Vahe 44

Fakasīlongoʻi ʻo ha Fuʻu Matangi Fakalilifu

NAʻE moʻumoʻua ʻa e taimi ʻo Sīsuú, ʻo kau ai ʻa ʻene akoʻi ʻa e fuʻu kakai ʻi he matātahí pea hoko atu ai ki hono fakamatalaʻi ʻa e ngaahi talanoa fakatātaá ki heʻene kau ākongá pē. ʻI he aʻu ki he efiafí, naʻá ne pehē: “Tau ō ki he kauvai ʻe tahá.”

ʻI ai ʻi he kauvai fakahahake ʻo e Tahi Kālelí ko e feituʻu ia naʻe ui ko Tikapolusi, mei he foʻi lea faka-Kalisi ko e deʹka, ʻoku ʻuhingá ko e “hongofulu,” pea ko e poʹlis, ʻoku ʻuhingá ko e “kolo lahi.” Ko e ngaahi kolo lalahi ʻo Tikapolusí naʻe hoko ia ko ha senitā ʻo e anga-fakafonua ʻo Kalisí, neongo ʻoku ʻikai ha veiveiua ko e toe feituʻu ia ʻo e kau Siu tokolahi. Kae kehe, naʻe fakangatangata ʻaupito ʻa e ngāue ʻa Sīsū ʻi he feituʻú ni. Naʻa mo ʻene ʻaʻahi ko ʻení, pea hangē ko ia te tau toki sio ki ai ʻamuí, naʻe taʻofi ia mei haʻane nofo fuoloa ai.

ʻI he kole ʻa Sīsū ke nau mavahe ki he kauvai ʻe tahá, naʻe ʻave ia ʻe he kau ākongá ʻi he vaká. Kae kehe, naʻe ʻikai ke taʻefakatokangaʻi ʻa ʻenau mavahé. He naʻe tuai-e-kemo kuo fakahekeheka mo e niʻihi kehé ʻi honau ngaahi vaká ke ō mo kinautolu. Naʻe ʻikai ke fuʻu loko mamaʻo fēfē. Ko hono moʻoní, ko e Tahi Kālelí ia ko ha fuʻu anovai pē naʻe kilomita nai ʻe 21 hono lōloá pea ʻi he lahi tahá ko e kilomita ʻe 11 hono fālahí.

ʻOku hā mahino naʻe helaʻia ʻa Sīsū. Ko ia, ʻi heʻenau mavahé atu pē, naʻá ne tokoto hifo ʻi he taumuli ʻo e vaká, ʻo ʻolunga hono ʻulú ki ha pilo, peá ne māʻumohe. Ko e niʻihi ʻo e kau ʻaposetoló ko e kau kaivai, he naʻa nau toutai lahi ʻaupito ʻi he Tahi Kālelí. Ko ia naʻa nau tokangaʻi ʻa hono fakafolau ʻo e vaká.

Ka naʻe ʻikai ko ha folau ʻeni ʻe faingofua. Koeʻuhi ko e ʻea māfana ange ʻi he fukahi vaí, ʻa ia naʻe māʻulalo hifo nai ʻaki ʻa e mita ʻe 210 mei he māʻolunga ʻo e tahí, pea mo e ʻea momoko ange ʻi he ʻotu moʻunga ofi maí, naʻe faʻa hoko hifo ai ʻa e ngaahi matangi mālohi ʻi he taimi lahi pea faʻa fakatupunga ai ha ngaahi matangi afā mālohi fakatuʻupakē ʻi he vaí. Ko e meʻa ʻeni naʻe hoko ʻi he taimi ko ʻení. Naʻe vave ʻa e faʻafaʻaki ʻa e ngaahi peaú ki he vaká ʻo aafu ki loto, ʻo meimei lōmekina hifo ia. Ka, naʻe hoko atu pē ʻa e mohe ia ʻa Sīsuú!

Naʻe ngāue hamumu holo ʻa e kau kaivaí ke fakaʻuli ʻa e vaká. ʻOku ʻikai ha veiveiua naʻa nau ʻosi fakahaohao holo ʻi ha ngaahi taufa ki muʻa. Ka ʻi he taimi ko ʻení naʻa nau aʻu ki he ngataʻanga ʻo honau iví. ʻI he manavahē koeʻuhi ko ʻenau moʻuí, naʻa nau fafangu ʻa Sīsū. ‘ʻEiki, ʻoku ʻikai te ke tokanga mai? Ko ʻeni te tau ngoto!’ ko ʻenau kalangá ia. ‘Fakahaofi kitautolu, te tau ngoto!’

ʻI heʻene mālanga haké, naʻe fekau atu ʻe Sīsū ki he matangí mo e tahí: “Longoā! ʻOua ʻe momoʻi ngū!” Pea naʻe tuʻu leva ʻa e fuʻu matangí pea nonga ʻa e tahí. ʻI heʻene hanga hake ki heʻene kau ākongá, naʻá ne ʻeke: ‘Ko e hā ʻoku pehē fau ai hoʻomou ilifiá? ʻOku ʻikai ʻi ai haʻamou tui?’

ʻI he meʻa ko iá, naʻe manavahē anga-kehe ai ʻa e kau ākongá. ‘Ko hai tū ʻa e tangatá ni?’ ko ʻenau feʻekenakí ia, ‘he naʻa mo e matangí mo e tahí ʻokú ne tuʻutuʻuni ki ai, pea ʻokú na ongo kiate ia.’

Ko ha mālohi lahi ē naʻe fakahāhā ʻe Sīsuú! He fakalotomaʻu lahi ē ʻa hono ʻilo ʻoku mapuleʻi ʻe hotau Tuʻí ʻa e ngaahi ʻelemēniti ʻo natulá pea ʻi he taimi ko ia ʻe fakahanga hifo ai ʻa ʻene tokanga kakató ki hotau foʻi māmaní he lolotonga ʻene pule ʻi he Puleʻangá, ko e kakai kotoa pē ʻe nofo ʻi he malu mei he ngaahi fakatamaki fakalilifu fakanatulá!

ʻI he hili ha taimi mei he malona ʻa e taufá, naʻe aʻu lelei ʻa Sīsū mo ʻene kau ākongá ki he kauvai fakahahaké. Mahalo ko e ngaahi vaka kehé naʻa nau mamae ʻi he mālohi ʻa e taufá pea nau toe foki pē ʻo tau lelei ki honau feituʻú. Maake 4:​35–5:1; Mātiu 8:​18, 23-27; Luke 8:​22-26.

▪ Ko e hā ʻa Tikapolusi, pea naʻe tuʻu ia ʻi fē?

▪ Ko e hā ʻa e ngaahi tuʻunga fakaenatula naʻe kaunga ki he ngaahi taufa mālohi ʻi he Tahi Kālelí?

▪ ʻI he ʻikai ke malava ʻe heʻenau ngaahi pōtoʻi fai folaú ʻo fakahaofi kinautolú, ko e hā naʻe fai ʻe he kau ākongá?