1, 2. Ko e hā ʻa e ngaahi pole pea mo e ngaahi fiefia ʻoku lava ke ʻomai ʻe he ngaahi taʻu hongofulu tupú?

 KO E ʻi ai ha taʻu hongofulu tupu ʻi he fāmilí ʻoku kehe ʻaupito ia mei he ʻi ai ha taʻu nima pe naʻa mo ha taʻu hongofulu. Ko e kau taʻu hongofulu tupú ʻoku nau ʻomai ʻenau ngaahi pole mo ʻenau ngaahi palopalema tonu, ka ʻe toe lava foki ke nau ʻomai ʻa e ngaahi fiefia mo e ngaahi pale. Ko e ngaahi fakatātā hangē ko Siosifa, Tēvita, Siosaia, mo Tīmoté ʻoku fakahaaʻi ai ʻoku lava ke ngāue ʻo fua fatongia ʻa e toʻutupú pea maʻu ha vahaʻangatae lelei mo Sihova. (Senesi 37:​2-11; 1 Samiuela 16:​11-13; 2 Tuʻi 22:​3-7; Ngāue 16:​1, 2) ʻOku fakamoʻoniʻi ʻe he kau taʻu hongofulu tupu tokolahi he ʻahó ni ʻa e poini tatau. Ngalingali, ʻokú ke ʻiloʻi ha niʻihi ʻo kinautolu.

² Ka, ki he niʻihi ko e ngaahi taʻu hongofulu tupú ʻoku fakatupu hohaʻa. ʻOku hokosia ʻe he kau talavoú ʻa e ngaahi fetōʻaki fakaeongo. Ko e tamaiki tangata mo e tamaiki fefine taʻu hongofulu tupú ʻoku nau loto nai ke nau tauʻatāina lahi ange, pea te nau ongoʻi ʻita nai ʻi he ngaahi fakangatangata ʻoku fai kiate kinautolu ʻe heʻenau ngaahi mātuʻá. Neongo ia, ko e kau talavou peheé ʻoku nau kei mātuʻaki taʻetaukei pea ʻoku fiemaʻu kiate kinautolu ʻa e tokoni anga-ʻofa, mo kātaki mei heʻenau ngaahi mātuʻá. ʻIo, ʻoku lava ke fakafiefia ʻa e ngaahi taʻu hongofulu tupú, ka ʻe lava ke nau toe fakatupu puputuʻu​—fakatouʻosi ki he ngaahi mātuʻá pea ki he kau taʻu hongofulu tupú. ʻE lava fēfē ke tokoniʻi ʻa e kau talavoú he lolotonga ʻa e ngaahi taʻu ko ení?

3. Ko e hā ʻa e founga ʻe lava ke ʻoange ai ʻe he ngaahi mātuʻá ki heʻenau fānau kei talavoú ha faingamālie lelei ʻi he moʻuí?

³ Ko e ngaahi mātuʻa ʻoku nau muimui ki he faleʻi ʻa e Tohitapú ʻoku nau ʻoange ki heʻenau fānau kei talavoú ʻa e faingamālie lelei taha ʻoku ala lavá ke nau fakalakalaka ai  ʻo lavameʻa ʻi he kotoa ʻo e ngaahi ʻahiʻahi ko iá ke aʻu ki he tuʻunga ko e kakai lalahi fua fatongia. ʻI he fonua kotoa pē pea ʻi he lolotonga ʻo e ngaahi vahaʻa taimi kotoa pē, ko e ngaahi mātuʻa mo e kau taʻu hongofulu tupu ko ia ʻoku nau ngāueʻaki fakataha ʻa e ngaahi tefitoʻi moʻoni ʻa e Tohitapú kuo tāpuakiʻi kinautolu ʻaki ʻa ʻenau lavameʻa.​—Sāme 119:1.

4. Ko e hā ʻoku tautefito ai ʻa e mahuʻinga ʻo e talanoa fekoekoeʻí he lolotonga ʻa e ngaahi taʻu hongofulu tupú?

⁴ ʻOku pehē ʻe he Tohitapú: “ʻOku taʻeʻaonga ʻa e ngaahi palaní ʻi he ʻikai ha talanoa fekoekoeʻí.” (Palovepi 15:​22, NW) Kapau naʻe fiemaʻu ha talanoa fekoekoeʻi ʻi he taimi naʻe iiki ange ai ʻa e fānaú, ʻoku tautefito ʻa ʻene mātuʻaki mahuʻingá ʻi he lolotonga ʻa e ngaahi taʻu hongofulu tupú​—ʻi he taimi ʻoku ngalingali ke fakamoleki ai ʻe he tamaikí ʻa e taimi siʻisiʻi ʻi ʻapi pea lahi ange ʻa e taimi mo honau ngaahi kaumeʻa ʻi he akó pe ko ha ngaahi takanga kehe. Kapau ʻoku ʻikai ke ʻi ai ha talanoa fekoekoeʻi​—ʻo ʻikai ha fetuʻutaki faitotonu mo hangatonu ʻi he vahaʻa ʻo e fānaú mo e ngaahi mātuʻá​—ʻe lava ke hoko ai ʻa e kau taʻu hongofulu tupú ko e kau sola ʻi he fāmilí. Ko ia, ʻe lava fēfē ke tauhi ke ʻatā ʻa e ngaahi founga ʻo e fetuʻutakí?

