Vahe 17

Ko Hono Akoʻi ʻo Nikotīmasí

ʻI HE lolotonga ʻo hono maʻu ʻe Sīsū ʻa e Laka-Atu ʻi he 30 T.S., naʻe fai ʻe Sīsū ʻa e ngaahi fakaʻilonga fakaofo, pe ngaahi mana. Ko hono olá, naʻe tui ʻa e tokolahi kiate ia. Ko Nikotīmasí, ko e mēmipa ia ʻo e Sanetalimí, ʻa ia ko e fakamaauʻanga māʻolunga faka-Siú, naʻe maongo kiate ia ʻa e ngaahi meʻá ni pea naʻá ne saiʻia ke ako ha meʻa lahi ange. Ko ia naʻá ne ʻaʻahi kia Sīsū ʻi he taimi poʻulí, mahalo naʻá ne ilifia naʻa maumau ʻa hono ongoongo mo e kau taki Siu kehé ʻo kapau ʻe sio ha taha kiate ia.

“Lāpai,” naʻá ne pehē, “ʻoku mau ʻilo kuó ke hoko mai mei he ʻOtuá ko hamau faiako; he talaʻehai ʻe lava ʻe ha tokotaha ha ngaahi fuʻu mana pehē, hangē ko ia ʻokú ke faí, ka ʻi he kau mo ia ʻa e ʻOtuá.” ʻI hono talí, naʻe tala ʻe Sīsū kia Nikotīmasi ʻo pehē ke lava ʻo hū ki he Puleʻanga ʻo e ʻOtuá, kuo pau ke “fanauʻi foʻou” ha taha.

Ka, ʻoku malava fēfē ke fanauʻi foʻou ha taha? “Te ne lava koā ke toe hū ki he mānava ʻo ʻene faʻeé, ʻo fanauʻi?” ko e ʻeke ia ʻa Nikotīmasí.

ʻIkai, ʻoku ʻikai ko e ʻuhinga ia ʻo e fanauʻi foʻoú. “Kapau ʻe ʻikai fanauʻi ha taha ʻi he vaí mo e laumālié,” ko e fakamatala ia ʻa Sīsuú, “ʻe ʻikai te ne lava ke hū ki he Puleʻanga ʻo e ʻOtuá.” ʻI he papitaiso ʻo Sīsuú pea ʻalu hifo ʻa e laumālie māʻoniʻoní kiate iá, naʻe toki fanauʻi ai ia “ʻi he vai mo e laumālie.” Naʻe talaki ʻe he ʻOtuá naʻá ne fakahoko mai ha foha fakalaumālie ʻokú ne maʻu ʻa e ʻamanaki ke hū ki he Puleʻanga fakahēvaní, ʻaki ʻa e fanongonongo naʻe fai mei hēvani ʻo pehē, ‘Ko hoku ʻAló ʻena, ʻa ia kuó u hōifua aí.’ Ki mui mai, ʻi he Penitekosi ʻo e 33 T.S., ko e faʻahinga kehe naʻe papitaisó naʻa nau maʻu ʻa e laumālie māʻoniʻoní pea ko ia ai naʻe fanauʻi foʻou foki ai kinautolu ʻo hoko ko e ngaahi foha fakalaumālie ʻo e ʻOtuá.

Ka ʻoku mātuʻaki mahuʻinga ʻa e ngafa ʻo e ʻAlo fakaetangata makehe ʻo e ʻOtuá. “Hangē naʻe hiki ki ʻolunga ʻe Mōsese ʻa e ngata ʻi he toafá,” ko e lea ia ʻa Sīsū kia Nikotīmasí, “pehē foki kuo pau ke hiki ki ʻolunga ʻa e Fanautama ʻa Tangatá, koeʻuhi ko ia kotoa pē ʻoku tuí ke ne maʻu ʻiate ia ʻa e moʻui taʻengatá.” ʻIo, ʻo hangē pē ko ia naʻe pau ke sio ʻa e kau ʻIsileli naʻe uʻu ʻe he fanga ngata koná ki he ngata palasá kae fakahaofi kinautolú, ko ia ʻoku fiemaʻu ki he kakai kotoa pē ke nau ngāueʻi ʻa e tui ki he ʻAlo ʻo e ʻOtuá kae fakahaofi kinautolu mei honau tuʻunga ko e fakaʻau ki he maté.

