Vahe 132

ʻI he Nima Toʻomataʻu ʻo e ʻOtuá

KO E huaʻi hifo ʻo e laumālie māʻoniʻoní ʻi he Penitekosí ko e fakamoʻoni ia naʻe ʻosi aʻu hake ʻa Sīsū ki hēvani. Ko e vīsone naʻe toki ʻomai fuoloa siʻi mei ai ki he ākonga ko Sitīvení ʻokú ne toe fakamoʻoniʻi naʻá Ne ʻosi aʻu ki ai. ʻI hono tolomakaʻi ʻo Sitīveni koeʻuhi ko ʻene faifakamoʻoni anga-tonú, naʻá ne kalanga: “ʻOku ou sió ni ki he ngaahi langí kuo matangaki, pea ko e Fanautama ʻa tangatá ʻokú ne tuʻu mei he toʻomataʻu ʻo e ʻOtuá.”

Lolotonga ʻa ʻene ʻi he nima toʻomataʻu ʻo e ʻOtuá, naʻe talitali ai ʻa Sīsū ki he fekau mei heʻene Tamaí ʻo pehē: “ʻI he lotolotonga ʻo ho ngaahi filí, pule pē koe.” Kae ʻi he lolotonga ʻa e taimi ko iá, ki muʻa ke ne fai ha meʻa ki hono ngaahi filí, ko e hā ʻa e meʻa naʻe fai ʻe Sīsuú? Naʻá ne pule mai, pe pule fakatuʻi, ki heʻene kau ākonga paní, ʻo tataki kinautolu ʻi heʻenau ngāue fakamalangá mo teuteuʻi kinautolu ke nau hoko ʻi haʻanau toetuʻu, ko e kaungātuʻi fakataha mo ia ʻi he Puleʻanga ʻo ʻene Tamaí.

Hangē ko ʻení, naʻe fili ʻe Sīsū ʻa Saula (naʻe ʻiloʻi lelei ange ki mui mai ʻi hono hingoa faka-Lomá, ko Paula) ke ne takimuʻa he ngāue ngaohi-ākongá ʻi he ngaahi fonua kehé. Naʻe faivelenga ʻa Saula ki he Lao ʻa e ʻOtuá, ka naʻe takihalaʻi ia ʻe he kau taki lotu faka-Siú. Ko hono nunuʻá, naʻe ʻikai ke ngata pē ʻa hono poupouʻi ʻe Saula ʻa e fakapoongi ʻo Sitīvení ka naʻá ne ʻalu ki Tāmasikusi mo e mafai mei he taulaʻeiki lahi ko Kaiafasí ke puke ʻo ʻomai ki Selusalema ha kau tangata pe kau fefine te ne maʻu ai ko e kau muimui ʻo Sīsū. Kae kehe, ʻi he lolotonga ʻa e fononga ʻa Saulá, naʻe huhulu fakafokifā mai ha maama ʻo fuʻu ngingila takatakai ʻiate ia peá ne tō ai ki he kelekelé.

“ʻE Saula, ʻe Saula, ko e hā ʻokú ke fakatangaʻi ai aú?” ko ha leʻo ia naʻe fehuʻi mai mei he feituʻu taʻehāmaí. “ʻEiki, ko hai koe?” ko e fehuʻi ia ʻa Saulá.

“Ko au ko Sīsū, ʻa ia ʻokú ke fakatangaʻí,” ko e tali ia naʻe fai maí.

Ko Saula, ʻa ia naʻe fakakuihi ʻe he maama fakaemaná, naʻe fakahā ki ai ʻe Sīsū ke ʻalu ki Tāmasikusi ʻo talitali ai ki ha ngaahi fakahinohino. Pea naʻe hā ʻa Sīsū ʻi ha vīsone kia ʻĀnanaia, ko e taha ʻo ʻene kau ākongá. Naʻe tala ʻe Sīsū kia ʻAnanaia ʻo fekauʻaki mo Saula: “Ko e ipu mātuʻaki fili ʻeni ʻaʻaku, ke hapai hoku hingoá ʻi he ʻao ʻo e Senitailé, mo e ngaahi tuʻi, mo haʻa ʻIsileli foki.”

Ko e moʻoni, ʻi he tokoni ʻa Sīsuú, ko Saula (naʻe toki ʻiloa ko Paulá) mo e kau ʻevangeliō kehe naʻa nau lavameʻa kāfakafa ʻi heʻenau ngāue fakamalangá mo e faiakó. Ko hono moʻoní, ʻi he hili ʻa e taʻu ʻe 25 nai mei he hā ʻa Sīsū kiate ia ʻi he hala ki Tāmasikusí, naʻe tohi ʻe Paula ʻo pehē ko e “ongoongo leleí” kuo ʻosi “malangaʻaki ki he meʻa moʻui kotoa pē ʻi he lalo langí.”

ʻI he ʻosi atu ʻa e toe ngaahi taʻu lahi, naʻe ʻomai ʻe Sīsū ha holongā vīsone ki heʻene ʻaposetolo ʻofeina ko Sioné. Ko hono moʻoní, fakafou mai ʻi he ngaahi vīsone ko ʻeni naʻe fakamatala ki ai ʻa Sione ʻi he tohi Fakahā ʻi he Tohitapú, ʻoku hangē naʻe moʻui ʻa Sione ʻo ne sio ki he foki mai ʻa Sīsū ʻi he mafai ʻo e Puleʻangá. Naʻe pehē ʻe Sione naʻe ʻave ai ia ki muʻa atu ʻi hono taimí ki he “ʻaho ʻo e ʻEikí” ʻaki ʻa e “meʻa fakahā.” Ko e hā ʻa e “ʻaho” ko ʻení?

