Vahe 19

Ko Hono Akoʻi ha Fefine Samēlia

ʻI HE fononga ʻa Sīsū mo ʻene kau ākongá mei Siutea ki Kālelí, naʻa nau fou ʻi he vahefonua ʻo Samēliá. Naʻa nau helaʻia ʻi he fonongá, pea ʻi he hoʻataá nai naʻa nau mālōlō ʻi he veʻe vaikeli he kolo ko Saika. Ko e vaikeli ko ʻení naʻe keli ʻe Sēkope ʻi he ngaahi senituli ki muʻá, pea ʻoku kei tuʻu pē ia ʻo aʻu mai ki he ʻahó ni, ʻo ofi ki he kolo he lolotongá ni ko Nablus.

ʻI he lolotonga ʻa e mālōlō ʻa Sīsū hení, naʻe ʻalu ʻene kau ākongá ki he koló ke fakatau meʻakai. ʻI he haʻu ha fefine Samēlia ke ʻutu vai, naʻe kole ʻa Sīsū ki ai: “ʻĒ, ʻomai siʻaku inu.”

Naʻe ʻikai ke faʻa feangainga ʻa e kau Siú mo e kau Samēliá koeʻuhi ko ha loto-fehiʻa naʻe tongiloto ai. Ko ia, naʻe ʻohovale ʻa e fefiné, ʻo ne ʻeke: “Ko e toe tala inu hā ē kiate au, ka ko e Siu koe, pea ko e fefine Samēlia kita?”

“Ka ne ke ilo,” ko e tali ia ʻa Sīsuú, “pe ko hai ia ʻokú ne pehē atu, ‘ʻOmi haku inú,’ pehē ko koe ne ke fai ʻa e kole kiate iá, pea kuó ne ʻatu ha vai moʻui.”

“Tangataʻeiki,” ko e tali mai ia ʻa e fefiné, “ʻoku ʻikai haʻo meʻa ke ʻutuʻaki, pea ʻoku loloto ʻa e luó. Pea mei fē ai hoʻo maʻu ʻa e vai moʻuí na? He ko e lahi koā koe ʻi heʻetau kui ko Sēkopé, ʻa ia naʻá ne tuku mai kiate kimautolu ʻa e vaí ni, pea naʻe inu mei ai ʻe ia, mo hono ngaahi fohá, pea mo ʻene fanga manú?”

“Ko ia kotoa pē ʻoku inu mei he vai ko ʻená te ne toe fieinua,” ko e lea ange ia ʻa Sīsuú. “Ka ʻilonga ʻa ia te ne inu mei he vai te u ʻoatu ʻe aú, ʻe ʻikai ʻaupito te ne toe fieinua ʻo taʻengata, ka ko e vai te u ʻatu kiate ia ʻe aú te ne tupu ʻi loto ʻi he tokotaha ko iá, ko e matavai mapunopuna hake, ʻo iku ki he moʻui taʻengata.”

“Tangataʻeiki, foaki mai ʻa e vai ko iá kiate au, koeʻuhi ke ʻoua naʻá ku fieinua, pe ongosia mai ki heni ke ʻutu vai,” ko e tali mai ia ʻa e fefiné.

Naʻe toki pehē ʻe Sīsū kiate ia: “ʻAlu ʻo ui mai ho husepānití, pea haʻu ki heni.”

“ʻOku ʻikai siʻaku husepāniti,” ko e tali ia ʻa e fefiné.

Naʻe fakapapauʻi ʻe Sīsū ʻa e lea ʻa e fefiné. “ʻOku moʻoni pē hoʻo leá na, ‘ʻOku ʻikai te u maʻu husepāniti.’ He naʻá ke maʻu ha husepāniti ʻe toko nima, pea ko e tangata ʻokú ke maʻú ni ʻoku ʻikai ko ho husepāniti.”

“Tangataʻeiki, tā ʻoku ou vakai ko e palōfita koe,” ko e lea ia ʻa e fefiné ʻi heʻene ʻohovalé. ʻI hono fakahaaʻi ʻe he fefiné ʻa ʻene mahuʻingaʻia ʻi he ngaahi meʻa fakalaumālié, naʻá ne fakahaaʻi ai ko e kau Samēliá “naʻa nau fai ʻenau lotú ʻi he moʻungá ni [Kelisimi, ʻa ia naʻe tuʻu ʻo ofi ai]; ka ko kimoutolu [ko e kau Siú] ʻoku mou pehē, ko Selusalema pē ʻa e potu ʻoku totonu ke fai ai ʻa e lotú.”

