Lēsoni 2

Ko Hai ʻa e ʻOtuá?

Ko hai ʻa e ʻOtua moʻoní, pea ko hai hono huafá? (1, 2)

Ko e faʻahinga sino fēfē ʻokú ne maʻú? (3)

Ko e hā ʻa hono ngaahi ʻulungaanga tuʻu-ki-muʻá? (4)

ʻOku totonu ke tau ngāueʻaki ha ngaahi ʻīmisi mo e ngaahi fakaʻilongá ʻi heʻetau lotu kiate iá? (5)

Ko e hā ʻa e founga ʻe ua ʻoku malava ke tau ako ai ʻo kau ki he ʻOtuá? (6)

1. ʻOku lahi ʻa e ngaahi meʻa ʻoku lotu ki ai ʻa e kakaí. Ka ʻoku talamai ʻe he Tohitapú kiate kitautolu ʻoku taha pē ʻa e ʻOtua MOʻONÍ. Naʻá ne fakatupu ʻa e meʻa kotoa pē ʻi hēvani mo māmani. Koeʻuhi naʻá ne foaki mai kiate kitautolu ʻa e moʻuí, ko ia pē ʻa e Tokotaha ʻoku totonu ke tau lotu ki aí.​—1 Kolinito 8:​5, 6; Fakahā 4:11.

2. ʻOku lahi ʻa e ngaahi hingoa fakalakanga ʻo e ʻOtuá ka ʻoku taha pē ʻa hono huafá. Ko e huafa ko iá ko SIHOVA. ʻI he ngaahi Tohitapu lahi, kuo toʻo mei ai ʻa e huafa ʻo e ʻOtuá ia pea kuo fetongiʻaki ia ʻa e hingoa fakalakanga ko e ʻEIKI pe ʻOTUA. Ka ʻi he taimi naʻe tohi ai ʻa e Tohitapú, naʻe hā ai ʻa e huafa ʻo Sihová ʻo tuʻo 7,000 nai!​—Ekisoto 3:15; Sāme 83:18.

3. ʻOku ʻi ai ha sino ʻo Sihova, ka ʻoku ʻikai ke hangē ia ko hoʻotautolú sino. “Ko e ʻOtua ko e laumālie,” ko e lau ia ʻa e Tohitapú. (Sione 4:24) Ko e laumālié ko ha founga ia ʻo e moʻuí ʻoku mātuʻaki māʻolunga ange ia  ʻi haʻatautolú moʻui. Kuo ʻikai ha tangata kuo mamata ki he ʻOtuá. ʻOku ʻafio ʻa Sihova ʻi hēvani, ka ʻoku malava ke ne ʻafioʻi ʻa e ngaahi meʻa kotoa pē. (Sāme 11:​4, 5; Sione 1:18) Ko ia, ko e hā ʻa e laumālie māʻoniʻoní ia? ʻOku ʻikai ko ha tokotaha ia ʻo hangē ko e ʻOtuá. Ka, ko e ivi ngāue ia ʻo e ʻOtuá.​—Sāme 104:30.

4. ʻOku fakahaaʻi mai ʻe he Tohitapú kiate kitautolu ʻa e ʻulungaanga ʻo Sihová. ʻOkú ne fakahaaʻi mai ko e ngaahi ʻulungaanga tuʻu-ki-muʻa ʻo e ʻOtuá ko e ʻofa, fakamaau totonu, poto, mo e mālohi. (Teutalonome 32:4; Siope 12:13; Aisea 40:26; 1 Sione 4:8) ʻOku talamai ʻe he Tohitapú ʻokú ne toe manavaʻofa, anga-ʻofa, anga-fakamolemole, nima-homo, mo anga-kātaki foki. ʻOku totonu ke tau feinga ke faʻifaʻitaki kiate ia, ʻo hangē ko e fānau talangofuá.​—Efeso 4:32e, 33 (5:​1, 2, PM ).

5. ʻOku totonu ke tau punou hifo pe lea ʻo lotu ki he ngaahi ʻīmisí, fakatātaá, pe fakaʻilongá ʻi heʻetau lotú? ʻIkai! (Ekisoto 20:​4, 5) ʻOku folofola mai ʻa Sihova ʻo pehē kuo pau ke tau lotu kiate ia pē. Heʻikai te ne vahevahe hono lāngilangí mo ha taha, pe ko ha toe meʻa kehe pē. ʻOku ʻikai ke ʻi ai ha mālohi ʻo e ngaahi ʻīmisí ke nau tokoni mai kiate kitautolu.​—Sāme 115:​4-8; Aisea 42:8.

6. ʻE lava fēfē ke tau hoko ʻo ʻiloʻi lelei ange ʻa e ʻOtuá? Ko e founga ʻe taha ko hono fakatokangaʻi ʻa e ngaahi meʻa kuó ne fakatupú pea fakakaukau loloto atu ʻo fekauʻaki mo e meʻa ʻoku nau fakahā mai kiate kitautolú. ʻOku fakahaaʻi mai ʻe he ngaahi fakatupu ʻa e ʻOtuá ko iá ʻokú ne maʻu ʻa e mālohi mo e poto lahi. ʻOku tau sio ki heʻene ʻofá ʻi he meʻa kotoa kuó ne ngaohí. (Sāme 19:​1-6; Loma 1:20) Ko e toe founga ʻe taha ʻoku malava ke tau ako ai ʻo fekauʻaki mo e ʻOtuá ko hono ako ʻa e Tohitapú. ʻI aí ʻokú ne talamai ai ʻa e meʻa lahi ange ʻo fekauʻaki mo e faʻahinga ʻOtua ko iá. ʻOkú ne toe talamai foki ʻo fekauʻaki mo ʻene taumuʻá pea mo e meʻa ʻokú ne finangalo mai ke tau faí.​—Emosi 3:7; 2 Timote 3:​16, 17.

[Fakatātā ʻi he peesi 5]

ʻOku tau ako ʻo fekauʻaki mo e ʻOtuá mei he fakatupú pea mei he Tohitapú