ʻa e faleʻi fakaemātuʻa anga-ʻofa ki he ngaahi fakatuʻutāmaki ʻo e ʻulungaanga taʻetaau fakaefehokotaki fakasinó. ʻOku fakahaaʻi ʻe he ngaahi veesi ko ení ʻoku fakatauele nai ʻi he taimi ʻe niʻihi ʻa e ʻulungaanga taʻetāú. (Palovepi 5:3; 6:​24, 25; 7:​14-21) Ka ʻoku nau akoʻi mai ʻoku hala ia pea ʻoku ʻi ai hono ngaahi nunuʻa fakatupu ʻauha, pea ʻoku nau ʻomai ʻa e tataki ke tokoniʻiʻaki ʻa e toʻutupú ke nau fakaʻehiʻehi mei he ngaahi founga ʻulungaanga taʻetāú. (Palovepi 5:​1-14, 21-23; 6:​27-35; 7:​22-27) ʻIkai ko ia pē, ʻoku kehe ʻaupito ʻa e ʻulungaanga taʻetāú mo e fakafiemālie ʻi he fiefia he fehokotaki fakasino ʻi hono tuʻunga totonú, ʻi loto ʻi he nofo malí. (Palovepi 5:​15-20) Ko ha sīpinga lelei moʻoni ē ʻo e faiakó ke muimui ki ai ʻa e ngaahi mātuʻá!

10. Ko e hā hono ʻuhinga ʻoku ʻikai taki atu ai ʻa e fānaú ke nau fai ha ʻulungaanga taʻetaau ʻi hono ʻoange kiate kinautolu ʻa e ʻilo fakaʻotua ʻo fekauʻaki mo e fehokotaki fakasinó?

¹⁰ ʻOku taki atu ʻe he akoʻi peheé ʻa e fānaú ke nau fai ʻa e ʻulungaanga taʻetāú? ʻI hono kehe ʻaupitó, ʻoku akoʻi ʻe he Tohitapú: “Koe mea i he ilo e fakamoui ae agatonu.” (Palovepi 11:​9, PM) ʻIkai ʻokú ke loto ke fakahaofi ʻa hoʻo fānaú mei he ngaahi tākiekina ʻa e māmani ko ení? Naʻe pehē ʻe he tamai ʻe taha: “Talu pē mei he kei siʻi ʻaupito ʻa e fānaú, mo ʻema feinga ke lea hangatonu fakaʻaufuli kiate kinautolu ʻi he taimi ʻoku hoko mai ai ki he meʻa fekauʻaki mo e fehokotaki fakasinó. ʻI he founga ko iá, ʻi he taimi ʻoku nau fanongo ai ki he fānau kehé ʻoku nau talanoa ʻo fekauʻaki mo e fehokotaki fakasinó, ʻoku ʻikai te nau fieʻilo. ʻOku ʻikai ʻi ai ha misiteli lahi.”

11. ʻOku lava fēfē ke akoʻi fakalakalaka ʻa e fānaú ʻo fekauʻaki mo e ngaahi meʻa fakapulipuli ʻi he moʻuí?