Kae kehe, naʻe fakahā ʻe Sīsū ko e feituʻu ʻoku fai ai ʻa e lotú ʻoku ʻikai ko e meʻa mahuʻingá ia. “Ka ʻoku ʻunu mai ha taimi,” ko ʻene leá ia, “ʻa ia ko e kakai ʻoku lotu moʻoní te nau fai ʻi he laumālie mo fai ʻi he moʻoni ʻenau lotu ki he Tamaí, he ko e Tamaí foki ʻokú ne kumi ʻa e faʻahinga ko iá, ʻa kinautolu ʻoku mātuʻaki lotu kiate iá. Ko e ʻOtuá ko e Laumālie, pea ko kinautolu ʻe hū kiate iá, kuo pau ke nau fai ʻi he laumālie pea fai ʻi he moʻoni ʻenau huú.”

Naʻe maongo ʻaupito ia ki he fefiné. “ʻOku ou ʻilo ʻoku haʻu ʻa e Mīsaiá, ʻa ia ʻoku ui ko Kalaisi,” ko ʻene leá ia. “Ka toki haʻu ʻa e tokotaha ko iá te ne fakahā kiate kimautolu ʻa e meʻa kotoa pē kotoa pē.”

“Ko au ia ʻoku lea kiate koé,” ko e lea ia ʻa Sīsuú. Fakakaukau ange ki aí! Ko e fefiné ni ʻa ia naʻá ne haʻu he hoʻatā mālié ke fai ʻene ʻutu vaí, mahalo ʻi he feinga ke fakaʻehiʻehi mei heʻene sio ki he kau fefine ʻo e koló ʻa ia naʻa nau taʻetokaʻi ia koeʻuhi ko ʻene tōʻonga moʻuí, kuo tali lelei ia ʻe Sīsū ʻi he founga fakaofo. ʻI he lea hangatonu atu pē ki ai naʻe tala ange ʻe Sīsū ʻa e meʻa naʻe ʻikai te ne tala fakahāhā ki ha taha kehe. Pea ko e hā ʻa e ngaahi ola ʻo ʻení?

Naʻe Tui ʻa e Kau Samēlia Tokolahi

ʻI he foki ʻa e kau ākongá mei Saika mo e meʻakaí, naʻa nau ʻilo ʻa Sīsū ʻi he veʻe vaikeli ʻo Sēkopé ʻa ia ko e feituʻu ia naʻá ne ʻi ai ʻi heʻenau ʻalú, pea naʻá ne kei talanoa ai mo ha fefine Samēlia. ʻI he aʻu mai ʻa e kau ākongá, naʻe mavahe ʻa e fefiné ʻo ne tuku ʻene siā vaí peá ne ʻalu ki he koló.

ʻI heʻene mahuʻingaʻia lahi ʻaupito ʻi he ngaahi meʻa naʻe tala ange ʻe Sīsū kiate iá, naʻá ne pehē ki he kau tangata ʻi he koló: “Ōmai angé, ʻo mamata ki he tangata kuó ne tala mai ʻa e meʻa kotoa kuó u faí.” Pea naʻá ne toki ʻeke ʻi ha founga fakatupu fieʻilo: “ʻOku ʻikai nai ko e Mīsaia ʻeni, ʻe?” Naʻe fakahoko ʻe he fehuʻí ʻa hono taumuʻá​—naʻe ʻalu ʻa e kau tangatá ke nau fakamoʻoniʻi ʻe kinautolu tonu.

Lolotonga iá, naʻe vili ʻa e kau ākongá kia Sīsū ke ne kai ʻa e meʻakai naʻa nau ʻomi mei he koló. Ka naʻá ne tali ange: “ʻOku ai ʻeku kai ʻoku ʻikai te mou ʻilo ki ai.”

