Ngaahi Fakatahaʻanga Fokotuʻutuʻu Maau ki Hono Malangaʻi ʻo e Puleʻanga ʻo e ʻOtuá

ʻI heʻene ʻi māmaní, naʻe malangaʻaki ʻe Sīsū Kalaisi ʻa e Puleʻanga ʻo e ʻOtuá, ʻo ʻalu mei he kolo ki he kolo pea mei he kolo lalahi ki he kolo lalahi. Naʻá ne toe akoʻi mo fekau atu ʻene kau ākongá ke nau fai ʻa e ngāue tatau. Ki muʻa pea hāʻele hake ki hēvaní, naʻá ne fekau ki hono kau muimuí ke nau ngaohi ākonga mei he kakai ʻo e ngaahi puleʻanga kotoa. Pea mei hono kamataʻangá, naʻe fokotuʻu­tuʻu maau ʻa e muʻaki fakatahaʻanga Kalisitiané ki hono malangaʻi ʻo e ongoongo leleí. ʻI ha feituʻu pē naʻe ʻalu ki ai ʻa e kau ākongá, naʻa nau malangaʻi ʻa e Puleʻanga ʻo e ʻOtuá.​—Mātiu 4:​17, 23; 10:1-16; 28:​19, 20; Luke 4:​43, 44; 8:1; 10:​1-9; Ngāue 1:8; 4:31; 5:42; 8:12; 19:8; 28:​23, 30, 31; Loma 10:​9, 10, 14.

ʻI he kikite ʻa Sīsū ki he fakaʻosiʻosi ʻo e tuʻu ko ʻení, naʻá ne pehē: “Pea ʻe ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” Ko e malanga ko ʻení ko e fatongia muʻo­muʻa ia ʻo e fakatahaʻanga Kalisitiane he ʻaho ní.​—Mātiu 24:14; Maʻake 13:10.

ʻI māmani lahi, ʻoku fokotuʻutuʻu maau ʻa e ngaahi fakatahaʻanga kotoa ʻo e Kau Fakamoʻoni ʻa Sihová ke malangaʻi hokohoko ʻa e ongoongo lelei ʻo e Puleʻanga ʻo e ʻOtuá ʻi honau feituʻú. Ko ia ke fai eni ʻi ha founga maau, ʻi he fonua taki taha ʻoku vaheʻi ʻe he vaʻa ʻo e Watch Tower Society ki he fakatahaʻanga taki taha ha vāhenga-ngāue ki he ngāue fakamalangá. ʻOku vahevahe leva ʻe he fakatahaʻangá ʻa e vāhenga-ngāue ko iá ki ha toe kongokonga iiki ange, ʻa ia ʻoku toki vaheʻi ki he faʻahinga ko ia te nau fakapapauʻi ke ʻaʻahi ki he kakai ʻoku nofo aí.​—1 Kolinitō 14:​33, 40.

ʻOku māʻunga fetuʻutaki ʻa e Kau Fakamoʻoní mo e kakaí ʻi heʻenau ʻalu mei he fale ki he falé. ʻI he ngaahi fakataha ʻa e fakatahaʻangá, ʻoku akoʻi ai ʻa e Kau Fakamoʻoni ʻa Sihová ki hono foaki atu ʻi ha taimi nounou ʻa e ongoongo ʻo e Puleʻangá ʻi he ngaahi ʻapí, ʻo ngāueʻaki ʻenau Tohitapú. ʻOku ʻave ʻe he  Kau Fakamoʻoní ha ʻū tohi faka-Tohitapu ke tuku ki he kau tauhiʻapi ʻoku nau saiʻia ke maʻu ha ʻilo lahi ange ki he Folofola ʻa e ʻOtuá.

Ke ʻoange ki he tokotaha kotoa pē ʻi he vāhenga-ngāue ko iá ha faingamālie ke fanongo ki he ongoongo ʻo e Puleʻangá, ʻoku tauhi ʻe he Kau Fakamoʻoní ha lekooti fakaikiiki ʻi heʻenau ngāue fale ki he falé, ʻo fakahaaʻi ai ʻa e ngaahi ʻapi naʻe ʻikai ha tahá pe ha ʻuhinga kehe naʻe ʻikai lava ke fakahoko ai ha fakamoʻoni. ʻE fai ha toe foki ki ai ʻi ha taimi kehe. Pea ka ʻi ai ha mahuʻingaʻia ʻe hā mei ha taha, ʻoku tohi ia, pea ʻe toe foki ʻa e Kau Fakamoʻoní, ke ʻoange ha toe fakamatala faka-Tohitapu kiate ia. Kapau ʻokú ne saiʻia ai, ʻe fai leva ha ako Tohitapu. ʻOku fai taʻetotongi kotoa eni.

ʻOku toe foaki atu ʻe he Kau Fakamoʻoni ʻa Sihová ha ngaahi makasini ki he kakai ʻi he ngaahi halá. ʻI he foungá ni ʻoku malava ai ke nau fetaulaki mo e kakai tokolahi naʻe ʻikai nai te nau fetaulaki ʻi ʻapí. ʻOku fai ha feinga lahi ke aʻu ki he tokotaha kotoa ʻe fie fanongó.​—Ngāue 17:17; Fakahā 14:​6, 7; 22:17.

Ko e hā hono ʻuhinga ʻoku hanganaki ʻaʻahi ai ʻa e Kau Fakamoʻoní neongo ʻoku ʻikai fakahā ha mahuʻingaʻia ʻe he tokolahi taha? Koeʻuhi kuo ʻilo ʻoku faʻa liliu ʻa e tuʻunga ʻo e niʻihi pea nau tali lelei ʻi ha toe ʻaʻahi kehe, pe ʻe fetaulaki nai mo ha taha kehe ʻi he ʻapi ko iá te ne fakahā ha mahuʻingaʻia.

Naʻe pehē ʻe Sīsū ki heʻene kau ākongá: “Ka mou kumi muʻa ki hono puleʻanga, mo e maʻoniʻoni aʻana.” Ko hono malangaʻi ʻo e Puleʻanga ʻo e ʻOtuá ko ha konga mahuʻinga ʻi heʻetau fuofua kumi ki he Puleʻangá, pea ʻoku ʻai ʻeni ʻe he Kau Fakamoʻoni ʻa Sihová ko ha taumuʻa mahuʻinga ʻi heʻenau moʻuí.​—Mātiu 6:33; 2 Tīmote 4:2.

• Ko e hā ʻa e ngāue ʻa Sīsū mo e muʻaki Kau Kalisitiané naʻe kikiteʻi ke toe fai ʻi hotau taimí?

• ʻOku anga-fēfē hono fokotuʻutuʻu maau ʻa e ngāue fakamalanga ʻa e Kau Fakamoʻoni ʻa Sihová?

• Ko e hā hono ʻuhinga ʻoku hanganaki ʻaʻahi ai ʻa e Kau Fakamoʻoní ki he kakai neongo ʻoku ʻikai fakahā ʻe he tokolahi taha ha mahuʻingaʻia?

[Fakatātā ʻi he peesi 16, 17]

Ko hono malangaʻi ʻe he Kau Fakamoʻoni ʻa Sihová ʻa e Puleʻanga ʻo e ʻOtuá ʻi he tukui fonua kehekehe

Taileni

Mekisikou

Netaleni

Kōlea

Curacao

Ghana

Pilitānia

ʻAositelēlia