 ¹¹ Hangē ko ia naʻe lave ki ai ʻi he ngaahi vahe ki muʻá, ʻoku totonu ke kamata tōmuʻa ʻa e ako fekauʻaki mo e fehokotaki fakasinó. ʻI hono akoʻi ʻa e fānau īkí ke nau fakahingoa ʻa e ngaahi kupu ʻo e sinó, ʻoua ʻe tukunoaʻi ʻa honau ngaahi kupu fakapulipulí ʻo hangē ia ʻoku fakamā ʻi ha founga ʻa e ngaahi kupu ko ení. Akoʻi kiate kinautolu ʻa e ngaahi hingoa totonu ʻo e ngaahi kupú ni. ʻI he faai mai ʻa e taimí, ʻoku fiemaʻu ai ʻa e ngaahi lēsoni fekauʻaki mo e fakapulipulí mo e ngaahi fakangatangatá. ʻOku feʻungamālie ange ki he ongo mātuʻá fakatouʻosi ke na akoʻi ki he fānaú ko e ngaahi kupu ko eni ʻo e sinó ʻoku makehe, ʻo ʻikai ʻaupito tonu ke ala ki ai pe fakaeʻa ia ki he niʻihi kehé, pea ʻoku ʻikai ʻaupito totonu ke talanoa ki ai ʻi ha founga kovi. ʻI he tupu hake ʻa e fānaú ʻo taʻumotuʻa angé, ʻoku totonu ke fakamatalaʻi kiate kinautolu ʻa e founga ʻoku fakataha ai ha tangata mo ha fefine ke faʻu ha kiʻi tamá. ʻI he aʻu ki he taimi ʻoku kamata ai honau sinó tonu ke hoko ʻo tangata lahí, ʻoku totonu ke nau ʻosi lāuʻilo lelei fekauʻaki mo e ngaahi liliu ʻe ʻamanekina ke hokó. Hangē ko ia naʻe lāulea ki ai ʻi he Vahe 5, ko e ako peheé ʻe toe lava ke tokoni ki hono maluʻi ʻa e fānaú mei he ngaohikoviʻi fakaefehokotaki fakasinó.​—Palovepi 2:​10-14.

12. Ko e hā ʻa e ngaahi fakakaukau mioʻi ʻoku faʻa akoʻi ʻi he ngaahi ʻapiakó?

¹² ʻOku fiemaʻu ke mateuteu ʻa e ongo mātuʻá ke fakafepakiʻi ʻa e ngaahi fakakaukau loi kehe ʻoku akoʻi nai ʻi he ʻapiakó​—ko e ngaahi filōsofia fakamāmani hangē ko e ʻevolūsoné, mamahiʻi-fonuá, pe ko e fakakaukau ʻoku ʻikai ha ngaahi moʻoni ia ʻe haohaoá. (1 Kolinito 3:19; fakafehoanaki mo Senesi 1:27; Livitiko 26:1; Sione 4:24; 17:17.) Ko e kau ʻōfisa ako loto-moʻoni tokolahi ʻoku nau tuku ʻa e mahuʻinga taʻetotonu ki he toe ako lahi angé. Lolotonga ko e meʻa fekauʻaki mo e ako fakalahí ko ha fili fakafoʻituitui ia, ʻoku poupouʻi ʻe he kau faiako ʻe niʻihi ko e hala pē ia ʻe taha ki ha faʻahinga lavameʻa fakafoʻituitui pē. a​—Sāme 146:​3-6.

13. ʻOku lava fēfē ke maluʻi ʻa e fānau ʻoku nau kau ki he akó mei he ngaahi fakakaukau halá?

 ¹³ Kapau ʻoku fiemaʻu ke fakafepakiʻi ʻe he ngaahi mātuʻá ʻa e ngaahi akonaki hala pe mioʻí, kuo pau ke nau ʻiloʻi ʻa e fakahinohino tofu pē ko ia ʻoku maʻu ʻe heʻenau fānaú. Ko ia ai ngaahi mātuʻa, manatuʻi ʻoku ʻi ai foki hoʻomou homueka! Fakahaaʻi ha mahuʻingaʻia moʻoni ʻi he ako ʻa hoʻomou fānaú. Talanoa mo kinautolu ʻi he tuku ʻa e akó. ʻEke pe ko e hā ʻoku nau akó, ko e meʻa ʻoku nau saiʻia taha aí, meʻa ʻoku nau ʻilo ʻoku hoko ko e pole lahi tahá. Sio ki ha ngaahi homueka kuo vaheʻi mai, ngaahi nouti, mo e ola ʻo e ngaahi siví. Feinga ke hoko ʻo ʻiloʻi ʻa ʻenau kau faiakó. Tuku ke ʻiloʻi ʻe he kau faiakó ʻoku mou houngaʻia ʻi heʻenau ngāué pea ʻoku mou loto ke hoko ʻo tokoni ʻi ha founga pē te mou malavá.

