Ngaahi Fakataha ke Fefakaʻaiʻaiʻaki ki he Feʻofaʻaki mo e Ngāue Lelei

Naʻe māʻunga fakataha ʻa e muʻaki kau Kalisitiané ki ha ʻapi nofoʻanga, ke maʻu ʻa e ngaahi fakahinohino pea fiefia ʻi he feohi fakatupu langahake. He ʻahó ni, ʻoku fakataha tuʻo tolu ʻa e ngaahi fakatahaʻanga ʻa e Kau Fakamoʻoni ʻa Sihová he uike. ʻOku fakaafeʻi koe ke maʻu ha taha ʻo e ngaahi fakatahá ni. Ko ʻenau ngaahi fakatahá ʻoku ʻikai fai ʻi ha ngaahi ouau fakamamalu, ka ʻoku fakahangataha ia ʻi he ako fakaʻotua. ʻOku kamata mo fakaʻosi ʻaki ʻa e hiva mo e lotu ʻa e ngaahi fakataha ʻa e fakatahaʻangá. ʻOku taʻetotongi ʻa e ngaahi fakatahá, pea ʻoku ʻikai ha tānaki paʻanga ʻi he lolotonga hono faí.​—Ngāue 4:23-31; 14:22; 15:​32, 35; Loma 16:5; Kolose 4:15.

Mahalo ko e ʻuluaki fakataha te ke maʻú ko ha malanga fakahāhā ʻe miniti ʻe 45, ʻo fekauʻaki mo e ngaahi akonaki faka-Tohitapu, ngaahi kikite, pe ko ha fakahinohino ki he moʻui faka-Kalisitiané. ʻOku ʻi ai ha ako ʻo e Tohitapú he hili ʻa e malangá ni, ʻo ngāueʻaki ha kupu ʻi he Taua Leʻó ʻa ia ʻoku teuteuʻi makehe tautefito ki he ako ʻa e fakatahaʻangá. ʻOku pehé ni hono fai ʻa e akó: ʻOku lau ʻa e palakalafi mei he Taua Leʻó, pea ʻe toki fai mai ʻe he faiakó ʻa e fehuʻi ʻi he meʻa naʻe laú pea ko kinautolu ʻoku loto ke tali ʻa e fehuʻí ʻe hiki honau nimá. ʻOku māʻunga fai ha ngaahi tali ʻi he palakalafi taki taha. Ko e fakatahá ni ʻoku feʻunga mo e houa ʻe taha.

ʻI he lolotonga ʻo e uiké, ʻoku toe fai mo e ongo fakataha miniti ʻe 45 ʻe ua. Ko e taha ko e Ako Fakafaifekau Fakateokalati. ʻOku fai ai ha ako ki he anga hono teuteu mo akoʻi lelei ha ngaahi kaveinga mei he Tohitapú. Hili ʻa e miniti ʻe 21 ʻo e akonaki makehe, ʻoku fai ha malanga nounou ʻe ha kau ako kuo ʻosi vaheʻi ki ai. Hili ʻa e malanga ʻa e kau akó taki taha, ʻoku fai leva ʻe he faiakó ha fakahinohino ke fakaleleiʻi ai ʻene malangá. Kuo teuteuʻi ha ʻū tohi ke ngāueʻaki ʻi he akó ni. Ko kinautolu ʻoku nau maʻu fakataha maʻu pē ʻe lava ke nau kau ki he akó, ʻo kapau ʻoku taau ʻenau founga moʻuí mo e ngaahi tefitoʻi moʻoni faka-Kalisitiané.

