Vahe 52

Fafangaʻi Fakaemana ʻe Sīsū ʻa e Laui Afe

NAʻE fiefia ʻa e kau ʻaposetolo ʻe toko 12 ʻi ha fononga ngāue fakamalanga māʻongoʻonga ʻi Kāleli kātoa. Kae kehe, ʻi he hili ha taimi siʻi mei hono tāmateʻi ʻo Sioné, naʻa nau foki kia Sīsū ʻo fakahā ʻa e ngaahi meʻa fakaofo naʻa nau hokosiá. ʻI he vakai atu ki heʻenau helaʻiá pea ki he fuʻu kakai tokolahi kuo haʻu mo ʻalú kuo ʻikai ai maʻu naʻa mo ha taimi ke fai ai ha kai, naʻe pehē ai ʻe Sīsū: ‘Tau ō fakaekitautolu pē ki ha potu lala, ʻo mālōlō.’

ʻI heʻenau fakahekeheka ki honau vaká, ofi nai ʻi Kāpaneume, naʻa nau huʻu atu ki ha feituʻu mamaʻo, ʻoku hā mahino ko e hahake ʻo Sioataní ʻo fakalaka atu ʻi Petesaita. Kae kehe, naʻe tokolahi ʻa e kakai naʻa nau sio kiate kinautolu ʻi heʻenau mavahe atú, pea naʻe ʻilo ki ai mo e niʻihi kehe. Naʻe lele muʻomuʻa ʻa e faʻahingá ni ʻi he matātahí, pea ʻi he aʻu atu ʻa e vaká, kuo ʻi ai ʻa e kakaí ia ke talitali kinautolu.

ʻI he hifo mei he vaká pea sio atu ki he fuʻu kakaí, naʻe langa ʻa e fatu ʻo Sīsuú ʻi he ʻofa koeʻuhi ko e kakaí naʻe hangē ha fanga sipi ʻoku ʻikai hanau tauhí. Ko ia, naʻá ne fakamoʻui ʻenau ngaahi mahakí pea kamata hono akoʻi kiate kinautolu ʻa e ngaahi meʻa lahi.

Naʻe vave ʻa e ʻalu ʻa e taimí, pea naʻe haʻu ʻa e kau ākonga ʻa Sīsuú kiate ia ʻo nau pehē: “Ko e potu lala ʻeni, pea kuo mei ʻosi ʻa e ʻahó ni. Tukuange muʻa kinautolu ke nau ʻalu ki he ngaahi ngoue takatakaí mo e ngaahi vilisí ʻo fakatau maʻanautolu ha meʻakai.”

Kae kehe, naʻe pehē ʻe Sīsū ʻi heʻene talí: “ʻAnge ʻe kimoutolu haʻanau meʻakai.” Ko ia, koeʻuhi naʻe ʻosi ʻilo ʻe Sīsū ia ʻa e meʻa te ne faí, naʻá ne ʻahiʻahiʻi ʻa Filipe ʻaki ʻene ʻeke ange kiate ia: “Te tau fakatau mei fē ha mā ke kai ʻa e kakaí na?”

Mei he anga ʻo e fakakaukau ʻa Filipé, heʻikai ke malava ʻa e tuʻunga ia ko ʻení. He, ko e toko 5,000 nai ē ko e kakai tangata, pea mahalo naʻe laka hake ʻi he kakai ʻe toko 10,000 ʻi hono toe lau atu ki ai mo e kakai fefiné mo e fānaú! Naʻe tali ʻe Filipe ʻo pehē “neongo ʻe onongeauʻi tēnali [ko e tēnali ʻe tahá ko ha vāhenga ia ʻi he ʻaho ʻe tahá ] ha mā, ka ʻe ʻikai feʻunga ke nau taki taha toʻo ha meʻa siʻi.”

Ke fakahāhā nai ʻa e taʻemalava ke fafangaʻi ha fuʻu tokolahi peheé, naʻe pole atu ʻa ʻAnitelū: “ʻOku ʻi ai ha tamasiʻi ʻi heni ʻokú ne maʻu ha foʻi mā paʻale ʻe nima mo ha mataʻi ika ʻe ua,” pea toe tānaki atu, “ka ko e hā ʻa e meʻa ko iá ki ha tokolahi pehē?”

Koeʻuhi ko e faʻahitaʻu failaú ia, ki muʻa siʻi pē ʻi he Laka-Atu ʻo e 32 T.S., naʻe lahi ʻa e mohuku lanu matá. Ko ia, naʻe tala ʻe Sīsū ki heʻene kau ākongá ke tala ki he kakaí ke nau tākoto hifo ʻi he mohukú ʻo fakakulukulupu ki he toko 50 mo e toko 100. Naʻá ne toʻo ʻa e foʻi mā ʻe nimá mo e mataʻi ika ʻe uá, ʻo ne hanga hake ki he langí, pea fai hono tāpuakiʻi. Pea naʻá ne kamata pakipaki leva ʻa e ngaahi foʻi maá pea vahevahe mo e ongo mataʻi iká. Naʻá ne ʻoange leva ia ki heʻene kau ākongá ke vahevahe atu ki he kakaí. Ko e meʻa fakaofó, naʻe kai kotoa ʻa e kakaí ʻo nau mākona!

ʻI he hili iá, naʻe tala ange ʻe Sīsū ki heʻene kau ākongá: “Mou tānaki ʻa e ngaahi mapakipakiʻi mā ʻoku toé, ke ʻoua naʻa maumau ha meʻa.” ʻI heʻenau fai iá, naʻa nau fakafonu ai ʻa e ngaahi kato ʻe 12 ʻi he toetoenga mei he meʻa naʻa nau kaí! Mātiu 14:​13-21; Maake 6:​30-44; Luke 9:​10-17; Sione 6:​1-13.

▪ Ko e hā naʻe kumi ai ʻa Sīsū ki ha potu lilo maʻá e kau ʻaposetolo ʻaʻaná?

▪ Naʻe ʻave ki fē ʻe Sīsū ʻa ʻene kau ākongá, pea ko e hā naʻe ʻikai lava ai ke fakahoko ʻenau fiemaʻu ko ia ke nau mālōloó?

▪ ʻI he fakaʻau ke efiafí, ko e hā naʻe kōlenga ki ai ʻa e kau ākongá, ka naʻe anga-fēfē ʻa hono tokangaʻi ʻe Sīsū ia ʻa e kakaí?