14. Ko e hā ʻoku mātuʻaki mahuʻinga ai ke fili ʻe he fānau anga-fakaʻotuá ʻa e ngaahi kaumeʻa leleí?

¹⁴ “Naʻá ke ʻilo mei fē ʻa e meʻa ko iá?” Ko e fihaʻi mātuʻa ē kuo nau ʻeke ʻa e foʻi fehuʻi ko iá, ʻi heʻenau fakalilifuʻia ʻi ha meʻa naʻe leaʻaki pe fai ʻe heʻenau kiʻi tamá pea ʻoku hā taʻengali ʻaupito? Pea ko e hā hono lahi ʻo e talí ʻoku kau ki ai ha kaumeʻa foʻou ʻi he akó pe ʻi he feituʻú? ʻIo, ʻoku uesia loloto kitautolu ʻe he ngaahi feohí, tatau ai pē pe ʻoku tau kei siʻi pe motuʻa. Naʻe fakatokanga mai ʻa e ʻapositolo ko Paulá: “ʻOua naʻa tuku ke kākāʻi kimoutolu. ʻOku maumauʻi ʻa e ngaahi ʻulungaanga lelei ʻe he faʻa talanoa [“ngaahi kaungāmeʻa,” NW] kovi.” (1 Kolinito 15:33; Palovepi 13:20) ʻOku tautefito ki he kau talavoú ʻa e fakamoʻulaloa ki he fakaʻaiʻai mei he toʻumeʻá. ʻOku nau hehema ke veiveiua fekauʻaki mo kinautolu tonu pea ongoʻi lōmekina nai ʻi he taimi ʻe niʻihi ʻi ha holi ke fakafiefiaʻi mo ʻai ke maongo ki honau ngaahi kaungāmeʻá. He mātuʻaki mahuʻinga leva ē, ke nau kumi ha ngaahi kaumeʻa lelei!

15. ʻOku lava fēfē ke tataki ʻe he ongo mātuʻá ʻena fānaú ʻi hono fili honau ngaahi kaumeʻá?

¹⁵ Hangē ko ia ʻoku ʻiloʻi ʻe he ngaahi mātuʻa kotoa pē, ʻe ʻikai ke fili lelei maʻu pē ʻa e fānaú; ʻoku nau fiemaʻu ha tataki. ʻOku ʻikai ko ha meʻa ia ke nau fili pē ʻe kinautolu honau ngaahi kaumeʻá. Ka, ʻi heʻenau tupu haké, akoʻi kiate  kinautolu ʻa e ʻiloʻiló pea tokoniʻi kinautolu ke nau sio ki he ngaahi anga ʻoku totonu ke nau fakamahuʻingaʻi ʻi he ngaahi kaumeʻá. Ko e anga tefitó ko ha ʻofa kia Sihova pea mo hono fai ʻa e meʻa ʻoku totonu ʻi heʻene ʻafio maí. (Maake 12:​28-30) Akoʻi kinautolu ke nau ʻofa mo ʻapasia ki he faʻahinga ʻoku nau maʻu ʻa e faitotonu, anga-ʻofa, nima-homo, mo tōtōiví. Lolotonga ʻa e ako fakafāmilí, tokoniʻi ʻa e fānaú ke nau ʻiloʻi ʻa e ngaahi anga pehē ʻi he faʻahinga he Tohitapú pea ke nau kumi leva ke maʻu ʻa e ngaahi fasi-ʻa-anga tatau ʻi he niʻihi kehe ʻi he fakatahaʻangá. Fokotuʻu ʻa e faʻifaʻitakiʻangá ʻaki hono ngāueʻaki ʻa e tuʻunga tatau ʻi hono fili homo ngaahi kaumeʻá tonu.

