Vahe 56

Ko e Hā ʻOkú Ne ʻUliʻi ha Tangatá?

NAʻE fakaʻau ke mālohi ange ʻa e fakafepaki kia Sīsuú. Naʻe ʻikai ke ngata pē ʻi he mavahe ʻa e tokolahi ʻo ʻene kau ākongá ka naʻe kumi ʻa e kau Siu ʻi Siuteá ke tāmateʻi ia, ʻo hangē pē ko ia naʻa nau fai ʻi heʻene ʻi Selusalema he lolotonga ʻa e Laka-Atu ʻo e 31 T.S.

Ko e Laka-Atu leva ʻeni ʻo e 32 T.S. Ngalingali, ʻi he fakatatau ki he fiemaʻu ʻa e ʻOtuá ke maʻu iá, naʻe ʻalu ai ʻa Sīsū ki he Laka-Atu ʻi Selusalemá. Kae kehe, naʻá ne fai ia ʻi he mātuʻaki tokanga koeʻuhi naʻe ʻi he tuʻunga fakatuʻutāmaki ʻa ʻene moʻuí. ʻI he hili pē iá naʻá ne foki ki Kāleli.

Naʻe ʻi Kāpaneume nai ʻa Sīsū ʻi he taimi naʻe haʻu ai kiate ia ʻa e kau Fālesi mo e kau sikalaipe mei Selusalemá. Naʻa nau kumi ki ha ngaahi ʻuhinga ke tukuakiʻi ai ia ki he maumauʻi ʻa e lao fakalotú. “Ko e hā ʻoku laka kehe ai ʻa hoʻo kau ākongá pea mo e lau ʻa e mātuʻá?” ko ʻenau fehuʻí ia. “He ʻoku ʻikai te nau fanofano honau nimá ʻi heʻenau nofo ke kaí.” ʻOku ʻikai ko ha meʻa ʻeni ia naʻe fiemaʻu ʻe he ʻOtuá, ka naʻe lau ʻe he kau Fālesí ia ko ha faihala mamafa ʻa e ʻikai ke fakahoko ʻa e ouau fakaetalatukufakaholo ko ʻení, ʻa ia naʻe kau ai ʻa e fanofano ke aʻu hake ki he tuiʻinimá.

ʻI he ʻikai ke fai ha tali kiate kinautolu ʻo fekauʻaki mo ʻenau tukuakiʻí, naʻe tuhu ʻa Sīsū ia ki heʻenau anga-fulikivanú mo hono maumauʻi loto-lelei pē ʻo e Lao ʻa e ʻOtuá. “Ko e hā ʻoku mou laka kehe ai foki kimoutolu pea mo e lao ʻa e ʻOtuá, koeʻuhi ko e lau fakaeonoʻaho ʻamoutolú?” naʻá ne fieʻilo ki ai. “He ko e tuʻutuʻuni ʻa e ʻOtuá naʻe pehē, ‘Fakaʻapaʻapa ki hoʻo tamaí mo hoʻo faʻeé’; mo ʻeni, ‘Ko ia te ne lea kovi ki heʻene tamaí pe ko ʻene faʻeé, ke ne mate tāmateʻi.’ Ka ʻoku mou pehē, ‘ʻIlonga ʻa ia te ne pehē ki heʻene tamaí pe ko ʻene faʻeé: “ʻA kuo tuku ki he ngāue ʻa e ʻOtuá ʻa e meʻa naʻá ku mei ʻaonga ai kiate koé,” pea ʻe ʻikai leva te ne fai ʻene fakaʻapaʻapa ki heʻene tamaí.’”

Ko e moʻoni, naʻe akoʻi ʻe he kau Fālesí ʻo pehē ko e paʻangá, koloá, pe ko ha meʻa pē naʻe fakatapui ko ha meʻaʻofa ki he ʻOtuá, naʻe ʻo e temipalé ia pea heʻikai lava ke ngāueʻaki ia ki ha toe taumuʻa kehe. Ka, ko hono moʻoní, ko e meʻaʻofa naʻe fakatapuí naʻe tauhi pē ia ʻe he tokotaha naʻá ne fakatapui iá. ʻI he foungá ni, ko ha foha, ʻi heʻene pehē pē ko ʻene paʻangá pe koloá kuo “kōpano”​—ko ha meʻaʻofa kuo fakatapui ki he ʻOtuá pe ki he temipalé​—ʻoku kalo ai ia mei hono fatongia ko e tokoni ki heʻene ongo mātuʻa kuo taʻumotuʻá, ʻa ia ʻokú na ʻi ha ngaahi tuʻunga faingataʻaʻia nai.

