Lēsoni 6

Ko e Hā ʻa e Puleʻanga ʻo e ʻOtuá?

ʻOku tuʻu ʻi fē ʻa e Puleʻanga ʻo e ʻOtuá? (1) Ko hai ʻa hono Tuʻí? (2)

ʻOku ʻi ai ha niʻihi kehe ʻoku kau ʻi he pulé fakataha mo e Tuʻí? Kapau ʻoku pehē, ʻoku toko fiha? (3)

Ko e hā ʻokú ne fakahaaʻi ʻoku tau moʻui ʻi he ngaahi ʻaho fakaʻosí? (4)

Ko e hā ʻe fai ʻe he Puleʻanga ʻo e ʻOtuá maʻá e tangatá ʻi he kahaʻú? (5-7)

1. ʻI he taimi naʻá ne ʻi māmani aí, naʻe akoʻi ai ʻe Sīsū ki hono kau muimuí ke nau lotu ʻo kole ʻa e Puleʻanga ʻo e ʻOtuá. Ko e puleʻangá ko ha founga-pule ʻoku taki ai ha tuʻi. Ko e Puleʻanga ʻo e ʻOtuá ko ha founga-pule makehe ia. ʻOku fokotuʻu ia ʻi hēvani pea ʻe pule mai ia ki he māmani ko ʻení. Te ne fakatapuhaaʻi, pe ʻai ke māʻoniʻoni, ʻa e huafa ʻo e ʻOtuá. Te ne fakahoko ʻa hono fai ʻa e finangalo ʻo e ʻOtuá ʻi he māmaní ʻo hangē ko ia ʻoku fai ʻi hēvaní.​—Mātiu 6:​9, 10.

2. Naʻe talaʻofa ʻe he ʻOtuá ʻe hoko ʻa Sīsū ko e Tuʻi ʻo Hono Puleʻangá. (Luke 1:​30-33) ʻI he taimi naʻe ʻi māmani ai ʻa Sīsuú, naʻá ne fakamoʻoniʻi te ne hoko ko ha Tokotaha-Pule anga-ʻofa, faitotonu, mo haohaoa. ʻI he taimi naʻá ne foki ai ki hēvaní, naʻe ʻikai ke fakanofo leva ia ʻi he taimi pē ko iá ke hoko ko e Tuʻi ʻo e Puleʻanga ʻo e ʻOtuá. (Hepelu 10:​12, 13) ʻI he 1914, naʻe ʻoange ai ʻe Sihova kia Sīsū ʻa e mafai naʻá Ne talaʻofa ange kiate iá. Talu mei ai, kuo pule ʻa Sīsū ʻi hēvani ʻi he tuʻunga ko e Tuʻi fakanofo ʻa Sihova.​—Taniela 7:​13, 14.

3. Kuo toe fili foki ʻe Sihova ha kau tangata mo e kau fefine anga-tonu mei he māmaní ke ō ki hēvani. Te nau pule fakataha mai ai mo Sīsū ki he faʻahinga ʻo e tangatá ʻi he tuʻunga ko e ngaahi tuʻi, kau fakamaau, mo e kau taulaʻeiki. (Luke 22:​28-30; Fakahā 5:​9, 10) Naʻe ui ʻe Sīsū ʻa e kau kaungā-pule ko ʻeni ʻi hono Puleʻangá ko ha “fanga sipi toko siʻi.” ʻOku nau toko 144,000.​—Luke 12:32; Fakahā 14:​1-3.