16. ʻE anga-fēfē nai hono tokangaʻi ʻe he ongo mātuʻá ʻa e fili ʻe heʻena fānaú honau ngaahi kaumeʻá?

¹⁶ ʻOkú mo ʻiloʻi ʻa e ngaahi kaumeʻa ʻo hoʻomo fānaú? Ko e hā ʻoku ʻikai ke ʻai ai hoʻomo fānaú ke nau ʻomai kinautolu ki ʻapi koeʻuhi ke lava ʻo mo feʻiloaki ai mo kinautolú? Te mo toe ʻeke nai ki hoʻomo fānaú pe ko e hā ʻa e fakakaukau ʻa e fānau kehé ʻo fekauʻaki mo e ngaahi kaumeʻa ko ení. ʻOku ʻiloa kinautolu ʻi hono fakahāhā a e tauhi anga-tonu fakafoʻituituí pe ko e moʻui ʻi ha moʻui lōuá? Kapau ʻoku hoko moʻoni ʻa e taha ki muí, tokoniʻi hoʻomo fānaú ke nau fakaʻuhinga ki he ʻuhinga ʻe lava ai ke fakatupu mamahi kiate kinautolu ʻa e kaungāmeʻa peheé. (Sāme 26:​4, 5, 9-12) Kapau ʻokú mo fakatokangaʻi ha ngaahi liliu ʻoku ʻikai fiemaʻu ʻi he tōʻonga, vala, fakakaukau, pe lea ʻa hoʻomo tamá, ʻe fiemaʻu nai ke mo fai ha talanoa ʻo fekauʻaki mo hono ngaahi kaumeʻá. ʻOku fakamoleki nai ʻe hoʻomo tamá ha taimi mo ha kaumeʻa ʻa ia ʻokú ne ʻomai ha tākiekina taʻepau.​—Fakafehoanaki mo Senesi 34:​1, 2.

17, 18. Tuku kehe ʻa e fakatokanga fekauʻaki mo e ngaahi kaungāmeʻa koví, ko e hā ʻa e tokoni ʻaonga ʻoku lava ke fai ʻe he ongo mātuʻá?

¹⁷ Neongo ia, ʻoku ʻikai feʻunga pē ke akoʻi ʻa hoʻomo fānaú ke nau fakaʻehiʻehi mei he ngaahi kaungāmeʻa koví. Tokoniʻi kinautolu ke kumi ha faʻahinga lelei. ʻOku pehē ʻe ha tamai ʻe taha: “Te ma feinga maʻu pē ke fai ha fakafetongi. Ko ia ʻi he taimi naʻe fiemaʻu ai ʻe he ʻapiakó ʻa homa fohá ki he timi ʻakapulú, naʻá ku tangutu hifo ai mo hoku uaifí fakataha mo ia ʻo fetalanoaʻaki ki he ʻuhinga ʻe ʻikai ke hoko ai ia ko ha  fakakaukau leleí​—koeʻuhi ko e ngaahi feohi foʻou ʻe kau ki aí. Ka naʻá ma fokotuʻu ange leva ke ma ʻomai ʻa e niʻihi ʻo e fānau kehe ʻi he fakatahaʻangá pea ʻave kinautolu kotoa ki he paʻaké ke nau ʻakapulu ai. Pea naʻe ngāue lelei ʻa e meʻa ko iá.”

¹⁸ ʻOku tokoniʻi ʻe he ngaahi mātuʻa fakapotopotó ʻenau fānaú ke nau maʻu ʻa e ngaahi taimi lelei pea ke fiefia leva ai ʻi he fakafiefia lelei fakataha mo kinautolu. Neongo ia, ki he ngaahi mātuʻa tokolahi, ko e meʻa ko eni fekauʻaki mo e fakafiefiá ʻoku ʻomai ai ʻa hono ngaahi pole tonu.