5. ʻOku anga-fēfē ʻa hono fakalototoʻaʻi ʻa e kau taʻu hongofulu tupú ke nau vakai ki he meʻa ko ia ʻo fekauʻaki mo e fetuʻutaki mo ʻenau ngaahi mātuʻá?

⁵ Kuo pau ke fakahoko fakatouʻosi ʻe he kau taʻu hongofulu tupú mo e ngaahi mātuʻá ʻenau tafaʻakí ʻi he meʻá ni. Ko e moʻoni, ʻe ʻilo nai ʻe he kau talavoú ʻoku faingataʻa ange he taimi ko ʻení ke talanoa mo ʻenau ngaahi mātuʻá ʻi heʻenau fai ia ʻi he taimi naʻa nau kei siʻi ange aí. Ka neongo ia, manatuʻi ko e “taimi ʻoku ʻikai ai ha tataki pōtoʻí, ʻoku hinga ʻa e kakaí; ka ʻoku ʻi ai ʻa e fakamoʻui ʻi he tokolahi ʻo e kau faleʻí.” (Palovepi 11:​14, NW) Ko e ngaahi leá ni ʻoku ngāueʻaki ia ki he tokotaha kotoa, tatau pē ʻa e kei siʻi mo e taʻumotuʻa. Ko e kau taʻu hongofulu tupu ko ia ʻoku nau ʻiloʻi ení te nau mahinoʻi ʻoku nau kei fiemaʻu pē ʻa e tataki pōtoʻí, koeʻuhi ʻoku nau fehangahangai mo e ngaahi ʻīsiu ʻoku toe fihi ange ia ʻi he taimi ki muʻá. ʻOku totonu ke nau ʻiloʻi ko ʻenau ngaahi mātuʻa tuí ʻoku nau taau moʻoni ʻi he tuʻunga ko e  kau faleʻi koeʻuhi ʻoku nau taukei ange ʻi he moʻuí pea kuo nau fakamoʻoniʻi ʻenau tokanga anga-ʻofa ʻi he faai mai ʻa e ngaahi taʻu lahi. Mei hení, ʻi he tuʻunga ko eni ʻi heʻenau moʻuí, ko e kau taʻu hongofulu tupu fakapotopotó ʻe ʻikai ke nau tafoki mei heʻenau ngaahi mātuʻá.

6. Ko e hā ʻa e fakakaukau ʻe maʻu ʻe he ngaahi mātuʻa fakapotopoto mo anga-ʻofá ʻi he fekauʻaki mo e fetuʻutaki mo ʻenau kau taʻu hongofulu tupú?

⁶ Ko e ʻatā ʻa e fetuʻutakí ʻoku ʻuhinga iá ʻe feinga mālohi ʻa e mātuʻá ke faingamālie ʻi he taimi ʻoku ongoʻi ai ʻe ha taʻu hongofulu tupu ʻokú ne fiemaʻu ke talanoá. Kapau ko ha mātuʻa koe, fakapapauʻi ʻoku ʻatā ʻa e fetuʻutakí ʻi ha tuʻunga ʻi hoʻo tafaʻakí. ʻE ʻikai nai ke faingofua ʻa e meʻá ni. ʻOku pehē ʻe he Tohitapú ʻoku ʻi ai ʻa e “taimi ke silongo, mo e taimi ke lea.” (Koheleti 3:7, NW) ʻI he ongoʻi ʻe hoʻo taʻu hongofulu tupú ko ha taimi ia ke leá, ko ho taimi nai ia ke sīlongo aí. Mahalo pē kuó ke vaheʻi ʻa e taimi ko iá ki ha ako fakafoʻituitui, mālōlō, pe ngāue takatakai ʻi he falé. Ka, ʻo kapau ʻoku loto hoʻo tamasiʻí ke talanoa kiate koe, feinga ke feʻunuʻaki hoʻo ngaahi palaní peá ke fanongo. He kapau ʻe ʻikai, ʻe ʻikai nai te ne toe ʻahiʻahi feinga. Manatuʻi ʻa e faʻifaʻitakiʻanga ʻa Sīsuú. ʻI he taimi ʻe taha, naʻá ne ʻosi fakataimitēpileʻi ha taimi ke mālōlō ai. Ka ʻi he omi ʻa e kakaí ʻo fakapupunga takatakai ke fanongo kiate iá, naʻá ne tuku ʻa e mālōloó pea kamata ke ne akoʻi kinautolu. (Maake 6:​30-34) Ko e tokolahi taha ʻo e kau taʻu hongofulu tupú ʻoku nau ʻiloʻi ʻoku fou ʻenau ngaahi mātuʻá ʻi ha ngaahi moʻui femoʻuekina, ka ʻoku nau fiemaʻu ʻa e fakafiemālie he ʻoku ʻi ai ʻenau ngaahi mātuʻá kiate kinautolu ʻo kapau ʻe fiemaʻu. Mei hení, ʻai ke ke hoko ʻo ala faingamālie mo maʻu ʻa e mahinó.