4. ʻI he hoko pē ʻa Sīsū ko e Tuʻí, naʻá ne lī hifo leva ʻa Sētane mo ʻene kau ʻāngelo anga-fulikivanú mei hēvani ki he feituʻu ʻo e māmaní. Ko e ʻuhinga ia kuo hoko ai ʻa e ngaahi meʻá ʻo kovi pehē fau ʻi heni ʻi he māmaní talu mei he 1914. (Fakahā 12:​9, 12) Ko e ngaahi taú, ngaahi hongé, ngaahi mahaki fakaʻauhá, tupulaki ʻa e maumau-laó​—ko e ngaahi meʻá ni kotoa ko e konga ia ʻo ha “fakaʻilonga” ʻokú ne fakahaaʻi ʻoku  lolotonga pule ʻa Sīsū pea ko e fokotuʻutuʻu ko ʻení ʻoku ʻi hono ngaahi ʻaho fakaʻosí.​—Mātiu 24:​3, 7, 8, 12; Luke 21:​10, 11; 2 Timote 3:​1-5.

5. ʻOku vavé ni ke fakamāuʻi ʻe Sīsū ʻa e kakaí, ʻo fakamavaheʻi kinautolu ʻo hangē ko hono fakamavaheʻi ʻe he tauhi-sipí ʻa e fanga sipí mei he fanga kosí. Ko e “fanga sipi” ko e faʻahinga ia te nau ʻosi fakamoʻoniʻi kinautolu ko ʻene kakai mateaki. Te nau maʻu ʻa e moʻui taʻengata ʻi he māmaní. Ko e “fanga kosi” ko e faʻahinga ia te nau ʻosi siʻaki ʻe kinautolu ʻa e Puleʻanga ʻo e ʻOtuá. (Mātiu 25:​31-34, 46) ʻI he kahaʻu ofi maí ni, ʻe fakaʻauha ai ʻe Sīsū ʻa e faʻahinga kotoa ʻoku hangē ha kosí. (2 Tesalonaika 1:​6-9) Kapau ʻokú ke loto ke ke hoko ko ha taha ʻo e “fanga sipi” ʻa Sīsuú, kuo pau ke ke fanongo ki he pōpoaki ʻo e Puleʻangá pea ngāue ki he meʻa kuó ke akó.​—Mātiu 24:14.

6. ʻI he taimi ní kuo vahevahe ʻa e māmaní ki he ngaahi fonua lahi. Kuo taki taha ʻi ai hono founga-pule ʻoʻona. ʻOku faʻa fetauʻaki ʻa e ngaahi fonuá ni. Ka ʻe fetongi ʻe he Puleʻanga ʻo e ʻOtuá ʻa e ngaahi founga-pule fakaetangatá kotoa. ʻE pule ia ʻi he tuʻunga ko e founga-pule pē ia ʻe taha ki he māmaní fakakātoa. (Taniela 2:44) ʻE ʻikai leva ke toe ʻi ai ha tau, faihia, mo ha fakamālohi. ʻE nofo fakataha ʻa e kakaí kotoa ʻi he melino mo e fāʻūtaha.​—Maika 4:​3, 4.

7. ʻI he lolotonga ʻo e Pule Taʻu ʻe Taha Afe ʻa Sīsuú, ʻe hoko ai ʻa e faʻahinga anga-tonu ʻo e tangatá ʻo haohaoa, pea ʻe hoko ʻa e māmaní kotoa ko ha palataisi. ʻI he aʻu ki he ngataʻanga ʻo e taʻu ʻe taha afé, ʻe ʻosi fai ʻe Sīsū ʻa e meʻa kotoa pē naʻe kole ange ʻe he ʻOtuá kiate ia ke ne faí. Te ne toki tuku atu leva ʻa e Puleʻangá ki heʻene Tamaí. (1 Kolinito 15:​24) Fēfē ke ke lea ki ho ngaahi kaumeʻá mo e faʻahinga ʻokú ke ʻofa aí ʻo fekauʻaki mo e meʻa ʻe fai ʻe he Puleʻanga ʻo e ʻOtuá?

[Fakatātā ʻi he peesi 13]

ʻI he malumalu ʻo e pule ʻa Sīsuú, ʻe ʻikai toe ʻi ai ha tāufehiʻa pe laulanu