Vahe 61

Fakamoʻui ha Tamasiʻi Naʻe ʻĀvanga

LOLOTONGA ʻa e mavahe ʻa Sīsū, Pita, Sēmisi, mo Sioné, ngalingali naʻa nau ʻi he funga Moʻunga Heamoní, naʻe fehangahangai ʻa e toenga ʻo e kau ākongá mo ha palopalema. ʻI heʻene foki maí, naʻe fakatokangaʻi leva ʻe Sīsū ʻoku ʻi ai ʻa e meʻa ʻoku fehālaaki. Naʻá ne ʻilo ha fuʻu kakai ʻoku takatakai ki heʻene kau ākongá, pea ko e kau sikalaipé ʻoku nau fakakikihi mo kinautolu. ʻI he sio mai ʻa e kakaí kia Sīsuú, naʻa nau fuʻu ʻohovale, pea nau lele mai ʻo fakafeʻiloaki kiate ia. “Ko e hā ʻa e meʻa naʻa mou fakafehuʻi ai kinautolú?” ko ʻene fehuʻí ange ia.

Naʻe haʻu ki muʻa mei he kakaí ha tangata ʻo tūʻulutui ʻi muʻa ʻia Sīsū mo ne fakamatala: “Tangataʻeiki, ne u haʻu mo au hoku ʻuhiki kiate koe, ʻoku ʻiate ia ha laumālie fakanoa; pea neongo pe ko e fē ha potu te ne puke ai ia ʻokú ne haʻaki ia, pea ʻoku koa hono ngutú, mo ngaiʻi hono nifó, mo ne mate. Peá u lea ki hoʻo kau akó ke nau kapusi ia, ka naʻe ʻikai te nau mafai.”

Ngalingali naʻe ngāueʻaki ʻe he kau sikalaipé ʻa e ʻikai malava ʻe he kau ākongá ke fakamoʻui ʻa e tamasiʻí, mahalo ke nau manumanukiʻi ʻaki ʻenau ngaahi feingá. ʻI he taimi faingataʻa ko ʻení, naʻe aʻu mai ʻa Sīsū. “ʻA e faʻahinga taʻetui,” ko ʻene leá ia, “ʻe ngata ʻafē ʻeku ʻiate kimoutolú? ʻE ngata ʻafē ʻeku kātakiʻi kimoutolú?”

Ngalingali naʻe fakahanga ʻe Sīsū ʻene leá ki he tokotaha kotoa pē naʻe ʻi aí, ka ʻoku ʻikai ha veiveiua naʻe fakahangatonu ki he kau sikalaipé, ʻa ia naʻa nau fakafaingataʻaʻiaʻi ʻene kau ākongá. Hoko ai, naʻe pehē ʻe Sīsū fekauʻaki mo e tamasiʻí: “ʻOmi ia kiate au.” Ka ʻi he haʻu ʻa e tamasiʻí kia Sīsuú, naʻe fakapaʻulu ia ki lalo ki he kelekelé ʻe he tēmeniō naʻe uluisino aí peá ne fakatekeliliʻi mālohi ia. Naʻe teka takai ʻa e tamasiʻí ʻi he kelekelé pea naʻe koa hono ngutú.

“Kuo fēfē hono fuoloa ʻo e hoko ʻa e meʻá ni kiate iá?” ko e fehuʻi atu ia ʻa Sīsuú.

“Mei heʻene valevalé,” ko e tali mai ia ʻa e tamaí. “Pea kuo tuʻo lahi [hono hanga ʻe he tēmenioó ʻo] lī ia ki lalo, ʻio ki he afí mo e vaí ke tāmateʻi ia.” Pea kole ʻe he tamaí: “Ka ʻo kapau te ke lava ha meʻa, peá ke ʻaloʻofa kiate kimaua ʻo tokoni mai.”

Mahalo naʻe laui taʻu, mo e kumi tokoni ʻa e tamaí. Pea ʻi he taimí ni ʻi he taʻemalava ʻa e kau ākonga ʻa Sīsuú, naʻe toe lahi ange ai ʻa e ʻikai haʻane ʻamanakí. ʻI he ongoʻi ʻa e fakatangi ʻa e tangatá he faingataʻá, naʻe pehē loto-toʻa ʻe Sīsū: “‘O kapau te ke lava’! He ʻoku malava ʻa e meʻa kotoa pē ki ha taha ʻoku tui.”

