Lēsoni 8

Moʻui Fakafāmili ʻOku Fakahōifua ki he ʻOtuá

Ko e hā ʻa e tuʻunga ʻo e husepānití ʻi he fāmilí? (1)

ʻOku totonu ke fēfē ʻa e fakafeangai ʻa ha husepāniti ki hono uaifí? (2)

Ko e hā ʻa e ngaahi fatongia ʻoku maʻu ʻe ha tamai? (3)

Ko e hā ʻa e ngafa ʻo e uaifí ʻi he fāmilí? (4)

Ko e hā ʻoku fiemaʻu mai ʻe he ʻOtuá mei he ongo mātuʻá mo e fānaú? (5)

Ko e hā ʻa e vakai ʻa e Tohitapú ki he māvaé mo e vete malí? (6, 7)

1. ʻOku pehē ʻe he Tohitapú ko e husepānití ko e ʻulu ia ʻo hono fāmilí. (1 Kolinito 11:3) Kuo pau ke maʻu ʻe ha husepāniti ʻa e uaifi pē ʻe taha. ʻOku totonu ke na mali totonu ʻo fakatatau ki he laó.​—1 Timote 3:2; Taitusi 3:1.

2. ʻOku totonu ke ʻofa ʻa e husepānití ki hono uaifí ʻo hangē ko ʻene ʻofa pē ʻiate iá. ʻOku totonu ke ne fakafeangai kiate ia ʻi he founga ʻo e fakafeangai ʻa Sīsū ki hono kau muimuí. (Efeso 5:​25, 28, 29) ʻOku ʻikai ʻaupito totonu ke ne taaʻi hono uaifí pe ngaohikoviʻi ia ʻi ha faʻahinga founga. Ka, ʻoku totonu ke ne fakahāhā kiate ia ʻa e fakaʻapaʻapa mo e tokaʻi.​—Kolose 3:19; 1 Pita 3:7.

3. ʻOku totonu ke ngāue mālohi ʻa e tamaí ke tokangaʻi hono fāmilí. Kuo pau ke ne tokonaki ʻa e meʻakai, vala, mo e fale ki hono uaifí mo e fānaú. Kuo pau foki ki he tamaí ke ne tokonaki ʻa e ngaahi fiemaʻu fakalaumālie ʻa hono fāmilí. (1 Timote 5:8) ʻOkú ne takimuʻa ʻi hono tokoniʻi hono fāmilí ke ako fekauʻaki mo e ʻOtuá mo ʻEne ngaahi taumuʻá.​—Teutalonome 6:​4-9; ʻEfesō 6:4.

4. ʻOku totonu ke hoko ʻa e uaifí ko ha tokoni lelei ki hono husepānití. (Senesi 2:18) ʻOku totonu ke ne tokoni ki hono husepānití ʻi hono akoʻi mo hono teuʻi ʻena fānaú. (Palovepi 1:8) ʻOku fiemaʻu mai ʻe Sihova ke tokanga anga-ʻofa ʻa e uaifí ki hono fāmilí. (Palovepi 31:​10, 15, 26, 27; Taitusi 2:​4, 5) ʻOku totonu ke ne ʻapasia loloto ki hono husepānití.​—Efeso 5:​22, 23, 33.

5. ʻOku fiemaʻu mai ʻe he ʻOtuá ʻa e fānaú ke nau talangofua ki heʻenau ongo mātuʻá. (Efeso 6:​1-3) ʻOkú ne ʻamanekina mai ʻa e ngaahi mātuʻá ke nau fakahinohinoʻi mo fakatonutonu ʻenau fānaú. ʻOku fiemaʻu ke fakamoleki ʻe he ngaahi mātuʻá ha taimi mo ʻenau fānaú pea ako ʻa e Tohitapú mo kinautolu, tokanga ki he ngaahi fiemaʻu  fakalaumālie mo fakaeongo kiate kinautolú. (Teutalonome 11:​18, 19; Palovepi 22:​6, 15) ʻOku ʻikai ʻaupito totonu ki he ngaahi mātuʻá ke nau akonekina ʻenau fānaú ʻi ha founga fefeka mo anga-fakamamahi.​—Kolose 3:21.

6. ʻI hono maʻu ʻe he ngaahi hoa malí ha ngaahi palopalema ʻo e taʻefetaulakí, ʻoku totonu ke nau feinga ke ngāueʻaki ʻa e akonaki ʻa e Tohitapú. ʻOku naʻinaʻi mai ʻa e Tohitapú ke tau fakahaaʻi ʻa e ʻofa mo e fakamolemole. (Kolose 3:​12-14) ʻOku ʻikai ke fakalototoʻaʻi mai ʻe he Folofola ʻa e ʻOtuá ia ʻo pehē ko e māvaé ko ha founga ia ki hono solova ʻa e fanga kiʻi palopalema iikí. Ka ʻe lava ke fili nai ha uaifi ia ke tukuange hono husepānití kapau (1) ʻoku fakafisi mālohi ʻa e husepānití ia ke poupou ki hono fāmilí, (2) ʻokú ne mātuʻaki fakamālohi ʻo ʻi ha tuʻunga fakatuʻutāmaki ai ʻa e moʻui lelei mo e moʻui ʻa e uaifí, pe (3) ko ʻene fakafepaki tōtuʻá ʻoku hoko ai ʻo ʻikai malava ʻa e uaifí ia ke lotu kia Sihova.​—1 Kolinito 7:​12, 13.

7. Kuo pau ke feangatonuʻaki ʻa e ngaahi hoa malí. Ko e tonó ko ha angahala ia ʻoku fakafepaki ki he ʻOtuá pea ʻoku toe pehē foki ki hoto hoá. (Hepelu 13:4) Ko e fehokotaki fakasino ʻi tuʻa mei he nofo malí ko e ʻuhinga Fakatohitapu pē ia ʻe taha ki ha vete ʻo ʻatā ai ke toe mali. (Mātiu 19:​6-9; Loma 7:​2, 3) ʻOku fakaliliʻa mai ʻa Sihova ʻi he taimi ʻoku vete mali ai ʻa e kakaí ʻo ʻikai ʻi ha ngaahi makatuʻunga Fakatohitapu pea toe mali mo ha taha kehe.​—Malakai 2:​14-16.

[Fakatātā ʻi he peesi 16, 17]

ʻOku ʻamanekina mai ʻe he ʻOtuá ʻa e ngaahi mātuʻá ke nau fakahinohinoʻi ʻenau fānaú mo fakatonutonu kinautolu

[Fakatātā ʻi he peesi 17]

ʻOku tokonaki fakamatelie mo fakalaumālie ha tamai ʻofa ki hono fāmilí