Vahe 15

ʻUluaki Mana ʻa Sīsuú

KO E ʻaho pē ʻeni ʻe taha pe ua talu mei he taimi naʻe hoko ai ʻa ʻAnitelū, Pita, Sione, Filipe, Nataniela, pea mahalo mo Sēmisi ko e ʻuluaki kau ākonga ʻa Sīsuú. Ko ʻenau foki ʻeni ki honau ʻapi ʻi he vahefonua ko Kālelí, ʻa ia naʻa nau tupu kotoa hake aí. Naʻa nau huʻu ki Kena, ko e kolo ia ʻo Natanielá, pea naʻe tuʻu ʻa e koló ʻi he ngaahi moʻunga naʻe ʻikai fuʻu mamaʻo mei Nasaleti, ko e feituʻu naʻe tupu hake ai ʻa Sīsuú. Naʻe fakaafeʻi kinautolu ki ha kātoanga mali ʻi Kena.

Naʻe ʻalu foki ʻa e faʻē ʻa Sīsuú ki he kātoanga malí. Koeʻuhi ko Mele ko e kaumeʻa ʻo e fāmili ʻo e ongo meʻa naʻe teu malí, ʻoku hā ngalingali naʻe kau ʻa Mele ʻi hono tokangaʻi ʻa e ngaahi fiemaʻu ʻa e faʻahinga tokolahi naʻe fakaafeʻí. Ko ia, naʻe vave ʻa ʻene fakatokangaʻi ha feʻamokaki, ʻa ia naʻá ne fakahā kia Sīsū: “ʻOku ʻikai haʻanau uaine.”

Naʻe ʻuluaki toumoua ʻa Sīsū ʻi hono ngali fokotuʻu atu ʻe Mele ke ne fai ha meʻa ʻo fekauʻaki mo e siʻi ʻa e uainé. “Ko ho hā au?” ko ʻene ʻeké ia. ʻI hono tuʻunga ko e Tuʻi kuo fakanofo ʻe he ʻOtuá, naʻe ʻikai totonu ke tataki ia ʻi heʻene ngāué ʻe he fāmilí pe ngaahi kaumeʻá. Ko ia naʻe fakapotopoto ʻa Mele ʻo tuku ʻa e meʻá ni ki he ʻaofinima ʻo ʻene tamá, ʻo ne pehē pē ki he faʻahinga naʻa nau fai ʻa e ngāué: “Neongo pe ko e hā ha meʻa te ne tala kiate kimoutolu, mou fai.”

Sai, naʻe ʻi ai ʻa e ngaahi siā maka ʻaiʻanga vai lalahi ʻe ono, pea ʻe hao taki taha ai ha lita ʻe 40. Naʻe fakahinohino ʻe Sīsū ki he faʻahinga naʻa nau fai ʻa e ngāué: “Mou fakafonu vai ʻa e ngaahi siā ʻaiʻangavaí na.” Pea naʻe fakafonu ia ʻe he kau fakanofonofó ʻo fonu ngutungutu. Naʻe toki pehē ʻe Sīsū: “ʻUtu leva, pea ʻave ki he talēkita ʻo e kātoangá.”

Naʻe maongo ki he talēkitá ʻa e lelei ʻo e uainé, ʻo ʻikai ke ne ʻilo naʻe maʻu ia ʻi ha mana. Naʻá ne ui ange ʻa e tangata malí, ʻo ne pehē: “Ko e anga ʻo e tangatá ke tomuʻa fokotuʻu mai ʻa e uaine leleí, pea ka konā ʻa e kakaí, pea toki fokotuʻu mai ʻa e uaine ʻoku ʻikai loko leleí. Ka ko koe kuó ke taʻofi ʻa e uaine leleí ki he taimí ni.”

Ko e ʻuluaki mana ʻeni naʻe fai ʻe Sīsuú, pea naʻe hoko ʻo mālohi ange ai ʻa e tui ʻa ʻene kau ākonga foʻoú ʻi heʻenau sio ki he meʻá ni. ʻI he hili ʻa e meʻá ni, naʻá ne fononga fakataha mo ʻene faʻeé mo hono ngaahi tokoua faʻē-tahá ki he kolo ko Kāpaneumé ʻo ofi ki he Tahi Kālelí. Sione 2:​1-12.

▪ Naʻe hoko ʻa e kātoanga mali ʻi Kená ʻi he taimi fē ʻi he lolotonga ʻo e ngāue fakafaifekau ʻa Sīsuú?

▪ Ko e hā naʻe ʻikai ke loto ai ʻa Sīsū ki he fokotuʻu ʻa ʻene faʻeé?

▪ Ko e hā ʻa e mana naʻe fai ʻe Sīsuú, pea ko e hā ʻa e ola ʻo e meʻá ni ki he niʻihi kehé?