Kau ʻOvasia Fefonongaʻaki​—Kaungāngāue ʻi he Moʻoní

ʻI he fakatahaʻanga Kalisitiane ʻo e ʻuluaki senitulí, naʻe ʻi ai ʻa e kau ʻovasia fefonongaʻaki naʻa nau ʻaʻahi ki he ngaahi fakatahaʻangá ke langa hake kinautolu. Naʻa nau līʻoa ʻa kinautolu, ʻikai ko e kumi ha lelei fakafoʻituitui, ka ke nau tokoniʻi ʻa kinautolu ʻi he ngaahi fakatahaʻangá ke hanganaki laka ʻo taau mo e ʻOtuá.​—Ngāue 11:23, 24; 14:21, 22; 15:32; 20:2, 31-35; Filipai 2:20-22, 29; 1 Tesalonaika 2:5-12.

He ʻahó ni ʻoku toe maʻu ʻe he ngaahi fakatahaʻanga ʻa e Kau Fakamoʻoni ʻa Sihová ʻa e ngaahi ʻaonga mei he kau ʻovasia fefonongaʻakí. Kuo maʻu ʻe he kau tangatá ni ʻa e taukei he ngaahi taʻu lahi ʻi he ngāue fakamalanga ʻa e Kau Fakamoʻoni ʻa Sihová, mo e tuʻunga ko e kau ʻovasiá. Kuo nau fakaʻataʻataaʻi ʻa kinautolu mei he ngāue fakamāmaní mo e fatongia fakaʻapí koeʻuhi ka nau ʻoatu kinautolu ke kau taimi-kakato ki he ngāue fakafaifekaú. Ko e faʻahinga kuo malí, ʻoku faʻa kau ʻa e ngaahi uaifi mo honau husepānití ʻi he ngāue fakamalanga taimi-kakató.

ʻOku vaheʻi ha ʻovasia fakafeituʻu ke ne tokangaʻi ha vāhenga-ngāue fakafeituʻu ʻa ia ʻoku kau ki ai ha ngaahi fakatahaʻanga ʻe 18 ki he 25 nai. ʻOkú ne ʻaʻahi tuʻo ua he taʻu ki he fakatahaʻanga taki taha pea ʻi he hili ha taʻu ʻe ua pe tolu ʻoku vaheʻi ia ki ha vāhenga-ngāue fakafeituʻu ʻe taha. ʻI he foungá ni ʻoku maʻu ai ʻe he ngaahi fakatahaʻangá ha ngaahi ʻaonga mei he ngaahi taukei mo e tufakanga ʻa e kau ʻovasia fakafeituʻú.

Ko e ʻovasia fakafeituʻú ʻokú ne vakaiʻi ʻa e tuʻunga fakalaumālie ʻo e fakatahaʻangá mo ʻene ngāué. ʻOkú ne fai ʻa e ngaahi malanga ki he fakatahaʻangá pea fakataha foki mo e kau mātuʻá pea mo e kau sevānití ke vakaiʻi pe ʻe malava fēfē ke nau fakaleleiʻi ʻenau ngāue ki he fakatahaʻangá.

ʻI he lolotonga ʻo e uiké ʻokú ne kau mo hono uaifí, kapau kuo mali, fakataha mo e Kau Fakamoʻoni mei he fakatahaʻangá, ʻo tokoniʻi kinautolu ke fakaleleiʻi ʻenau ngāue fale-ki-he-falé. Ko ia mo hono uaifí te na toe ʻaʻahi foki ki ha kakai foʻou ʻoku nau mahuʻingaʻiá ke fakalototoʻaʻi kinautolu ʻi he tui. ʻE lava pē ke ke kole ke fai atu ha ʻaʻahi pehé ni.