7. Ko e hā ʻoku fiemaʻu ke fakaʻehiʻehi mei ai ʻa e ngaahi mātuʻá?

⁷ Feinga ke manatuʻi pe naʻe fēfē ʻa e taimi naʻá ke taʻu hongofulu tupu aí, pea ʻoua ʻe mole ʻa hoʻo fakakatá! ʻOku fiemaʻu ki he ngaahi mātuʻá ke nau fiefia ʻi heʻenau feohi mo ʻenau fānaú. ʻI he ala maʻu ʻa e taimi ʻataá, ʻoku anga-fēfē hono ngāueʻaki ia ʻe he ngaahi mātuʻá? Kapau ʻoku nau loto maʻu pē ke ngāueʻaki honau taimi ʻataá ʻi hono fai ʻa e ngaahi meʻa ʻoku ʻikai ke kau ki ai honau fāmilí, ʻe vave ʻa hono fakatokangaʻi ia ʻe he kau taʻu hongofulu tupú. Kapau ʻe aʻu  ʻa e kau talavoú ki ha fakamulituku ʻoku fakamahuʻingaʻi kinautolu ʻe honau ngaahi kaumeʻa ʻi he akó ʻo lahi ange ia ʻi heʻenau ngaahi mātuʻá, ʻe pau ke nau maʻu ai ha ngaahi palopalema.

8. ʻE lava fēfē ke ʻai ke maongo ki he fānaú ʻa e houngaʻia ki he faitotonú, ngāue mālohí, mo e ʻulungaanga totonú?

⁸ Kapau kuo teʻeki ke fakahūhū ʻe he ngaahi mātuʻá ki heʻenau fānaú ha houngaʻia ki he faitotonú mo e ngāue mālohí, ʻoku totonu ke nau fakapapauʻi ke fai ia lolotonga ʻa e ngaahi taʻu hongofulu tupú. (1 Tesalonaika 4:11; 2 Tesalonaika 3:10) ʻOku toe mātuʻaki mahuʻinga kiate kinautolu ke fakapapauʻi ʻoku tui līʻoa kakato ʻenau fānaú ki he mahuʻinga ʻo e nofo ʻi ha moʻui ʻulungaanga taau mo maʻá. (Palovepi 20:11) ʻOku fetuʻutaki lahi ha mātuʻa ʻi he ngaahi tafaʻaki ko ení ʻaki ʻa e founga ʻo e faʻifaʻitakiʻangá. Hangē pē ko e ngaahi husepāniti taʻetuí ʻa e lava ke “maʻu mai kinautolu ʻaki ʻa e ngaahi toʻonga ʻa honau ngaahi uaifi, kae ʻikai ʻaki ha lea,” ʻoku pehē ʻa e lava ke ako ʻe he kau taʻu hongofulu tupú ʻa e ngaahi tefitoʻi moʻoni totonú fakafou ʻi he ʻulungaanga ʻo ʻenau ngaahi mātuʻá. (1 Pita 3:1) Ka, ko e faʻifaʻitakiʻangá ʻiate ia pē ʻoku ʻikai ʻaupito ke feʻunga ia, koeʻuhi ʻoku toe fakaʻasi atu ʻa e fānaú ki he ngaahi faʻifaʻitakiʻanga kovi lahi pea ki he haʻu vave ʻa e ngaahi fakakaukau fakatauele ʻi tuʻa mei ʻapi. Ko ia ai, ko e ngaahi mātuʻa tokangá, ʻoku fiemaʻu ke nau ʻiloʻi ʻa e ngaahi fakakaukau ʻa ʻenau kau taʻu  hongofulu tupú ki he meʻa ʻoku nau sio mo fanongo ki aí, pea ʻoku fiemaʻu ʻi he meʻá ni ha fetalanoaʻaki mohu ʻuhinga.​—Palovepi 20:5.

9, 10. Ko e hā ʻoku totonu ai ke fakapapauʻi ʻe he ngaahi mātuʻá ke fakahinohinoʻi ʻenau fānaú ʻo fekauʻaki mo e ngaahi meʻa fakaefehokotaki fakasinó, pea ʻe lava fēfē ke nau fai ʻa e meʻá ni?

⁹ ʻOku tautefito ʻa e moʻoni ʻo e meʻá ni ʻi he taimi ʻoku hoko mai ai ki he ngaahi meʻa fakaefehokotaki fakasinó. Ngaahi mātuʻa, ʻoku mou mā ke lāulea ki he fehokotaki fakasinó mo hoʻomou fānaú? Neongo kapau ʻoku mou mā, fai ha feinga ke fai ia, he kuo pau ke ako ʻe hoʻomou fānau īkí fekauʻaki mo e kaveinga ko iá mei ha taha. Kapau ʻoku ʻikai te nau ʻilo ia meiate kimoutolu, ko hai ia ʻokú ne ʻilo pe ko e hā ʻa e fakamatala mioʻi te nau maʻú? ʻI he Tohitapú, ʻoku ʻikai ke fakaʻehiʻehi ʻa Sihova mei he ngaahi meʻa ʻoku natula fakaefehokotaki fakasinó, pea ʻoku totonu ke pehē mo e ngaahi mātuʻá.​—Palovepi 4:​1-4; 5:​1-21.

