Vahe 133

Fakaʻosi ʻe Sīsū ʻa e Ngaahi Fekau Kotoa ʻa e ʻOtuá

ʻI HE toʻo atu ʻe he Tangata-Tau ko e Tuʻi ko Sīsū Kalaisí ʻa Sētane mo hono māmani taʻemāʻoniʻoní, ko ha toki meʻa fakatupunga fiefia lahi ē! ʻE toki kamata leva ʻa e Pule Taʻu Taha Afe melino ʻa Sīsuú!

ʻI he malumalu ʻo e tataki ʻa Sīsū mo hono kaungātuʻí, ko e kau hao moʻui atu ʻi ʻĀmaketoné te nau fakamaʻa ʻa e ngaahi maumau ʻe toe mei he tau māʻoniʻoni ko iá. ʻOku ngalingali ʻe fanauʻi ʻe he kau hao moʻui atu ʻo e māmaní ha fānau ʻi ha vahaʻa taimi, pea ʻe kau mo e faʻahinga ko iá ʻi he ngāue fakafiefia ko hono ngoueʻi ʻa e māmaní ke hoko ko ha ngoue fakaʻofoʻofa ʻo hangē ha paʻaké.

Faifai atu pē pea ʻe fokotuʻu mai ʻe Sīsū ʻa e laui miliona mei honau ngaahi faʻitoká ke nau maʻu ʻa e fiefia ʻi he Palataisi fakaʻofoʻofa ko ʻení. Te ne fai ʻeni ʻi hono fakahoko ʻo ʻene fakapapau pē ʻaʻana: “ʻOku ʻunu mai ha taimi, . . . [ko e] kakai kotoa pē ʻoku ʻi he ngaahi faʻitoká, te nau ʻalu atu mei ai.”

Ko e toko taha ʻo kinautolu ʻe toe fokotuʻu mai ʻe Sīsū mei he maté ko e tokotaha kaihaʻa ʻi muʻa ʻa ia naʻe tautau ʻo mate ʻi hono tafaʻakí ʻi he ʻakau fakamamahí. Manatuʻi naʻe talaʻofa ʻe Sīsū kiate ia: “Ko e moʻoni ʻoku ou tala atu kiate koe ʻi he ʻahó ni, Te ke ʻi Palataisi mo au.” ʻIo, ʻe ʻikai ke ʻave ʻa e tangata ko ʻení ki hēvani ke pule ko ha tuʻi fakataha mo Sīsū, pea ʻe ʻikai toe hoko mai ʻa Sīsū ko ha tangata ʻo nofo ʻi he māmani Palataisí mo ia. Ka, ko e ʻi ai ʻa Sīsū fakataha mo e tokotaha kaihaʻá ʻoku ʻuhingá te Ne fokotuʻu ia mei he maté ke moʻui ʻi he Palataisí pea te ne fakapapauʻi ke tokangaʻi ai ʻa ʻene ngaahi fiemaʻu fakamatelié mo fakalaumālié fakatouʻosi, ʻo hangē ko ia ʻoku fakatātaaʻi ʻi he peesi hono hoko maí.

Fakakaukau ange ā ki ai! ʻI he malumalu ʻo e tokanga anga-ʻofa ʻa Sīsuú, ko e fāmili fakaetangatá fakakātoa​—kau hao moʻui atu ʻi ʻĀmaketoné, ko ʻenau fānaú, mo e laui miliona ʻo e kau mate ʻe fokotuʻu mei he maté ʻa ia te nau talangofua kiate iá​—te nau fakaʻau atu ki he haohaoa fakaetangatá. ʻE ʻafio fakalaumālie ʻa Sihova mo e faʻahinga ʻo e tangatá ʻo fakafou mai ʻi hono ʻAlo fakatuʻi, ko Sīsū Kalaisí. “Pea,” hangē ko ia ko e leʻo mei hēvani naʻe fanongo ki ai ʻa Sioné naʻe lea mai ʻo pehē, “te ne holoholo ʻa e loʻimata kotoa pē mei honau matá, pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia.” ʻE ʻikai ke toe ʻi ai ha tokotaha ʻi he māmaní ʻe faingataʻaʻia pe puke.