“Ka talaʻehai kuo ʻomai ʻe ha taha haʻane meʻakai, ʻinē?” ko e feʻekeʻaki ia ʻa e kau ākongá. Naʻe fakamatala ange ʻe Sīsū kiate kinautolu: “Ko ʻeku meʻakaí ē, ko e tuli ke fai ʻa e finangalo ʻo ia naʻá ne fekau mai aú, pea ke fakaʻosi haʻaná ngāue. ʻIkai ʻoku mou lau, ʻOku toe fā ʻa e māhiná, pea hoko ʻa e ututaʻú?” Kae kehe, ʻi he fakahanga ʻe Sīsū ʻa e tokangá ki he utu-taʻu fakalaumālié, naʻe pehē ʻe Sīsū: “Mou hanga hake muʻa ki he ngaahi ngoué na, vakai, kuo fisi hina ia ki he ututaʻú. Pea naʻa mo e taimí ni ʻoku maʻu totongi ʻe ia ʻoku utú, kaeʻumaʻā ʻokú ne tānaki fua ki he moʻui taʻengatá, koeʻuhi ke fiefia fakataha, ʻe ia naʻe toó, mo ia naʻe utú.”

Naʻe ʻosi malava nai ke sio ʻa Sīsū ki he ola maʻongoʻonga ʻo ʻene fetalanoaʻaki mo e fefine Samēliá​—he ko e tokolahi naʻa nau kamata ke nau tui kiate ia koeʻuhi ko e fakamatala ʻa e fefiné. Naʻe fai ha fakamoʻoni ʻe he fefiné ki he kakai ʻo e koló, ʻo ne pehē: “Kuó ne tala mai ʻa e meʻa kotoa pē ne u faí.” Ko ia ai, ʻi he haʻu ʻa e kau tangata mei Saiká kiate ia ki he vaikelí, naʻa nau kole kia Sīsū ke ne nofo mo kinautolu ʻo talanoa lahi ange kiate kinautolu. Naʻe tali ʻe Sīsū ʻa e fakaafe ko ʻení ʻo ne nofo ʻi he ʻaho ʻe ua.

ʻI he fanongo ʻa e kau Samēliá kia Sīsuú, naʻe tui ai ʻa e tokolahi. Pea naʻa nau toki pehē ki he fefiné: “ʻOku ʻikai te mau kei tui koeʻuhi pē ko hoʻo talanoa naʻe faí; he kuo mau fanongo tonu ki ai ʻe kimautolu, pea ʻoku mau ʻilo, ko ʻeni moʻoni ia ʻa e Fakamoʻui ʻo māmaní.” ʻOku pau naʻe fokotuʻu ʻe he fefine Samēliá ha faʻifaʻitakiʻanga lelei ʻo kau ki he founga ʻoku malava ke tau fai fakamoʻoni ai ʻo kau kia Kalaisí ʻaki hono fakatupu ʻa e fieʻilo kae fai ʻe he kau fanongó ha fekumi lahi ange!

Manatuʻi ko e māhina ia ʻe fā ki muʻa ʻi he utu taʻú​—ʻoku ngalingali ko e utu taʻu ʻo e paʻalé, ʻa ia naʻe hoko ʻi he faʻahitaʻu failau ʻi Palesitainé. Ko e māhina Nōvemá pe Tīsemá nai ia. ʻOku ʻuhinga ʻení, naʻe nofo ʻa Sīsū mo ʻene kau ākongá he māhina ʻe valu nai ʻi Siutea ʻi he hili ʻa e Laka-Atu ʻo e 30 T.S., ʻo nau faiako ai mo fai ʻa e papitaiso. Naʻa nau toki mavahe leva ki he vahefonua naʻa nau tupu aí ko Kāleli. Ko e hā ʻa e meʻa naʻe fakatatali mai kiate kinautolu ʻi aí? Sione 4:​3-43.

▪ Ko e hā naʻe ʻohovale ai ʻa e fefine Samēliá ʻi he lea ange ki ai ʻa Sīsuú?

▪ Ko e hā naʻe akoʻi ki ai ʻe Sīsū ʻo fekauʻaki mo e vai moʻuí pea mo e feituʻu ke fai ai ʻa e lotú?

▪ Naʻe fakahaaʻi fēfē ʻe Sīsū ki he fefiné pe ko hai ia, pea ko e hā naʻe fakaofo lahi ai ʻa e meʻá ni?

▪ Ko e hā ʻa e ngāue fakamoʻoni naʻe fai ʻe he fefine Samēliá, pea ko e hā ʻa e olá?

▪ Ko e hā ʻa e felāveʻi ʻa e meʻakai ʻa Sīsuú ki he utu-taʻú?

▪ ʻI he founga fē ʻoku malava ai ke tau ʻilo ʻa e fuoloa ʻo e ngāue fakafaifekau ʻa Sīsū ʻi Siuteá ʻi he hili ʻa e Laka-Atu ʻo e 30 T.S.?