19. Ko e hā ʻa e ngaahi fakatātā faka-Tohitapu ʻoku fakahaaʻi ai ʻoku ʻikai ko ha angahala ia ki he ngaahi fāmilí ke nau maʻu ha fakaoliʻia?

¹⁹ ʻOku fakahalaiaʻi ʻe he Tohitapú ʻa e maʻu ʻo ha fakaoliʻiá? ʻIkai ʻaupito! ʻOku pehē ʻe he Tohitapú ʻoku ʻi ai ʻa e “ʻaho ke kata . . . mo e ʻaho ke meʻe.” b (Koheleti 3:4) Ko e kakai ʻa e ʻOtuá ʻi ʻIsileli ʻo e kuonga muʻá naʻa nau fiefia ʻi he fasí mo e hulá, ngaahi vaʻingá, mo e ngaahi mate tupuʻá. Naʻe maʻu ʻe Sīsū Kalaisi ha kātoanga mali lahi, pea mo ha “fuʻu kātoanga” ʻa ia naʻe fai ʻe Mātiu Līvai kiate ia. (Luke 5:29; Sione 2:​1, 2) ʻOku hā mahino, ko Sīsuú naʻe ʻikai ko ha taha taʻofi fiefia ia. ʻOfa ke ʻoua naʻa vakai ki he kakatá mo e fakaolí ko ha ngaahi angahala ia ʻi ho fāmilí!

20. Ko e hā ʻoku totonu ke manatuʻi ʻe he ngaahi mātuʻá ʻi hono tokonaki ʻa e fakafiefia ki he fāmilí?

²⁰ Ko Sihová “ko e ʻOtua fiefia.” (1 Timote 1:​11, NW) Ko ia, ko e lotu kia Sihová ʻoku totonu ke hoko ko ha matavai ia ʻo e fiefia, ʻo ʻikai ko ha meʻa ʻoku fakatupunga ai ha taʻefiefia ki he moʻuí. (Fakafehoanaki mo Teutalonome 16:15.) ʻOku fakanatula pē ʻa e fiefia taʻefakangatangata mo fonu iviʻia ʻa e fānaú ʻa ia ʻe lava ke tukuange atu ia ʻi he vaʻingá mo e fakafiefiá. Ko e fakafiefia filifili leleí ʻoku mahulu atu ia ʻi he fakaolí. Ko ha founga ia ki ha kiʻi tama ke ako ai pea hoko ʻo matuʻotuʻa. ʻOku fakafatongiaʻaki ʻa e ʻuluʻi fāmilí ke ne tokonaki maʻá e ngaahi fiemaʻu ʻa hono fāmilí ʻi he meʻa kotoa pē, ʻo kau ai ʻa e fakafiefiá. Kae kehe, ʻoku fiemaʻu ki ai ʻa e mafamafatatau.

21. Ko e hā ʻa e ngaahi tōʻanga ʻoku ʻi he fakafiefiá ʻi he ʻahó ni?

²¹ ʻI he “kuonga fakamui” taʻemanonga ko ení, ʻoku fonu ai ʻa e sōsaieti ʻo e faʻahinga ʻo e tangatá ʻi he kakai ʻa ia ko e “kau ʻofa ki he malie ʻo ʻikai ʻofa ki he ʻOtua,” hangē ko ia naʻe kikiteʻi ʻi he Tohitapú. (2 Timote 3:​1-5) Ki he tokolahi, ko e fakafiefiá ʻa e meʻa tefito ʻi he moʻuí. ʻOku lahi fau ʻa e fakafiefia ʻoku ala maʻú ʻo faingofua ai ʻa e lava ke fakafetongiʻaki ia ʻa e ngaahi meʻa mahuʻinga angé. ʻIkai ko ia pē, ko e lahi ʻo e ngaahi fakafiefia ʻi onopōní ʻoku fakahaaʻi mai ai ʻa e  ʻulungaanga taʻetaau fakaefehokotaki fakasinó, fakamālohí, ngāuekoviʻaki ʻa e faitoʻo kona tapú, pea mo e ngaahi tōʻonga fakatupu maumau mafatukituki kehe. (Palovepi 3:31) Ko e hā ʻe lava ke fai ke maluʻiʻaki ʻa e fānaú mei he fakafiefia fakatupu maumaú?

