ʻOku Mau Fie Tokoni Atu

Ko e polosiuá ni kuo tokonaki mai ke ke maheni ange ai mo e ngāue ʻa e Kau Fakamoʻoni ʻa Sihová pea mo ʻenau ngaahi fokotuʻutuʻu ke tokoniʻi koe ke ke tupulaki ʻi he ʻilo ki he Tohitapú. Mahalo kuo ʻosi ʻaʻahi atu ha Kau Fakamoʻoni ʻa Sihova, pe kuó ke fetalanoaʻaki mo kinautolu he halá pe ngaahi feituʻu kehe. Mahalo ko ha taha ʻo e Kau Fakamoʻoní ʻokú ne lolotonga ako mo koe.

Naʻá ke ʻiloʻi ko ʻenau fakamatala fekauʻaki mo e Puleʻanga ʻo e ʻOtuá ʻoku lolotonga fanongonongo ia ʻi māmani lahi? Ko e hā hono ʻuhingá? Koeʻuhi ʻoku finangalo ʻe he ʻOtuá, ko hotau Tokotaha-fakatupú, ke fāʻūtaha ʻa e kakaí mei he puleʻanga kotoa ʻi heʻenau lotu ange kiate iá. Naʻá ne kikite fekauʻaki mo hotau taimí: “ʻE ōange ʻa e ngaahi kakai lahi, pea te nau pehe, Haʻuā, ke tau ʻalu hake ki he moʻunga ʻo Sihova, ki he fale ʻo e ʻOtua ʻo Sekope; pea te ne ako kiate kitautolu hano ngaahi ʻalunga, pea te tau fou ʻi hono ngaahi founga.”​—ʻAisea 2:​2, 3.

Ko e ngāue ʻa e Kau Fakamoʻoni ʻa Sihová ʻi hono fakahā atu kiate koe ʻo kau ki he ngaahi ʻalunga ʻa e ʻOtuá ko ha fakahoko ia ʻo e kikité ni. ʻE fakahā atu ʻi he ngaahi peesi hoko maí ʻa hono mahuʻinga ʻo e ngāue ko ʻení he taimí ni pea mo e founga ke ke maʻu ʻa e ʻaonga mei aí.