ʻI he loto-mamahi totonu ʻi hono mioʻi anga-fulikivanu ʻe he kau Fālesí ʻa e Lao ʻa e ʻOtuá, naʻe pehē ʻe Sīsū: “Kuo mou fakataʻeʻaongaʻi ʻa e lao ʻa e ʻOtuá ʻaki hoʻomou lau fakaeonoʻahó. ʻA e kau mālualoi, ʻe halaā ʻa e palofisai ʻa ʻAiseá ʻiate kimoutolu, ʻo pehē, ‘Ko e kakaí ni ʻoku nau fakaʻapaʻapa kiate au ʻaki honau loungutú, ka ko honau lotó ʻoku fakamamaʻo. Ka ko e kula noa ʻenau lotu maí, ʻoku nau ako ʻaki ha ngaahi tokāteline ʻa ia ko e ngaahi tuʻutuʻuni pē ʻa e tangata.’”

Mahalo naʻe holomui ʻa e kakaí kae fakaʻatā ʻa e kau Fālesí ke nau fakafehuʻi ʻa Sīsū. Ka, ʻi he ʻikai ke ʻi ai ha tali ʻa e kau Fālesí ki he valokiʻi mālohi ʻe Sīsū kinautolú, naʻá ne ui ʻa e kakaí ke nau fakaofi mai. “Fanongo mai,” ko ʻene leá ia, “ka mou ʻilo. ʻOku ʻikai ko e meʻa ʻoku hū ki he ngutú ʻoku ʻuli ai ha tangatá; ka ko ia ʻoku hū mei he ngutú, ko eni ia ʻoku ʻuli ai ʻa e tangatá.”

Ki mui ai, ʻi heʻenau hū ki ha fale, naʻe ʻeke ʻe heʻene kau ākongá: “ʻOkú ke meaʻi naʻe tūkia ai ʻa e kau Fālesí, ʻi heʻenau fanongo ki he leá na?”

“ʻIlonga ha tō ʻakau ʻa ia naʻe ʻikai ko e fai ʻe heʻeku Tamai ʻoku ʻi he langí, ʻe taʻaki fuʻu ia,” ko e tali ia ʻa Sīsuú. “Tuku ai pē ā kinautolu. Ko e koto takimuʻa kui kinautolu. Pea ka taki ʻe he kui ʻa e kui, te na fakatou tō ki ha luo.”

Naʻe hā ngali ʻohovale ʻa Sīsū, ʻi he kole ʻa Pita, maʻá e kau ākongá, ki ha fakamahino fekauʻaki mo e meʻa ʻoku ʻuli ai ha tangatá. “ʻOku kei taʻeʻilo mo kimoutolu foki?” ko e tali ia ʻa Sīsuú. “Kuo teʻeki koā ke mahino atu ka ʻilonga ha meʻa ʻoku hū ki he ngutú ʻoku mole ia ki he keté pea toki laku atu ki tuaʻā? Ka ko e ngaahi meʻa ʻoku hū mei he ngutú ʻoku mei he lotó, pea ko ʻena pē meʻa ʻoku ʻuli ai ʻa e tangatá. He ʻoku mei he lotó ʻa e ngaahi fakakaukau pango, ʻa e ngaahi fakapō, ʻa e ngaahi tono, ʻa e ngaahi feʻauaki, ʻa e ngaahi kaihaʻa, ʻa e ngaahi tukuakiʻi loi, ʻa e ngaahi laukovi ki he ʻOtuá. Ko eni ʻa e ngaahi meʻa ʻoku ʻuli ai ha tangata; ka ko e kai taʻefanofanó ʻoku ʻikai ʻuli ai ʻa e tangatá.”

Naʻe ʻikai ke fakalotosiʻiʻi heni ʻe Sīsū ia ʻa e tuʻunga haisini totonú. Naʻe ʻikai ko ʻene fakakikihiʻi ia ʻe ia ʻo pehē ʻoku ʻikai fiemaʻu pau ki ha taha ia ke ne fanofano hono nimá ki muʻa pea toki teuteu pe kai ha meʻakai. Ka, naʻe fakahalaʻi ʻe Sīsū ia ʻa e mālualoi ʻa e kau taki lotu ko ia naʻa nau feinga femamioaki holo ke haʻohaʻo takai ʻa e ngaahi lao māʻoniʻoni ʻa e ʻOtuá ʻaki hono kounaʻi atu ʻa e ngaahi talatukufakaholo taʻefakatohitapú. ʻIo, ko e ngaahi ngāue fulikivanú ia ʻoku ʻuli ai ha tangatá, pea naʻe fakahaaʻi ʻe Sīsū ʻoku tupu ʻa e ngaahi meʻa ko iá ʻi ha loto ʻo ha taha. Sione 7:1; Teutalonome 16:16; Mātiu 15:​1-20; Maake 7:​1-23; Ekisoto 20:12; 21:17; Aisea 29:13.

▪ Ko e hā ʻa e fakafepaki naʻe fehangahangai leva mo Sīsuú?

▪ Ko e hā ʻa e tukuakiʻi naʻe fai ʻe he kau Fālesí, kae fakatatau kia Sīsū, naʻe anga-fēfē ʻa hono maumauʻi loto-lelei pē ʻe he kau Fālesí ʻa e Lao ʻa e ʻOtuá?

▪ Ko e hā naʻe fakahā ʻe Sīsū ko e ngaahi meʻa ia ʻoku ʻuli ai ha tangatá?