Lēsoni 7

Ko e ʻUnuʻunu Ofi ki he ʻOtuá ʻi he Lotu

Ko e hā ʻoku mahuʻinga ai ke tau lotu maʻu pē? (1)

Ko hai ʻoku totonu ke tau lotu ki aí, pea ʻi he founga fē? (2, 3)

Ko e hā ʻa e ngaahi meʻa totonu ke lotu ʻo kau ki aí? (4)

Ko fē ʻa e taimi ʻoku totonu ke ke lotu aí? (5, 6)

ʻOku fanongo mai ʻa e ʻOtuá ki he ngaahi lotu kotoa pē? (7)

1. Ko e lotú ko e lea anga-fakatōkilalo ia ki he ʻOtuá. ʻOku totonu ke ke lotu maʻu pē ki he ʻOtuá. Ko ia ʻoku malava ke ke ongoʻi vāofi ai kiate ia ʻo hangē ki ha kaumeʻa ʻofeina. ʻOku fuʻu lahi fau mo māfimafiʻia ʻa Sihova, ka neongo ia ʻokú ne fanongo mai ki heʻetau ngaahi lotú! ʻOkú ke lotu maʻu pē ki he ʻOtuá?​—Sāme 65:2; 1 Tesalonaika 5:17.

2. Ko e lea ʻo lotú ko e konga ia ʻo ʻetau lotu ʻoku faí. Ko ia, ʻoku totonu ke tau lotu pē ki he ʻOtuá, ko Sihova. ʻI he ʻi māmani ʻa Sīsuú, naʻá ne lotu maʻu pē ki heʻene Tamaí, ʻikai ki ha toe taha kehe. ʻOku totonu ke tau fai pē ʻa e meʻa tatau. (Mātiu 4:10; 6:9) Kae kehe,  ko e kotoa ʻo ʻetau ngaahi lotú ʻoku totonu ke leaʻaki ʻi he huafa ʻo Sīsuú. ʻOku fakahaaʻi ʻe he meʻá ni ʻoku tau tokaʻi ʻa e tuʻunga ʻo Sīsuú pea kuo tau tui ki heʻene feilaulau huhuʻí.​—Sione 14:6; 1 Sione 2:​1, 2.

3. ʻI he taimi ʻoku tau lotu aí ʻoku totonu ke tau lea ki he ʻOtuá mei hotau lotó. ʻOku ʻikai totonu ke tau leaʻaki ʻetau ngaahi lotú mei heʻetau manatú, pe ko hono lau kinautolu mei ha tohi lotu. (Mātiu 6:​7, 8) ʻOku lava ke tau lotu ʻi ha faʻahinga tuʻunga anga-fakaʻapaʻapa pē, ʻi ha faʻahinga taimi pē, pea ʻi ha feituʻu pē. Naʻa mo e ngaahi lotu fakalongolongo ʻoku leaʻaki ʻi hotau lotó ʻoku malava ke ongoʻi ia ʻe he ʻOtuá. (1 Samiuela 1:​12, 13) ʻOku lelei ke kumi ki ha feituʻu lōngonoa ʻo mamaʻo mei he kakai kehé ke leaʻaki ai ʻetau ngaahi lotu fakafoʻituituí.​—Maake 1:35.

4. Ko e hā ʻa e ngaahi meʻa ʻoku lava ke ke lotu ʻo fekauʻaki mo iá? Ko ha meʻa pē ʻokú ne uesia nai hoʻo kaumeʻa mo iá. (Filipai 4:​6, 7) ʻOku fakahaaʻi ʻe he sīpinga lotú ʻoku totonu ke tau lotu ʻo fekauʻaki mo e huafa ʻo Sihová mo ʻene taumuʻá. ʻOku lava foki ke tau kole ʻo fekauʻaki mo e ngaahi fiemaʻu fakamatelie kiate kitautolú ke tokonaki mai, ke fakamolemoleʻi ʻetau ngaahi angahalá, mo ha tokoni ke talitekeʻiʻaki ʻa e ʻahiʻahí. (Mātiu 6:​9-13) ʻOku ʻikai totonu ke siokita ʻa ʻetau ngaahi lotú. ʻOku totonu ke tau lotu pē ʻo fekauʻaki mo e ngaahi meʻa ʻoku hoa mo e finangalo ʻo e ʻOtuá.​—1 Sione 5:14.

5. Te ke lotu nai ʻi ha taimi pē ʻoku ueʻi ai koe ʻe ho lotó ke ke fakamālō pe fakahīkihikiʻi ʻa e ʻOtuá. (1 Kalonikali 29:​10-13) ʻOku totonu ke ke lotu ʻi he taimi ʻoku ʻi ai ai haʻo ngaahi palopalema pea pehē ʻi hono ʻahiʻahiʻi ʻa hoʻo tuí. (Sāme 55:22; 120:1) ʻOku feʻungamālie ke lotu ki muʻa peá ke toki maʻu hoʻo meʻatokoní. (Mātiu 14:19) ʻOku fakaafeʻi mai kitautolu ʻe Sihova ke tau lotu “ʻi he faingamalie kotoa pe.”​—Efeso 6:18.

6. ʻOku fiemaʻu tautefito ke tau lotu ʻo kapau kuo tau fai ha angahala mamafa. ʻI he ngaahi taimi peheé ʻoku totonu ke tau kole ʻa e meesi ʻa Sihová mo ʻene fakamolemolé. Kapau ʻoku tau vete ʻetau ngaahi angahalá kiate ia pea fai ʻetau lelei tahá ke ʻoua ʻe toe fai kinautolu, ko e ʻOtuá ʻoku “faʻa fakamolemole.”​—Sāme 86:5; Palovepi 28:13.

7. ʻOku fanongo mai ʻa Sihova ki he ngaahi lotu pē ʻa e kakai māʻoniʻoní. Ke fanongo mai ʻa e ʻOtuá ki hoʻo lotú, kuo pau ke ke feingaʻaki hoʻo lelei tahá ke moʻui ʻaki ʻa ʻene ngaahi laó. (Palovepi 15:29; 28:9) Kuo pau ke ke anga-fakatōkilalo ʻi he taimi ʻokú ke lotu aí. (Luke 18:​9-14) ʻOku fiemaʻu ke ke ngāue ki he meʻa ʻokú ke lotu ʻo fekauʻaki mo iá. ʻE fakamoʻoniʻi ai kuó ke maʻu ʻa e tui pea ʻokú ke fakamātoato moʻoni ʻi he meʻa ʻokú ke leaʻakí. Ko e meʻa pē ia ʻe toki tali ai ʻe Sihova ʻa hoʻo ngaahi lotú.​—Hepelu 11:6.