Lēsoni 4

Ko Hai ʻa e Tēvoló?

Sētane ko e Tēvoló​—naʻá ne haʻu mei fē? (1, 2)

ʻOku anga-fēfē ʻa hono takihalaʻi ʻe Sētane ʻa e kakaí? (3-7)

Ko e hā ʻoku totonu ai ke ke talitekeʻi ʻa e Tēvoló? (7)

1. Ko e foʻi lea “tēvolo” ʻoku ʻuhingá ko ha taha ʻokú ne tala ha ngaahi loi kovi ʻaupito ʻo fekauʻaki mo ha tokotaha kehe. ʻOku ʻuhinga ʻa e “Sētane” ia ko ha fili pe ko ha tokotaha fakafepaki. ʻOku ʻai ʻa e ngaahi foʻi leá ni ki he fili lahi ʻo e ʻOtuá. ʻI he kamatá, ko ha ʻāngelo haohaoa ia naʻe ʻi hēvani mo e ʻOtuá. Kae kehe, ki mui mai ai naʻá ne fakakaukau ai kiate ia ʻo fuʻu hulu peá ne fiemaʻu ai ʻa e lotu ʻoku totonu ke fai ki he ʻOtuá.​—Mātiu 4:​8-10.

2. Ko e ʻāngeló ni, ʻa Sētane, naʻe lea kia ʻIvi ʻo fakafou ʻi ha ngata. ʻI hono tala ha ngaahi loi kiate iá, naʻá ne ʻai ai ia ke ne talangataʻa ki he ʻOtuá. Naʻe ʻohofi ai ʻe Sētane ʻa e “tuʻunga-hau” ʻo e ʻOtuá, pe tuʻunga ko e Fungani Māʻolungá. Naʻe fehuʻia ʻe Sētane pe ʻoku pule ʻa e ʻOtuá ʻi ha founga taau pea ʻi he ngaahi meʻa ʻoku leleiʻia taha ai ʻa ʻEne kakaí. Naʻe toe langaʻi ʻe Sētane ʻa e veiveiua pe ʻe ʻi ai koā ha taha ʻi he faʻahinga ʻo e tangatá ʻe kei mateaki ki he ʻOtuá. ʻI hono fai ʻení, naʻe ʻai ai ʻe Sētane ʻa ia tonu ko e fili ʻo e ʻOtuá. Ko e ʻuhinga ia naʻá ne hoko ai ʻo ui ko Sētane ko e Tēvoló.​—Senesi 3:​1-5; Siope 1:​8-11; Fakahā 12:9.

3. ʻOku feinga ʻa Sētane ke kākaaʻi ʻa e kakaí ke nau lotu ange kiate ia. (2 Kolinito 11:​3, 14) Ko e founga ʻe taha ʻokú ne takihalaʻi ai ʻa e kakaí ʻoku fakafou ia ʻi he lotu loí. Kapau ʻoku akoʻi ʻe ha lotu ha ngaahi loi fekauʻaki mo e ʻOtuá, ʻokú ne fakahoko moʻoni ai ʻa e taumuʻa ʻa Sētané. (Sione 8:44) Ko e kakai ko ia ko e kau mēmipa ʻo e ngaahi lotu loí ʻoku nau tui loto-moʻoni nai ʻoku nau lotu ki he ʻOtua moʻoní. Ka ʻoku nau tauhi moʻoni ʻe kinautolu ʻa Sētane. Ko ia ‘ʻa e ʻotua ʻo e tuʻu ko ení.’​—2 Kolinito 4:4.

