Vahe 33

Fakahoko ʻa e Kikite ʻa ʻAiseá

NAʻE mavahe ʻa Sīsū mo ʻene kau ākongá ki he Tahi Kālelí ʻi he hili ʻa ʻene ʻilo naʻe fakaangaanga ʻa e kau Fālesí mo e faʻahi ʻa Hēlotá ke nau tāmateʻi iá. Naʻe ʻaukolo mai kiate ia ʻi heni ʻa e fuʻu kakai tokolahi mei he feituʻu kotoa pē ʻi Palesitaine, pea naʻa mo e ngaahi feituʻu ʻi tuʻa mei hono kauʻāfonuá. Naʻá ne fakamoʻui ʻa e tokolahi, pea naʻe iku ai ki he tutui ke ala kiate ia ʻa e faʻahinga kotoa pē naʻe puke lalahí.

Koeʻuhi naʻe fuʻu tokolahi ʻa e kakaí, naʻe tala ʻe Sīsū ki heʻene kau ākongá ke ʻai ha vaka ke tatali maʻu pē kiate ia ke ne ngāueʻaki. ʻI he mavahe mei ʻutá, naʻe lava ke taʻofi ai ʻa e tutui atu kiate ia ʻa e fuʻu kakaí. Naʻe malava ke ne akoʻi kinautolu mei he vaká pe folau ki ha toe feituʻu ʻe taha he matātahí ke tokoniʻi ʻa e kakai ʻi aí.

Naʻe fakatokangaʻi ʻe he ākonga ko Mātiú naʻe fakahoko ʻe he ngāue ʻa Sīsuú “ʻa e meʻa naʻe folofolaʻaki ʻia ʻAisea ko e palōfitá.” Pea naʻe lave ʻa Mātiu ki he kikite naʻe fakahoko ʻe Sīsuú:

“Ko ʻeni ʻeku sevāniti kuó u fili, ʻa ʻeku pele, ʻa ia naʻe hōifua ai hoku finangaló: Te u ʻai hoku laumālié kiate ia, pea te ne fakahā ki he Senitailé ʻa e faifakamaau totonú. ʻE ʻikai te ne fakakikihi, ʻumaʻā ha lea lahi; ʻio, ʻe ʻikai fanongo ʻe ha taha mei hala ki hono leʻó. Ko e kofe kuo foa ʻe ʻikai te ne laiki, pea ko e vavae ʻoku kohú ʻe ʻikai te ne tāmateʻi, kaeʻoua ke ne ʻai atu ʻa e fakamaau totonú ke ikuna. Pea ʻe falala ʻa e Senitailé ki hono huafá.”

Ko hono moʻoní, ko Sīsū ʻa e sevāniti pele ʻa ia naʻe hōifua ki ai ʻa e ʻOtuá. Pea naʻe ʻai ʻe Sīsū ke mahino ʻa e fakamaau totonu moʻoní, ʻa ia naʻe fakaʻuliʻulilātaiʻi ʻe he ngaahi talatukufakaholo fakalotu loí. Koeʻuhi ko e ngāuetaʻetotonuʻaki ʻe he kau Fālesí ʻa e lao ʻa e ʻOtuá, naʻe ʻikai te nau tokoni ʻo aʻu ki ha tokotaha naʻe puke he Sāpaté! ʻI hono fakamaeʻeeʻa lelei ʻe Sīsū ʻa e fakamaau totonu ʻa e ʻOtuá, naʻá ne toʻo ai mei he kakaí ʻa e meʻa fakamafasia ko e ngaahi talatukufakaholo taʻetotonu, pea naʻe feinga ʻa e kau taki lotú ke tāmateʻi ia koeʻuhi ko ʻene fai peheé.

ʻOku ʻuhinga ki he hā ʻa e pehē ‘heʻikai te ne fakakikihi, ʻumaʻā haʻane lea lahi kae fanongo ʻe ha taha mei hala ki hono leʻó’? ʻI hono fakamoʻui ʻe Sīsū ʻa e kakaí, naʻá ne ‘naʻinaʻi kiate kinautolu ke ʻoua naʻa nau fakaeʻa ia.’ Naʻe ʻikai te ne loto ke fai ha fakahāhā longoaʻa ʻo ia ʻi he ngaahi halá pe ke ʻi ai ha ngaahi fakamatala mioʻi ʻoku fakamafola toʻotoʻoa atu.

Pehē foki, naʻe fakahoko ʻe Sīsū ʻa ʻene pōpoaki fakatupu-fiemālié ki he kakai naʻa nau hangē ʻi he founga fakaefakatātaá ha kofe kuo foá, ʻo mapelu mo moloki hifo. Naʻa nau hangē ha vavae ʻoku kohu, ʻa ia kuo mei tāmateʻi ʻene moʻuí. Naʻe ʻikai laiki ʻe Sīsū ʻa e kofe kuo foá pe tāmateʻi ʻa e vavae ʻoku kohú. Ka, ʻi he anga-fakaalaala mo e ʻofá, naʻá ne pōtoʻi ʻi hono hiki hake ʻa e anga-maluú. Ko e moʻoni, ko Sīsū ʻa e tokotaha ʻe lava ke falala ki ai ʻa e ngaahi kakaí! Mātiu 12:​15-21; Maake 3:​7-12; Aisea 42:​1-4.

▪ Naʻe fēfē ʻa hono fakamaeʻeeʻa lelei ʻe Sīsū ʻa e fakamaau totonú, ʻo ʻikai te ne fakakikihi pe lea leʻo-lahi ʻi he halá?

▪ Ko hai ʻa e faʻahinga naʻa nau hangē ha kofe kuo foa mo e vavaé, pea naʻe fēfē ʻa e feangainga ʻa Sīsū mo kinautolú?