ʻI he aʻu ki he ngataʻanga ʻo e Pule Taʻu Taha Afe ʻa Sīsuú, ʻe hoko ʻa e tuʻungá ʻo hangē pē ko e ʻuluaki taumuʻa ʻa e ʻOtuá ʻi heʻene tala ange ki he ʻuluaki ongo mātuʻa fakaetangatá, ko ʻĀtama mo ʻIvi, ke na fakatokolahi mo fakafonu ʻa e māmaní. ʻIo, ko e māmaní ʻe fakafonuʻaki ia ʻa e kakai haohaoa ko e faʻahinga māʻoniʻoni. Ko hono ʻuhingá ko e ngaahi ʻaonga ʻo e feilaulau huhuʻi ʻa Sīsuú kuo ngāueʻaki ia ki he tokotaha kotoa pē. Ko e mate koeʻuhi ko e angahala ʻa ʻĀtamá ʻe ʻikai ke toe ʻi ai ia!

Ko ia, ʻe lavaʻi ʻe Sīsū ʻa e ngaahi fekau kotoa ʻa Sihová. Ko ia ai, ʻi he ngataʻanga ʻo e afeʻi taʻú, te ne toki ʻoatu ʻa e Puleʻangá pea mo e fāmili haohaoa ʻo e faʻahinga ʻo e tangatá ki heʻene Tamaí. ʻE toki tuku ange mai leva ʻe he ʻOtuá ʻa Sētane mo ʻene kau tēmenioó mei he luo taʻehanotakele ko e taʻengāue ʻo hangē ko e tuʻunga ʻo e maté. Ko e hā hono taumuʻá?

Sai, ʻi he aʻu ki he ngataʻanga ʻo e afeʻi taʻú, ko e tokolahi taha ʻo kinautolu te nau moʻui ʻi he Palataisí ko e faʻahinga naʻe fokotuʻu mei he maté naʻe teʻeki ai ʻaupito ke ʻahiʻahiʻi ʻa ʻenau tuí. Ki muʻa pea nau maté, naʻe ʻikai ʻaupito ke ʻi ai haʻanau ʻilo ki he ngaahi talaʻofa ʻa e ʻOtuá pea ko ia ai naʻe ʻikai te nau lava ke fakahāhā haʻanau tui ki ai. Pea ʻi he ʻosi hono fokotuʻu mei he maté pea mo akoʻi kiate kinautolu ʻa e ngaahi moʻoni ʻo e Tohitapú, ʻe faingofua kiate kinautolu ʻi Palataisi ke nau tauhi ki he ʻOtuá he ʻe ʻikai ke ʻi ai ha fakafepaki. Ka ʻo kapau naʻe tuku ha faingamālie kia Sētane ke ne feinga ke taʻofi kinautolu mei heʻenau hokohoko atu ʻa e tauhi ki he ʻOtuá, te nau fakahā ʻa ʻenau mateakí lolotonga ha ʻahiʻahi? Ke fakapapauʻi ʻa e fehuʻi ko ʻení, ʻe toe tuku ange mai ʻa Sētane.

ʻOku fakahā ʻe he meʻa fakahā naʻe ʻoange kia Sioné ʻo pehē ʻi he hili ʻa e Pule Taʻu Taha Afe ʻa Sīsuú, ʻe lavameʻa ʻa Sētane ʻi hono fakatafokiʻi ʻa e kakai ʻoku ʻikai fakapapauʻi hono tokolahí mei heʻenau tauhi ki he ʻOtuá. Ka, ʻi he ʻosi ʻa e ʻahiʻahi fakaʻosí, ʻe fakaʻauha taʻengata ʻa Sētane, ko ʻene kau tēmenioó, pea mo kinautolu hono kotoa ʻa ia naʻá ne lavameʻa ʻi hono takihalaʻí. ʻI he tafaʻaki ʻe tahá, ko kinautolu kuo ʻahiʻahiʻi kakató, ko e kau hao moʻui mateaki, te nau moʻui atu ai pē ke maʻu ʻa e ngaahi tāpuaki ʻa ʻenau Tamai fakahēvaní ʻo faai atu ki ʻitāniti.

ʻOku hā mahino, kuo fakahoko ʻe Sīsū ʻa e ngafa mātuʻaki mahuʻinga ʻi hono lavaʻi ʻa e ngaahi taumuʻa lāngilangiʻia ʻa e ʻOtuá pea ʻe hokohoko pehē atu ai pē. Ko ha kahaʻu maʻongoʻonga ē te tau maʻu nai ko e ola ia ʻo e ngaahi meʻa hono kotoa pē ʻokú ne fakahoko ʻi he tuʻunga ko e Tuʻi lahi fakahēvani ʻa e ʻOtuá! Ka neongo ia, ʻoku ʻikai lava ke ngalo ʻiate kitautolu ʻa e ngaahi meʻa hono kotoa naʻá ne fai ʻi he lolotonga ʻo ʻene kei tangatá.

