Lēsoni 16

Ko Hoʻo Fili ke Tauhi ʻa e ʻOtuá

Ko e hā kuo pau ke ke fai ka ke hoko ko ha kaumeʻa ʻo e ʻOtuá? (1, 2)

ʻOku anga-fēfē hoʻo fai ʻa hoʻo fakatapui ki he ʻOtuá? (1)

Ko fē ʻa e taimi ʻoku totonu ke ke papitaiso aí? (2)

ʻE lava fēfē ke ke maʻu ʻa e mālohi ke kei anga-tonu ai pē ki he ʻOtuá? (3)

1. Ke hoko ko ha kaumeʻa ʻo e ʻOtuá, kuo pau ke ke maʻu ha ʻilo lelei ʻo e moʻoni ʻo e Tohitapú (1 Timote 2:​3, 4), tui ki he ngaahi meʻa kuó ke akó (Hepelu 11:6), fakatomalaʻi hoʻo ngaahi angahalá (Ngāue 17:30, 31), pea tafoki ʻi he ʻalunga ʻo hoʻo moʻuí. (Ngāue 3:19) Pea ko hoʻo ʻofa ki he ʻOtuá ʻoku totonu ke ne ueʻi leva koe ke ke fakatapui koe kiate ia. ʻOku ʻuhinga ʻení ko hoʻo tala kiate ia ʻi ha lotu fakafoʻituitui mo fakapulipuli ʻo pehē ʻokú ke foaki atu koe kiate ia ke fai hono finangaló.​—Mātiu 16:24; 22:37.

2. ʻI he hili ʻa hoʻo fai ʻa hoʻo fakatapui ki he ʻOtuá, ʻoku totonu ke ke papitaiso. (Mātiu 28:​19, 20) ʻOku hanga ʻe he papitaisó ʻo ʻai ke ʻilo ʻe he tokotaha kotoa kuó ke fakatapui koe kia Sihova. Ko ia ai, ko e papitaisó ia ki he faʻahinga pē ʻoku nau motuʻa feʻunga ke fai ʻa e fili ke tauhi ʻa e ʻOtuá. ʻI hono papitaiso ʻo ha taha, ʻoku totonu ke tuku hifo kakato hono sinó ki lalo ʻi he loto vaí ʻi ha mōmeniti siʻi. a​—Maake 1:​9, 10; Ngāue 8:36.

3. ʻI he hili ʻa hoʻo fai ʻa hoʻo fakatapuí, ʻoku ʻamanekina mai ʻe Sihova ke ke moʻuiʻaki ʻa hoʻo palōmesí. (Sāme 50:14; Koheleti 5:​4, 5) ʻE feinga ʻa e Tēvoló ke taʻofi koe mei hono tauhi ʻa Sihová. (1 Pita 5:8) Kae ʻunuʻunu ofi ki he ʻOtuá ʻi he lotu. (Filipai 4:​6, 7) Ako ʻa ʻene Folofolá ʻi he ʻaho taki taha. (Sāme 1:​1-3) Pipiki ofi ki he fakatahaʻangá. (Hepelu 13:17) ʻI hono fai kotoa ʻa e ngaahi meʻá ni, te ke maʻu ai ʻa e mālohi ke kei anga-tonu ai pē ki he ʻOtuá. Te ke malava ai ʻo fai ʻo laui ʻitāniti ʻa e ngaahi meʻa ʻoku fiemaʻu ʻe he ʻOtuá meiate koé!

[Fakamatala ʻi lalo]