¹⁰ ʻOku fakafiefiá, he ʻoku ʻi he Tohitapú ʻa e fakahinohino māʻalaʻala ʻi he tafaʻaki ʻo e ʻulungaanga fakaefehokotaki fakasinó, pea kuo pulusi ʻe he Sōsaieti Taua Leʻó ʻa e fakamatala ʻaonga lahi ʻo fakahaaʻi ai ʻoku kei ngāueʻaki pē ʻa e fakahinohino ko ení ʻi he māmani onopōní. Ko e hā ʻoku ʻikai ke ngāueʻaki ai ʻa e tokoni ko ení? Ko e fakatātaá, ko e hā ʻoku ʻikai te ke fakamanatu ai mo ho fohá pe ʻofefiné ngaahi vahe feʻungamālie ʻi he Voliume 1 mo e 2 ʻo e tohi Questions Young People Ask​—Answers That Work? Te ke ʻohovale ʻo fiefia nai ʻi he ngaahi olá.

11. Ko e hā ha founga ola lelei taha ki he ngaahi mātuʻá ke akoʻi ʻaki ʻenau fānaú ki he founga ʻo e tauhi kia Sihová?

¹¹ Ko e hā ʻa e kaveinga mahuʻinga taha ʻoku totonu ke lāulea ki ai ʻa e ngaahi mātuʻá mo e fānaú? Naʻe lave ki ai ʻa e ʻapositolo ko Paulá ʻi heʻene tohi: “Hanganaki tauhi hake [hoʻomou fānaú] ʻi he akonaki mo e fakatonutonu fakaʻatamai ʻa Sihová.” (Efeso 6:4, NW) ʻOku fiemaʻu ke hanganaki ako ʻa e fānaú ʻo fekauʻaki mo Sihova. ʻOku tautefito, ʻa e fiemaʻú ke nau ako ke ʻofa kiate ia, pea ʻoku totonu ke nau loto ke tauhi kiate ia. ʻI hení foki, ʻoku lava ke akoʻi ʻa e meʻa lahi ʻaki ʻa e faʻifaʻitakiʻangá. Kapau ʻoku sio ʻa e kau talavoú ʻoku ʻofa ʻenau ngaahi mātuʻá ki he ʻOtuá ‘ʻaki ʻa e kotoa ʻo honau  lotó, mo e kotoa ʻo honau laumalié, mo e kotoa ʻo honau ʻatamaí’ pea ʻoku fakatupu ʻe he meʻá ni ʻa e ngaahi fua lelei ʻi he moʻui ʻa ʻenau ngaahi mātuʻá, ʻe tākiekina lelei nai ai kinautolu ke nau fai ʻa e meʻa tatau. (Mātiu 22:37) ʻI he founga meimei tatau, kapau ʻoku sio ʻa e kau talavoú ʻoku maʻu ʻe heʻenau ngaahi mātuʻá ha fakakaukau lelei fekauʻaki mo e ngaahi meʻa fakamatelié, ʻo fakamuʻomuʻa ʻa e Puleʻanga ʻo e ʻOtuá, ʻe tokoniʻi ai kinautolu ke nau fakatupulekina ʻa e fakakaukau fakaeʻatamai tatau.​—Koheleti 7:12; Mātiu 6:31-33.

12, 13. Ko e hā ʻa e ngaahi poini ʻoku totonu ke tauhi maʻu ʻi he fakakaukaú ʻo kapau ʻoku fiemaʻu ke lavameʻa ʻa e ako fakafāmilí?

¹² Ko ha tokoni tuʻu-ki-muʻa ki hono fakafetuʻutaki ʻa e ngaahi meʻa mahuʻinga fakalaumālié ki he kau talavoú ko ha ako Tohitapu fakafāmili fakauike. (Sāme 119:​33, 34; Palovepi 4:​20-23) Ko hono maʻu ha ako tuʻumaʻu peheé ʻoku mātuʻaki mahuʻinga. (Sāme 1:​1-3) ʻOku totonu ke ʻiloʻi ʻe he ngaahi mātuʻá mo ʻenau fānaú kuo pau ke fakataimitēpileʻi ʻo muʻomuʻa ʻa e ako fakafāmilí ʻi he ngaahi meʻa kehé, ʻo ʻikai feliliuaki. ʻIkai ko ia pē, ʻoku mātuʻaki fiemaʻu ʻa e fakakaukau totonú kapau ʻoku fiemaʻu ke ola lelei ʻa e ako fakafāmilí. Naʻe pehē ʻe ha tamai ʻe taha: “Ko e fakapulipulí ko  hono fakaʻaiʻai ʻe he tokotaha faiakó ha ʻatimosifia nonga kae anga-fakaʻapaʻapa he lolotonga ʻa e ako fakafāmilí​—ʻo fai taʻefakaeouau kae ʻikai ke fakavaʻivaʻinga. Ko e mafamafatatau totonú ʻe ʻikai nai faingofua maʻu pē ke maʻu, pea ʻe toutou fiemaʻu ki he tamaikí ha feʻunuʻaki ʻi he fakakaukaú. Kapau ʻoku ʻikai ke lele lelei ʻa e ngaahi meʻá ʻo tuʻo taha pe tuʻo ua, kītaki pea hanga atu ki he taimi hoko maí.” Naʻe pehē ʻe he tamai tatau pē ko ʻene lotu ki muʻa ʻi he ako taki taha, naʻá ne kole fakahangatonu ai ha tokoni meia Sihova ki ha fakakaukau totonu ʻi he tokotaha kotoa ʻoku kau ki aí.​—Sāme 119:66.

