Lēsoni 11

Ngaahi Tui mo e Ngaahi Tōʻonga ʻOku Taʻefakahōifua ki he ʻOtuá

Ko e hā ʻa e faʻahinga tui mo e ngaahi tōʻonga ʻoku halá? (1)

ʻOku totonu ke tui ʻa e kau Kalisitiané ko e ʻOtuá ko ha Tolu-Tahaʻi-ʻOtua? (2)

Ko e hā ʻoku ʻikai ke kātoangaʻi ai ʻe he kau Kalisitiane moʻoní ʻa e Kilisimasí, ʻAho Toetuʻú, pe ngaahi faiʻahó (3, 4)

ʻOku malava ʻe he kau maté ke nau uesia ʻa e kau moʻuí? (5)

Naʻe pekia ʻa Sīsū ʻi ha kolosi? (6)

ʻOku fēfē hono mahuʻinga ke fakahōifuaʻi ʻa e ʻOtuá? (7)

1. ʻOku ʻikai ke kovi ʻa e ngaahi tui mo e ngaahi tōʻonga kotoa pē. Ka ʻoku ʻikai ke tali kinautolu ʻe he ʻOtuá kapau ʻoku tupu mei he lotu loí pe ʻoku fepaki mo e ngaahi akonaki ʻa e Tohitapú.​—Mātiu 15:6.

2. Tolu-Tahaʻi-ʻOtua: Ko ha Tolu-Tahaʻi-ʻOtua ʻa Sihova​—ʻo toko tolu ʻi he ʻOtua ʻe taha? ʻIkai! Ko Sihova, ko e Tamaí, “ko e ʻOtua moʻonia pe taha.” (Sione 17:3; Maake 12:29) Ko Sīsuú ko Hono ʻAlo ʻuluakí ia, pea ʻokú ne moʻulaloa ki he ʻOtuá. (1 Kolinito 11:3) ʻOku lahi ange ʻa e Tamaí ʻi he ʻAló. (Sione 14:28) Ko e laumālie māʻoniʻoní ʻoku ʻikai ko ha taha; ko e ivi ngāue ia ʻo e ʻOtuá.​—Senesi 1:2; Ngāue 2:18.

3. Kilisimasí mo e ʻAho Toetuʻú: Naʻe ʻikai ke ʻaloʻi ʻa Sīsū ʻi Tīsema 25. Naʻe ʻaloʻi nai ia ʻi ʻOkatopa 1, ko ha taimi ʻo e taʻú naʻe tauhi ai ʻe he kau tauhi-sipí ʻenau ngaahi tākanga sipí ʻi tuʻa ʻi he poʻulí. (Luke 2:​8-12) Naʻe ʻikai ʻaupito ke fekau ʻe Sīsū ʻa e kau Kalisitiané ke kātoangaʻi ʻa hono ʻaloʻí. Ka, naʻá ne tala ki heʻene kau ākongá ke nau fakamanatu, pe manatuʻi ʻa ʻene pekiá. (Luke 22:​19, 20) Ko e Kilisimasí mo hono ngaahi tōʻongá ko e tupu ia mei he ngaahi lotu loi ʻo e kuonga muʻá. ʻOku pehē pē mo e ngaahi tōʻonga ʻo e ʻAho Toetuʻú, ʻo hangē ko hono ngāueʻaki ʻa e ngaahi foʻi moá mo e fanga kiʻi lāpisí. Naʻe ʻikai ke kātoangaʻi ʻe he muʻaki kau Kalisitiané ʻa e Kilisimasí pe ko e ʻAho Toetuʻú, pea ʻoku pehē pē mo e kau Kalisitiane moʻoni he ʻaho ní.

4. Ngaahi Faiʻahó: Ko e kātoanga faiʻaho pē ʻe ua ʻoku fakamatala ki ai ʻi he Tohitapú naʻe fai ʻe he faʻahinga naʻe ʻikai  te nau lotu kia Sihova. (Senesi 40:​20-22; Maake 6:​21, 22, 24-27) Naʻe ʻikai ke kātoangaʻi ʻe he muʻaki kau Kalisitiané ʻa e ngaahi ʻaho fāʻeleʻí. Ko e tōʻonga ko ia ko hono kātoangaʻi ʻo e ngaahi ʻaho fāʻeleʻí ko e tupu ia mei he ngaahi lotu loi ʻo e kuonga muʻá. ʻOku foaki meʻaʻofa mo feohi fiefia ʻa e kau Kalisitiane moʻoní ʻi he ngaahi taimi kehe he lolotonga ʻo e taʻú.

5. Ilifia ki he kau Maté: ʻOku ʻikai malava ʻe he kau maté ke fai ha meʻa pe ongoʻi ha meʻa. ʻOku ʻikai malava ke tau tokoni kiate kinautolu, pea ʻoku ʻikai malava ke nau uesia kitautolu. (Sāme 146:4; Koheleti 9:​5, 10) ʻOku mate ʻa e soulú; ʻoku ʻikai te ne toe moʻui atu ʻi he hili ʻa e maté. (Isikeli 18:4) Ka ʻi he taimi ʻe niʻihi ko e kau ʻāngelo fulikivanú, ʻoku ui ko e kau tēmenioó, ʻoku nau fakangalingali mai ko e ngaahi laumālie ʻo e kau maté. Ko ha faʻahinga tōʻonga pē ʻoku fekauʻaki mo e ilifia pe lotu ki he kau maté ʻoku hala ia.​—Aisea 8:19.

6. Kolosí: Naʻe ʻikai ke pekia ʻa Sīsū ʻi ha kolosi. Naʻá ne pekia ʻi ha fuʻu pou, pe ko ha ʻakau. Ko e foʻi lea faka-Kalisi naʻe liliu lea ko e “kolosi” ʻi he ngaahi Tohitapu lahi naʻe ʻuhinga pē ia ki ha fuʻu papa ʻe taha. Ko e fakaʻilonga ʻo e kolosí ko e tupu mei he ngaahi lotu loi ʻo e kuonga muʻá. Naʻe ʻikai ke ngāueʻaki pe lotu ʻa e muʻaki kau Kalisitiané ki he kolosí. Ko ia ai, ʻokú ke fakakaukau ʻe totonu ke ngāueʻaki ha kolosi ʻi he lotú?​—Teutalonome 7:26; 1 Kolinito 10:14.

7. ʻOku mātuʻaki faingataʻa nai ke liʻaki atu ha niʻihi ʻo e ngaahi tui mo e ngaahi tōʻonga ko ʻení. ʻE feinga nai ʻa e ngaahi kāingá mo e ngaahi kaumeʻá ke fakalotoʻi koe ke ʻoua ʻe liliu ʻa hoʻo tuí. Ka ʻoku mahuʻinga ange ʻa hono fakahōifuaʻi ʻa e ʻOtuá ʻi hono fakahōhōʻiaʻi ʻa e tangatá.​—Palovepi 29:25; Mātiu 10:​36, 37.

[Fakatātā ʻi he peesi 22]

Ko e ʻOtuá ʻoku ʻikai ko ha Tolu-Tahaʻi-ʻOtua

[Fakatātā ʻi he peesi 23]

Ko e Kilisimasí mo e ʻAho Toetuʻú ko e tupu mei he ngaahi lotu loi ʻo e kuonga muʻá

[Fakatātā ʻi he peesi 23]

ʻOku ʻikai ha ʻuhinga ke lotu ai ki he kau maté pe ilifia kiate kinautolu