Vahe 3

Fanauʻi ʻa e Tokotaha-Teuteu ʻo e Halá

NAʻE mei aʻu ki he taimi ke fāʻele ai ʻa ʻIlisapesí. ʻI he lolotonga ʻa e māhina ʻe tolu ki muʻá, naʻe nofo ʻa Mele mo ia. Ka naʻe aʻu mai ki he taimi ke lea māvae atu ai ʻa Mele pea ke ne fononga lōloa ʻo foki ki hono ʻapi ʻi Nasaletí. Naʻe kei toe ʻa e māhina ʻe ono ke ne fāʻeleʻi mo ia foki ha pēpē.

ʻI he hili ha taimi siʻi mei he mavahe ʻa Melé, naʻe fāʻele leva ʻa ʻIlisapesi. Ko ha fiefia lahi ē ʻi he lavameʻa ʻa e fāʻelé pea fakatou moʻui lelei ʻa ʻIlisapesi mo e pēpeé! Naʻe fiefia fakataha mo ʻIlisapesi ʻa hono ngaahi kaungāʻapí mo e ngaahi kāingá ʻi heʻene fakahā kiate kinautolu ʻa e kiʻi pēpeé.

Fakatatau ki he Lao ʻa e ʻOtuá, naʻe pau ke kamu ha kiʻi pēpē tangata ʻi ʻIsileli ʻi he ʻaho hono valu hili hono fāʻeleʻí. Naʻe ʻaʻahi mai ʻa e ngaahi kaungāmeʻá mo e ngaahi kāingá ʻi he taimi ko iá. Naʻa nau pehē, naʻe totonu ke fakahingoa ʻa e tamasiʻí ki heʻene tamaí, ko Sākalaia. Ka naʻe lea hake ʻa ʻIlisapesi. “ʻOua,” naʻá ne pehē, “ka ʻe ui ia ko Sione.” Manatuʻi, ko e hingoa ia naʻe fakahā ʻe he ʻāngelo ko Kepalelí ʻoku totonu ke uiʻaki ʻa e tamasiʻí.

Kae kehe, naʻe lea fakafepaki ʻa hona ngaahi kaungāmeʻá ʻo nau pehē: “ʻOku ʻikai ha taha ʻi ho kāingá ʻoku hingoa pehē.” Pea ʻi heʻenau ngāueʻaki ʻa e talanoa tuhutuhú, naʻa nau ʻeke ki he tamai ʻa e tamasiʻí pe ʻokú ne loto ke ui ʻa e tamasiʻí ko hai. Pea ʻi he kole ʻa Sākalaia ke ʻomi ha makatohi ke tohi aí, naʻe ʻohovale kotoa ʻi heʻene tohi: “Ko hono hingoá ko Sione.”

Ko ia ai, naʻe toe fakafoki fakaemana mai ʻa e malava ke lea ʻa Sākalaiá. Te ke manatuʻi naʻe mole meiate ia ʻa e malava ke leá ʻi heʻene taʻetui ki he fanongonongo ʻa e ʻāngeló ʻo pehē ʻe fāʻeleʻi ʻe ʻIlisapesi ha tamá. Naʻe ʻohovale ʻaupito ʻa e kakai kotoa naʻe nofo takatakai ʻi he feituʻu ko iá ʻi he toe lea ʻa Sākalaiá pea nau fepehēʻaki: “Ko e hā ha meʻa ʻe hoko ki ai ʻa e tamasiʻi ni?”

Naʻe fonu leva ʻa Sākalaia ʻi he laumālie māʻoniʻoní, peá ne hākailangitau ʻo pehē: “Ha taha ā ke fakamālooʻi, ko Sihova ko e ʻOtua ʻo ʻIsileli! He kuó ne fakahanga mai ʻene tokangá pea fakahoko ʻa hono fakahaofi hono kakaí; mo ne fokotuʻu he hako ʻo Tēvitá, ko ʻene tamaioʻeikí, ha nifo moʻotau fakahaofi.” Ko hono moʻoní, ko e “nifo moʻotau fakahaofi” ko ʻení ko e ʻEiki ko Sīsuú, ʻa ia naʻe teʻeki ʻaloʻi. Fakafou ʻiate ia, naʻe pehē ʻe Sākalaia, ko e ʻOtuá te ne “meʻaʻofaʻaki mai ʻa e meʻa ko ʻení, ʻa e monū ko hono fai taʻeteteki ʻetau ngāue toputapu kiate iá, he kuo hamusi kitautolu mei hotau ngaahi filí, ʻo tau fakafeangai kiate ia ʻaki ʻa e mateaki mo e māʻoniʻoni ʻi he ngaahi ʻaho kotoa pē ʻo ʻetau moʻuí.”

Naʻe toki tala leva ki muʻa ʻe Sākalaia ʻo fekauʻaki mo hono fohá, ko Sione: “Pea ko koe, tamasiʻi, ʻe lau ko e palōfita ʻo e Fungani Māʻolungá, he te ke ʻalu muʻomuʻa ʻia Sihova ke teuteu hono ngaahi halá, ke ʻatu ʻa e ʻilo ʻo e fakamoʻuí ki he kakai ʻaʻaná, ko e fakamolemole ʻenau ngaahi angahalá, ko e meʻa ʻi he ʻaloʻofa ʻa hotau ʻOtuá, ʻa ia ne ʻaʻahi mei ai ʻa e pongipongí mei ʻolunga, ke huluʻaki he nofo he poʻuli mo e malu ʻo maté, mo tataki ki he hala ʻo e melinó hotau vaʻé.”

ʻI he aʻu mai ki he taimi ko ʻení, ko Mele, ʻa ia ʻoku hā mahino naʻe kei hoko ko e fefine teʻeki ai malí, naʻá ne aʻu ki hono ʻapi ʻi Nasaletí. Ko e hā ʻa e meʻa naʻe hoko kiate ia ʻi he hoko ʻo hā mahino ʻokú ne feitamá? Luke 1:​56-80; Livitiko 12:​2, 3.

▪ Ko e hā hono lahi naʻe lahi ange ʻaki ʻe Sione ʻia Sīsuú?

▪ Ko e hā ʻa e ngaahi meʻa naʻe hoko ʻi he ʻaho valu ʻa Sioné?

▪ ʻI he founga fē naʻe fakahanga ai ʻe he ʻOtuá ʻa ʻene tokangá ki heʻene kakaí?

▪ Ko e hā ʻa e ngāue naʻe tala ki muʻa ʻe fai ʻe Sioné?