¹³ Ko hono fai ʻa e ako fakafāmilí ko e fatongia ia ʻo e ngaahi mātuʻa tuí. Ko e moʻoni, ʻoku ʻikai nai ko ha kau faiako talēnitiʻia ʻa e ngaahi mātuʻa ʻe niʻihi, pea ʻe faingataʻa nai kiate kinautolu ke maʻu ha ngaahi founga ke ʻai ai ʻa e ako fakafāmilí ke fakamānako. Ka neongo ia, kapau ʻoku mou ʻofa ʻi hoʻomou kau taʻu hongofulu tupú “i he gaue moe mooni,” te mou holi ai ke tokoniʻi kinautolu ʻi ha founga anga-fakatōkilalo mo faitotonu ke nau laka ki muʻa fakalaumālie. (1 Sione 3:​18, PM) Te nau lāunga nai ʻi he taimi ki he taimi, ka ʻoku ngalingali te nau ʻiloʻi hoʻomou mahuʻingaʻia lahi ʻi haʻanau leleí.

14. ʻE lava fēfē ke ngāueʻaki ʻa e Teutalonome 11:​18, 19 ʻi he taimi ʻo hono fakafetuʻutaki ʻo e ngaahi meʻa fakalaumālié ki he kau taʻu hongofulu tupú?

¹⁴ Ko e ako fakafāmilí ʻoku ʻikai ko e taimi pē ia ke fakafetuʻutaki atu ai ʻa e ngaahi meʻa ʻoku mahuʻinga fakalaumālié.  ʻOku mou manatuʻi ʻa e fekau ʻa Sihova ki he ngaahi mātuʻá? Naʻá ne pehē: “Te mou ʻai ʻeku ngaahi lea ni ki homou loto, pea ki homou laumalie; pea te mou noʻo ia moʻo fakaʻilonga ʻi homou nima, pea te nau tuʻu moʻo failaketeli ʻi homou vahaʻa mata. Pea te mou ako ia ki hoʻomou fanau, hoʻomou talanoa ki ai ʻi hoʻo nofo ʻi ho fale, pea ʻi hoʻo fononga ʻi he hala, pea ʻi hoʻo tokoto, pea ʻi hoʻo tuʻu hake.” (Teutalonome 11:​18, 19; sio foki ki he Teutalonome 6:​6, 7.) ʻOku ʻikai ʻuhinga eni ia kuo pau ke malanga tuʻumaʻu ʻa e ngaahi mātuʻá ki heʻenau fānaú. Ka ko ha ʻuluʻi fāmili anga-ʻofa ʻoku totonu ke ne tokanga maʻu pē ki he ngaahi faingamālie ke langa hake ai ʻa e fakakaukau fakalaumālie ʻa hono fāmilí.

15, 16. (a) Ko e hā ʻa e akonaki? (e) Ko hai ʻoku fakafatongiaʻaki ki hono fakahoko ʻo e akonakí, pea ko hai ʻokú ne maʻu ʻa e fatongia ke fakapapauʻi ʻe fai ʻa e tokanga ki aí?

¹⁵ Ko e akonakí ko e ako ia ʻokú ne fai ʻa e fakatonutonu, pea ʻoku kau ki ai ʻa e fetuʻutakí. Ko e akonakí ʻoku fakahoko ai ʻa e foʻi fakakaukau ʻo e fakatonutonú ʻo lahi ange ia ʻi he tauteá​—neongo ʻe fiemaʻu nai ki ai ʻa e tauteá. Naʻe fiemaʻu ki hoʻo fānaú ʻa e akonakí ʻi he taimi naʻa nau kei siʻi ange aí, pea kuo nau taʻu hongofulu tupu eni, ʻoku nau kei fiemaʻu pē ha faʻahinga founga ʻo e akonakí, mahalo ʻo toe lahi ange ia. Ko e kau taʻu hongofulu tupu fakapotopotó ʻoku nau ʻiloʻi ʻoku moʻoni eni.