Ko e ʻovasia fakavahé ʻoku ʻi ai hono tuʻunga fakalaumālie mo e ngaahi taukei tatau. ʻOkú ne fononga mei ha vāhenga-ngāue fakafeituʻu ʻe taha ki he taha, ʻo fai ha tokoni he uike taki taha ʻi he ngaahi  fakataha fakafeituʻú. Ko ia mo hono uaifí ʻokú na toe ngāue he ngāue fakamalangá mo e Kau Fakamoʻoni ʻi he taha ʻo e ngaahi fakatahaʻanga ʻo e vāhenga-ngāue fakafeituʻu ʻokú ne ʻaʻahi ki aí. ʻOkú ne tokangaʻi ʻa hono teuteu aofangatuku ʻo e polokalama ʻo e fakataha fakafeituʻú pea fai mo e ngaahi malanga he lolotonga ʻa e fakatahá, kau ai mo e malanga fakahāhā.

ʻI he ʻosi ʻa e ʻaʻahi ʻa e kau ʻovasia fefonongaʻakí ki ha fakatahaʻanga pe ha vāhenga-ngāue fakafeituʻu, ʻoku nau hoko atu leva ʻenau ʻaʻahí ki ha toe taha kehe, ʻo muimui ki he taimi tēpile tatau, kaeʻoua kuo ʻaʻahi ki he ngaahi fakatahaʻangá pe vāhenga-ngāue fakafeituʻú fakakātoa ʻi he māhina ʻe ono nai; pea te nau toe kamata leva mei muʻa.

ʻI he ngaahi fonua lahi ʻoku fononga ʻa e kau ʻovasia fefonongaʻakí ʻi ha kā pe ngāueʻaki ʻa e ngaahi meʻalele ʻoku fononga ai ʻa e kakaí. ʻI he ngaahi fonua ʻe niʻihi ʻoku nau ngāueʻaki nai ha pasikala pea aʻu ʻo fononga lalo. ʻOku totongi ʻa e ngaahi fakamole ʻo e fononga holo ʻa e ʻovasia fefonongaʻakí ʻe he Sōsaietí pea toe ʻoange kiate ia mo hono uaifí ha kiʻi tokoni ki heʻena fiemaʻu fakafoʻituituí. ʻOku māʻunga tokonaki ʻe he kau mēmipa ʻo e fakatahaʻanga taki taha ki he ʻovasia fefonongaʻakí mo hono uaifí ha nofoʻanga, mo e meʻatokoni.

ʻOku fiemaʻu ki he ngāué ni ha laumālie ʻo e feilaulauʻi-kita. ʻOku loto-pau ʻa e kau ʻovasia fefonongaʻakí mo honau ngaahi uaifí ke fai ha tokoni ki he ngaahi fakatahaʻangá ʻo ʻoua ʻe tuku ha kavenga mamafa kiate kinautolu.​—1 Tesalonaika 2:9.

• Ko e hā ʻa e taumuʻa ʻa e kau ʻovasia fefonongaʻaki ʻi he fakatahaʻanga Kalisitiane ʻi he ʻuluaki senitulí?

• ʻOku anga-fēfē ʻa e hoko ʻa e kau ʻovasia fefonongaʻaki he ʻaho ní ʻo taau mo ʻatā ki he ngāue fakafaifekau ko ʻení?

• Fakamatala ʻa e ngāue ʻa e ʻovasia fakafeituʻú mo e fakavahé pea mo e anga ʻo ʻenau moʻuí.

[Fakatātā ʻi he peesi 20]

ʻOvasia fakavahe ʻokú ne lea ʻi ha fakataha fakafeituʻu

[Fakatātā ʻi he peesi 21]

Ko e kau ʻovasia fakafeituʻú ʻoku nau ʻoatu ʻa e fakahinohino ʻi he malanga fale ki he falé, lea ki he kau mātuʻa ʻo e fakatahaʻangá, ʻaʻahi ki he ako Tohitapu mo ha kau mahuʻingaʻia foʻou, pea malanga ki he ngaahi fakatahaʻangá