ʻI hono fakamamafaʻi ʻe Sīsū ʻa e tafaʻaki anga-ʻofa ʻa Sihova ʻi he meʻá ni, naʻá ne toki tala kia Nikotīmasi: “He naʻe ʻofa pehē ʻa e ʻOtuá ki māmani, ko ia naʻá ne foaki hono ʻAlo tofu-pē-taha-ne-fakatupú, koeʻuhi ko ia kotoa pē ʻoku tui pīkitai kiate iá ke ʻoua naʻa ʻauha, kae maʻu ʻa e moʻui taʻengatá.” Ko ia ai, ʻi heni ʻi Selusalemá, ʻi he hili ʻa e māhina pē ʻe ono mei he kamata ʻo ʻene ngāue fakafaifekaú, naʻe ʻai ʻe Sīsū ke hā mahino ko ia ʻa e founga ʻoku ngāueʻaki ʻe he ʻOtua ko Sihová ke fakahaofi ʻa e faʻahinga ʻo e tangatá.

Naʻe hoko atu ʻe Sīsū ʻo ne fakamatala lahi ange kia Nikotīmasi: “He talaʻehai naʻe fekau ʻe he ʻOtuá ʻa e ʻAló ki māmani ke fakamāua ʻa māmani,” ko hono ʻuhingá ke ʻoua ʻe fai ha fakamaau tamaki pe fakahalaiaʻi ia, ʻo tautea ʻa e faʻahinga ʻo e tangatá ki he fakaʻauha. Ka, ʻoku hangē ko ia naʻe leaʻaki ʻe Sīsuú, naʻe fekau mai iá “koeʻuhi ke moʻui ʻa māmani ʻiate ia.”

Naʻe haʻu ilifia ʻa Nikotīmasi kia Sīsū ʻi he taimi poʻulí. Ko ia ko e meʻa fakatupu tokanga ʻa hono fakaʻosi ʻe Sīsū ʻa ʻena fetalanoaʻakí ʻaki ʻa e pehē: “Pea ko ʻeni ia ʻa e fakamāú, kuo hoko mai ʻa e maama [ʻa ia naʻe fakahāhā fakaʻaufuli ʻe Sīsū ʻi heʻene founga moʻuí pea mo ʻene ngaahi akonakí] ki māmani, pea ʻofa ʻa e kakaí ki he poʻulí ʻo ʻikai ki he maamá, he ko ʻenau ngaahi ngāué naʻe kovi. He ʻilonga ʻa ia ʻoku ngāue koví ʻokú ne fehiʻa ki he maamá, pea ʻoku ʻikai te ne haʻu ki he maamá, naʻa ʻilonga ʻene ngaahi ngāué. Ka ko ia ʻokú ne feia ʻa e moʻoní ʻokú ne haʻu ki he maamá, koeʻuhi ke eʻa ʻene ngaahi ngāué, he kuo fai ia ʻo fetāiaki mo e ʻOtuá.” Sione 2:​23–3:21; Mātiu 3:​16, 17; Ngāue 2:​1-4; Nomipa 21:9.

▪ Ko e hā ʻa e meʻa naʻá ne ueʻi ʻa Nikotīmasi ke ne fai ha ʻaʻahí, pea ko e hā ʻa e ʻuhinga naʻá ne haʻu ai ʻi he taimi poʻulí?

▪ ʻOku ʻuhinga ki he hā ʻa e “fanauʻi foʻoú”?

▪ Naʻe fakahaaʻi fēfē ʻe Sīsū ʻa hono ngafa fekauʻaki mo hotau fakahaofí?

▪ Ko e hā ʻa e ʻuhinga ʻo e pehē naʻe ʻikai ke haʻu ʻa Sīsū ke fakamāuʻi ʻa māmani?