“ʻOku ou tui pē!” ko e kalanga ia ʻa e tamaí, ka naʻá ne kole: “Tokoniʻi ʻeku taʻetuí!”

Pea ʻi he vakai ʻe Sīsū ʻoku feleleʻi mai ʻa e kakaí, naʻá ne valokiʻi ʻa e tēmenioó: “ʻA e laumālie fakanoa mo tuli, ʻoku ou kouna atu ke ke mahuʻi mai meiate ia, pea ʻoua te ke toe hū ki ai.” ʻI he mavahe ʻa e tēmenioó, naʻá ne toe ʻai ʻa e tamasiʻí ke kalanga peá ne fakateketekeliliʻi ia. Pea naʻe tokoto taʻengaue ʻa e tamasiʻí he kelekelé, ʻo kamata ke pehē ai ʻe he tokolahi taha ʻo e kakaí: “Kuo pekia!” Ka naʻe puke ʻe Sīsū ʻa e nima ʻo e tamasiʻí, peá ne tuʻu hake.

Ki muʻa atú, ʻi hono fekau atu ʻa e kau ākonga ke malangá, naʻa nau kapusi ʻa e kau tēmeniō. Ko ia, ʻi heʻenau hū atu ki ha fale, naʻa nau ʻeke kia Sīsū fakaekinautolu pē: “Ko e hā naʻe ʻikai te mau lava ai ʻe kimautolu ke kapusi iá?”

ʻI he ʻiloʻi ko hono ʻuhingá ko e siʻi ʻo ʻenau tuí, naʻe tali ʻe Sīsū: “Ko e faʻahinga ko ʻení ʻoku ʻikai lava ke mahuʻi, ka ʻi he lotu pē.” Ngalingali naʻe fiemaʻu ha mateuteu ki hano kapusi ʻa e tēmeniō mālohi ko ʻení. Naʻe fiemaʻu ʻa e tui mālohi fakataha mo e lotu ʻo kole ʻa e tokoni fakaivimālohi ʻa e ʻOtuá.

Pea tānaki atu ʻe Sīsū: “Ko au ē, ʻoku ou tala atu, ka ne ai haʻamou tui, ʻo tatau mo ha foʻi tengaʻi mūsita hono lahí, te mou pehē ki he moʻungá ni, ‘Hiki mei heni ki hena,’ pea ʻe hiki, pea ʻoku ʻikai ha meʻa ʻe faingataʻa kiate kimoutolu.” Ko e meʻa mālohi ē ka ko e tuí!

Ko e ngaahi faingataʻaʻiaʻanga mo e ngaahi faingataʻa ʻokú ne fakafaingataʻaʻiaʻi ʻa e fakalakalaka ʻi he ngāue ʻa Sihová ʻoku hangehangē ʻe ʻikai ala lavaʻi pe ueʻi ʻo hangē ko ha fuʻu moʻunga lahi moʻoni. Ko ia, naʻe fakahaaʻi ʻe Sīsū kapau te tau fakatupulekina ʻa e tuí ʻi hotau ngaahi lotó, fuʻifuʻi ia mo fakaʻaiʻai ke tupu, ʻe aʻu ia ki he matuʻotuʻá pea te tau malava ai ke ikuʻi ʻa e ngaahi faingataʻaʻiaʻanga mo e ngaahi faingataʻa hangē ko ha moʻungá. Maake 9:​14-29; Mātiu 17:​19, 20; Luke 9:​37-43.

▪ ʻI heʻene foki mai mei he Moʻunga Heamoní, ko e hā ʻa e tuʻunga naʻe fetaulaki mo Sīsuú?

▪ Ko e hā ʻa e fakalototoʻa naʻe ʻoange ʻe Sīsū ki he tamai ʻa e tamasiʻi naʻe uluisino ai ʻa e tēmenioó?

▪ Ko e hā naʻe ʻikai malava ai ʻe he kau ākongá ke kapusi ʻa e tēmenioó?

▪ ʻOku fēfē hono mālohi ʻo e tuí ʻi hono fakahaaʻi ʻe Sīsuú?