Vahe 70

Fakamoʻui ha Tangata Fanauʻi Kui

ʻI HE feinga ʻa e kau Siú ke tolomakaʻi ʻa Sīsuú, naʻe ʻikai te ne mavahe mei Selusalema. Ki mui ai, he Sāpaté, naʻá ne fononga mai mo ʻene kau ākongá ʻi he koló ʻo nau vakai atu ki ha tangata kuó ne kui talu pē mei hono fanauʻí. Naʻe fehuʻi ʻa e kau ākongá kia Sīsū: “Lāpai, ko hai naʻe angahalá, ʻa e sianá ni, pe ko ʻene mātuʻá, ʻo tupu ai hono fanauʻi kuí?”

Mahalo naʻe tui ʻa e kau ākongá, ʻo hangē pē ko e kau lāpai ʻe niʻihi, ʻoku lava pē ha taha ke faiangahala ʻi he manava ʻo ʻene faʻeé. Ka naʻe tali ʻe Sīsū: “Naʻe ʻikai ko e angahala ʻa e sianá ni, pe ko ʻene mātuʻá, ka koeʻuhi ke fakaeʻa ʻiate ia ʻa e ngaahi ngāue ʻa e ʻOtuá.” Ko e kui ʻa e tangatá ni naʻe ʻikai ko ha nunuʻa ʻo ha hala pe angahala makehe naʻe fai ʻe he tangatá, pe ko ʻene mātuʻá. Ko e angahala ʻa e ʻuluaki tangata ko ʻĀtamá ʻoku iku ai ʻa e faʻahinga ʻo e tangatá kotoa ʻo taʻehaohaoa, pea ko ia ai, ʻoku hoko ai ʻa e ngaahi mele hangē pē ko e fanauʻi kuí. Ko e mele ko ʻeni ʻa e tangatá naʻá ne ʻomai ha faingamālie ke fakaeʻa ai ʻe Sīsū ʻa e ngaahi ngāue ʻa e ʻOtuá.

Naʻe fakamamafaʻi ʻe Sīsū ha fakavave ʻi hono fai ʻa e ngaahi ngāué ni. “Kuo pau ke tau fai ʻa e ngāue ʻaʻana naʻá ne fekau mai aú lolotonga ʻoku ʻaho,” ko ʻene leá ia. “ʻOku ʻunu mai ʻa e pō, ʻa ia ʻe ʻikai lava ai ʻe ha taha ke ngāue. Kau ka ʻi māmani, ko e maama au ʻa māmani.” Ko e vave ia ke pekia ʻa Sīsū ʻo ne tō ki he fakapoʻuli ʻo e faʻitoká ʻa ia heʻikai te ne lava ke toe fai ai ha meʻa. Lolotonga iá, naʻá ne hoko ko ha matavai ʻo e fakamaama ki he māmaní.

ʻI he hili ʻene leaʻaki ʻa e ngaahi meʻá ni, naʻe ʻaʻanu leva ʻa Sīsū ki he kelekelé pea naʻá ne ngaohiʻaki ʻa e fāvaí ha meʻi pelepela. Naʻá ne ʻai ia ki he mata ʻo e tangata kuí mo ne pehē: “Mole pē ʻo fufulu ʻi he vai ko Sailoamé.” Naʻe talangofua ki ai ʻa e tangatá. Pea ʻi heʻene fai iá, naʻá ne sio leva! Hono ʻikai fiefia ia heʻene foki maí, ʻi he malava ke ne sio ʻi he ʻuluaki taimi ʻo ʻene moʻuí!

Naʻe ofo ʻa e ngaahi kaungāʻapí mo e niʻihi kehe naʻa nau ʻilo kiate iá. “ʻIkai ko e siana ʻeni naʻe nofo hē, ʻo hanganaki kolé?” ko ʻenau fehuʻí ia. “Ko eni ia,” ko e tali ia ʻa e niʻihi. Ka naʻe ʻikai tui ki ai ʻa e niʻihi kehe: “ʻOku ʻikai, ka ʻokú ne hangē pē ko iá.” Ka naʻe pehē ʻe he tangatá ni: “Ko au ia.”

“Naʻe fakaʻā fēfē ho matá?” ko e fieʻilo ia ʻa e kakaí.

“Ko e tangata ʻoku ui ko Sīsū, naʻá ne ngaohi ha pelepela, ʻo ne pani ʻaki hoku ongo matá ni, mo ne pehē mai, ‘Mole pē ki Sailoame ʻo fufulu.’ Ko ia naʻá ku ʻalu ʻo fufulu, peá u ʻā hake.”

“Kofaʻā ʻa e tangata ko iá?” ko ʻenau ʻeké ia.

“ʻOku ʻikai te u ʻilo,” ko ʻene talí ia.

Naʻe taki leva ʻe he kakaí ʻa e tangata kuí ni ki honau kau taki lotú, ko e kau Fālesí. Naʻe toe fehuʻi mo kinautolu kiate ia pe naʻe fēfē ʻene ʻaá. “Naʻá ne ʻai ha pelepela ki hoku pokoʻi matá ni, peá u fufulu, peá u ʻā,” ko e fakamatala ia ʻa e tangatá.

Ko hono moʻoní, naʻe totonu ke fiefia ʻa e kau Fālesí ʻi hono fakamoʻui ʻa e tangata kolekolé ni! Kae kehe, naʻa nau talatalaakiʻi ʻa Sīsū. “Talaʻehai ko ha tangata ia mei he ʻOtuá,” ko ʻenau taukaveʻí ia. Ko e hā naʻa nau lea pehē aí? “He ʻoku ʻikai te ne tauhi ʻa e Sāpaté.” Ka naʻe fifili ʻa e kau Fālesi ʻe niʻihi: “ʻO lava fēfē ʻe ha tangata ʻoku angahala ke fai ha alā mana pehē?” Ko ia, naʻe hoko leva ha māvahevahe ʻiate kinautolu.

Ko ia ai, naʻa nau ʻeke ki he tangatá ni: “Ko e hā haʻo poa ʻaʻau ki he tangatá na, heʻene fakaʻā ho matá?”

“Ko e palōfita ia,” ko ʻene talí ia.

Naʻe fakafisi ʻa e kau Fālesí ke tui ki he meʻá ni. Naʻa nau tui pau ʻoku pau pē naʻe ʻi ai ha alea fakafufū ʻi he vahaʻa ʻo Sīsū mo e tangatá ni ke fakavaleʻiʻaki ʻa e kakaí. Ko ia, ke toe fakapapauʻi ʻa e meʻá ni, naʻa nau ui ange ki he ongo mātuʻa ʻa e tangata kolekolé ke fehuʻi kiate kinaua. Sione 8:59; 9:​1-18.

▪ Ko e hā naʻe tupunga mei ai ʻa e kui ʻa e tangatá, pea ko e hā naʻe ʻikai tupunga mei aí?

▪ Ko e hā ʻa e pō ʻa ia ʻe ʻikai malava ai ha tangata ke ngāué?

▪ ʻI hono fakamoʻui ʻa e tangatá, naʻe fēfē ʻa e tali ki ai ʻa e faʻahinga naʻa nau ʻilo kiate iá?

▪ Naʻe anga-fēfē ʻa e māvahevahe ʻa e kau Fālesí ʻi he fekauʻaki mo e fakamoʻui ʻo e tangatá ni?