22. ʻOku lava fēfē ke akoʻi ʻe he ngaahi mātuʻá ʻenau fānaú ke nau fai ha ngaahi fili fakapotopoto ʻi he fekauʻaki mo e fakafiefiá?

²² ʻOku fiemaʻu ke fokotuʻu ʻe he ngaahi mātuʻá ha ngaahi ngataʻanga mo ha ngaahi fakangatangata. Kae mahulu atu aí, ʻoku fiemaʻu ke nau akoʻi ʻenau fānaú ki he founga ke fakafuofuaʻi ai ʻa e fakafiefia ʻoku fakatupu maumaú pea ke ʻiloʻi ʻa e lahi ʻo e fakafiefia ʻoku fuʻu hulú. Ko e akoʻi peheé ʻoku fiemaʻu ki ai ʻa e taimi mo e feinga. Fakakaukau atu ki ha fakatātā. Ko ha tamai ʻa ha ongo tamaiki tangata ʻe toko ua naʻá ne fakatokangaʻi naʻe faʻa toutou fanongo ʻa hono foha taʻumotuʻa angé ki ha fale fakamafola lea letiō foʻou.  Ko ia ʻi he lolotonga ʻa ʻene fakaʻuli ʻi heʻene lolí ki he ngāué ʻi he ʻaho ʻe taha, naʻe fakaava hake ai ʻe he tamaí ki he fakamafola lea tatau. Naʻá ne toutou tuʻu ʻo hikiʻi hifo ʻa e ngaahi lea ʻo e ngaahi hiva ʻe niʻihi. Ki mui ai, naʻá ne tangutu hifo mo hono ongo fohá ʻo fetalanoaʻaki ki he meʻa naʻá ne fanongo ki aí. Naʻá ne ʻeke ʻa e ngaahi fehuʻi fakatupunga fakakaukau, ʻo kamata ʻaki eni “Ko e hā hoʻomo fakakaukaú?” pea fanongo anga-kātaki ki heʻena ngaahi talí. Hili ʻa e fefakaʻuhingaʻaki ʻi he meʻá ni ʻo ngāueʻaki ʻa e Tohitapú, naʻe loto-lelei ai ʻa e ongo tamaikí ke ʻoua te na toe fanongo ki he fale fakamafola lea ko iá.

23. ʻE anga-fēfē hano maluʻi ʻe he ngaahi mātuʻá ʻenau fānaú mei he fakafiefia ʻikai leleí?

²³ Ko e ngaahi mātuʻa Kalisitiane fakapotopotó ʻoku nau vakaiʻi ʻa e fasí, ngaahi polokalama TV, ngaahi tepi vitiō, ngaahi tohi kōmikí, ngaahi keimi vitioó, mo e ngaahi faiva ʻoku mahuʻingaʻia ai ʻenau fānaú. ʻOku nau sio ki he fakatātā ʻi he takafí, ko e ngaahi leá, mo e faʻoʻangá, pea ʻoku nau lau ʻa e ngaahi fakamatala ʻi he nusipepá mo sio ʻi he ngaahi konga ʻoku hiki tataú. ʻOku ʻohovale ʻa e tokolahi ʻi he niʻihi ʻo e “fakafiefia” ʻoku fakahanga ki he fānaú he ʻaho ní. Ko e faʻahinga ko ia ʻoku nau fakaʻamu ke maluʻi ʻenau fānaú mei he ngaahi tākiekina taʻemaʻá ʻoku nau tangutu hifo mo honau fāmilí ʻo fetalanoaʻaki ki he ngaahi fakatuʻutāmakí, ʻo ngāueʻaki ʻa e Tohitapú mo e ngaahi tohi makatuʻunga ʻi he Tohitapú, hangē ko e tohi Questions Young People Ask​—Answers That Work mo e ngaahi kupu ʻi he ngaahi makasini Taua Leʻo mo e ʻĀ Hake! c ʻI he taimi ʻoku fokotuʻu ai ʻe he ngaahi mātuʻá ʻa e ngaahi fakangatangata fefeká, ko e hoko ʻo huʻufataha mo fakaʻatuʻí, ʻoku nau faʻa sio ai ki he ngaahi ola lelei.​—Mātiu 5:37; Filipai 4:5.

