Vahe 4

Feitama kae Teʻeki Ai Mali

KO E māhina ʻeni hono tolu ʻo e feitama ʻa Melé. Te ke manatuʻi, ʻi he kamakamata ʻo ʻene feitamá naʻá ne ʻaʻahi ʻo nofo mo ʻIlisapesi, ka naʻá ne foki mai ʻeni ki hono kolo ko Nasaletí. Naʻe vave ʻa e hoko ʻo ʻilo ʻe he kakai kotoa ʻi hono koló ʻa e tuʻunga kuó ne ʻi aí. Ko e moʻoni, naʻá ne ʻi ha tuʻunga faingataʻa!

Ko e meʻa naʻá ne ʻai ke kovi ange ʻa e tuʻungá he naʻe fakamaʻu ʻa Mele ke hoko ko e uaifi ʻo e tufunga ko Siosefá. Pea naʻe ʻilo ʻe Mele, fakatatau ki he lao ʻa e ʻOtuá ki ʻIsilelí, naʻe tolomakaʻi ke mate ha fefine naʻe fakamaʻu mo ha tangata ʻe taha ka ne fai loto-fiefai ʻe ia ha fehokotaki fakasino mo ha tangata ʻe taha. Naʻe malava fēfē ke ne fakamatalaʻi kia Siosefa ʻa ʻene feitamá?

ʻOku tau ʻilo pau naʻe vēkeveke ʻa Siosefa ke sio kia Mele he ko e māhina ē ʻe tolu ia naʻe mavahe ai ʻa Melé. ʻOku hā ngali naʻe tala ʻe Mele kia Siosefa ʻa e ongoongó ʻi heʻena fetaulakí. Naʻe feinga mālohi nai ʻa Mele ke ne fakamatalaʻi ko ʻene feitamá naʻe hoko ia fakafou ʻi he laumālie māʻoniʻoni ʻo e ʻOtuá. Ka, hangē ko ia te ke lava ʻo fakakaukau atu ki aí, ko ha meʻa faingataʻa ʻaupito ʻeni ke tui ki ai ʻa Siosefa.

Naʻe ʻiloʻi ʻe Siosefa ko Melé ko e fefine ongoongo lelei. Pea ʻoku hā ngali naʻe ʻofa lahi ʻaupito ʻa Siosefa kiate ia. Ka neongo ʻa e meʻa kotoa pē naʻe taukaveʻi ʻe Melé, naʻe hā ngali naʻe feitama ia ki ha tangata ʻe taha. Kae kehe, naʻe ʻikai ke loto ʻa Siosefa ke tolomakaʻi ia ke mate pe ke fakamaaʻi fakahāhā ia. Ko ia, naʻá ne fakapapauʻi ke veteʻi fakafufū ʻa Mele. ʻI he taimi ko iá, naʻe sio ki he faʻahinga kuo fakamaʻú ʻo hangē kuo ʻosi malí, pea naʻe fiemaʻu ke fai ha vete ke fakangata ʻa e fakamaʻú.

Ki mui maí, lolotonga ʻa e kei fakakaukau ʻa Siosefa ki he ngaahi meʻá ni, naʻá ne mohe. Naʻe hā ha ʻāngelo ʻa Sihova kiate ia ʻi ha misi ʻo ne pehē: “ʻOua naʻá ke teteki ke ʻomi ʻa Mele ko ho uaifí, he ko ia kuó ne tuʻituʻia aí ʻoku mei he laumālie māʻoniʻoní. Pea te ne ʻaloʻi ha tama, pea te ke fakahingoa ko Sīsū, he ko ia ia te ne fakamoʻui hono kakaí mei heʻenau ngaahi angahalá.”

ʻI he ʻā hake ʻa Siosefá, ko ha houngaʻia lahi ē naʻá ne maʻú! Naʻe ʻikai te ne toloi ʻa hono fai ʻa e meʻa naʻe fakahinohinoʻi ʻe he ʻāngeló ke ne faí. Naʻá ne ʻave ʻa Mele ki hono ʻapí. Ko e meʻa fakahāhā ko ʻení, naʻe hangē ko e fai ʻo e malí, ʻo fakahāhā ai kuo mali ʻa Siosefa mo Mele. Ka naʻe ʻikai ke fehokotaki fakasino ʻa Siosefa mo Mele ʻi he kei feitamaʻi ʻe Mele ʻa Sīsuú.

Vakai! Naʻe mei fāʻele ʻa Mele, ka naʻe tuku hake ia ʻe Siosefa ki he ʻasí. Naʻá na ʻalu ki fē, pea ko e hā naʻá na fai ai ha fononga ʻi he teu ʻa Mele ke fāʻelé? Luke 1:​39-41, 56; Mātiu 1:​18-25; Teutalonome 22:​23, 24.

▪ Ko e hā ʻa e anga ʻo e fakakaukau ʻa Siosefa ʻi heʻene ʻilo ki he feitama ʻa Melé, pea ko e hā hono ʻuhingá?

▪ Ko e hā naʻe malava ai ke veteʻi ʻe Siosefa ʻa Mele neongo naʻe teʻeki ai ke na malí?

▪ Ko e hā ʻa e meʻa fakahāhā naʻe hoko ko hono fai ia ʻa e mali ʻa Siosefa mo Melé?