¹⁶ ʻOku pehē ʻe he Tohitapú: “Oku [“taʻeʻapasia,” NW] ae vale ki he akonaki a ene tamai: ka oku fakabotoboto ia aia oku tokaga ki he valoki.” (Palovepi 15:​5, PM) ʻOku tau ako ʻa e meʻa lahi mei he konga Tohitapu ko ení. ʻOku fakahuʻunga mai ai ʻe fai ha akonaki. ʻE ʻikai lava ke ‘tokaga ki he valokí’ ha taʻu hongofulu tupu, kapau ʻoku ʻikai ke fai ia. ʻOku foaki ʻe Sihova ʻa e fatongia ki hono fakahoko ʻo e akonakí ki he ngaahi mātuʻá, tautefito ki he tamaí. Kae kehe, ko e fatongia ki he fanongo ki he akonaki ko iá ko e meʻa ia ʻa e taʻu hongofulu tupú. Te ne ako lahi ange pea fai ʻa e ngaahi fehālaaki siʻisiʻi ange kapau te ne tokanga ki he akonaki fakapotopoto ʻa ʻene tamaí mo ʻene faʻeé. (Palovepi 1:8) ʻOku pehē ʻe he Tohitapú: “E hoko ae majiva moe ma kiate  ia oku ne tekeʻi ae akonaki: ka e hakeakiʻi ia aia oku tokaga ki he valoki.”—Palovepi 13:​18, PM.

17. Ko e hā ʻa e mafamafatatau ʻoku fiemaʻu ke fakataumuʻa ki ai ʻa e ngaahi mātuʻá ʻi he taimi ʻo hono fakahoko ʻo e akonakí?

¹⁷ ʻI hono akonakiʻi ʻa e kau taʻu hongofulu tupú, ʻoku fiemaʻu ke mafamafatatau ʻa e ngaahi mātuʻá. ʻOku totonu ke nau fakaʻehiʻehi mei he hoko ʻo fuʻu fefeka ʻo nau fakaʻitaʻi ʻenau fānaú, mahalo ʻe aʻu ʻo nau maumauʻi ʻa e falala fakaekita ʻenau fānaú. (Kolose 3:​21) Pea neongo ia ʻoku ʻikai fiemaʻu ke fuʻu fakangofua tavale ʻa e ngaahi mātuʻá ʻo mole ai mei heʻenau tamaikí ʻa e ako mātuʻaki mahuʻingá. Ko e fakangofua tavale peheé ʻe lava ke fakatuʻutāmaki ia. ʻOku pehē ʻe he Palovepi 29:17: “Tautea ho foha, pea te ne hoko ko ho nongaʻanga; ʻio, te ne taufetuku fiemalie ki hoʻo moʻui.” Kae kehe, ʻoku pehē ʻe he Palovepi vahe 29 veesi 21 (NW): “Kapau ʻoku fakapelepelekoviʻi ʻe ha taha ʻa ʻene sevānití mei he kei talavoú ʻo faai mai ai, ʻi heʻene moʻui ʻamuí te ne aʻu ai ʻo hoko ko ha tokotaha taʻehoungaʻia.” Neongo ʻoku talanoa ʻa e veesi ia ko ení ʻo fekauʻaki mo ha sevāniti, ʻoku ngāueʻaki tatau pē ia ki ha tamasiʻi pē ʻi he fāmilí.

18. Ko e akonakí ko ha fakamoʻoni ia ʻo e hā, pea ko e hā ke fakaʻehiʻehi mei ai ʻi he taimi ʻoku fakahoko ai ʻe he ngaahi mātuʻá ʻa e akonaki huʻufatahá?

¹⁸ ʻI hono moʻoní, ko e akonaki totonú ko ha fakamoʻoni ia ʻo e ʻofa ʻa e mātuʻá ki heʻene tamá. (Hepelu 12:​6, 11) Kapau ko ha mātuʻa koe, ʻokú ke ʻiloʻi ʻoku faingataʻa ke tauhi maʻu ʻa e akonaki huʻufataha, mo fakaʻatuʻí. Telia ʻa e melinó, ʻe hā ngali faingofua nai ke fakaʻatā ha taʻu hongofulu tupu loto-fefeka ke ne fai ʻa e meʻa ʻokú ne loto ki aí. Kae kehe, ʻe faifai pē ʻo utu ʻe ha mātuʻa ʻa ia ʻoku muimui ʻi he ʻalunga ki muí ha fāmili ʻa ia ʻoku ʻikai ke mapuleʻi.​—Palovepi 29:15; Kaletia 6:9.

19, 20. ʻE lava fēfē ke feangai fakapotopoto ʻa e ngaahi mātuʻá mo e meʻa fekauʻaki mo e fakafiefiá ki heʻenau kau taʻu hongofulu tupú?

¹⁹ ʻI he ngaahi taimi ki muʻá naʻe faʻa ʻamanekina ʻa e fānaú ke nau tokoni ʻi he ʻapí pe ʻi he fāmá. ʻI he ʻahó ni ʻoku tokolahi ʻa e kau taʻu hongofulu tupu ʻoku nau maʻu ha taimi ʻatā lahi ʻoku taʻetokangaʻi. Ke fakafonu ʻa e taimi ko iá, ʻoku tokonaki mai ʻe he māmani fakakōmesialé ha naunau  hulu fau ke fakafonuʻaki ʻa e taimi ʻatā ko iá. ʻOku tānaki atu ki he meʻá ni ʻa e moʻoniʻi meʻa ko ia ʻo e tuku ʻe he māmaní ʻa e mahuʻinga mātuʻaki siʻisiʻi ki he ngaahi tuʻunga ʻulungaanga taau ʻa e Tohitapú, pea ʻokú ke maʻu ai ha founga ke ala lava ʻo hoko ai ha fakatuʻutāmaki.