24, 25. Ko e hā ʻa e ngaahi founga fakafiefia lelei ʻe niʻihi ʻoku lava ke fiefia fakataha ai ʻa e ngaahi fāmilí?

²⁴ Ko e moʻoni, ko hono taʻotaʻofi ʻo e ngaahi founga fakafiefia fakatupu maumaú ko e konga pē ia ʻo e faitaú. Kuo pau ke fakafepakiʻi ʻa e koví ʻaki ʻa e leleí, he ka ʻikai ʻe ʻauhia ʻa e fānaú ki ha ʻalunga hala. Kuo maʻu ʻe he ngaahi fāmili Kalisitiane  lahi ʻa e ngaahi manatu māfana mo fakafiefia ʻi he kau fakataha ʻi he fakafiefiá​—ʻi he kai meʻakai, ʻeva, kemi, vaʻinga ʻi ha ngaahi keimi mo e ngaahi sipoti, fononga ke ʻaʻahi ki he ngaahi kāingá pe ngaahi kaumeʻá. Kuo ʻilo ʻe he niʻihi ko e lautohi fakataha leʻo-lahi pē ki ha mālōloó ko ha matavai lahi ia ʻo e fiefiá mo e fiemālié. ʻOku fiefia ʻa e niʻihi kehe ʻi hono fai ʻo ha ngaahi talanoa fakakata pe fakamānako. Lolotonga ia kuo kamataʻi fakataha ʻe he niʻihi kehe ia ha ngaahi vaʻinga, ko e fakatātaá, ko e ngāue fakatufunga mo e ngaahi faiva kehe, pea pehē ki he tā ʻo e ngaahi meʻalea fakamūsiká, tāvalivali, pe ako ki he ngaahi fakatupu ʻa e ʻOtuá. Ko e fānau ko ia ʻoku nau ako ke fiefia ʻi he ngaahi vaʻinga peheé ʻoku maluʻi ai kinautolu mei he lahi ʻo e fakafiefia taʻemaʻá, pea ʻoku nau ʻilo ai ʻoku lahi ange ʻa e meʻa ia fekauʻaki mo e fakafiefiá ʻi he tangutu ʻataʻatā pē pea fakafiefiaʻí. ʻOku faʻa fakaoli ange ʻa e kau ki aí ʻi he sió pē.

²⁵ Ko e ngaahi fakatahataha fakasōsialé ʻe toe lava ke hoko ia ko ha founga fakafiemālie ʻo e fakafiefiá. ʻI he taimi ʻoku tokangaʻi lelei ai kinautolú pea ʻikai ke fuʻu tokolahi anga-kehe pe fakamole taimí, ʻoku lava ke ne ʻoatu ai ki hoʻo fānaú ʻa e meʻa lahi ange ia ʻi he fakaolí pē. ʻOku lava ke nau tokoni ke toe fakaloloto ange ai ʻa e ngaahi haʻi ʻo e ʻofá ʻi he fakatahaʻangá.​—Fakafehoanaki mo Luke 14:​13, 14; Siutasi 12.

