Lēsoni 1

Founga ʻOku Lava ke ʻIlo Ai ʻa e Meʻa ʻOku Fiemaʻu ʻe he ʻOtuá

Ko e hā ʻa e fakamatala mahuʻinga ʻoku ʻi he Tohitapú? (1)

Ko hai ʻa e faʻu-tohi ʻo e Tohitapú? (2)

Ko e hā ʻoku totonu ai ke ke ako ʻa e Tohitapú? (3)

1. Ko e Tohitapú ko ha meʻaʻofa mahuʻinga ia mei he ʻOtuá. ʻOku hangē ia ha tohi mei ha tamai ʻofa ki heʻene fānaú. ʻOku talamai ai kiate kitautolu ʻa e moʻoni fekauʻaki mo e ʻOtuá​—ko hai ia pea ko e hā ʻa ʻene ngaahi tuʻungá. ʻOku fakamatala ai ki he founga ke fekuki ai mo e ngaahi palopalemá pea mo e founga ke maʻu ai ʻa e fiefia moʻoní. Ko e Tohitapú pē ʻokú ne talamai kiate kitautolu ʻa e meʻa kuo pau ke tau fai ke fakahōifuaʻi ai ʻa e ʻOtuá.​—Sāme 1:​1-3; Aisea 48:​17, 18.

2. Naʻe tohi ʻa e Tohitapú ʻe he kau tangata ʻe toko 40 nai ʻi he vahaʻa taimi ko e taʻu ʻe 1,600, ʻo kamata mei he 1513 K.M. ʻOku faʻuʻaki ia ʻa e ngaahi tohi iiki ʻe 66. Ko e faʻahinga ko ia naʻa nau tohi ʻa e Tohitapú naʻe fakamānavaʻi ʻe he ʻOtuá. Naʻa nau tohi ʻa ʻene ngaahi fakakaukaú, ʻikai ko haʻanautolú. Ko ia ko e ʻOtuá ʻi hēvani, ʻikai ko ha tangata ʻi he māmaní, ʻa e Faʻu-Tohi ʻo e Tohitapú.​—2 Timote 3:​16, 17; 2 Pita 1:​20, 21.

3. Naʻe fakapapauʻi ʻe he ʻOtuá ke hiki totonu mo fakatolonga mai ʻa e Tohitapú. Kuo lahi ange ʻa e ngaahi Tohitapu kuo pulusí ʻi ha toe tohi kehe. ʻE ʻikai ke fiefia ʻa e tokotaha kotoa ʻi he sio atu ʻokú ke ako ʻa e Tohitapú, kae ʻoua ʻe ʻai ia ke ne taʻofi koe. ʻOku fakatuʻunga ho kahaʻu taʻengatá ʻi hoʻo ʻiloʻi ʻa e ʻOtuá mo fai hono finangaló neongo ha faʻahinga fakafepaki pē.​—Mātiu 5:​10-12; Sione 17:3.