²⁰ Mei hení, ko e mātuʻa fakapotopotó ʻokú ne tauhi maʻu ʻa e totonu ke fai ha ngaahi fili aofangatuku ʻo fekauʻaki mo e fakafiefiá. Ko ia ai, ʻoua naʻa ngalo, ʻoku tupu hake ʻa e taʻu hongofulu tupú. ʻI he taʻu taki taha, ko iá ʻoku ngalingali te ne ʻamanaki ke fai ange kiate ia ʻo hangē ko ha tokotaha lahí. Ko ia ai, ʻoku fakapotopoto ki ha mātuʻa ke ne fakaʻatā ha tauʻatāina lahi ange ʻi he fili ʻo e fakafiefiá ʻi he hoko ʻo taʻumotuʻa ange ʻa e tokotaha taʻu hongofulu tupú​—kehe pē ʻoku tapua mei he ngaahi fili ko iá ʻa e fakalakalaka ki he matuʻotuʻa fakalaumālié. ʻI he taimi ʻe niʻihi, ʻe fai nai ʻe he taʻu hongofulu tupú ha ngaahi fili taʻefakapotopoto ʻi he mūsiká, ngaahi feohí, mo e alā meʻa peheé. ʻI he hoko ʻa e meʻá ni, ʻoku totonu ke lāulea ki ai mo e taʻu hongofulu tupú koeʻuhi ke ne fai ha ngaahi fili lelei ange ʻi he kahaʻú.

21. ʻE anga-fēfē hano hanga ʻe he fakaʻatuʻi ʻi he lahi ʻo e taimi ʻoku fakamoleki ʻi he fakafiefiá ʻo maluʻi ha taʻu hongofulu tupu?

²¹ Ko e hā e lahi ʻo e taimi ʻoku totonu ke vaheʻi ki he fakafiefiá? ʻI he ngaahi fonua ʻe niʻihi ʻoku tataki ai ʻa e kau taʻu hongofulu tupú ke nau tui ʻoku ʻi ai ʻenau totonu ke hokohoko taʻefakangatangata atu ʻa e fakafiefiá. Mei hení, ʻe palani nai ʻe ha talavou ʻa ʻene taimi-tēpilé koeʻuhi ke ne ʻalu mei he “taimi fakafiefia” ʻe taha ki he fakafiefia hono hokó. Ko e meʻa ia ʻa e ngaahi mātuʻá ke nau fakahaaʻi ʻa e lēsoni ko ia ʻo e totonu ke toe fakamoleki ʻa e taimí ʻi he ngaahi meʻa kehé, hangē ko e fāmilí, ako fakafoʻituituí, feohi mo e faʻahinga ʻoku matuʻotuʻa fakalaumālié, ngaahi fakataha faka-Kalisitiané, mo e ngaahi ngāue ʻi he fāmilí. ʻE hanga ʻe he meʻá ni ʻo taʻofi ʻa e ‘ngaahi mālie ʻo e moʻuí ni’ mei haʻanau kāsia ʻa e Folofola ʻa e ʻOtuá.​—Luke 8:​11-15.

22. ʻOku totonu ke mafamafatatau mo e hā ʻa e fakafiefiá ʻi ha moʻui ʻa ha taʻu hongofulu tupu?

²² Naʻe pehē ʻe Tuʻi Solomone: “Kuo u ʻilo ʻoku ʻikai ha lelei ʻi he nofo, ka ke te fiefia mo fai lelei lolotonga ʻete moʻui. Ka ko eni foki, ko e kai mo inu ʻa e tangata kotoa pe, mo ʻene ʻilo lelei ʻi heʻene ngaahi ngaue kehekehe, ko e meʻa foaki ia ʻa e  ʻOtua.” (Koheleti 3:​12, 13) ʻIo, ko e fiefiá ko e konga ia ʻo ha moʻui mafamafatatau. Ka ʻoku pehē pē mo e ngāue mālohí. Ko e kau taʻu hongofulu tupu tokolahi ʻi he ʻahó ni ʻoku ʻikai te nau ʻiloʻi ʻa e fiemālie ʻoku hoko mai mei he ngāue mālohí pe ko e ongoʻi ʻo e ʻapasiaʻi-kita ʻoku hoko mai mei hano maʻu ha palopalema pea solova iá. ʻOku ʻikai ʻoange ki he niʻihi ʻa e faingamālie ke fakatupulekina ai ha pōtoʻi pe ngāue koeʻuhi ke tokoniʻi ʻaki kinautolu ʻi he moʻui ʻamuí. Ko ha pole moʻoni eni ki he mātuʻá. Te ke ʻai ke fakapapauʻi ʻoku ʻi ai ha ngaahi faingamālie pehē ʻo hoʻo fānau īkí? Kapau te ke lava ʻo lavameʻa ʻi hono akoʻi hoʻo taʻu hongofulu tupú ke ne fakamahuʻingaʻi pea aʻu ʻo fiefia ʻi he ngāue mālohí, ko iá te ne fakatupulekina ha fakakaukau lelei ʻa ia te ne ʻomai ha ngaahi ʻaonga ʻi he kotoa ʻo e moʻuí.