26. ʻI he taimi ʻoku hoko mai ai ki hono maluʻi ʻo e fāmilí mei he ngaahi tākiekina ʻikai leleí, ko e hā ʻa e anga ʻoku mahuʻinga tahá?

²⁶ ʻOku ʻikai ha toe fehuʻia, ko hono maluʻi ho fāmilí mei he ngaahi tākiekina fakatupu maumau ʻa e māmaní ʻoku fiemaʻu ki ai ʻa e ngāue mālohi lahi. Ka ʻoku ʻi ai ʻa e meʻa ʻe taha, ʻoku laka ange ia ʻi ha toe meʻa, te ne ʻai ke malava ai ʻo lavameʻá. Ko e ʻofá! Ko e ngaahi haʻi vāofi, mo ʻofa ʻi he fāmilí te ne ʻai ho ʻapí ke hoko ko ha taulangaū malu pea te ne pouaki ʻa e fetuʻutakí, ʻa ia ko ha maluʻi lahi ia mei he ngaahi tākiekina koví. ʻIkai ko ia pē, ko hono fakatupulekina ʻa e toe faʻahinga ʻe taha ʻo e ʻofá ʻoku toe mahuʻinga lahi ange ia​—ko e ʻofa kia Sihová. ʻI he taimi ʻoku hūhū ai ʻa e ʻofa peheé ʻi he fāmilí, ʻoku ngalingali lahi ange ai ke tupu hake ʻa e fānaú ʻo fehiʻa ʻi he foʻi fakakaukau tofu pē ko ia ko hono  taʻefakahōifuaʻi ʻa e ʻOtuá ʻaki ʻa e hehema ki he ngaahi tākiekina fakamāmaní. Pea ko e ngaahi mātuʻa ʻoku nau ʻofa kia Sihova mei honau lotó te nau kumi ke faʻifaʻitaki ki hono angaʻitangata ʻofa, fakaʻatuʻi, mo mafamafatataú. (Efeso 5:1; Semisi 3:17) Kapau ʻe fai ia ʻe he ngaahi mātuʻá, ʻe ʻikai leva ke ʻi ai ha ʻuhinga ke vakai ai ʻenau fānaú ki he lotu kia Sihová ko ha fakahokohoko pē ʻo ha ngaahi meʻa ʻoku ʻikai fakaʻatā ke nau fai, pe ko ha founga moʻui ʻoku ʻikai ha fakaoli pe kakata, ʻa ia ʻoku nau loto ke hola mei ai ʻi he vave taha ʻe ala lavá. ʻI hono kehé, te nau sio ki he lotu kia Sihová ko e founga moʻui fiefia taha ia, mo kakato taha ʻe ala lavá.

27. ʻE lava fēfē ke ikuna ʻe ha fāmili ʻa e māmaní?

²⁷ Ko e ngaahi fāmili ʻoku nau nofo fāʻūtaha ʻi he ngāue fiefia, mo mafamafatatau ki he ʻOtuá, ʻo nau feinga līʻoa kakato ke nofo “taʻe ha ʻila, pea taʻe ha mele” mei he ngaahi tākiekina fakameleʻi ʻo e māmani ko ení, ko ha matavai kinautolu ʻo e fiefiá kia Sihova. (2 Pita 3:14; Palovepi 27:11) Ko e ngaahi fāmili peheé ʻoku nau muimui ʻi he ngaahi topuvaʻe ʻo Sīsū Kalaisí, ʻa ia naʻá ne talitekeʻi ʻa e feinga kotoa pē ʻa e māmani ʻo Sētané ke fakaʻuliʻi iá. ʻI he ofi ki he ngataʻanga ʻo ʻene moʻui fakaetangatá, naʻe malava ai ʻa Sīsū ke ne pehē: “Kuo u ikuna ʻa mamani ʻe au.” (Sione 16:33) ʻOfa ke toe ikunaʻi foki ʻe ho fāmilí ʻa e māmaní pea fiefia ʻi he moʻuí ʻo taʻengata!