Ko e fakataha ʻoku hokó ko e Fakataha Ngāue. ʻOku kau ki ai ʻa e konga ʻe tolu pe fā ʻo fekauʻaki mo hono foaki atu ʻa e ongoongo leleí mei he fale ki he falé pea pehē ki he ngaahi tafaʻaki kehe ʻo e ngāue fakafaifekaú. ʻOku fai ʻa e ngaahi kongá ni ʻo hangē ha malanga, pe fetalanoaʻaki, pe ko ha ngaahi fakahāhā, ʻo fakakau nai ki ai ʻa e kau fanongó. Ko e konga lahi ʻo e polokalamá ʻoku toʻo mei he ʻEtau Ngāue  Fakafaifekau ʻo e Puleʻanga, ko ha pepa peesi fā ʻoku pulusi fakamāhina ʻe he Watch Tower Society.

Ko ha fakataha ʻe taha ko e ako fakauike ʻoku fai ʻi ha ngaahi kulupu tokosiʻi ange, ʻo māʻunga ngāueʻaki ʻa e ngaahi ʻapi ʻo e niʻihi ʻi he fakatahaʻangá. ʻOku makatuʻunga ʻa e akó ʻi he Tohitapú mo ha tohi kuo toki pulusi ʻe he Sōsaietí. Koeʻuhi ko e tokosiʻi ange ʻa e kulupú, ʻoku ʻi ai ai ha faingamālie lelei ange ke kau kotoa ki he fetalanoaʻakí, pea ʻoku toe ʻi ai ha faingamālie lelei ke nau femaheniʻaki lelei ange ai.

Ko e lahi taha ʻo e ngaahi fakatahaʻangá ʻoku fai ʻenau ngaahi fakatahá ʻi he Kingdom Hall (fale fakatahaʻanga) kuo langa ʻe he Kau Fakamoʻoni ʻa Sihová. Ko e fakamolé ʻoku fua pē ia ʻe he Kau Fakamoʻoní ʻaki ʻenau foaki meʻaʻofa loto-fiefoaki pē ʻa kinautolu, pea ʻi he taimi lahi taha ʻoku fai taʻetotongi pē ʻa e ngāué ʻe ha kau ngāue pole. ʻI he ngaahi fakatahá kotoa ʻoku ʻi ai ha līʻanga meʻaʻofa ke ngāueʻaki ʻe he faʻahinga ʻoku nau loto ke foaki ha tokoní.

Ko e ngaahi fakataha ʻa e fakatahaʻangá ʻoku tokoni ki he Kau Fakamoʻoni ʻa Sihová ke nau muimui ʻi he akonaki ʻia Hepelū 10:​24, 25: “Pea ke tau fetokangaʻaki, ke fefakaʻaiʻaiʻaki ʻa kitautolu ki he feʻofaʻaki mo e ngaue lelei: ʻo ʻoua naʻa tau liʻaki ʻetau ngaahi fakataha, ʻo hange ko e anga ʻo e niʻihi; ka mou feenginakiʻaki, pea ʻasili he ʻoku mou sio ki he fakaofiofi mai ʻa e ʻaho.”

• Ko e hā ʻa e ngaahi konga ʻo e ngaahi fakataha ʻa e muʻaki Kalisitiané ʻoku hā mahino mai ʻi he ngaahi fakataha ʻa e Kau Fakamoʻoni ʻa Sihová?

• Fakamatala ki he ngaahi meʻa ʻoku fai ʻi he ngaahi fakataha ʻe nima ʻoku fai maʻu pē ʻe he Kau Fakamoʻoní.

• ʻOku anga-fēfē hano maʻu ha fale fakatahaʻanga?

[Fakatātā ʻi he peesi 14]

Ko ha mātuʻa ʻoku fai Ako Taua Leʻo, ʻIunaite Setete

Tā ʻo e Ako Fakafaifekau Fakateokalati, ʻOtu Motu Faeroe

Ako fakakulupu ʻi ha ʻapi, ʻi Yap

Kingdom Hall, New Braunfels, Texas, U.S.A., naʻe langa he ʻaho ʻe ua ʻe he Kau Fakamoʻoni ʻa Sihová

[Fakatātā ʻi he peesi 15]

Ngaahi Kingdom Hall ʻi he tukui fonua

Siapani

ʻAositelēlia

ʻAositulia

Sēpeni