Lēsoni 14

Founga ʻo Hono Fokotuʻutuʻu Maau ʻo e Kau Fakamoʻoni ʻa Sihová

Ko fē ʻa e taimi naʻe kamata ai ʻa e Kau Fakamoʻoni ʻa Sihová ʻi onopōní? (1)

ʻOku anga-fēfē hono fai ʻa e ngaahi fakataha ʻa e Kau Fakamoʻoni ʻa Sihová? (2)

ʻOku anga-fēfē hono tokangaʻi ʻa e ngaahi fakamolé? (3)

Ko hai ʻoku takimuʻa ʻi he fakatahaʻanga taki taha? (4)

Ko e hā ʻa e ngaahi fakataha lalahi ange ʻoku fai ʻi he taʻu taki taha? (5)

Ko e hā ʻa e ngāue ʻoku fai ʻi honau ʻuluʻi ʻōfisí mo e ngaahi ʻōfisi vaʻá? (6)

1. Naʻe kamata ʻa e Kau Fakamoʻoni ʻa Sihová ʻi onopooni ʻi he 1870 tupú. ʻI he kamataʻangá, naʻe ui kinautolu ko e Kau Ako Tohitapu. Ka ʻi he 1931 naʻa nau ohi ai ʻa e hingoa Fakatohitapu ko e Kau Fakamoʻoni ʻa Sihová. (Aisea 43:10) Kuo tupu ʻa e kautahá mei heʻene kamata siʻisiʻí ʻo aʻu ki he Kau Fakamoʻoni ʻe laui miliona, ʻa ia ʻoku nau femoʻuekina ʻi he malanga ʻi he ngaahi fonua ʻe 230 tupu.

2. Ko e lahi taha ʻo e ngaahi fakatahaʻanga ʻa e Kau Fakamoʻoni ʻa Sihová ʻoku nau fai ʻa e ngaahi fakataha tuʻo tolu ʻi he uike taki taha. ʻOku fakaafeʻi atu koe ke ke maʻu ha taha ʻo e ngaahi fakatahá ni. (Hepelu 10:​24, 25) Ko e Tohitapú ʻa e makatuʻunga ki he ngaahi meʻa ʻoku akoʻí. ʻOku kamata mo fakaʻosi ʻa e ngaahi fakatahá ʻaki ʻa e lotu. ʻOku hivaʻi foki ʻi he lahi taha ʻo e ngaahi fakatahá ʻa e “hiva fakalaumālie” ʻoku ongoʻi mei he lotó. (Efeso 5:​18, 19) ʻOku ʻikai totongi ʻa e hū ki aí, pea ʻoku ʻikai ke fai ha lī paʻanga ai.​—Mātiu 10:8.

3. Ko e lahi taha ʻo e ngaahi fakatahaʻangá ʻoku nau fakataha ʻi ha Fale Fakatahaʻanga. Ko e ngaahi langa faingofua pē ʻeni ia ʻoku faʻa langa pē ʻe he kau Fakamoʻoni ngāue pole. ʻE ʻikai te ke sio koe ʻi he ngaahi ʻīmisi, koluse, pe meʻa pehē ʻi he Fale Fakatahaʻangá. ʻOku totongi ʻa e fakamolé ʻaki ʻa e ngaahi tokoni loto-fiefoaki pē. ʻOku ʻi ai ha puha lī meʻaʻofa  maʻá e faʻahinga ʻoku nau loto ke fai ha tokoní.​—2 Kolinito 9:7.

4. ʻI he fakatahaʻanga taki taha, ʻoku ʻi ai ʻa e kau mātuʻa, pe kau ʻovasia. ʻOku nau takimuʻa ʻi he faiako ʻi he fakatahaʻangá. (1 Timote 3:​1-7; 5:17) ʻOku tokoni kiate kinautolu ʻa e kau sevāniti fakafaifekau. (1 Timote 3:​8-10, 12, 13) Ko e kau tangatá ni ʻoku ʻikai te nau māʻolunga hake kinautolu ʻi he toenga ʻo e fakatahaʻangá. (2 Kolinito 2:2 [1:​24, PM]) ʻOku ʻikai ke ʻoange kiate kinautolu ha ngaahi hingoa fakalakanga makehe. (Mātiu 23:​8-10) ʻOku ʻikai te nau teunga kehe kinautolu mei he niʻihi kehé. ʻOku ʻikai ke totongi ʻenau ngāué. ʻOku loto-lelei pē ʻa e kau mātuʻá ke tokanga ki he ngaahi fiemaʻu fakalaumālie ʻa e fakatahaʻangá. ʻOku malava ke nau tokonaki mai ʻa e fakafiemālie mo e tataki ʻi he taimi ʻo e mamahí.​—Semisi 5:​14-​16; 1 Pita 5:​2, 3.

5. ʻOku toe fai foki ʻe he Kau Fakamoʻoni ʻa Sihová ʻa e ngaahi ʻasemipilī lalahi pe ngaahi fakataha-lahi ʻi he taʻu taki taha. ʻI he ngaahi taimi ko ʻení ʻoku fakatahataha mai ai ʻa e ngaahi fakatahaʻanga lahi ki ha polokalama makehe ʻo e fakahinohino mei he Tohitapú. Ko hono papitaiso ʻo e kau ākonga foʻoú ko ha konga tuʻumaʻu ia ʻo e polokalama ʻo e ʻasemipilií pe fakataha-lahi taki taha.​—Mātiu 3:​13-17; 28:​19, 20.

6. Ko e ʻuluʻi ʻōfisi ʻo e Kau Fakamoʻoni ʻa Sihová ʻoku ʻi Niu ʻIoke ia. ʻOku ʻi ai mo e Kulupu Pulé, ko ha kulupu tefito ia ʻo e kau mātuʻa taukei ʻoku nau tokangaʻi ʻa e fakatahaʻangá ʻi māmani lahi. ʻOku toe ʻi ai foki mo e ngaahi ʻōfisi vaʻa ʻoku laka hake he 100 ʻoku takatakai ʻi he māmaní. ʻI he ngaahi feituʻu ko ʻení, ʻoku tokoni ai ʻa e kau ngāue pole ki hono pulusi mo hono fakaheka vaka atu ʻo e ngaahi tohi faka-Tohitapú. ʻOku toe fai foki mo e tataki ki hono fokotuʻutuʻu maau ʻo e ngāue fakamalangá. Fēfē ke fokotuʻutuʻu ha ʻaʻahi ki he ʻōfisi vaʻa ʻoku ofi taha atu kiate koé?