Lēsoni 9

Kuo Pau ke Maʻa ʻa e Kau Sevāniti ʻa e ʻOtuá

Ko e hā kuo pau ai ke tau maʻa ʻi he tafaʻaki kotoa pē? (1)

Ko e hā hono ʻuhinga ke maʻa fakalaumālié? (2) maʻa fakaeʻulungāngá? (3) maʻa fakaefakakaukaú? (4) maʻa fakaesinó? (5)

Ko e hā ʻa e faʻahinga lea taʻemaʻa ʻoku totonu ke tau fakaʻehiʻehi mei aí? (6)

1. Ko Sihova ko e ʻOtuá ʻoku maʻa mo māʻoniʻoni. ʻOkú ne ʻamanekina mai ʻa ʻene kau lotú ke nau hoko ai pē ʻo maʻa​—fakalaumālie, fakaeʻulungaanga, fakaefakakaukau, mo fakaesino. (1 Pita 1:16) ʻOku fiemaʻu ʻa e feinga moʻoni kae kei maʻa ai pē ʻi he ʻafio mai ʻa e ʻOtuá. ʻOku tau nofo ʻi ha māmani taʻemaʻa. ʻOku tau toe fefāingaʻaki mo ʻetau ngaahi hehema pē ʻatautolu ke fai ʻa e meʻa ʻoku halá. Ka kuo pau ke ʻoua te tau foʻi.

2. Maʻa Fakalaumālie: Kapau ʻoku tau fiemaʻu ke tau tauhi ʻa Sihova, heʻikai te tau pipiki ai pē ki ha taha ʻo e ngaahi akonaki pe ngaahi tōʻonga ʻa e ngaahi lotu loí. Kuo pau ke tau mavahe mei he lotu loí pea ʻoua ʻe poupou ki ai ʻi ha faʻahinga tafaʻaki. (2 Kolinito 6:​14-18; Fakahā 18:4) ʻI heʻetau ako pē ʻa e moʻoni fekauʻaki mo e ʻOtuá, kuo pau leva ke tau tokanga ke ʻoua naʻa takihalaʻi kitautolu ʻe he kakai ʻoku nau akoʻaki ʻa e loí.​—2 Sione 10, 11.

3. Maʻa Fakaeʻulungaanga: ʻOku fiemaʻu ʻe Sihova ʻa ʻene kau lotú ke ʻai honau ʻulungāngá ʻi he tuʻunga ko e kau Kalisitiane moʻoni ʻi he taimi kotoa pē. (1 Pita 2:12) ʻOkú ne ʻafioʻi ʻa e meʻa kotoa pē ʻoku tau faí, naʻa mo hono fai ʻi he liló. (Hepelu 4:13) ʻOku  totonu ke tau fakaʻehiʻehi mei he fehokotaki fakasino taʻetāú mo e ngaahi tōʻonga taʻemaʻa kehe ʻo e māmani ko ʻení.​—1 Kolinito 6:​9-11.

4. Maʻa Fakaefakakaukau: Kapau ʻoku tau fakafonu hotau ʻatamaí ʻaki ʻa e ngaahi fakakaukau maʻa mo haohaoa, ʻe maʻa foki ai hotau ʻulungāngá. (Filipai 4:8) Ka ʻo kapau ʻoku tau nōfoʻi ʻi he ngaahi meʻa taʻemaʻá, ʻe iku atu ia ki he ngaahi ngāue fulikivanu. (Mātiu 15:​18-20) ʻOku totonu ke tau fakaʻehiʻehi mei he ngaahi faʻahinga fakafiefia ʻoku malava ke nau ʻuliʻi hotau ʻatamaí. ʻOku malava ke tau fakafonu hotau ʻatamaí ʻaki ʻa e ngaahi fakakaukau maʻá ʻaki hono ako ʻa e Folofola ʻa e ʻOtuá.

5. Maʻa Fakaesino: Koeʻuhi ʻoku nau fakafofongaʻi ʻa e ʻOtuá, ʻoku totonu ai ki he kau Kalisitiané ke nau tauhi honau sinó mo e valá ke maʻa. ʻOku totonu ke tau fanofano hotau nimá ʻi he hili hono ngāueʻaki ʻa e fale mālōloó, pea ʻoku totonu ke tau fanofano ki muʻa pea toki kai ʻa e meʻakaí pe ala ki he meʻakaí. Kapau ʻoku ʻikai te ke maʻu ha founga totonu ki hono fakaʻauha ʻa e kinohaʻa mei he fale mālōloó, ʻoku totonu ke tanu ia. (Teutalonome 23:​12, 13) Ko hono tauhi ʻa e sinó ke maʻá ʻoku tokoni ia ki he moʻui leleí. Ko ha ʻapi ʻo ha Kalisitiane ʻoku totonu ke maau mo maʻa fakatouʻosi ʻa loto mo tuʻa. ʻOku totonu ke hā mahino mai ia ʻi he koló ʻi he tuʻunga ko ha faʻifaʻitakiʻanga lelei.

6. Lea Maʻa: Ko e kau sevāniti ʻa e ʻOtuá kuo pau ke nau leaʻaki maʻu pē ʻa e moʻoní. Ko e kau loí ʻe ʻikai te nau hū ki he Puleʻanga ʻo e ʻOtuá. (Efeso 4:25; Fakahā 21:8) ʻOku ʻikai ke ngāueʻaki ʻe he kau Kalisitiané ʻa e lea koví. ʻOku ʻikai te nau fanongo pe leaʻaki ʻa e ngaahi hua koví pe ngaahi talanoa taʻemaʻá. Koeʻuhi ko ʻenau lea maʻá, ʻoku hā mahino mai ʻoku nau kehe ʻi he ngāueʻangá pe ʻi he ʻapiakó pea ʻi he kaungāʻapí.​—Efeso 4:​29, 31; 5:1 (5:3, PM).

[Fakatātā ʻi he peesi 18, 19]

Ko e kau sevāniti ʻa e ʻOtuá kuo pau ke nau maʻa ʻi he ngaahi tafaʻaki kotoa pē