Vahe 18

Fakaʻau ki Mui ʻa Sione, Fakaʻau ki Muʻa ʻa Sīsū

ʻI HE hili ʻa e Laka-Atu ʻi he faʻahitaʻu failau ʻo e 30 T.S., naʻe mavahe ai ʻa Sīsū mo ʻene kau ākongá mei Selusalema. Kae kehe, naʻe ʻikai te nau foki ki honau ngaahi ʻapi ʻi Kālelí ka naʻa nau ʻalu ki he vahefonua ko Siuteá, ʻa ia naʻa nau fai papitaiso ai. Naʻe fai ʻe Sione Papitaiso ʻa e ngāue tatau ʻi he meimei taʻu nai ʻeni ʻe taha, pea naʻe kei ʻiate ia pē ʻene kau ākongá ʻo feohi mo ia.

Ko hono moʻoní, naʻe ʻikai ke fai ʻe Sīsū tonu ia ha papitaiso ʻe taha, ka naʻe fai ia ʻe heʻene kau ākongá ʻi heʻene tatakí. Ko e papitaiso naʻa nau faí naʻe ʻuhinga tatau pē mo ia naʻe fai ʻe Sioné, ʻo hoko ia ko ha fakaʻilonga ʻo e fakatomala ʻa ha Siu heʻene ngaahi angahala ki he fuakava ʻo e Lao ʻa e ʻOtuá. Kae kehe, ʻi he hili ʻa e toetuʻu ʻa Sīsuú, naʻá ne fakahinohinoʻi ʻene kau ākongá ke nau fai ʻa e papitaisó ʻi ha ʻuhinga kehe. Ko e papitaiso ʻa e Kalisitiané ʻi he ʻaho ní ko ha fakaʻilonga ia ʻo e fakatapui ʻo ha taha ke tauhi ʻa e ʻOtua ko Sihová.

Kae kehe, ʻi he taimi siʻi pē ko ia mei he kamata ʻo e ngāue fakafaifekau ʻa Sīsuú, naʻe akoʻi mo papitaiso ʻa e faʻahinga ʻoku fakatomalá fakatouʻosi ʻe Sīsū mo Sione, neongo naʻe ʻikai te na ngāue fakataha. Ka naʻe hoko ʻo meheka ʻa e kau ākonga ʻa Sioné mo nau lāunga kiate ia ʻo kau kia Sīsū: “Lāpai, . . . ʻoku fai papitaiso ia, pea ʻoku tafe taha ʻa e kakaí kiate ia.”

Naʻe ʻikai ke meheka ʻa Sione, ka naʻá ne fiefia ʻi he lavameʻa ʻa Sīsuú pea naʻá ne loto ke fiefia foki mo ʻene kau ākongá. Naʻá ne fakamanatu kiate kinautolu: “Ko kimoutolu foki te mou fakamoʻoni ki heʻeku pehē, ʻOku ʻikai ko au ia ʻa e Mīsaiá, ka kuo fekau mai au ke muʻomuʻa ʻi he tokotaha ko iá.” Pea naʻá ne ngāueʻaki ha talanoa fakatātā fakaʻofoʻofa moʻoni: “Ko ia ʻokú ne maʻu ʻa e taʻahiné, ko ia ia ʻa e tangata-taʻané. Ka, ko e kaumeʻa ʻo e tangata-taʻané, ʻa ia ʻokú ne tuʻu ʻo fakaongo kiate ia, ʻokú ne fiefia—ka ko ha fiefia—ʻi he ongo mai ʻa e leʻo ʻo e tangata-taʻané. Āua, ko e fiefia pē ʻena ʻoku ʻaʻaku, pea tā kuo kakato.”

Ko Sione, ʻi he tuʻunga ko e kaumeʻa ʻo e Tangata-Taʻané, naʻá ne fiefia ʻi he māhina ʻe ono nai ki muʻá ʻi heʻene fakafeʻiloaki ʻa ʻene kau ākongá kia Sīsuú. Ko e niʻihi mei he faʻahinga ko iá naʻa nau maʻu ʻa e ʻamanaki ke hoko ko e kau mēmipa ʻo e kalasi fefine mali fakahēvani ʻa Kalaisí ʻa ia ʻe faʻuʻaki ʻa e kau Kalisitiane naʻe pani ʻaki ʻa e laumālié. Naʻe loto ʻa Sione ke muimui foki ʻa ʻene kau ākonga lolotongá ʻia Sīsū, koeʻuhi ko ʻene taumuʻá ke teuteu ʻa e halá ke lavameʻa ʻa e ngāue fakafaifekau ʻa Kalaisí. ʻOku hangē ko ia naʻe fakamatalaʻi ʻe Sioné: “Kuo pau ke fakaʻau ia ki muʻa, kau fakaʻau au ki mui.”

Ko Sione, ko e ākonga foʻou ʻa Sīsuú, ʻa ia naʻá ne hoko foki ki muʻa ko ha ākonga ʻa Sione Papitaisó, naʻá ne tohi ʻo kau ki he tupuʻanga ʻo Sīsuú pea mo Hono ngafa mahuʻinga ʻi hono fakahaofi ʻa e faʻahinga ʻo e tangatá, ʻo ne pehē. “Ko ia ʻoku hoko mai mei ʻolungá ʻokú ne māʻolunga ʻi he meʻa kotoa pē: . . . ʻOku ʻofa ʻa e Tamaí ki he ʻAló, pea kuó ne tuku ʻa e meʻa kotoa pē ki hono nimá. Ko ia ʻokú ne tui pikitai ki he ʻAló ʻokú ne maʻu ʻa e moʻui taʻengatá; ka ko ia ʻoku ʻikai te ne talangofua ki he ʻAló ʻe ʻikai te ne mamata ki he moʻuí, ka ʻoku nofo maʻu kiate ia ʻa e houhau ʻa e ʻOtuá.”

Naʻe ʻikai ke fuoloa mei he lave ʻa Sione Papitaiso ki he fakaʻau ki mui ʻo ʻene ngāué, pea puke pōpula ia ʻe Tuʻi Hēlota. Naʻe ʻave ʻe Hēlota ʻa Helotiasi, ko e uaifi ʻo hono tokoua ko Filipe, ʻo nonofo mo ia, pea ʻi hono fakaeʻa fakahāhā ʻe Sione ʻoku taʻetotonu ʻa e meʻa ko ʻení, naʻe fakahū pilīsone ai ia ʻe Hēlota. ʻI he fanongo ʻa Sīsū ʻo kau ki hono puke pōpula ʻo Sioné, naʻá ne mavahe leva mei Siutea fakataha mo ʻene kau ākongá ki Kāleli. Sione 3:​22–4:3; Ngāue 19:4; Mātiu 28:19; 2 Kolinito 11:2; Maake 1:14; 6:​17-20.

▪ Ko e hā ʻa e ʻuhinga ʻo e ngaahi papitaiso naʻe fai ʻi he tataki ʻa Sīsū ki muʻa ʻi heʻene toetuʻú? Pea mo e hili ʻene toetuʻú?

▪ Naʻe fakahaaʻi fēfē ʻe Sione naʻe ʻikai ha makatuʻunga lelei ʻa e lāunga ʻa ʻene kau ākongá?

▪ Ko e hā naʻe fakahū pilīsone ai ʻa Sioné?