Vahe 34

Fili ʻo ʻEne Kau ʻAposetoló

KO E taʻu nai ʻe taha mo e konga talu mei hono fakafeʻiloaki ʻe Sione Papitaiso ʻa Sīsū ko e Lami ʻa e ʻOtuá pea mo e kamata ʻe Sīsū ʻene ngāue fakafaifekau ki he kakaí. ʻI he taimi ko iá ko ʻAnitelū, Saimone Pita, Sione, pea mahalo mo Sēmisi (ko e tokoua ʻo Sioné), pea pehē foki mo Filipe mo Nataniela (ne toe ui ko Pātolomiú), naʻa nau hoko ko ʻene ʻuluaki kau ākongá. Naʻe faifai atu pē pea naʻe ʻi ai mo e niʻihi kehe tokolahi naʻa nau kau fakataha mo kinautolu ʻi he muimui kia Kalaisí.

ʻI he taimi ko iá naʻe mateuteu ʻa Sīsū ke ne fili ʻene kau ʻaposetoló. Te nau hoko ko hono ngaahi kaungāmeʻa fekoekoeʻi, ʻa ia ʻe akoʻi makehe. Ka ki muʻa ke fili kinautolú, naʻe ʻalu hake ʻa Sīsū ki he moʻungá ʻo ne fakamoleki ha pō kakato ʻi heʻene lotu, ʻo ne kole nai ʻa e poto pea mo e tāpuaki ʻa e ʻOtuá. ʻI he maʻa hake ʻa e ʻahó, naʻá ne ui leva ʻene kau ākongá kotoa peá ne fili mei ai ʻa e toko 12. Kae kehe, koeʻuhi ko ʻenau kei hoko ko e kau ako ʻa Sīsuú, naʻe kei ui ai pē kinautolu ko e kau ākonga.

Ko e toko ono naʻe fili ʻe Sīsuú, ʻa ē ʻoku hā atu honau hingoá ʻi ʻolungá, ko e faʻahinga ia naʻa nau hoko ko ʻene ʻuluaki kau ākongá. Naʻe fili foki ʻa Mātiu, ʻa ia naʻe ui ʻe Sīsū mei hono ʻōfisi tukuhaú. Ko e toko nima kehe naʻe filí ko Siutasi (naʻe toe ui ko Tatiusí), Siutasi ʻIsikaliote, Saimone ko e Kēnaní, Tōmasi, mo Sēmisi ko e foha ʻo ʻAlefiusí. Ko e Sēmisi ko ʻení naʻe toe ui ko Sēmisi ko e Siʻi, mahalo pē koeʻuhi ko ʻene pukupuku ange pe taʻu siʻi ange ʻi he ʻaposetolo ʻe taha ko Sēmisí.

ʻI he aʻu ki he taimi ko ʻení naʻe feohi ai ʻa e toko 12 ko ʻení mo Sīsū ʻi ha vahaʻa taimi, peá ne ʻiloʻi lelei ai kinautolu. Ko hono moʻoní, ko e niʻihi ʻo kinautolu ko hono kāinga pē. ʻOku hā mahino ko Sēmisi mo hono tokoua ko Sioné naʻe tokouaʻaki pē ʻe Sīsū. Pea ʻoku hā ngalingali ko ʻAlefiusí ko e tokoua ʻo Siosefa, ko e tamai ohi ʻa Sīsuú. Ko ia ko e foha ʻo ʻAlefiusi, ʻa e ʻaposetolo ko Sēmisí, naʻe toe tokouaʻaki ʻe Sīsū.

Ko hono moʻoní, naʻe ʻikai ha palopalema kia Sīsū ʻa hono manatuʻi ʻa e hingoa ʻo ʻene kau ʻaposetoló. Ka te ke lava ʻo manatuʻi kinautolu? Sai, manatuʻi pē ʻoku ʻi ai ʻa e toko ua naʻe fakahingoa ko Saimone, toko ua naʻe fakahingoa ko Sēmisi, mo e toko ua naʻe fakahingoa ko Siutasi, ko Saimone ko hono tokouá ko ʻAnitelū, pea ko Sēmisi ko hono tokouá ko Sione. Ko e kī ia ke manatuʻi ʻa e kau ʻaposetolo ʻe toko valu. Ko e toko fā kehé leva ʻoku kau ai ʻa e tangata tānaki tukuhau (ko Mātiu), mo e toko taha naʻe fakataʻetaʻetui ki mui (ko Tōmasi), mo e toko taha naʻe ui mei he lalo ʻakaú (ko Nataniela), pea mo hono kaumeʻa ko Filipé.

Ko e toko hongofulu mā taha ʻo e kau ʻaposetoló ko ʻenau haʻu mei Kāleli, ko e feituʻu ia naʻe haʻu mei ai ʻa Sīsuú. Ko Nataniela naʻe haʻu mei Kena. Naʻe tupu ʻa Filipe, Pita, mo ʻAnitelū mei Petesaita, ka, ki mui aí naʻe hiki ʻa Pita mo ʻAnitelū ki Kāpaneume, ʻa ia ʻoku ngalingali naʻe nofo ai ʻa Mātiu. Ko Sēmisi mo Sione naʻá na ʻi haʻana ngāue fakatoutai pea ʻoku ngalingali naʻá na nofo ʻi Kāpaneume, pe ofi ki ai. ʻOku ngalingali ko Siutasi ʻIsikaliote, ʻa ia naʻá ne lavakiʻi ki mui ʻa Sīsuú, ko e ʻaposetolo pē ia ʻe taha mei Siuteá. Maake 3:​13-19; Luke 6:​12-16.

▪ Ko hai ʻa e kau ʻaposetolo ko e kāinga pē ʻo Sīsuú?

▪ Ko hai ʻa e kau ʻaposetolo ʻa Sīsuú, pea ʻe anga-fēfē ke ke lava ʻo manatuʻi honau hingoá?

▪ Ko fē ʻa e feituʻu naʻe haʻu mei ai ʻa e kau ʻaposetoló?