23. ʻE lava fēfē ke fakalototoʻaʻi ʻe he ngaahi mātuʻá ʻenau kau taʻu hongofulu tupú?

²³ Naʻa mo e ʻi ai haʻo ngaahi palopalema mo hoʻo taʻu hongofulu tupú, ʻoku kei moʻoni pē ʻa e lau ʻa e konga Tohitapú: “Ko ʻOfa ʻoku ʻikai ke kaʻanga ia ʻi ha taimi.” (1 Kolinito 13:8) ʻOua ʻaupito ʻe tuku ʻa hono fakahāhā ʻo e ʻofa ʻa ia ʻoku ʻikai toe veiveiua ʻa hoʻo ongoʻí. ʻEke hifo kiate koe, ‘ʻOku ou fakavīkivikiʻi ʻa e tama taki taha ʻi heʻene ngaahi lavameʻa ʻi hono fakaleleiʻi ʻa e ngaahi palopalemá pe ikuʻi ʻa e ngaahi fakafaingataʻaʻiaʻangá? ʻOku ou puke ʻa e ngaahi faingamālié ke fakahāhā ai ʻa ʻeku ʻofa mo e houngaʻia ki heʻeku fānaú, ki muʻa ke fakalaka atu ʻa e ngaahi faingamālie ko iá?’ Neongo ʻe ʻi ai nai ai ha ngaahi fetaʻemahinoʻaki ʻi he taimi ʻe niʻihi, kapau ʻoku ongoʻi fakapapauʻi ʻe he kau taʻu hongofulu tupú ʻa hoʻo ʻofa kiate kinautolú, ʻoku ngalingali lahi ange te nau toe fakafoki atu ʻa e ʻofa ko iá.

24. Ko e hā ʻa e tefitoʻi moʻoni Fakatohitapu ʻoku moʻoni ʻi he tuʻunga fakalūkufuá ʻi hono tauhi hake ʻo e fānaú, ka ko e hā ʻoku totonu ke manatuʻí?

²⁴ Ko e moʻoni, ʻi he tupu hake ʻa e fānaú ki he tuʻunga ʻo e kakai lalahí, ʻe faifai atu pē ʻo nau fai ha ngaahi fili mātuʻaki mafatukituki maʻanautolu. ʻI he ngaahi tuʻunga ʻe niʻihi ʻe ʻikai nai ke saiʻia ʻa e ngaahi mātuʻá ʻi he ngaahi fili ko iá. Fēfē kapau ʻe fili ʻa ʻenau tamá ke ʻikai toe hoko atu ʻa ʻene  tauhi kia Sihova ko e ʻOtuá? ʻE lava ke hoko eni. Naʻa mo e niʻihi ʻo e ngaahi foha fakalaumālie tonu ʻo Sihová naʻa nau talitekeʻi ʻa ʻene faleʻí pea fakahāhā ʻa ʻenau angatuʻu. (Senesi 6:2; Siutasi 6) Ko e fānaú ʻoku ʻikai ko e ngaahi komipiuta kinautolu, ʻa ia ʻe lava ke fakapolokalamaʻi ke nau ngāue ʻi he founga ʻoku tau loto ki aí. Ko e ngaahi meʻamoʻui kinautolu ʻoku nau maʻu ʻa e tauʻatāina ke fili, te nau fai ʻa e tali ʻi he ʻao ʻo Sihová ki he ngaahi fili ʻoku nau faí. ʻOku kei moʻoni pē ʻa e lau ʻa e Palovepi 22:6 ʻi ha tuʻunga fakalūkufua: “Atu ako ki ha tamasiʻi, ʻo tāu mo hono ʻalunga, talaatu ʻo ka ne ka motuʻa ʻe ʻikai te ne hiki mei ai.”

25. Ko e hā ʻa e founga lelei taha ki he ngaahi mātuʻá ke fakahāhā ai ʻa e fakamālō kia Sihova ki he monū ʻo e hoko ʻo ʻi he tuʻunga ʻo e mātuʻa tauhi fānaú?

²⁵ Ko ia ai, fakahaaʻi leva ki hoʻo fānaú ʻa e ʻofa lahi. Fai hoʻo lelei tahá ke muimui ʻi he ngaahi tefitoʻi moʻoni faka-Tohitapú ʻi hono ʻohake kinautolú. Fokotuʻu ha faʻifaʻitakiʻanga lelei ʻo e ʻulungaanga fakaʻotuá. Te ke ʻoange ai ki hoʻo fānaú ʻa e faingamālie lelei taha ke tupu hake ai ʻo hoko ko e kakai lalahi, fua fatongia mo manavahē-ʻOtua. Ko e founga lelei taha eni ki he ngaahi mātuʻá ke fakahāhā ai ʻa e fakamālō kia Sihova ʻi he monū ʻo e ʻi he tuʻunga ko e mātuʻa tauhi fānaú.