4. Ko e fakahaʻele faʻahikehé ko e toe founga ia ʻe taha ʻoku puleʻi ai ʻe Sētane ʻa e kakaí. ʻOku nau ui nai ki he ngaahi laumālié ke maluʻi kinautolu, ke uesia ʻa e niʻihi kehé, ke talamai ki muʻa ʻa e kahaʻú, pe ke fakahoko ha ngaahi mana. Ko Sētane ʻa e mālohi fulikivanu ʻoku tuʻu mei mui ʻi he ngaahi tōʻonga kotoa ko ʻení. Ke fakahōifuaʻi ʻa e ʻOtuá, kuo pau ke ʻoua naʻa tau fai ha meʻa fekauʻaki mo e fakahaʻele faʻahikehé.​—Teutalonome 18:​10-12; Ngāue 19:​18, 19.

5. ʻOku toe takihalaʻi ʻe Sētane ʻa e kakaí ʻo fakafou ʻi he pōlepole ʻaki hoto matakalí ʻo fuʻu hulu pea mo e lotu ki he ngaahi kautaha fakapolitikalé. ʻOku fakakaukau ʻa e niʻihi ʻoku lelei ange honau puleʻangá pe matakalí  ʻi he ngaahi matakali kehé. Ka ʻoku ʻikai ke moʻoni ʻeni. (Ngāue 10:​34, 35) ʻOku hanga ʻa e kakai ʻe niʻihi ki he ngaahi kautaha fakapolitikalé ke solova ʻa e ngaahi palopalema ʻo e tangatá. ʻI he fai peheé, ʻoku nau siʻaki ai ʻa e Puleʻanga ʻo e ʻOtuá. Ko e fakaleleiʻanga pē ia ʻe taha ki hotau ngaahi palopalemá.​—Taniela 2:44.

6. Ko e toe founga ʻe taha ʻoku takihalaʻi ai ʻe Sētane ʻa e kakaí ko hono fakataueleʻi kinautolu ʻaki ʻa e ngaahi holi angahalaʻia. ʻOku folofola mai ʻa Sihova kiate kitautolu ke tau fakaʻehiʻehi mei he ngaahi tōʻonga angahalaʻiá koeʻuhi he ʻokú ne ʻafioʻi te nau uesia kitautolu. (Kaletia 6:​7, 8) ʻOku fiemaʻu nai ʻe ha kakai ʻe niʻihi ke ke kau fakataha mo kinautolu ʻi he ngaahi tōʻonga peheé. Ka, ke manatuʻi, ko Sētane ia ʻokú ne fiemaʻu moʻoni koe ke ke fai ʻa e ngaahi meʻá ni.​—1 Kolinito 6:​9, 10; 15:33.

7. ʻOku ngāueʻaki nai ʻe Sētane ʻa e fakatangá pe fakafepakí ke ʻai koe ke ke liʻaki ʻa Sihova. ʻE hoko nai ʻo ʻita lahi ʻa e niʻihi ʻokú ke ʻofa aí koeʻuhi ko hoʻo ako ʻa e Tohitapú. ʻE fakakataʻaki nai koe ʻe he niʻihi. Ka ʻokú ke moʻuaʻaki ʻa hoʻo moʻuí kia hai? ʻOku loto ʻa Sētane ke fakailifiaʻi koe koeʻuhi ke tuku ʻa hoʻo ako ʻo fekauʻaki mo Sihová. ʻOua ʻe tuku ke ikuna ʻa Sētane! (Mātiu 10:​34-39; 1 Pita 5:​8, 9) ʻI hono talitekeʻi ʻa e Tēvoló, ʻoku lava ke ke ʻai ai ʻa Sihova ke fiefia pea ʻoku fakahaaʻi ai ʻokú ke pouaki ʻa Hono tuʻunga-haú.​—Palovepi 27:11.

[Fakatātā ʻi he peesi 9]

Ko e lotu loí, fakahaʻele faʻahikehé, mo e mateakiʻi fonuá ʻoku nau takihalaʻi ʻa e kakaí

[Fakatātā ʻi he peesi 9]

Talitekeʻi ʻa Sētane ʻaki ʻa e hokohoko atu ke ako ʻo fekauʻaki mo Sihova