Naʻe loto-lelei pē ʻa Sīsū ke ne haʻu ki he māmaní pea ke ne akoʻi kitautolu ʻo fekauʻaki mo ʻene Tamaí. Mahulu atu mei he meʻa ko ʻení, naʻá ne faʻifaʻitakiʻanga ʻi he ngaahi ʻulungaanga mahuʻinga ʻo e ʻOtuá. ʻOku ueʻi ʻa hotau lotó ʻi heʻetau fakakaukau atu ki heʻene loto-toʻa mo e anga-fakaetangata ʻi he tuʻunga māʻolunga tahá, ko ʻene poto taʻealafakatatauá, ko ʻene malava lelei taupotu ʻi he tuʻunga ko ha faiakó, ko ʻene taki taʻeilifiá, pea mo ʻene manavaʻofa mo kaungāongoʻí. ʻI heʻetau manatu ki heʻene faingataʻaʻia taʻealafakamatalaʻi ʻi heʻene fakahoko ʻa e huhuʻí, ʻa ia ko e founga pē ia ʻe taha te tau maʻu nai ai ʻa e moʻuí, ʻoku pau ʻoku ueʻi hotau lotó ʻi he houngaʻia kiate ia!

Ko e moʻoni, ko ha tangata maʻongoʻonga lahi ē kuo tau sio ai ʻi he ako ko ʻeni ʻo kau ki he moʻui ʻa Sīsuú! ʻOku tuʻu-ki-muʻa mo fuʻu hulu ʻa ʻene ongoongoá. ʻOku ueʻi ai kitautolu ke tau leaʻaki ʻa e ngaahi lea tatau ʻa e kōvana Loma ko Ponitō Pailató: “Vakai! Ko ʻena ʻa e tangatá!” ʻIo, ko e moʻoni, “ʻa e tangatá,” ʻa e moʻungaʻi tangata lahi taha kuo moʻui mai!

ʻI heʻetau tali ʻa e tokonaki ʻo ʻene feilaulau huhuʻí, ʻe lava ke toʻo atu ai meiate kitautolu ʻa e kavenga ko ia ko e angahala mo e mate ko e tukufakaholo mai meia ʻĀtamá, pea ʻe lava ke hoko ʻa Sīsū ko ʻetau “Tamai Taʻengata.” Ko kinautolu hono kotoa te nau maʻu ʻa e moʻui taʻengatá kuo pau ke nau maʻu ʻa e ʻilo ʻo ʻikai ngata pē ʻi he ʻOtuá ka ki hono ʻAló foki, ko Sīsū Kalaisi. ʻOfa ke tokoniʻi koe ʻe hoʻo lau mo ako ʻa e tohí ni ke ke maʻu ʻa e ʻilo foaki-moʻui ko iá! 1 Sione 2:17; 1:7; Sione 5:​28, 29; 3:16; 17:3; 19:5; Luke 23:43; Senesi 1:28; 1 Kolinito 15:​24-28; Fakahā 20:​1-3, 6-10; 21:​3, 4; Aisea 9:6.

▪ Ko e hā ʻa e monū fakafiefia ʻe maʻu ʻe he kau hao moʻui atu ʻi ʻĀmaketoné mo ʻenau fānaú?

▪ Ko toe hai te nau maʻu ʻa e fiefia ʻi he Palataisí fakataha mo e kau hao moʻui atu ʻi ʻĀmaketoné mo ʻenau fānaú, pea ʻi he ʻuhinga fē ʻe ʻi ai ai ʻa Sīsū fakataha mo kinautolú?

▪ Ko e hā ʻa e tuʻunga ʻe ʻi he ngataʻanga ʻo e taʻu ʻe taha afé, pea ko e hā ʻa e meʻa ʻe toki fai ai ʻe Sīsuú?

▪ Ko e hā ʻe toe tuku ange mai ai ʻa Sētane mei he luo taʻehanotakelé, pea faifai atu pē ko e hā ʻe hoko ki ai mo kinautolu kotoa ʻoku nau muimui kiate iá?

▪ ʻE anga-fēfē ʻa e hoko ʻa Sīsū ko ʻetau “Tamai Taʻengatá”?