Ko hano ako fakalelei ʻa e ngaahi kikite ʻa e Tohitapú, kau ai mo e kikite ʻa Sīsū tonu ʻo fekauʻaki mo e ngaahi ʻaho fakaʻosí, ʻoku fakahā ai ko e “ʻaho ʻo e ʻEikí” naʻe kamata ʻi he taʻu fakahisitōlia ko e 1914! Ko ia naʻe foki taʻehāmai ai ʻa Sīsū ʻi he 1914, ʻo ʻikai ʻi ha founga fakahāhā ki tuʻa pea ko ʻene kau sevāniti tauhi anga-tonú pē naʻa nau ʻilo ʻa ʻene foki maí. ʻI he taʻu ko iá naʻe ʻoange ai ʻe Sihova kia Sīsū ʻa e fekau ke ne ʻalu ʻo pule ʻi he lotolotonga ʻo hono ngaahi filí!

ʻI he talangofua ki he tuʻutuʻuni ʻa ʻene Tamaí, naʻe fakamaʻa ʻe Sīsū ʻa hēvani ʻo ne lī hifo ʻa Sētane mo ʻene kau tēmenioó ki he māmaní. ʻI he hili ʻa e sio ki he meʻa ko ʻení ʻi ha vīsone, naʻe fanongo ʻa Sione ki ha leʻo fakahēvani naʻá ne talaki: “Kuo hoko ʻeni ʻa e fakamoʻuí, mo e mālohí, mo e puleʻanga ʻo hotau ʻOtuá, pea mo e pule ʻa ʻene Kalaisí!” ʻIo, ʻi he 1914 naʻe kamata pule ai ʻa Kalaisi ko e Tuʻi!

Ko ha ongoongo lelei lahi ē ki he kau lotu kia Sihova ʻi hēvaní! Naʻe naʻinaʻi kiate kinautolu: “Mou fiefia ʻa e ngaahi langí, mo kimoutolu ʻoku nofo tāpanekale ʻi aí!” Ka ko e hā ʻa e tuʻunga kiate kinautolu ʻi he māmaní? “Ka ʻoiauē ʻa e fonuá mo e tahí,” ko e hoko atu ia ʻa e leʻo mei he langí, “he kuo hoko hifo ʻa e Tēvoló kiate kimoua, ʻokú ne ʻita lahi, ko ʻene ʻilo, ʻoku toesiʻi pē hono taimí.”

ʻOku tau ʻi he lolotonga ʻa e taimi ko ia ʻoku toe siʻí. ʻOku lolotonga fakahaaʻi ʻe he kakaí pe ʻoku nau taau ki he hū atu ki he māmani foʻou ʻa e ʻOtuá pe ko e tō ki he fakaʻauhá. Ko hono moʻoní, ko ho kahaʻú tonu ʻoku lolotonga fakapapauʻi ia ʻi he taimí ni ʻi he anga ʻo hoʻo tali ki he ongoongo lelei ʻo e Puleʻanga ʻo e ʻOtuá ʻa ia ʻoku lolotonga malangaʻi ʻi māmani lahi ʻi he malumalu ʻo e tataki ʻa Kalaisí.

ʻI he hili iá, ʻe hoko ʻa Sīsū Kalaisi ko e Fakafofonga ʻo e ʻOtuá ke ne toʻo atu mei he māmaní ʻa e fokotuʻutuʻu kotoa ʻo e ngaahi meʻa ʻa Sētané mo kinautolu kotoa pē ʻoku nau poupouʻi iá. ʻE fakahoko ʻe Sīsū ʻa hono toʻo ko ʻeni ʻo e fulikivanú hono kotoa pē ʻi he tau ʻoku ui ʻi he Tohitapú ko Hāmaketone, pe ʻĀmaketone. ʻI he hili iá, ko Sīsū, ko e Tokotaha lahi taha ia ʻi he ʻuniveesí ʻoku hoko hake kia Sihova ko e ʻOtuá tonu, te ne puke ʻa Sētane mo ʻene kau tēmenioó pea haʻi kinautolu ʻo feʻunga mo e afeʻi taʻu ʻi he “luo taʻehanotakele,” ʻa ia, ko ha tuʻunga ʻo e taʻelava ke toe ngāue ʻo hangē ko e tuʻunga ʻo e maté. Ngāue 7:​55-60; 8:​1-3; 9:​1-19; 16:​6-10; Sāme 110:​1, 2; Hepelu 10:​12, 13; 1 Pita 3:22; Luke 22:​28-30; Kolose 1:​13, 23; Fakahā 1:​1, 10; 12:​7-12; 16:​14-16; 20:​1-3; Mātiu 24:14.

▪ ʻI he hili ʻa e ʻalu hake ʻa Sīsū ki hēvaní, naʻá ne nofo ʻi fē, pea ko e hā ʻa e meʻa naʻá ne tatali ki aí?

▪ Ko hai naʻe pule mai ki ai ʻa Sīsū ʻi he hili ʻo ʻene ʻalu hake ki hēvaní, pea naʻe fakahāhā fēfē ʻene pulé?

▪ Naʻe kamata ʻanefē ʻa e “ʻaho ʻo e ʻEikí,” pea ko e hā naʻe hoko ʻi hono kamataʻangá?

▪ ʻOku anga-fēfē ʻa e kaunga ʻa e ngāue fakamalanga ʻoku lolotonga fai ʻi he ʻaho ní kiate kitautolu tāutaha kotoa?

▪ Ko e hā ʻa e ngaahi meʻa ʻe hoko mai ʻi he ʻosi ʻa e ngāue fakamalanga ko ʻení?